໖. ສຸມນພຸທ຺ຘວໍໂສ

໑. ມງ຺ຄລສ຺ສ ອປເຣນ, ສຸມໂນ ນາມ ນາຍໂກ;

ສພ຺ພຘມ຺ເມຫິ ອສໂມ, ສພ຺ພສຕ຺ຕານມຸຕ຺ຕໂມ.

໒. ຕທາ ອມຕເຠຣິໍ ໂສ, ອາຫນີ ເມຂເລ ປຸເຣ;

ຘມ຺ມສງ຺ຂສມາຍຸຕ຺ຕໍ, ນວງ຺ຄໍ ຊິນສາສນໍ.

໓. ນິຊ຺ຊິນິຕ຺ວາ ກິເລເສ ໂສ, ປຕ຺ວາ ສມ຺ໂພຘິມຸຕ຺ຕມໍ;

ມາເປສິ ນຄຣໍ ສຕ຺ຖາ, ສທ຺ຘມ຺ມປຸຣວຣຸຕ຺ຕມໍ.

໔. ນິຣນ຺ຕຣໍ ອກຸຏິລໍ, ອຸຊຸໍ ວິປຸລວິຕ຺ຖຕໍ;

ມາເປສິ ໂສ ມຫາວີຖິໍ, ສຕິປຏ຺ຐານວຣຸຕ຺ຕມໍ.

໕. ຜເລ ຈຕ຺ຕາຣິ ສາມຎ຺ເຎ, ຈຕສ຺ໂສ ປຏິສມ຺ຠິທາ;

ຉຬຠິຎ຺ຎາຏ຺ຐສມາປຕ຺ຕີ, ປສາເຣສິ ຕຕ຺ຖ ວີຖິຍໍ.

໖. ເຍ ອປ຺ປມຕ຺ຕາ ອຂິລາ, ຫິຣິວີຣິເຍຫຸປາຄຕາ;

ເຕ ເຕ ອິເມ ຄຸຓວເຣ, ອາທິຍນ຺ຕິ ຍຖາ ສຸຂໍ.

໗. ເອວເມເຕນ ໂຍເຄນ, ອຸທ຺ຘຣນ຺ໂຕ ມຫາຊນໍ;

ໂພເຘສິ ປຐມໍ ສຕ຺ຖາ, ໂກຏິສຕສຫສ຺ສິໂຍ.

໘. ຍມ຺ຫິ ກາເລ ມຫາວີໂຣ, ໂອວທີ ຕິຕ຺ຖິເຍ ຄເຓ;

ໂກຏິສຫສ຺ສາຠິສມິໍສຸ [ໂກຏິສຕສຫສ຺ສານິ (ສ຺ຍາ. ກໍ.), ໂກຏິສຕສຫສ຺ສານໍ (ກ.)], ທຸຕິເຍ ຘມ຺ມເທສເນ.

໙. ຍທາ ເທວາ ມນຸສ຺ສາ ຈ, ສມຄ຺ຄາ ເອກມານສາ;

ນິໂຣຘປຎ຺ຫໍ ປຸຈ຺ຉິໍສຸ, ສໍສຍຎ຺ຈາປິ ມານສໍ.

໑໐. ຕທາປິ ຘມ຺ມເທສເນ, ນິໂຣຘປຣິທີປເນ;

ນວຸຕິໂກຏິສຫສ຺ສານໍ, ຕຕິຍາຠິສມໂຍ ອຫຸ.

໑໑. ສນ຺ນິປາຕາ ຕໂຍ ອາສຸໍ, ສຸມນສ຺ສ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໑໒. ວສ຺ສໍວຸຕ຺ຖສ຺ສ ຠຄວໂຕ, ອຠິຆຸຏ຺ເຐ ປວາຣເຓ;

ໂກຏິສຕສຫສ຺ເສຫິ, ປວາເຣສິ ຕຖາຄໂຕ.

໑໓. ຕໂຕປຣໍ ສນ຺ນິປາເຕ, ວິມເລ ກຎ຺ຈນປພ຺ພເຕ;

ນວຸຕິໂກຏິສຫສ຺ສານໍ, ທຸຕິໂຍ ອາສິ ສມາຄໂມ.

໑໔. ຍທາ ສກ຺ໂກ ເທວຣາຊາ, ພຸທ຺ຘທສ຺ສນຸປາຄມິ;

ອສີຕິໂກຏິສຫສ຺ສານໍ, ຕຕິໂຍ ອາສິ ສມາຄໂມ.

໑໕. ອຫໍ ເຕນ ສມເຍນ, ນາຄຣາຊາ ມຫິທ຺ຘິໂກ;

ອຕຸໂລ ນາມ ນາເມນ, ອຸສ຺ສນ຺ນກຸສລສຎ຺ຈໂຍ.

໑໖. ຕທາຫໍ ນາຄຠາວນາ, ນິກ຺ຂມິຕ຺ວາ ສຎາຕິຠິ;

ນາຄານໍ ທິພ຺ພຕຸຣິເຍຫິ, ສສງ຺ຆໍ ຊິນມຸປຏ຺ຐຫິໍ.

໑໗. ໂກຏິສຕສຫສ຺ສານໍ, ອນ຺ນປາເນນ ຕປ຺ປຍິໍ;

ປຈ຺ເຈກທຸສ຺ສຍຸຄໍ ທຕ຺ວາ, ສຣຓໍ ຕມຸປາຄມິໍ.

໑໘. ໂສປິ ມໍ ພຸທ຺ໂຘ ພ຺ຍາກາສິ, ສຸມໂນ ໂລກນາຍໂກ;

‘‘ອປຣິເມຍ຺ຍິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໙. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໒໐. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໒໑. ນຄຣໍ ເມຂລໍ ນາມ [ເມຂລໍ ນາມ ນຄຣໍ (ສີ. ສ຺ຍາ.)], ສຸທຕ຺ໂຕ ນາມ ຂຕ຺ຕິໂຍ;

ສິຣິມາ ນາມ ຊນິກາ, ສຸມນສ຺ສ ມເຫສິໂນ.

໒໒. ນວວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ຈນ຺ໂທ ສຸຈນ຺ໂທ ວຏໍໂສ ຈ, ຕໂຍ ປາສາທມຸຕ຺ຕມາ.

໒໓. ເຕສຏ຺ຐິສຕສຫສ຺ສານິ, ນາຣິໂຍ ສມລງ຺ກຕາ;

ວຏໍສິກາ ນາມ ນາຣີ, ອນູປໂມ ນາມ ອຕ຺ຣໂຊ.

໒໔. ນິມິຕ຺ເຕ ຈຕຸໂຣ ທິສ຺ວາ, ຫຕ຺ຖິຍາເນນ ນິກ຺ຂມິ;

ອນູນທສມາສານິ, ປຘານໍ ປທຫີ ຊິໂນ.

໒໕. ພ຺ຣຫ຺ມຸນາ ຍາຈິໂຕ ສນ຺ໂຕ, ສຸມໂນ ໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ເມຂເລ ປຸຣມຸຕ຺ຕເມ.

໒໖. ສຣໂຓ ຠາວິຕຕ຺ໂຕ ຈ, ອເຫສຸໍ ອຄ຺ຄສາວກາ;

ອຸເທໂນ ນາມຸປຏ຺ຐາໂກ, ສຸມນສ຺ສ ມເຫສິໂນ.

໒໗. ໂສຓາ ຈ ອຸປໂສຓາ ຈ, ອເຫສຸໍ ອຄ຺ຄສາວິກາ;

ໂສປິ ພຸທ຺ໂຘ ອມິຕຍໂສ, ນາຄມູເລ ອພຸຊ຺ຌຖ.

໒໘. ວຣຸໂຓ ເຈວ ສຣໂຓ ຈ, ອເຫສຸໍ ອຄ຺ຄຸປຏ຺ຐກາ;

ຈາລາ ຈ ອຸປຈາລາ ຈ, ອເຫສຸໍ ອຄ຺ຄຸປຏ຺ຐິກາ.

໒໙. ອຸຈ຺ຈຕ຺ຕເນນ [ອຸຈ຺ຈຕເຣນ (ກ.)] ໂສ ພຸທ຺ໂຘ, ນວຸຕິຫຕ຺ຖມຸຄ຺ຄໂຕ;

ກຎ຺ຈນຄ຺ຆິຍສງ຺ກາໂສ, ທສສຫສ຺ສີ ວິໂຣຈຕິ.

໓໐. ນວຸຕິວສ຺ສສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໓໑. ຕາຣຓີເຍ ຕາຣຍິຕ຺ວາ, ໂພຘນີເຍ ຈ ໂພຘຍິ;

ປຣິນິພ຺ພາຍິ ສມ຺ພຸທ຺ໂຘ, ອຸຬຸຣາຊາວ ອຕ຺ຖມິ.

໓໒. ເຕ ຈ ຂີຓາສວາ ຠິກ຺ຂູ, ໂສ ຈ ພຸທ຺ໂຘ ອສາທິໂສ;

ອຕຸລປ຺ປຠໍ ທສ຺ສຍິຕ຺ວາ, ນິພ຺ພຸຕາ ເຍ ມຫາຍສາ.

໓໓. ຕຎ຺ຈ ຎາຓໍ ອຕຸລິຍໍ, ຕານິ ຈ ອຕຸລານິ ຣຕນານິ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໓໔. ສຸມໂນ ຍສຘໂຣ ພຸທ຺ໂຘ, ອງ຺ຄາຣາມມ຺ຫິ ນິພ຺ພຸໂຕ;

ຕຕ຺ເຖວ ຕສ຺ສ ຊິນຖູໂປ, ຈຕຸໂຍຊນມຸຄ຺ຄໂຕຕິ.

ສຸມນສ຺ສ ຠຄວໂຕ ວໍໂສ ຈຕຸຕ຺ໂຖ.