໓. ທີປງ຺ກຣພຸທ຺ຘວໍໂສ

໑. ຕທາ ເຕ ໂຠຊຍິຕ຺ວານ, ສສງ຺ຆໍ ໂລກນາຍກໍ;

ອຸປຄຈ຺ຉຸໍ ສຣຓໍ ຕສ຺ສ, ທີປງ຺ກຣສ຺ສ ສຕ຺ຖຸໂນ.

໒. ສຣຓາຄມເນ ກຎ຺ຈິ, ນິເວເສສິ ຕຖາຄໂຕ;

ກຎ຺ຈິ ປຎ຺ຈສຸ ສີເລສຸ, ສີເລ ທສວິເຘ ປຣໍ.

໓. ກສ຺ສຈິ ເທຕິ ສາມຎ຺ຎໍ, ຈຕຸໂຣ ຜລມຸຕ຺ຕເມ;

ກສ຺ສຈິ ອສເມ ຘມ຺ເມ, ເທຕິ ໂສ ປຏິສມ຺ຠິທາ.

໔. ກສ຺ສຈິ ວຣສມາປຕ຺ຕິໂຍ, ອຏ຺ຐ ເທຕິ ນຣາສໂຠ;

ຕິສ຺ໂສ ກສ຺ສຈິ ວິຊ຺ຊາໂຍ, ຉຬຠິຎ຺ຎາ ປເວຈ຺ຉຕິ.

໕. ເຕນ ໂຍເຄນ ຊນກາຍໍ, ໂອວທຕິ ມຫາມຸນິ;

ເຕນ ວິຕ຺ຖາຣິກໍ ອາສິ, ໂລກນາຖສ຺ສ ສາສນໍ.

໖. ມຫາຫນຸສຠກ຺ຂນ຺ໂຘ, ທີປງ຺ກຣສ຺ສ ນາມໂກ;

ພຫູ ຊເນ ຕາຣຍຕິ, ປຣິໂມເຈຕິ ທຸຄ຺ຄຕິໍ.

໗. ໂພຘເນຍ຺ຍໍ ຊນໍ ທິສ຺ວາ, ສຕສຫສ຺ເສປິ ໂຍຊເນ;

ຂເຓນ ອຸປຄນ຺ຕ຺ວານ, ໂພເຘຕິ ຕໍ ມຫາມຸນິ.

໘. ປຐມາຠິສມເຍ ພຸທ຺ໂຘ, ໂກຏິສຕມໂພຘຍິ;

ທຸຕິຍາຠິສມເຍ ນາໂຖ, ນວຸຕິໂກຏິມໂພຘຍິ.

໙. ຍທາ ຈ ເທວຠວນມ຺ຫິ, ພຸທ຺ໂຘ ຘມ຺ມມເທສຍິ;

ນວຸຕິໂກຏິສຫສ຺ສານໍ, ຕຕິຍາຠິສມໂຍ ອຫຸ.

໑໐. ສນ຺ນິປາຕາ ຕໂຍ ອາສຸໍ, ທີປງ຺ກຣສ຺ສ ສຕ຺ຖຸໂນ;

ໂກຏິສຕສຫສ຺ສານໍ, ປຐໂມ ອາສິ ສມາຄໂມ.

໑໑. ປຸນ ນາຣທກູຏມ຺ຫິ, ປວິເວກຄເຕ ຊິເນ;

ຂີຓາສວາ ວີຕມລາ, ສມິໍສຸ ສຕໂກຏິໂຍ.

໑໒. ຍມ຺ຫິ ກາເລ ມຫາວີໂຣ, ສຸທສ຺ສນສິລຸຈ຺ຈເຍ;

ນວໂກຏິສຫສ຺ເສຫິ, ປວາເຣສິ ມຫາມຸນິ.

໑໓. ທສວີສສຫສ຺ສານໍ, ຘມ຺ມາຠິສມໂຍ ອຫຸ;

ເອກທ຺ວິນ຺ນໍ ອຠິສມຍາ, ຄຓນາໂຕ ອສງ຺ຂິຍາ.

໑໔. ວິຕ຺ຖາຣິກໍ ພາຫຸຊຎ຺ຎໍ, ອິທ຺ຘໍ ຜີຕໍ ອຫູ ຕທາ;

ທີປງ຺ກຣສ຺ສ ຠຄວໂຕ, ສາສນໍ ສຸວິໂສຘິຕໍ.

໑໕. ຈຕ຺ຕາຣິ ສຕສຫສ຺ສານິ, ຉຬຠິຎ຺ຎາ ມຫິທ຺ຘິກາ;

ທີປງ຺ກຣໍ ໂລກວິທຸໍ, ປຣິວາເຣນ຺ຕິ ສພ຺ພທາ.

໑໖. ເຍ ເກຈິ ເຕນ ສມເຍນ, ຊຫນ຺ຕິ ມານຸສໍ ຠວໍ;

ອປຕ຺ຕມານສາ ເສຂາ, ຄຣຫິຕາ ຠວນ຺ຕິ ເຕ.

໑໗. ສຸປຸປ຺ຜິຕໍ ປາວຈນໍ, ອຣຫນ຺ເຕຫິ ຕາທິຫິ;

ຂີຓາສເວຫິ ວິມເລຫິ, ອຸປໂສຠຕິ ສພ຺ພທາ.

໑໘. ນຄຣໍ ຣມ຺ມວຕີ ນາມ, ສຸເທໂວ ນາມ ຂຕ຺ຕິໂຍ;

ສຸເມຘາ ນາມ ຊນິກາ, ທີປງ຺ກຣສ຺ສ ສຕ຺ຖຸໂນ.

໑໙. ທສວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ [ອຊ຺ຌາວສີ ຊິໂນ (ສ຺ຍາ. ກ.)];

ຫໍສາ ໂກຎ຺ຈາ ມຍູຣາ ຈ, ຕໂຍ ປາສາທມຸຕ຺ຕມາ.

໒໐. ຕີຓິສຕສຫສ຺ສານິ, ນາຣິໂຍ ສມລງ຺ກຕາ;

ປທຸມາ ນາມ ສາ ນາຣີ, ອຸສຠກ຺ຂນ຺ໂຘ ອຕ຺ຣໂຊ.

໒໑. ນິມິຕ຺ເຕ ຈຕຸໂຣ ທິສ຺ວາ, ຫຕ຺ຖິຍາເນນ ນິກ຺ຂມິ;

ອນູນທສມາສານິ, ປຘາເນ ປທຫີ ຊິໂນ.

໒໒. ປຘານຈາຣໍ ຈຣິຕ຺ວານ, ອພຸຊ຺ຌິ ມານສໍ ມຸນິ;

ພ຺ຣຫ຺ມຸນາ ຍາຈິໂຕ ສນ຺ໂຕ, ທີປງ຺ກໂຣ ມຫາມຸນິ.

໒໓. ວຕ຺ຕິ ຈກ຺ກໍ ມຫາວີໂຣ, ນນ຺ທາຣາເມ ສິຣີຆເຣ [ສິຣີຘເຣ (ສີ.)];

ນິສິນ຺ໂນ ສິຣີສມູລມ຺ຫິ, ອກາ ຕິຕ຺ຖິຍມທ຺ທນໍ.

໒໔. ສຸມງ຺ຄໂລ ຈ ຕິສ຺ໂສ ຈ, ອເຫສຸໍ ອຄ຺ຄສາວກາ;

ສາຄໂຕ [ໂສຠິໂຕ (ກ.)] ນາມຸປຏ຺ຐາໂກ, ທີປງ຺ກຣສ຺ສ ສຕ຺ຖຸໂນ.

໒໕. ນນ຺ທາ ເຈວ ສຸນນ຺ທາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ປິປ຺ຜລີຕິ ປວຸຈ຺ຈຕິ.

໒໖. ຕປຸສ຺ສຠລ຺ລິກາ [ຕປສ຺ສຸຠລ຺ລິກາ (ສີ.)] ນາມ, ອເຫສຸໍ ອຄ຺ຄຸປຏ຺ຐກາ;

ສິຣິມາ ໂກຓາ ອຸປຏ຺ຐິກາ, ທີປງ຺ກຣສ຺ສ ສຕ຺ຖຸໂນ.

໒໗. ອສີຕິຫຕ຺ຖມຸພ຺ເພໂຘ, ທີປງ຺ກໂຣ ມຫາມຸນິ;

ໂສຠຕິ ທີປຣຸກ຺ໂຂວ, ສາລຣາຊາວ ຜຸລ຺ລິໂຕ.

໒໘. ສຕສຫສ຺ສວສ຺ສານິ, ອາຍຸ ຕສ຺ສ ມເຫສິໂນ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໙. ໂຊຕຍິຕ຺ວານ ສທ຺ຘມ຺ມໍ, ສນ຺ຕາເຣຕ຺ວາ ມຫາຊນໍ;

ຊລິຕ຺ວາ ອຄ຺ຄິກ຺ຂນ຺ໂຘວ, ນິພ຺ພຸໂຕ ໂສ ສສາວໂກ.

໓໐. ສາ ຈ ອິທ຺ຘິ ໂສ ຈ ຍໂສ, ຕານິ ຈ ປາເທສຸ ຈກ຺ກຣຕນານິ;

ສພ຺ພໍ ຕມນ຺ຕຣຫິຕໍ [ສມນ຺ຕຣຫິຕໍ (ສີ. ສ຺ຍາ. ກ.)], ນນຸ ຣິຕ຺ຕາ ສພ຺ພສງ຺ຂາຣາ [ສພ຺ພສງ຺ຂາຣາຕິ (ສພ຺ພຕ຺ຖ)].

໓໑. ທີປງ຺ກໂຣ ຊິໂນ ສຕ຺ຖາ, ນນ຺ທາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຊິນຖູໂປ, ຉຕ຺ຕິໍສຸພ຺ເພຘໂຍຊໂນຕິ.

ທີປງ຺ກຣສ຺ສ ຠຄວໂຕ ວໍໂສ ປຐໂມ.