໔. ໂກຓ຺ຑຎ຺ຎພຸທ຺ຘວໍໂສ

໑. ທີປງ຺ກຣສ຺ສ ອປເຣນ, ໂກຓ຺ຑຎ຺ໂຎ ນາມ ນາຍໂກ;

ອນນ຺ຕເຕໂຊ ອມິຕຍໂສ, ອປ຺ປເມຍ຺ໂຍ ທຸຣາສໂທ.

໒. ຘຣຓູປໂມ ຂມເນນ, ສີເລນ ສາຄຣູປໂມ;

ສມາຘິນາ ເມຣູປໂມ, ຎາເຓນ ຄຄນູປໂມ.

໓. ອິນ຺ທ຺ຣິຍພລໂພຊ຺ຌງ຺ຄ-ມຄ຺ຄສຈ຺ຈປ຺ປກາສນໍ;

ປກາເສສິ ສທາ ພຸທ຺ໂຘ, ຫິຕາຍ ສພ຺ພປາຓິນໍ.

໔. ຘມ຺ມຈກ຺ກໍ ປວຕ຺ເຕນ຺ເຕ, ໂກຓ຺ຑຎ຺ເຎ ໂລກນາຍເກ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໕. ຕໂຕ ປຣມ຺ປິ ເທເສນ຺ເຕ, ນຣມຣູນໍ ສມາຄເມ;

ນວຸຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໖. ຕິຕ຺ຖິເຍ ອຠິມທ຺ທນ຺ໂຕ, ຍທາ ຘມ຺ມມເທສຍິ;

ອສີຕິໂກຏິສຫສ຺ສານໍ, ຕຕິຍາຠິສມໂຍ ອຫຸ.

໗. ສນ຺ນິປາຕາ ຕໂຍ ອາສຸໍ, ໂກຓ຺ຑຎ຺ຎສ຺ສ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໘. ໂກຏິສຕສຫສ຺ສານໍ, ປຐໂມ ອາສິ ສມາຄໂມ;

ທຸຕິໂຍ ໂກຏິສຫສ຺ສານໍ, ຕຕິໂຍ ນວຸຕິໂກຏິນໍ.

໙. ອຫໍ ເຕນ ສມເຍນ, ວິຊິຕາວີ ນາມ ຂຕ຺ຕິໂຍ;

ສມຸທ຺ທໍ ອນ຺ຕມນ຺ເຕນ, ອິສ຺ສຣິຍໍ ວຕ຺ຕຍາມຫໍ.

໑໐. ໂກຏິສຕສຫສ຺ສານໍ, ວິມລານໍ ມເຫສິນໍ;

ສຫ ໂລກຄ຺ຄນາເຖນ, ປຣມນ຺ເນນ ຕປ຺ປຍິໍ.

໑໑. ໂສປິ ມໍ ພຸທ຺ໂຘ ພ຺ຍາກາສິ, ໂກຓ຺ຑຎ຺ໂຎ ໂລກນາຍໂກ;

‘‘ອປຣິເມຍ຺ຍິໂຕ ກປ຺ເປ, ພຸທ຺ໂຘ ໂລເກ ຠວິສ຺ສຕິ.

໑໒. ‘‘ປຘານໍ ປທຫິຕ຺ວານ, ກຕ຺ວາ ທຸກ຺ກຣກາຣິກໍ;

ອສ຺ສຕ຺ຖມູເລ ສມ຺ພຸທ຺ໂຘ, ພຸຊ຺ຌິສ຺ສຕິ ມຫາຍໂສ.

໑໓. ‘‘ອິມສ຺ສ ຊນິກາ ມາຕາ, ມາຍາ ນາມ ຠວິສ຺ສຕິ;

ປິຕາ ສຸທ຺ໂຘທໂນ ນາມ, ອຍໍ ເຫສ຺ສຕິ ໂຄຕໂມ.

໑໔. ‘‘ໂກລິໂຕ ອຸປຕິສ຺ໂສ ຈ, ອຄ຺ຄາ ເຫສ຺ສນ຺ຕິ ສາວກາ;

ອານນ຺ໂທ ນາມຸປຏ຺ຐາໂກ, ອຸປຏ຺ຐິສ຺ສຕິມໍ ຊິນໍ.

໑໕. ‘‘ເຂມາ ອຸປ຺ປລວຓ຺ຓາ ຈ, ອຄ຺ຄາ ເຫສ຺ສນ຺ຕິ ສາວິກາ;

ໂພຘິ ຕສ຺ສ ຠຄວໂຕ, ອສ຺ສຕ຺ໂຖຕິ ປວຸຈ຺ຈຕິ.

໑໖. ‘‘ຈິຕ຺ໂຕ ຈ ຫຕ຺ຖາຬວໂກ, ອຄ຺ຄາ ເຫສ຺ສນ຺ຕຸປຏ຺ຐກາ;

ນນ຺ທມາຕາ ຈ ອຸຕ຺ຕຣາ, ອຄ຺ຄາ ເຫສ຺ສນ຺ຕຸປຏ຺ຐິກາ;

ອາຍຸ ວສ຺ສສຕໍ ຕສ຺ສ, ໂຄຕມສ຺ສ ຍສສ຺ສິໂນ’’.

໑໗. ອິທໍ ສຸຕ຺ວານ ວຈນໍ, ອສມສ຺ສ ມເຫສິໂນ;

ອາໂມທິຕາ ນຣມຣູ, ພຸທ຺ຘພີຊໍ ກິຣ ອຍໍ.

໑໘. ອຸກ຺ກຸຏ຺ຐິສທ຺ທາ ວຕ຺ຕນ຺ຕິ, ອປ຺ໂຜເຏນ຺ຕິ ຫສນ຺ຕິ ຈ;

ກຕຎ຺ຊລີ ນມສ຺ສນ຺ຕິ, ທສສຫສ຺ສິເທວຕາ.

໑໙. ‘‘ຍທິມສ຺ສ ໂລກນາຖສ຺ສ, ວິຣຊ຺ຌິສ຺ສາມ ສາສນໍ;

ອນາຄຕມ຺ຫິ ອທ຺ຘາເນ, ເຫສ຺ສາມ ສມ຺ມຸຂາ ອິມໍ.

໒໐. ‘‘ຍຖາ ມນຸສ຺ສາ ນທິໍ ຕຣນ຺ຕາ, ປຏິຕິຕ຺ຖໍ ວິຣຊ຺ຌິຍ;

ເຫຏ຺ຐາຕິຕ຺ເຖ ຄເຫຕ຺ວານ, ອຸຕ຺ຕຣນ຺ຕິ ມຫານທິໍ.

໒໑. ‘‘ເອວເມວ ມຍໍ ສພ຺ເພ, ຍທິ ມຸຎ຺ຈາມິມໍ ຊິນໍ;

ອນາຄຕມ຺ຫິ ອທ຺ຘາເນ, ເຫສ຺ສາມ ສມ຺ມຸຂາ ອິມໍ’’.

໒໒. ຕສ຺ສາຫໍ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ຕເມວ ອຕ຺ຖໍ ສາເຘນ຺ໂຕ, ມຫາຣຊ຺ຊໍ ຊິເນ ອທໍ;

ມຫາຣຊ຺ຊໍ ທທິຕ຺ວານ [ຈຊິຕ຺ວາ (ສີ.)], ປພ຺ພຊິໍ ຕສ຺ສ ສນ຺ຕິເກ.

໒໓. ສຸຕ຺ຕນ຺ຕໍ ວິນຍຎ຺ຈາປິ, ນວງ຺ຄໍ ສຕ຺ຖຸສາສນໍ;

ສພ຺ພໍ ປຣິຍາປຸຓິຕ຺ວານ, ໂສຠຍິໍ ຊິນສາສນໍ.

໒໔. ຕຕ຺ຖປ຺ປມຕ຺ໂຕ ວິຫຣນ຺ໂຕ, ນິສຊ຺ຊຏ຺ຐານຈງ຺ກເມ;

ອຠິຎ຺ຎາປາຣມິໍ ຄນ຺ຕ຺ວາ, ພ຺ຣຫ຺ມໂລກມຄຎ຺ຉຫໍ.

໒໕. ນຄຣໍ ຣມ຺ມວຕີ ນາມ, ສຸນນ຺ໂທ ນາມ ຂຕ຺ຕິໂຍ;

ສຸຊາຕາ ນາມ ຊນິກາ, ໂກຓ຺ຑຎ຺ຎສ຺ສ ມເຫສິໂນ.

໒໖. ທສວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ [ອຄາຣມຊ຺ເຌ ຈ ໂສ ວສິ (ສ຺ຍາ.)];

ສຸຈິ ສຸຣຸຈິ ສຸໂຠ ຈ, ຕໂຍ ປາສາທມຸຕ຺ຕມາ.

໒໗. ຕີຓິສຕສຫສ຺ສານິ, ນາຣິໂຍ ສມລງ຺ກຕາ;

ຣຸຈິເທວີ ນາມ ນາຣີ, ວິຊິຕເສໂນ ອຕ຺ຣໂຊ.

໒໘. ນິມິຕ຺ເຕ ຈຕຸໂຣ ທິສ຺ວາ, ຣຖຍາເນນ ນິກ຺ຂມິ;

ອນູນທສມາສານິ, ປຘານໍ ປທຫີ ຊິໂນ.

໒໙. ພ຺ຣຫ຺ມຸນາ ຍາຈິໂຕ ສນ຺ໂຕ, ໂກຓ຺ຑຎ຺ໂຎ ທ຺ວິປທຸຕ຺ຕໂມ;

ວຕ຺ຕິ ຈກ຺ກໍ ມຫາວີໂຣ, ເທວານໍ ນຄຣຸຕ຺ຕເມ.

໓໐. ຠທ຺ໂທ ເຈວ ສຸຠທ຺ໂທ ຈ, ອເຫສຸໍ ອຄ຺ຄສາວກາ;

ອນຸຣຸທ຺ໂຘ ນາມຸປຏ຺ຐາໂກ, ໂກຓ຺ຑຎ຺ຎສ຺ສ ມເຫສິໂນ.

໓໑. ຕິສ຺ສາ ຈ ອຸປຕິສ຺ສາ ຈ, ອເຫສຸໍ ອຄ຺ຄສາວິກາ;

ສາລກລ຺ຍາຓິໂກ ໂພຘິ, ໂກຓ຺ຑຎ຺ຎສ຺ສ ມເຫສິໂນ.

໓໒. ໂສໂຓ ຈ ອຸປໂສໂຓ ຈ, ອເຫສຸໍ ອຄ຺ຄຸປຏ຺ຐກາ;

ນນ຺ທາ ເຈວ ສິຣີມາ ຈ, ອເຫສຸໍ ອຄ຺ຄຸປຏ຺ຐິກາ.

໓໓. ໂສ ອຏ຺ຐາສີຕິ ຫຕ຺ຖານິ, ອຈ຺ຈຸຄ຺ຄໂຕ ມຫາມຸນິ;

ໂສຠເຕ ອຸຬຸຣາຊາວ ສູຣິໂຍ ມຊ຺ຌນ຺ຫິເກ ຍຖາ.

໓໔. ວສ຺ສສຕສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໓໕. ຂີຓາສເວຫິ ວິມເລຫິ, ວິຈິຕ຺ຕາ ອາສິ ເມທນີ;

ຍຖາ ຄຄນມຸຬູຫິ, ເອວໍ ໂສ ອຸປໂສຠຖ.

໓໖. ເຕປິ ນາຄາ ອປ຺ປເມຍ຺ຍາ, ອສງ຺ໂຂຠາ ທຸຣາສທາ;

ວິຊ຺ຊຸປາຕໍວ ທສ຺ເສຕ຺ວາ, ນິພ຺ພຸຕາ ເຕ ມຫາຍສາ.

໓໗. ສາ ຈ ອຕຸລິຍາ ຊິນສ຺ສ ອິທ຺ຘິ, ຎາຓປຣິຠາວິໂຕ ຈ ສມາຘິ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໓໘. ໂກຓ຺ຑຎ຺ໂຎ ປວໂຣ ພຸທ຺ໂຘ, ຈນ຺ທາຣາມມ຺ຫິ ນິພ຺ພຸໂຕ;

ຕຕ຺ເຖວ ເຈຕິໂຍ ຈິຕ຺ໂຕ, ສຕ຺ຕ ໂຍຊນມຸສ຺ສິໂຕຕິ.

ໂກຓ຺ຑຎ຺ຎສ຺ສ ຠຄວໂຕ ວໍໂສ ທຸຕິໂຍ.