໒໖. ກສ຺ສປພຸທ຺ຘວໍໂສ

໑. ໂກຓາຄມນສ຺ສ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ກສ຺ສໂປ ນາມ ໂຄຕ຺ເຕນ, ຘມ຺ມຣາຊາ ປຠງ຺ກໂຣ.

໒. ສຎ຺ຉຑ຺ຑິຕໍ ກຸລມູລໍ, ພຫ຺ວນ຺ນປານໂຠຊນໍ;

ທຕ຺ວານ ຍາຈເກ ທານໍ, ປູຣຍິຕ຺ວານ ມານສໍ;

ອຸສໂຠວ ອາຬກໍ ເຠຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ.

໓. ຘມ຺ມຈກ຺ກໍ ປວຕ຺ເຕນ຺ເຕ, ກສ຺ສເປ ໂລກນາຍເກ;

ວີສໂກຏິສຫສ຺ສານໍ, ປຐມາຠິສມໂຍ ອຫຸ.

໔. ຈຕຸມາສໍ ຍທາ ພຸທ຺ໂຘ, ໂລເກ ຈຣຕິ ຈາຣິກໍ;

ທສໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໕. ຍມກໍ ວິກຸພ຺ພນໍ ກຕ຺ວາ, ຎາຓຘາຕຸໍ ປກິຕ຺ຕຍິ;

ປຎ຺ຈໂກຏິສຫສ຺ສານໍ, ຕຕິຍາຠິສມໂຍ ອຫຸ.

໖. ສຸຘມ຺ມາ ເທວປຸເຣ ຣມ຺ເມ, ຕຕ຺ຖ ຘມ຺ມໍ ປກິຕ຺ຕຍິ;

ຕີຓິໂກຏິສຫສ຺ສານໍ, ເທວານໍ ໂພຘຍີ ຊິໂນ.

໗. ນຣເທວສ຺ສ ຍກ຺ຂສ຺ສ, ອປເຣ ຘມ຺ມເທສເນ;

ເອເຕສານໍ ອຠິສມຍາ, ຄຓນາໂຕ ອສງ຺ຂິຍາ.

໘. ຕສ຺ສາປິ ເທວເທວສ຺ສ, ເອໂກ ອາສິ ສມາຄໂມ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໙. ວີສຠິກ຺ຂຸສຫສ຺ສານໍ, ຕທາ ອາສິ ສມາຄໂມ;

ອຕິກ຺ກນ຺ຕຠວນ຺ຕານໍ, ຫິຣິສີເລນ ຕາທິນໍ.

໑໐. ອຫໍ ຕທາ ມາຓວໂກ, ໂຊຕິປາໂລຕິ ວິສ຺ສຸໂຕ;

ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ.

໑໑. ລກ຺ຂເຓ ອິຕິຫາເສ ຈ, ສຘມ຺ເມ ປາຣມິໍ ຄໂຕ;

ຠູມນ຺ຕລິກ຺ຂກຸສໂລ, ກຕວິຊ຺ໂຊ ອນາວໂຍ.

໑໒. ກສ຺ສປສ຺ສ ຠຄວໂຕ, ຆຏິກາໂຣ ນາມຸປຏ຺ຐາໂກ;

ສຄາຣໂວ ສປ຺ປຕິສ຺ໂສ, ນິພ຺ພຸໂຕ ຕຕິເຍ ຜເລ.

໑໓. ອາທາຍ ມໍ ຆຏີກາໂຣ, ອຸປຄຎ຺ຉິ ກສ຺ສປໍ ຊິນໍ;

ຕສ຺ສ ຘມ຺ມໍ ສຸຓິຕ຺ວານ, ປພ຺ພຊິໍ ຕສ຺ສ ສນ຺ຕິເກ.

໑໔. ອາຣທ຺ຘວີຣິໂຍ ຫຸຕ຺ວາ, ວຕ຺ຕາວຕ຺ເຕສຸ ໂກວິໂທ;

ນ ກ຺ວຈິ ປຣິຫາຍາມິ, ປູເຣສິໍ ຊິນສາສນໍ.

໑໕. ຍາວຕາ ພຸທ຺ຘຠຓິຕໍ, ນວງ຺ຄໍ ຊິນສາສນໍ;

ສພ຺ພໍ ປຣິຍາປຸຓິຕ຺ວານ, ໂສຠຍິໍ ຊິນສາສນໍ.

໑໖. ມມ ອຈ຺ຉຣິຍໍ ທິສ຺ວາ, ໂສປິ ພຸທ຺ໂຘ ວິຍາກຣິ;

‘‘ອິມມ຺ຫິ ຠທ຺ທເກ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໗. ‘‘ອຫຸ ກປິລວ຺ຫຍາ ຣມ຺ມາ, ນິກ຺ຂມິຕ຺ວາ ຕຖາຄໂຕ;

ປຘານໍ ປທຫິຕ຺ວານ, ກຕ຺ວາ ທຸກ຺ກຣກາຣິກໍ.

໑໘. ‘‘ອຊປາລຣຸກ຺ຂມູເລ, ນິສີທິຕ຺ວາ ຕຖາຄໂຕ;

ຕຕ຺ຖ ປາຍາສໍ ປຄ຺ຄຍ຺ຫ, ເນຣຎ຺ຊຣມຸເປຫິຕິ.

໑໙. ‘‘ເນຣຎ຺ຊຣາຍ ຕີຣມ຺ຫິ, ປາຍາສໍ ປຣິຠຸຎ຺ຊິຍ;

ປຏິຍຕ຺ຕວຣມຄ຺ເຄນ, ໂພຘິມູລມຸເປຫິຕິ.

໒໐. ‘‘ຕໂຕ ປທກ຺ຂິຓໍ ກຕ຺ວາ, ໂພຘິມຓ຺ຑໍ ອນຸຕ຺ຕໂຣ;

ອປຣາຊິຕຏ຺ຐານມ຺ຫິ [ອປຣາຊິຕນິສຠຏ຺ຐາເນ (ກ.)], ໂພຘິປລ຺ລງ຺ກມຸຕ຺ຕເມ;

ປລ຺ລງ຺ເກນ ນິສີທິຕ຺ວາ, ພຸຊ຺ຌິສ຺ສຕິ ມຫາຍໂສ.

໒໑. ‘‘ອິມສ຺ສ ຊນິກາ ມາຕາ, ມາຍາ ນາມ ຠວິສ຺ສຕິ;

ປິຕາ ສຸທ຺ໂຘທໂນ ນາມ, ອຍໍ ເຫສ຺ສຕິ ໂຄຕໂມ.

໒໒. ‘‘ອນາສວາ ວີຕຣາຄາ, ສນ຺ຕຈິຕ຺ຕາ ສມາຫິຕາ;

ໂກລິໂຕ ອຸປຕິສ຺ໂສ ຈ, ອຄ຺ຄາ ເຫສ຺ສນ຺ຕິ ສາວກາ;

ອານນ຺ໂທ ນາມຸປຏ຺ຐາໂກ, ອຸປຏ຺ຐິສ຺ສຕິມໍ ຊິນໍ.

໒໓. ‘‘ເຂມາ ອຸປ຺ປລວຓ຺ຓາ ຈ, ອຄ຺ຄາ ເຫສ຺ສນ຺ຕິ ສາວິກາ;

ອນາສວາ ສນ຺ຕຈິຕ຺ຕາ, ວີຕຣາຄາ ສມາຫິຕາ;

ໂພຘິ ຕສ຺ສ ຠຄວໂຕ, ອສ຺ສຕ຺ໂຖຕິ ປວຸຈ຺ຈຕິ.

໒໔. ‘‘ຈິຕ຺ໂຕ ຫຕ຺ຖາຬວໂກ ຈ, ອຄ຺ຄາ ເຫສ຺ສນ຺ຕຸປຏ຺ຐກາ;

ນນ຺ທມາຕາ ຈ ອຸຕ຺ຕຣາ, ອຄ຺ຄາ ເຫສ຺ສນ຺ຕຸປຏ຺ຐິກາ’’.

໒໕. ອິທໍ ສຸຕ຺ວານ ວຈນໍ, ອສ຺ສມສ຺ສ ມເຫສິໂນ;

ອາໂມທິຕາ ນຣມຣູ, ພຸທ຺ຘພີຊໍ ກິຣ ອຍໍ.

໒໖. ອຸກ຺ກຸຏ຺ຐິສທ຺ທາ ປວຕ຺ຕນ຺ຕິ, ອປ຺ໂຜເຏນ຺ຕິ ຫສນ຺ຕິ ຈ;

ກຕຎ຺ຊລີ ນມສ຺ສນ຺ຕິ, ທສສຫສ຺ສີ ສເທວກາ.

໒໗. ‘‘ຍທິມສ຺ສ ໂລກນາຖສ຺ສ, ວິຣຊ຺ຌິສ຺ສາມ ສາສນໍ;

ອນາຄຕມ຺ຫິ ອທ຺ຘາເນ, ເຫສ຺ສາມ ສມ຺ມຸຂາ ອິມໍ.

໒໘. ‘‘ຍຖາ ມນຸສ຺ສາ ນທິໍ ຕຣນ຺ຕາ, ປຏິຕິຕ຺ຖໍ ວິຣຊ຺ຌິຍ;

ເຫຏ຺ຐາ ຕິຕ຺ເຖ ຄເຫຕ຺ວານ, ອຸຕ຺ຕຣນ຺ຕິ ມຫານທິໍ.

໒໙. ‘‘ເອວເມວ ມຍໍ ສພ຺ເພ, ຍທິ ມຸຎ຺ຈາມິມໍ ຊິນໍ;

ອນາຄຕມ຺ຫິ ອທ຺ຘາເນ, ເຫສ຺ສາມ ສມ຺ມຸຂາ ອິມໍ’’.

໓໐. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໓໑. ເອວມຫໍ ສໍສຣິຕ຺ວາ, ປຣິວຊ຺ເຊນ຺ໂຕ ອນາຈຣໍ;

ທຸກ຺ກຣຎ຺ຈ ກຕໍ ມຍ຺ຫໍ, ໂພຘິຍາເຍວ ກາຣຓາ.

໓໒. ນຄຣໍ ພາຣາຓສີ ນາມ, ກິກີ ນາມາສິ ຂຕ຺ຕິໂຍ;

ວສເຕ ຕຕ຺ຖ ນຄເຣ, ສມ຺ພຸທ຺ຘສ຺ສ ມຫາກຸລໍ.

໓໓. ພ຺ຣາຫ຺ມໂຓ ພ຺ຣຫ຺ມທຕ຺ໂຕວ, ອາສິ ພຸທ຺ຘສ຺ສ ໂສ ປິຕາ;

ຘນວຕີ ນາມ ຊນິກາ, ກສ຺ສປສ຺ສ ມເຫສິໂນ.

໓໔. ທຸເວ ວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ຫໍໂສ ຍໂສ ສິຣິນນ຺ໂທ, ຕໂຍ ປາສາທມຸຕ຺ຕມາ.

໓໕. ຕິໂສຬສສຫສ຺ສານິ, ນາຣິໂຍ ສມລງ຺ກຕາ;

ສຸນນ຺ທາ ນາມ ສາ ນາຣີ, ວິຊິຕເສໂນ ນາມ ອຕ຺ຣໂຊ.

໓໖. ນິມິຕ຺ເຕ ຈຕຸໂຣ ທິສ຺ວາ, ປາສາເທນາຠິນິກ຺ຂມິ;

ສຕ຺ຕາຫໍ ປຘານຈາຣໍ, ອຈຣີ ປຸຣິສຸຕ຺ຕໂມ.

໓໗. ພ຺ຣຫ຺ມຸນາ ຍາຈິໂຕ ສນ຺ໂຕ, ກສ຺ສໂປ ໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ມິຄທາເຍ ນຣຸຕ຺ຕໂມ.

໓໘. ຕິສ຺ໂສ ຈ ຠາຣທ຺ວາໂຊ ຈ, ອເຫສຸໍ ອຄ຺ຄສາວກາ;

ສພ຺ພມິຕ຺ໂຕ ນາມຸປຏ຺ຐາໂກ, ກສ຺ສປສ຺ສ ມເຫສິໂນ.

໓໙. ອນຸຬາ ອຸຣຸເວຬາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ນິຄ຺ໂຣໂຘຕິ ປວຸຈ຺ຈຕິ.

໔໐. ສຸມງ຺ຄໂລ ຆຏິກາໂຣ ຈ, ອເຫສຸໍ ອຄ຺ຄຸປຏ຺ຐກາ;

ວິຈິຕເສນາ ຠທ຺ທາ [ຠທ຺ຣາ (ກ.)] ຈ, ອເຫສຸໍ ອຄ຺ຄຸປຏ຺ຐິກາ.

໔໑. ອຸຈ຺ຈຕ຺ຕເນນ ໂສ ພຸທ຺ໂຘ, ວີສຕິຣຕນຸຄ຺ຄໂຕ;

ວິຊ຺ຊຸລຏ຺ຐີວ ອາກາເສ, ຈນ຺ໂທວ ຄຫປູຣິໂຕ.

໔໒. ວີສຕິວສ຺ສສຫສ຺ສານິ, ອາຍຸ ຕສ຺ສ ມເຫສິໂນ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໔໓. ຘມ຺ມຕຬາກໍ ມາປຍິຕ຺ວາ, ສີລໍ ທຕ຺ວາ ວິເລປນໍ;

ຘມ຺ມທຸສ຺ສໍ ນິວາເສຕ຺ວາ, ຘມ຺ມມາລໍ ວິຠຊ຺ຊິຍ.

໔໔. ຘມ຺ມວິມລມາທາສໍ, ຐປຍິຕ຺ວາ ມຫາຊເນ;

ເກຈິ ນິພ຺ພານໍ ປຕ຺ເຖນ຺ຕາ, ປສ຺ສນ຺ຕຸ ເມ ອລງ຺ກຣໍ.

໔໕. ສີລກຎ຺ຈຸກໍ ທຕ຺ວານ, ຌານກວຈວມ຺ມິຕໍ;

ຘມ຺ມຈມ຺ມໍ ປາຣຸປິຕ຺ວາ, ທຕ຺ວາ ສນ຺ນາຫມຸຕ຺ຕມໍ.

໔໖. ສຕິຜລກໍ ທຕ຺ວານ, ຕິຂິຓຎາຓກຸນ຺ຕິມໍ;

ຘມ຺ມຂຄ຺ຄວຣໍ ທຕ຺ວາ, ສີລສໍສຄ຺ຄມທ຺ທນໍ.

໔໗. ເຕວິຊ຺ຊາຠູສນໍ ທຕ຺ວານ, ອາເວຬໍ ຈຕຸໂຣ ຜເລ;

ຉຬຠິຎ຺ຎາຠຣຓໍ ທຕ຺ວາ, ຘມ຺ມປຸປ຺ຜປິຬນ຺ຘນໍ.

໔໘. ສທ຺ຘມ຺ມປຓ຺ຑຣຈ຺ຉຕ຺ຕໍ, ທຕ຺ວາ ປາປນິວາຣຓໍ;

ມາປຍິຕ຺ວາຠຍໍ ປຸປ຺ຜໍ, ນິພ຺ພຸໂຕ ໂສ ສສາວໂກ.

໔໙. ເອໂສ ຫິ ສມ຺ມາສມ຺ພຸທ຺ໂຘ, ອປ຺ປເມຍ຺ໂຍ ທຸຣາສໂທ;

ເອໂສ ຫິ ຘມ຺ມຣຕໂນ, ສ຺ວາກ຺ຂາໂຕ ເອຫິປສ຺ສິໂກ.

໕໐. ເອໂສ ຫິ ສງ຺ຆຣຕໂນ, ສຸປ຺ປຏິປນ຺ໂນ ອນຸຕ຺ຕໂຣ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໕໑. ມຫາກສ຺ສໂປ ຊິໂນ ສຕ຺ຖາ, ເສຕພ຺ຍາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຊິນຖູໂປ, ໂຍຊນຸພ຺ເພຘມຸຄ຺ຄໂຕຕິ.

ກສ຺ສປສ຺ສ ຠຄວໂຕ ວໍໂສ ຈຕຸວີສຕິໂມ.