໒໗. ໂຄຕມພຸທ຺ຘວໍໂສ

໑. ອຫເມຕຣຫິ ສມ຺ພຸທ຺ໂຘ [ພຸທ຺ໂຘ (ສີ.)], ໂຄຕໂມ ສກ຺ຍວຑ຺ຒໂນ;

ປຘານໍ ປທຫິຕ຺ວານ, ປຕ຺ໂຕ ສມ຺ໂພຘິມຸຕ຺ຕມໍ.

໒. ພ຺ຣຫ຺ມຸນາ ຍາຈິໂຕ ສນ຺ໂຕ, ຘມ຺ມຈກ຺ກໍ ປວຕ຺ຕຍິໍ;

ອຏ຺ຐາຣສນ຺ນໍ ໂກຏີນໍ, ປຐມາຠິສມໂຍ ອຫຸ.

໓. ຕໂຕ ປຣຎ຺ຈ ເທເສນ຺ເຕ, ນຣເທວສມາຄເມ;

ຄຓນາຍ ນ ວຕ຺ຕພ຺ໂພ, ທຸຕິຍາຠິສມໂຍ ອຫຸ.

໔. ອິເຘວາຫໍ ເອຕຣຫິ, ໂອວທິໍ ມມ ອຕ຺ຣຊໍ;

ຄຓນາຍ ນ ວຕ຺ຕພ຺ໂພ, ຕຕິຍາຠິສມໂຍ ອຫຸ.

໕. ເອໂກສິ ສນ຺ນິປາໂຕ ເມ, ສາວການໍ ມເຫສິນໍ;

ອຑ຺ຒເຕຬສສຕານໍ, ຠິກ຺ຂູນາສິ ສມາຄໂມ.

໖. ວິໂຣຈມາໂນ ວິມໂລ, ຠິກ຺ຂຸສງ຺ຆສ຺ສ ມຊ຺ຌໂຄ;

ທທາມິ ປຕ຺ຖິຕໍ ສພ຺ພໍ, ມຓີວ ສພ຺ພກາມໂທ.

໗. ຜລມາກງ຺ຂມານານໍ, ຠວຈ຺ຉນ຺ທຊເຫສິນໍ;

ຈຕຸສຈ຺ຈໍ ປກາເສມິ, ອນຸກມ຺ປາຍ ປາຓິນໍ.

໘. ທສວີສສຫສ຺ສານໍ, ຘມ຺ມາຠິສມໂຍ ອຫຸ;

ເອກທ຺ວິນ຺ນໍ ອຠິສມໂຍ, ຄຓນາໂຕ ອສງ຺ຂິໂຍ.

໙. ວິຕ຺ຖາຣິກໍ ພາຫຸຊຎ຺ຎໍ, ອິທ຺ຘໍ ຜີຕໍ ສຸຜຸລ຺ລິຕໍ;

ອິຘ ມຍ຺ຫໍ ສກ຺ຍມຸນິໂນ, ສາສນໍ ສຸວິໂສຘິຕໍ.

໑໐. ອນາສວາ ວີຕຣາຄາ, ສນ຺ຕຈິຕ຺ຕາ ສມາຫິຕາ;

ຠິກ຺ຂູເນກສຕາ ສພ຺ເພ, ປຣິວາເຣນ຺ຕິ ມໍ ສທາ.

໑໑. ອິທານິ ເຍ ເອຕຣຫິ, ຊຫນ຺ຕິ ມານຸສໍ ຠວໍ;

ອປ຺ປຕ຺ຕມານສາ ເສຂາ, ເຕ ຠິກ຺ຂູ ວິຎ຺ຎຸຄຣຫິຕາ.

໑໒. ອຣິຍຎ຺ຈ ສໍໂຖມຍນ຺ຕາ, ສທາ ຘມ຺ມຣຕາ ຊນາ;

ພຸຊ຺ຌິສ຺ສນ຺ຕິ ສຕິມນ຺ໂຕ, ສໍສາຣສຣິຕໍ ຄຕາ.

໑໓. ນຄຣໍ ກປິລວຕ຺ຖຸ ເມ, ຣາຊາ ສຸທ຺ໂຘທໂນ ປິຕາ;

ມຍ຺ຫໍ ຊເນຕ຺ຕິກາ ມາຕາ, ມາຍາເທວີຕິ ວຸຈ຺ຈຕິ.

໑໔. ເອກູນຕິໍສວສ຺ສານິ, ອຄາຣໍ ອຊ຺ຌຫໍ ວສິໍ;

ຣມ຺ໂມ ສຸຣມ຺ໂມ ສຸຠໂກ, ຕໂຍ ປາສາທມຸຕ຺ຕມາ.

໑໕. ຈຕ຺ຕາຣີສສຫສ຺ສານິ, ນາຣິໂຍ ສມລງ຺ກຕາ;

ຠທ຺ທກຎ຺ຈນາ ນາມ ນາຣີ, ຣາຫຸໂລ ນາມ ອຕ຺ຣໂຊ.

໑໖. ນິມິຕ຺ເຕ ຈຕຸໂຣ ທິສ຺ວາ, ອສ຺ສຍາເນນ ນິກ຺ຂມິໍ;

ຉພ຺ພສ຺ສໍ ປຘານຈາຣໍ, ອຈຣິໍ ທຸກ຺ກຣໍ ອຫໍ.

໑໗. ພາຣາຓສິຍໍ ອິສິປຕເນ, ຈກ຺ກໍ ປວຕ຺ຕິຕໍ ມຍາ;

ອຫໍ ໂຄຕມສມ຺ພຸທ຺ໂຘ, ສຣຓໍ ສພ຺ພປາຓິນໍ.

໑໘. ໂກລິໂຕ ອຸປຕິສ຺ໂສ ຈ, ທ຺ເວ ຠິກ຺ຂູ ອຄ຺ຄສາວກາ;

ອານນ຺ໂທ ນາມຸປຏ຺ຐາໂກ, ສນ຺ຕິກາວຈໂຣ ມມ;

ເຂມາ ອຸປ຺ປລວຓ຺ຓາ ຈ, ຠິກ຺ຂຸນີ ອຄ຺ຄສາວິກາ.

໑໙. ຈິຕ຺ໂຕ ຫຕ຺ຖາຬວໂກ ຈ, ອຄ຺ຄຸປຏ຺ຐາກຸປາສກາ;

ນນ຺ທມາຕາ ຈ ອຸຕ຺ຕຣາ, ອຄ຺ຄຸປຏ຺ຐິກຸປາສິກາ.

໒໐. ອຫໍ ອສ຺ສຕ຺ຖມູລມ຺ຫິ, ປຕ຺ໂຕ ສມ຺ໂພຘິມຸຕ຺ຕມໍ;

ພ຺ຍາມປ຺ປຠາ ສທາ ມຍ຺ຫໍ, ໂສຬສຫຕ຺ຖມຸຄ຺ຄຕາ.

໒໑. ອປ຺ປໍ ວສ຺ສສຕໍ ອາຍຸ, ອິທາເນຕຣຫິ ວິຊ຺ຊຕິ;

ຕາວຕາ ຕິຏ຺ຐມາໂນຫໍ, ຕາເຣມິ ຊນຕໍ ພຫຸໍ.

໒໒. ຐປຍິຕ຺ວານ ຘມ຺ມຸກ຺ກໍ, ປຈ຺ຉິມໍ ຊນໂພຘນໍ;

ອຫມ຺ປິ ນຈິຣສ຺ເສວ, ສທ຺ຘິໍ ສາວກສງ຺ຆໂຕ;

ອິເຘວ ປຣິນິພ຺ພິສ຺ສໍ, ອຄ຺ຄີ ວາຫາຣສງ຺ຂຍາ.

໒໓. ຕານິ ຈ ອຕຸລເຕຊານິ, ອິມານິ ຈ ທສພລານິ [ຍສພລານິ (ອຏ຺ຐ.)];

ອຍຎ຺ຈ ຄຸຓຘາຣໂຓ ເທໂຫ, ທ຺ວຕ຺ຕິໍສວຣລກ຺ຂຓວິຈິຕ຺ໂຕ.

໒໔. ທສ ທິສາ ປຠາເສຕ຺ວາ, ສຕຣໍສີວ ຉປ຺ປຠາ;

ສພ຺ພໍ ຕມນ຺ຕຣຫິສ຺ສນ຺ຕິ, ນນຸ ຣິຕ຺ຕາ ສພ຺ພສງ຺ຂາຣາຕິ.

ໂຄຕມສ຺ສ ຠຄວໂຕ ວໍໂສ ປຎ຺ຈວີສຕິໂມ.