໒໕. ໂກຓາຄມນພຸທ຺ຘວໍໂສ

໑. ກກຸສນ຺ຘສ຺ສ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ໂກຓາຄມໂນ ນາມ ຊິໂນ, ໂລກເຊຏ຺ໂຐ ນຣາສໂຠ.

໒. ທສຘມ຺ເມ ປູຣຍິຕ຺ວານ, ກນ຺ຕາຣໍ ສມຕິກ຺ກມິ;

ປວາຫິຍ ມລໍ ສພ຺ພໍ, ປຕ຺ໂຕ ສມ຺ໂພຘິມຸຕ຺ຕມໍ.

໓. ຘມ຺ມຈກ຺ກໍ ປວຕ຺ເຕນ຺ເຕ, ໂກຓາຄມນນາຍເກ;

ຕິໍສໂກຏິສຫສ຺ສານໍ, ປຐມາຠິສມໂຍ ອຫຸ.

໔. ປາຏິຫີຣໍ ກໂຣນ຺ເຕ ຈ, ປຣວາທປ຺ປມທ຺ທເນ;

ວີສຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໕. ຕໂຕ ວິກຸພ຺ພນໍ ກຕ຺ວາ, ຊິໂນ ເທວປຸຣໍ ຄໂຕ;

ວສເຕ ຕຕ຺ຖ ສມ຺ພຸທ຺ໂຘ, ສິລາຍ ປຓ຺ຑຸກມ຺ພເລ.

໖. ປກຣເຓ ສຕ຺ຕ ເທເສນ຺ໂຕ, ວສ຺ສໍ ວສຕິ ໂສ ມຸນິ;

ທສໂກຏິສຫສ຺ສານໍ, ຕຕິຍາຠິສມໂຍ ອຫຸ.

໗. ຕສ຺ສາປິ ເທວເທວສ຺ສ, ເອໂກ ອາສິ ສມາຄໂມ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໘. ຕິໍສຠິກ຺ຂຸສຫສ຺ສານໍ, ຕທາ ອາສິ ສມາຄໂມ;

ໂອຆານມຕິກ຺ກນ຺ຕານໍ, ຠິຊ຺ຊິຕານຎ຺ຈ ມຈ຺ຈຸຍາ.

໙. ອຫໍ ເຕນ ສມເຍນ, ປພ຺ພໂຕ ນາມ ຂຕ຺ຕິໂຍ;

ມິຕ຺ຕາມຈ຺ເຈຫິ ສມ຺ປນ຺ໂນ, ອນນ຺ຕພລວາຫໂນ.

໑໐. ສມ຺ພຸທ຺ຘທສ຺ສນໍ ຄນ຺ຕ຺ວາ, ສຸຕ຺ວາ ຘມ຺ມມນຸຕ຺ຕຣໍ;

ນິມນ຺ເຕຕ຺ວາ ສຊິນສງ຺ຆໍ, ທານໍ ທຕ຺ວາ ຍທິຈ຺ຉກໍ.

໑໑. ປຏ຺ຏຸຓ຺ຓໍ ຈີນປຏ຺ຏຎ຺ຈ, ໂກເສຍ຺ຍໍ ກມ຺ພລມ຺ປິ ຈ;

ໂສວຓ຺ຓປາທຸກຎ຺ເຈວ, ອທາສິໍ ສຕ຺ຖຸສາວເກ.

໑໒. ໂສປິ ມໍ ພຸທ຺ໂຘ ພ຺ຍາກາສິ, ສງ຺ຆມຊ຺ເຌ ນິສີທິຍ;

‘‘ອິມມ຺ຫິ ຠທ຺ທເກ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໓. ‘‘ອຫຸ ກປິລວ຺ຫຍາ ຣມ຺ມາ…ເປ… ເຫສ຺ສາມ ສມ຺ມຸຂາ ອິມໍ’’.

໑໔. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໕. ສພ຺ພຎ຺ຎຸຕໍ ຄເວສນ຺ໂຕ, ທານໍ ທຕ຺ວາ ນຣຸຕ຺ຕເມ;

ໂອຫາຍາຫໍ ມຫາຣຊ຺ຊໍ, ປພ຺ພຊິໍ ຊິນສນ຺ຕິເກ [ຕສ຺ສ ສນ຺ຕິເກ (ສີ.)].

໑໖. ນຄຣໍ ໂສຠວຕີ ນາມ, ໂສໂຠ ນາມາສິ ຂຕ຺ຕິໂຍ;

ວສເຕ ຕຕ຺ຖ ນຄເຣ, ສມ຺ພຸທ຺ຘສ຺ສ ມຫາກຸລໍ.

໑໗. ພ຺ຣາຫ຺ມໂຓ ຍຎ຺ຎທຕ຺ໂຕ ຈ, ອາສິ ພຸທ຺ຘສ຺ສ ໂສ ປິຕາ;

ອຸຕ຺ຕຣາ ນາມ ຊນິກາ, ໂກຓາຄມນສ຺ສ ສຕ຺ຖຸໂນ.

໑໘. ຕີຓິ ວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ຕຸສິຕສນ຺ຕຸສິຕສນ຺ຕຸຏ຺ຐາ, ຕໂຍ ປາສາທມຸຕ຺ຕມາ.

໑໙. ອນູນໂສຬສສຫສ຺ສານິ, ນາຣິໂຍ ສມລງ຺ກຕາ;

ຣຸຈິຄຕ຺ຕາ ນາມ ນາຣີ, ສຕ຺ຖວາໂຫ ນາມ ອຕ຺ຣໂຊ.

໒໐. ນິມິຕ຺ເຕ ຈຕຸໂຣ ທິສ຺ວາ, ຫຕ຺ຖິຍາເນນ ນິກ຺ຂມິ;

ຉມາສໍ ປຘານຈາຣໍ, ອຈຣີ ປຸຣິສຸຕ຺ຕໂມ.

໒໑. ພ຺ຣຫ຺ມຸນາ ຍາຈິໂຕ ສນ຺ໂຕ, ໂກຓາຄມນນາຍໂກ;

ວຕ຺ຕິ ຈກ຺ກໍ ມຫາວີໂຣ, ມິຄທາເຍ ນຣຸຕ຺ຕໂມ.

໒໒. ຠິຍ຺ຍໂສ ອຸຕ຺ຕໂຣ ນາມ, ອເຫສຸໍ ອຄ຺ຄສາວກາ;

ໂສຕ຺ຖິໂຊ ນາມຸປຏ຺ຐາໂກ, ໂກຓາຄມນສ຺ສ ສຕ຺ຖຸໂນ.

໒໓. ສມຸທ຺ທາ ອຸຕ຺ຕຣາ ເຈວ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ອຸທຸມ຺ພໂຣຕິ ປວຸຈ຺ຈຕິ.

໒໔. ອຸຄ຺ໂຄ ຈ ໂສມເທໂວ ຈ, ອເຫສຸໍ ອຄ຺ຄຸປຏ຺ຐກາ;

ສີວລາ ເຈວ ສາມາ ຈ, ອເຫສຸໍ ອຄ຺ຄຸປຏ຺ຐິກາ.

໒໕. ອຸຈ຺ຈຕ຺ຕເນນ ໂສ ພຸທ຺ໂຘ, ຕິໍສຫຕ຺ຖສມຸຄ຺ຄໂຕ;

ອຸກ຺ກາມຸເຂ ຍຖາ ກມ຺ພຸ, ເອວໍ ຣໍສີຫິ ມຓ຺ຑິໂຕ.

໒໖. ຕິໍສວສ຺ສສຫສ຺ສານິ, ອາຍຸ ພຸທ຺ຘສ຺ສ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໗. ຘມ຺ມເຈຕິໍ ສມຸສ຺ເສຕ຺ວາ, ຘມ຺ມທຸສ຺ສວິຠູສິຕໍ;

ຘມ຺ມປຸປ຺ຜຄຸຬໍ ກຕ຺ວາ, ນິພ຺ພຸໂຕ ໂສ ສສາວໂກ.

໒໘. ມຫາວິລາໂສ ຕສ຺ສ ຊໂນ, ສິຣິຘມ຺ມປ຺ປກາສໂນ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໒໙. ໂກຓາຄມໂນ ສມ຺ພຸທ຺ໂຘ, ປພ຺ພຕາຣາມມ຺ຫິ ນິພ຺ພຸໂຕ;

ຘາຕຸວິຕ຺ຖາຣິກໍ ອາສິ, ເຕສຸ ເຕສຸ ປເທສໂຕຕິ.

ໂກຓາຄມນສ຺ສ ຠຄວໂຕ ວໍໂສ ເຕວີສຕິໂມ.