໒໔. ກກຸສນ຺ຘພຸທ຺ຘວໍໂສ

໑. ເວສ຺ສຠຸສ຺ສ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ກກຸສນ຺ໂຘ ນາມ ນາເມນ, ອປ຺ປເມຍ຺ໂຍ ທຸຣາສໂທ.

໒. ອຸຄ຺ຆາເຏຕ຺ວາ ສພ຺ພຠວໍ, ຈຣິຍາຍ ປາຣມິໍ ຄໂຕ;

ສີໂຫວ ປຎ຺ຊຣໍ ເຠຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ.

໓. ຘມ຺ມຈກ຺ກໍ ປວຕ຺ເຕນ຺ເຕ, ກກຸສນ຺ເຘ ໂລກນາຍເກ;

ຈຕ຺ຕາຣີສໂກຏິສຫສ຺ສານໍ, ຘມ຺ມາຠິສມໂຍ ອຫຸ.

໔. ອນ຺ຕລິກ຺ຂມ຺ຫິ ອາກາເສ, ຍມກໍ ກຕ຺ວາ ວິກຸພ຺ພນໍ;

ຕິໍສໂກຏິສຫສ຺ສານໍ, ໂພເຘສິ ເທວມານຸເສ.

໕. ນຣເທວສ຺ສ ຍກ຺ຂສ຺ສ, ຈຕຸສຈ຺ຈປ຺ປກາສເນ;

ຘມ຺ມາຠິສມໂຍ ຕສ຺ສ, ຄຓນາໂຕ ອສງ຺ຂິໂຍ.

໖. ກກຸສນ຺ຘສ຺ສ ຠຄວໂຕ, ເອໂກ ອາສິ ສມາຄໂມ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໗. ຈຕ຺ຕາລີສສຫສ຺ສານໍ, ຕທາ ອາສິ ສມາຄໂມ;

ທນ຺ຕຠູມິມນຸປ຺ປຕ຺ຕານໍ, ອາສວາຣິຄຓກ຺ຂຍາ.

໘. ອຫໍ ເຕນ ສມເຍນ, ເຂໂມ ນາມາສິ ຂຕ຺ຕິໂຍ;

ຕຖາຄເຕ ຊິນປຸຕ຺ເຕ, ທານໍ ທຕ຺ວາ ອນປ຺ປກໍ.

໙. ປຕ຺ຕຎ຺ຈ ຈີວຣໍ ທຕ຺ວາ, ອຎ຺ຊນໍ ມຘຸລຏ຺ຐິກໍ;

ອິເມຕໍ ປຕ຺ຖິຕໍ ສພ຺ພໍ, ປຏິຍາເທມິ ວຣໍ ວຣໍ.

໑໐. ໂສປິ ມໍ ພຸທ຺ໂຘ ພ຺ຍາກາສິ, ກກຸສນ຺ໂຘ ວິນາຍໂກ;

‘‘ອິມມ຺ຫິ ຠທ຺ທເກ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໑. ‘‘ອຫຸ ກປິລວ຺ຫຍາ ຣມ຺ມາ…ເປ… ເຫສ຺ສາມ ສມ຺ມຸຂາ ອິມໍ’’.

໑໒. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໓. ນຄຣໍ ເຂມາວຕີ ນາມ, ເຂໂມ ນາມາສຫໍ ຕທາ;

ສພ຺ພຎ຺ຎຸຕໍ ຄເວສນ຺ໂຕ, ປພ຺ພຊິໍ ຕສ຺ສ ສນ຺ຕິເກ.

໑໔. ພ຺ຣາຫ຺ມໂຓ ອຄ຺ຄິທຕ຺ໂຕ ຈ, ອາສິ ພຸທ຺ຘສ຺ສ ໂສ ປິຕາ;

ວິສາຂາ ນາມ ຊນິກາ, ກກຸສນ຺ຘສ຺ສ ສຕ຺ຖຸໂນ.

໑໕. ວສເຕ ຕຕ຺ຖ ເຂເມ ປຸເຣ, ສມ຺ພຸທ຺ຘສ຺ສ ມຫາກຸລໍ;

ນຣານໍ ປວຣໍ ເສຏ຺ຐໍ, ຊາຕິມນ຺ຕໍ ມຫາຍສໍ.

໑໖. ຈຕຸວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ກາມ -ກາມວຓ຺ຓ-ກາມສຸທ຺ຘິນາມາ [ສຸຈິ ສຸຣຸຈິ ຣຕິວທ຺ຘນນາມກາ (ສີ.)], ຕໂຍ ປາສາທມຸຕ຺ຕມາ.

໑໗. ສມຕິໍສສຫສ຺ສານິ, ນາຣິໂຍ ສມລງ຺ກຕາ;

ໂຣຈິນີ ນາມ ສາ ນາຣີ, ອຸຕ຺ຕໂຣ ນາມ ອຕ຺ຣໂຊ.

໑໘. ນິມິຕ຺ເຕ ຈຕຸໂຣ ທິສ຺ວາ, ຣຖຍາເນນ ນິກ຺ຂມິ;

ອນູນອຏ຺ຐມາສານິ, ປຘານໍ ປທຫີ ຊິໂນ.

໑໙. ພ຺ຣຫ຺ມຸນາ ຍາຈິໂຕ ສນ຺ໂຕ, ກກຸສນ຺ໂຘ ວິນາຍໂກ;

ວຕ຺ຕິ ຈກ຺ກໍ ມຫາວີໂຣ, ມິຄທາເຍ ນຣຸຕ຺ຕໂມ.

໒໐. ວິຘຸໂຣ ຈ ສຎ຺ຊີໂວ ຈ, ອເຫສຸໍ ອຄ຺ຄສາວກາ;

ພຸທ຺ຘິໂຊ ນາມຸປຏ຺ຐາໂກ, ກກຸສນ຺ຘສ຺ສ ສຕ຺ຖຸໂນ.

໒໑. ສາມາ ຈ ຈມ຺ປານາມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ສິຣີໂສຕິ ປວຸຈ຺ຈຕິ.

໒໒. ອຈ຺ຈຸໂຕ ຈ ສຸມໂນ ຈ, ອເຫສຸໍ ອຄ຺ຄຸປຏ຺ຐກາ;

ນນ຺ທາ ເຈວ ສຸນນ຺ທາ ຈ, ອເຫສຸໍ ອຄ຺ຄຸປຏ຺ຐິກາ.

໒໓. ຈຕ຺ຕາລີສຣຕນານິ, ອຈ຺ຈຸຄ຺ຄໂຕ ມຫາມຸນິ;

ກນກປ຺ປຠາ ນິຈ຺ຉຣຕິ, ສມນ຺ຕາ ທສໂຍຊນໍ.

໒໔. ຈຕ຺ຕາລີສວສ຺ສສຫສ຺ສານິ, ອາຍຸ ຕສ຺ສ ມເຫສິໂນ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໕. ຘມ຺ມາປຓໍ ປສາເຣຕ຺ວາ, ນຣນາຣີນໍ ສເທວເກ;

ນທິຕ຺ວາ ສີຫນາທໍວ, ນິພ຺ພຸໂຕ ໂສ ສສາວໂກ.

໒໖. ອຏ຺ຐງ຺ຄວຈນສມ຺ປນ຺ໂນ, ອຈ຺ຉິທ຺ທານິ ນິຣນ຺ຕຣໍ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໒໗. ກກຸສນ຺ໂຘ ຊິນວໂຣ, ເຂມາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຖູປວໂຣ, ຄາວຸຕໍ ນຠມຸຄ຺ຄໂຕຕິ.

ກກຸສນ຺ຘສ຺ສ ຠຄວໂຕ ວໍໂສ ທ຺ວາວີສຕິໂມ.