໒໓. ເວສ຺ສຠູພຸທ຺ຘວໍໂສ

໑. ຕຕ຺ເຖວ ມຓ຺ຑກປ຺ປມ຺ຫິ, ອສໂມ ອປ຺ປຏິປຸຄ຺ຄໂລ;

ເວສ຺ສຠູ ນາມ ນາເມນ, ໂລເກ ອຸປ຺ປຊ຺ຊິ ນາຍໂກ [ໂສ ຊິໂນ (ສ຺ຍາ. ກໍ. ກ.)].

໒. ອາທິຕ຺ຕໍ ວຕ ຣາຄຄ຺ຄິ, ຕຓ຺ຫານໍ ວິຊິຕໍ ຕທາ;

ນາໂຄວ ພນ຺ຘນໍ ເຉຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ.

໓. ຘມ຺ມຈກ຺ກໍ ປວຕ຺ເຕນ຺ເຕ, ເວສ຺ສຠູໂລກນາຍເກ;

ອສີຕິໂກຏິສຫສ຺ສານໍ, ປຐມາຠິສມໂຍ ອຫຸ.

໔. ປກ຺ກນ຺ເຕ ຈາຣິກໍ ຣຏ຺ເຐ, ໂລກເຊຏ຺ເຐ ນຣາສເຠ;

ສຕ຺ຕຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໕. ມຫາທິຏ຺ຐິໍ ວິໂນເທນ຺ໂຕ, ປາຏິເຫຣໍ ກໂຣຕິ ໂສ;

ສມາຄຕາ ນຣມຣູ, ທສສຫສ຺ສີ ສເທວເກ.

໖. ມຫາອຈ຺ຉຣິຍໍ ທິສ຺ວາ, ອພ຺ຠຸຕໍ ໂລມຫໍສນໍ;

ເທວາ ເຈວ ມນຸສ຺ສາ ຈ, ພຸຊ຺ຌເຣ ສຏ຺ຐິໂກຏິໂຍ.

໗. ສນ຺ນິປາຕາ ຕໂຍ ອາສຸໍ, ເວສ຺ສຠຸສ຺ສ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໘. ອສີຕິຠິກ຺ຂຸສຫສ຺ສານໍ, ປຐໂມ ອາສິ ສມາຄໂມ;

ສຕ຺ຕຕິຠິກ຺ຂຸສຫສ຺ສານໍ, ທຸຕິໂຍ ອາສິ ສມາຄໂມ.

໙. ສຏ຺ຐິຠິກ຺ຂຸສຫສ຺ສານໍ, ຕຕິໂຍ ອາສິ ສມາຄໂມ;

ຊຣາທິຠຍຠີຕານໍ, ໂອຣສານໍ ມເຫສິໂນ.

໑໐. ອຫໍ ເຕນ ສມເຍນ, ສຸທສ຺ສໂນ ນາມ ຂຕ຺ຕິໂຍ;

ນິມນ຺ເຕຕ຺ວາ ມຫາວີຣໍ, ທານໍ ທຕ຺ວາ ມຫາຣຫໍ;

ອນ຺ນປາເນນ ວຕ຺ເຖນ, ສສງ຺ຆໍ ຊິນ ປູຊຍິໍ.

໑໑. ຕສ຺ສ ພຸທ຺ຘສ຺ສ ອສມສ຺ສ, ຈກ຺ກໍ ວຕ຺ຕິຕມຸຕ຺ຕມໍ;

ສຸຕ຺ວານ ປຓິຕໍ ຘມ຺ມໍ, ປພ຺ພຊ຺ຊມຠິໂຣຈຍິໍ.

໑໒. ມຫາທານໍ ປວຕ຺ເຕຕ຺ວາ, ຣຕ຺ຕິນ຺ທິວມຕນ຺ທິໂຕ;

ປພ຺ພຊ຺ຊໍ ຄຸຓສມ຺ປນ຺ນໍ, ປພ຺ພຊິໍ ຊິນສນ຺ຕິເກ.

໑໓. ອາຈາຣຄຸຓສມ຺ປນ຺ໂນ, ວຕ຺ຕສີລສມາຫິໂຕ;

ສພ຺ພຎ຺ຎຸຕໍ ຄເວສນ຺ໂຕ, ຣມາມິ ຊິນສາສເນ.

໑໔. ສທ຺ຘາປີຕິໍ ອຸປຄນ຺ຕ຺ວາ, ພຸທ຺ຘໍ ວນ຺ທາມິ ສຕ຺ຖຣໍ;

ປີຕິ ອຸປ຺ປຊ຺ຊຕິ ມຍ຺ຫໍ, ໂພຘິຍາເຍວ ກາຣຓາ.

໑໕. ອນິວຕ຺ຕມານສໍ ຎຕ຺ວາ, ສມ຺ພຸທ຺ໂຘ ເອຕທພ຺ຣວິ;

‘‘ເອກຕິໍເສ ອິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໖. ‘‘ອຫຸ ກປິລວ຺ຫຍາ ຣມ຺ມາ…ເປ… ເຫສ຺ສາມ ສມ຺ມຸຂາ ອິມໍ’’.

໑໗. ຕສ຺ສາຫໍ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໘. ອໂນມໍ ນາມ ນຄຣໍ, ສຸປ຺ປຕີໂຕ ນາມ ຂຕ຺ຕິໂຍ;

ມາຕາ ຍສວຕີ ນາມ, ເວສ຺ສຠຸສ຺ສ ມເຫສິໂນ.

໑໙. ຉ ຈ ວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ຣຸຈິ ສຸຣຸຈິ ຣຕິວຑ຺ຒໂນ, ຕໂຍ ປາສາທມຸຕ຺ຕມາ.

໒໐. ອນູນຕິໍສສຫສ຺ສານິ, ນາຣິໂຍ ສມລງ຺ກຕາ;

ສຸຈິຕ຺ຕາ ນາມ ສາ ນາຣີ, ສຸປ຺ປພຸທ຺ໂຘ ນາມ ອຕ຺ຣໂຊ.

໒໑. ນິມິຕ຺ເຕ ຈຕຸໂຣ ທິສ຺ວາ, ສິວິກາຍາຠິນິກ຺ຂມິ;

ຉມາສໍ ປຘານຈາຣໍ, ອຈຣີ ປຸຣິສຸຕ຺ຕໂມ.

໒໒. ພ຺ຣຫ຺ມຸນາ ຍາຈິໂຕ ສນ຺ໂຕ, ເວສ຺ສຠູໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ອຣຸຓາຣາເມ ນຣຸຕ຺ຕໂມ.

໒໓. ໂສໂຓ ຈ ອຸຕ຺ຕໂຣ ເຈວ, ອເຫສຸໍ ອຄ຺ຄສາວກາ;

ອຸປສນ຺ໂຕ ນາມຸປຏ຺ຐາໂກ, ເວສ຺ສຠຸສ຺ສ ມເຫສິໂນ.

໒໔. ຣາມາ [ທາມາ (ສີ.)] ເຈວ ສມາລາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ມຫາສາໂລຕິ ວຸຈ຺ຈຕິ.

໒໕. ໂສຕ຺ຖິໂກ ເຈວ ຣມ຺ໂຠ ຈ, ອເຫສຸໍ ອຄ຺ຄຸປຏ຺ຐກາ;

ໂຄຕມີ ສິຣິມາ ເຈວ, ອເຫສຸໍ ອຄ຺ຄຸປຏ຺ຐິກາ.

໒໖. ສຏ຺ຐິຣຕນມຸພ຺ເພໂຘ, ເຫມຍູປສມູປໂມ;

ກາຍາ ນິຈ຺ຉຣຕິ ຣສ຺ມິ, ຣຕ຺ຕິໍວ ປພ຺ພເຕ ສິຂີ.

໒໗. ສຏ຺ຐິວສ຺ສສຫສ຺ສານິ, ອາຍຸ ຕສ຺ສ ມເຫສິໂນ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໘. ຘມ຺ມໍ ວິຕ຺ຖາຣິກໍ ກຕ຺ວາ, ວິຠຊິຕ຺ວາ ມຫາຊນໍ;

ຘມ຺ມນາວໍ ຐເປຕ຺ວານ, ນິພ຺ພຸໂຕ ໂສ ສສາວໂກ.

໒໙. ທສ຺ສເນຍ຺ຍໍ ສພ຺ພຊນໍ, ວິຫາຣໍ ອິຣິຍາປຖໍ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໓໐. ເວສ຺ສຠູ ຊິນວໂຣ ສຕ຺ຖາ, ເຂມາຣາມມ຺ຫິ ນິພ຺ພຸໂຕ;

ຘາຕຸວິຕ຺ຖາຣິກໍ ອາສິ, ເຕສຸ ເຕສຸ ປເທສໂຕຕິ.

ເວສ຺ສຠຸສ຺ສ ຠຄວໂຕ ວໍໂສ ເອກວີສຕິໂມ.