໒໒. ສິຂີພຸທ຺ຘວໍໂສ

໑. ວິປສ຺ສິສ຺ສ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ສິຂິວ຺ຫໂຍ ອາສິ ຊິໂນ, ອສໂມ ອປ຺ປຏິປຸຄ຺ຄໂລ.

໒. ມາຣເສນໍ ປມທ຺ທິຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ;

ຘມ຺ມຈກ຺ກໍ ປວຕ຺ເຕສິ, ອນຸກມ຺ປາຍ ປາຓິນໍ.

໓. ຘມ຺ມຈກ຺ກໍ ປວຕ຺ເຕນ຺ເຕ, ສິຂິມ຺ຫິ ຊິນປຸງ຺ຄເວ [ມຸນິປຸງ຺ຄເວ (ສີ.)];

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໔. ອປຣມ຺ປິ ຘມ຺ມໍ ເທເສນ຺ເຕ, ຄຓເສຏ຺ເຐ ນຣຸຕ຺ຕເມ;

ນວຸຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໕. ຍມກປາຏິຫາຣິຍຎ຺ຈ [ຍມກໍ ປາຏິຫີຣຎ຺ຈ (ສີ.)], ທສ຺ສຍນ຺ເຕ ສເທວເກ;

ອສີຕິໂກຏິສຫສ຺ສານໍ, ຕຕິຍາຠິສມໂຍ ອຫຸ.

໖. ສນ຺ນິປາຕາ ຕໂຍ ອາສຸໍ, ສິຂິສ຺ສາປິ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໗. ຠິກ຺ຂຸສຕສຫສ຺ສານໍ, ປຐໂມ ອາສິ ສມາຄໂມ;

ອສີຕິຠິກ຺ຂຸສຫສ຺ສານໍ, ທຸຕິໂຍ ອາສິ ສມາຄໂມ.

໘. ສຕ຺ຕຕິຠິກ຺ຂຸສຫສ຺ສານໍ, ຕຕິໂຍ ອາສິ ສມາຄໂມ;

ອນຸປລິຕ຺ໂຕ ປທຸມໍວ, ໂຕຍມ຺ຫິ ສມ຺ປວຑ຺ຒິຕໍ.

໙. ອຫໍ ເຕນ ສມເຍນ, ອຣິນ຺ທໂມ ນາມ ຂຕ຺ຕິໂຍ;

ສມ຺ພຸທ຺ຘປ຺ປມຸຂໍ ສງ຺ຆໍ, ອນ຺ນປາເນນ ຕປ຺ປຍິໍ.

໑໐. ພຫຸໍ ທຸສ຺ສວຣໍ ທຕ຺ວາ, ທຸສ຺ສໂກຏິໍ ອນປ຺ປກໍ;

ອລງ຺ກຕໍ ຫຕ຺ຖິຍານໍ, ສມ຺ພຸທ຺ຘສ຺ສ ອທາສຫໍ.

໑໑. ຫຕ຺ຖິຍານໍ ນິມ຺ມິນິຕ຺ວາ, ກປ຺ປິຍໍ ອຸປນາມຍິໍ;

ປູຣຍິໍ ມານສໍ ມຍ຺ຫໍ, ນິຈ຺ຈໍ ທຬ຺ຫມຸປຏ຺ຐິຕໍ.

໑໒. ໂສປິ ມໍ ພຸທ຺ໂຘ ພ຺ຍາກາສິ, ສິຂີ ໂລກຄ຺ຄນາຍໂກ;

‘‘ເອກຕິໍເສ ອິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໓. ‘‘ອຫຸ ກປິລວ຺ຫຍາ ຣມ຺ມາ…ເປ… ເຫສ຺ສາມ ສມ຺ມຸຂາ ອິມໍ’’.

໑໔. ຕສ຺ສາຫໍ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໕. ນຄຣໍ ອຣຸຓວຕີ ນາມ, ອຣຸໂຓ ນາມ ຂຕ຺ຕິໂຍ;

ປຠາວຕີ ນາມ ຊນິກາ, ສິຂິສ຺ສາປິ ມເຫສິໂນ.

໑໖. ສຕ຺ຕວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ສຸຈນ຺ທໂກ ຄິຣິ ວສໂຠ [ສຸຈນ຺ໂທ ຄິຣິວຫໂນ (ສີ.)], ຕໂຍ ປາສາທມຸຕ຺ຕມາ.

໑໗. ຈຕຸວີສສຫສ຺ສານິ, ນາຣິໂຍ ສມລງ຺ກຕາ;

ສພ຺ພກາມາ ນາມ ນາຣີ, ອຕຸໂລ ນາມ ອຕ຺ຣໂຊ.

໑໘. ນິມິຕ຺ເຕ ຈຕຸໂຣ ທິສ຺ວາ, ຫຕ຺ຖິຍາເນນ ນິກ຺ຂມິ;

ອຏ຺ຐມາສໍ ປຘານຈາຣໍ, ອຈຣີ ປຸຣິສຸຕ຺ຕໂມ.

໑໙. ພ຺ຣຫ຺ມຸນາ ຍາຈິໂຕ ສນ຺ໂຕ, ສິຂີ ໂລກຄ຺ຄນາຍໂກ;

ວຕ຺ຕິ ຈກ຺ກໍ ມຫາວີໂຣ, ມິຄທາເຍ ນຣຸຕ຺ຕໂມ.

໒໐. ອຠິຠູ ສມ຺ຠໂວ ເຈວ, ອເຫສຸໍ ອຄ຺ຄສາວກາ;

ເຂມງ຺ກໂຣ ນາມຸປຏ຺ຐາໂກ, ສິຂິສ຺ສາປິ ມເຫສິໂນ.

໒໑. ສຂິລາ ຈ ປທຸມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ປຸຓ຺ຑຣີໂກຕິ ວຸຈ຺ຈຕິ.

໒໒. ສິຣິວຑ຺ໂຒ ຈ ນນ຺ໂທ ຈ, ອເຫສຸໍ ອຄ຺ຄຸປຏ຺ຐກາ;

ຈິຕ຺ຕາ ເຈວ ສຸຄຸຕ຺ຕາ ຈ, ອເຫສຸໍ ອຄ຺ຄຸປຏ຺ຐິກາ.

໒໓. ອຸຈ຺ຈຕ຺ຕເນນ ໂສ ພຸທ຺ໂຘ, ສຕ຺ຕຕິຫຕ຺ຖມຸຄ຺ຄໂຕ;

ກຎ຺ຈນຄ຺ຆິຍສງ຺ກາໂສ, ທ຺ວຕ຺ຕິໍສວຣລກ຺ຂໂຓ.

໒໔. ຕສ຺ສາປິ ພ຺ຍາມປ຺ປຠາ ກາຍາ, ທິວາຣຕ຺ຕິໍ ນິຣນ຺ຕຣໍ;

ທິໂສທິສໍ ນິຈ຺ຉຣນ຺ຕິ, ຕີຓິໂຍຊນໂສ ປຠາ.

໒໕. ສຕ຺ຕຕິວສ຺ສສຫສ຺ສານິ, ອາຍຸ ຕສ຺ສ ມເຫສິໂນ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໖. ຘມ຺ມເມຆໍ ປວສ຺ເສຕ຺ວາ, ເຕມຍິຕ຺ວາ ສເທວເກ;

ເຂມນ຺ຕໍ ປາປຍິຕ຺ວານ, ນິພ຺ພຸໂຕ ໂສ ສສາວໂກ.

໒໗. ອນຸພ຺ຍຎ຺ຊນສມ຺ປນ຺ນໍ, ທ຺ວຕ຺ຕິໍສວຣລກ຺ຂຓໍ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໒໘. ສິຂີ ມຸນິວໂຣ ພຸທ຺ໂຘ, ອສ຺ສາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຖູປວໂຣ, ຕີຓິໂຍຊນມຸຄ຺ຄໂຕຕິ.

ສິຂິສ຺ສ ຠຄວໂຕ ວໍໂສ ວີສຕິໂມ.