໒໑. ວິປສ຺ສີພຸທ຺ຘວໍໂສ

໑. ຜຸສ຺ສສ຺ສ ຈ ອປເຣນ, ສມ຺ພຸທ຺ໂຘ ທ຺ວິປທຸຕ຺ຕໂມ;

ວິປສ຺ສີ ນາມ ນາເມນ, ໂລເກ ອຸປ຺ປຊ຺ຊິ ຈກ຺ຂຸມາ.

໒. ອວິຊ຺ຊໍ ສພ຺ພໍ ປທາເລຕ຺ວາ, ປຕ຺ໂຕ ສມ຺ໂພຘິມຸຕ຺ຕມໍ;

ຘມ຺ມຈກ຺ກໍ ປວຕ຺ເຕຕຸໍ, ປກ຺ກາມິ ພນ຺ຘຸມຕີປຸຣໍ.

໓. ຘມ຺ມຈກ຺ກໍ ປວຕ຺ເຕຕ຺ວາ, ອຸໂຠ ໂພເຘສິ ນາຍໂກ;

ຄຓນາຍ ນ ວຕ຺ຕພ຺ໂພ, ປຐມາຠິສມໂຍ ອຫຸ.

໔. ປຸນາປຣໍ ອມິຕຍໂສ, ຕຕ຺ຖ ສຈ຺ຈໍ ປກາສຍິ;

ຈຕຸຣາສີຕິສຫສ຺ສານໍ, ທຸຕິຍາຠິສມໂຍ ອຫຸ.

໕. ຈຕຸຣາສີຕິສຫສ຺ສານິ, ສມ຺ພຸທ຺ຘໍ ອນຸປພ຺ພຊຸໍ;

ເຕສມາຣາມປຕ຺ຕານໍ, ຘມ຺ມໍ ເທເສສິ ຈກ຺ຂຸມາ.

໖. ສພ຺ພາກາເຣນ ຠາສໂຕ, ສຸຕ຺ວາ ອຸປນິສາທິໂນ [ອຸປນິສ຺ສາ ຊິໂນ (ສ຺ຍາ. ກໍ.)];

ເຕປິ ຘມ຺ມວຣໍ ຄນ຺ຕ຺ວາ, ຕຕິຍາຠິສມໂຍ ອຫຸ.

໗. ສນ຺ນິປາຕາ ຕໂຍ ອາສຸໍ, ວິປສ຺ສິສ຺ສ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໘. ອຏ຺ຐສຏ຺ຐິສຕສຫສ຺ສານໍ, ປຐໂມ ອາສິ ສມາຄໂມ;

ຠິກ຺ຂຸສຕສຫສ຺ສານໍ, ທຸຕິໂຍ ອາສິ ສມາຄໂມ.

໙. ອສີຕິຠິກ຺ຂຸສຫສ຺ສານໍ, ຕຕິໂຍ ອາສິ ສມາຄໂມ;

ຕຕ຺ຖ ຠິກ຺ຂຸຄຓມຊ຺ເຌ, ສມ຺ພຸທ຺ໂຘ ອຕິໂຣຈຕິ.

໑໐. ອຫໍ ເຕນ ສມເຍນ, ນາຄຣາຊາ ມຫິທ຺ຘິໂກ;

ອຕຸໂລ ນາມ ນາເມນ, ປຸຎ຺ຎວນ຺ໂຕ ຊຸຕິນ຺ຘໂຣ.

໑໑. ເນການໍ ນາຄໂກຏີນໍ, ປຣິວາເຣຕ຺ວານຫໍ ຕທາ;

ວຊ຺ຊນ຺ໂຕ ທິພ຺ພຕຸຣິເຍຫິ, ໂລກເຊຏ຺ຐໍ ອຸປາຄມິໍ.

໑໒. ອຸປສງ຺ກມິຕ຺ວາ ສມ຺ພຸທ຺ຘໍ, ວິປສ຺ສິໍ ໂລກນາຍກໍ;

ມຓິມຸຕ຺ຕຣຕນຂຈິຕໍ, ສພ຺ພາຠຣຓວິຠູສິຕໍ;

ນິມນ຺ເຕຕ຺ວາ ຘມ຺ມຣາຊສ຺ສ, ສຸວຓ຺ຓປີຐມທາສຫໍ.

໑໓. ໂສປິ ມໍ ພຸທ຺ໂຘ ພ຺ຍາກາສິ, ສງ຺ຆມຊ຺ເຌ ນິສີທິຍ;

‘‘ເອກນວຸຕິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໔. ‘‘ອຫຸ ກປິລວ຺ຫຍາ ຣມ຺ມາ, ນິກ຺ຂມິຕ຺ວາ ຕຖາຄໂຕ;

ປຘານໍ ປທຫິຕ຺ວານ, ກຕ຺ວາ ທຸກ຺ກຣກາຣິກໍ.

໑໕. ‘‘ອຊປາລຣຸກ຺ຂມູລສ຺ມິໍ, ນິສີທິຕ຺ວາ ຕຖາຄໂຕ;

ຕຕ຺ຖ ປາຍາສໍ ປຄ຺ຄຍ຺ຫ, ເນຣຎ຺ຊຣມຸເປຫິຕິ.

໑໖. ‘‘ເນຣຎ຺ຊຣາຍ ຕີຣມ຺ຫິ, ປາຍາສໍ ອທ ໂສ ຊິໂນ;

ປຏິຍຕ຺ຕວຣມຄ຺ເຄນ, ໂພຘິມູລມຸເປຫິຕິ.

໑໗. ‘‘ຕໂຕ ປທກ຺ຂິຓໍ ກຕ຺ວາ, ໂພຘິມຓ຺ຑໍ ອນຸຕ຺ຕໂຣ;

ອສ຺ສຕ຺ຖມູເລ ສມ຺ໂພຘິໍ, ພຸຊ຺ຌິສ຺ສຕິ ມຫາຍໂສ.

໑໘. ‘‘ອິມສ຺ສ ຊນິກາ ມາຕາ, ມາຍາ ນາມ ຠວິສ຺ສຕິ;

ປິຕາ ສຸທ຺ໂຘທໂນ ນາມ, ອຍໍ ເຫສ຺ສຕິ ໂຄຕໂມ.

໑໙. ‘‘ອນາສວາ ວີຕຣາຄາ, ສນ຺ຕຈິຕ຺ຕາ ສມາຫິຕາ;

ໂກລິໂຕ ອຸປຕິສ຺ໂສ ຈ, ອຄ຺ຄາ ເຫສ຺ສນ຺ຕິ ສາວກາ;

ອານນ຺ໂທ ນາມຸປຏ຺ຐາໂກ, ອຸປຏ຺ຐິສ຺ສຕິມໍ ຊິນໍ.

໒໐. ‘‘ເຂມາ ອຸປ຺ປລວຓ຺ຓາ ຈ, ອຄ຺ຄາ ເຫສ຺ສນ຺ຕິ ສາວິກາ;

ອນາສວາ ວີຕຣາຄາ, ສນ຺ຕຈິຕ຺ຕາ ສມາຫິຕາ;

ໂພຘິ ຕສ຺ສ ຠຄວໂຕ, ອສ຺ສຕ຺ໂຖຕິ ປວຸຈ຺ຈຕິ.

໒໑. ‘‘ຈິຕ຺ໂຕ ຈ ຫຕ຺ຖາຬວໂກ, ອຄ຺ຄາ ເຫສ຺ສນ຺ຕຸປຏ຺ຐກາ;

ນນ຺ທມາຕາ ຈ ອຸຕ຺ຕຣາ, ອຄ຺ຄາ ເຫສ຺ສນ຺ຕຸປຏ຺ຐິກາ;

ອາຍຸ ວສ຺ສສຕໍ ຕສ຺ສ, ໂຄຕມສ຺ສ ຍສສ຺ສິໂນ.

໒໒. ‘‘ອິທໍ ສຸຕ຺ວານ ວຈນໍ…ເປ… ເຫສ຺ສາມ ສມ຺ມຸຂາ ອິມໍ’’.

໒໓. ຕສ຺ສາຫໍ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໒໔. ນຄຣໍ ພນ຺ຘຸມຕີ ນາມ, ພນ຺ຘຸມາ ນາມ ຂຕ຺ຕິໂຍ;

ມາຕາ ພນ຺ຘຸມຕີ ນາມ, ວິປສ຺ສິສ຺ສ ມເຫສິໂນ.

໒໕. ອຏ຺ຐວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ນນ຺ໂທ ສຸນນ຺ໂທ ສິຣິມາ, ຕໂຍ ປາສາທມຸຕ຺ຕມາ.

໒໖. ຕິຈຕ຺ຕາຣີສສຫສ຺ສານິ, ນາຣິໂຍ ສມລງ຺ກຕາ;

ສຸທສ຺ສນາ ນາມ ສາ ນາຣີ, ສມວຕ຺ຕກ຺ຂນ຺ໂຘ ນາມ ອຕ຺ຣໂຊ.

໒໗. ນິມິຕ຺ເຕ ຈຕຸໂຣ ທິສ຺ວາ, ຣຖຍາເນນ ນິກ຺ຂມິ;

ອນູນອຏ຺ຐມາສານິ, ປຘານໍ ປທຫີ ຊິໂນ.

໒໘. ພ຺ຣຫ຺ມຸນາ ຍາຈິໂຕ ສນ຺ໂຕ, ວິປສ຺ສີ ໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ມິຄທາເຍ ນຣຸຕ຺ຕໂມ.

໒໙. ຂຓ຺ໂຑ ຈ ຕິສ຺ສນາໂມ ຈ, ອເຫສຸໍ ອຄ຺ຄສາວກາ;

ອໂສໂກ ນາມຸປຏ຺ຐາໂກ, ວິປສ຺ສິສ຺ສ ມເຫສິໂນ.

໓໐. ຈນ຺ທາ ຈ ຈນ຺ທມິຕ຺ຕາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ປາຏລີຕິ ປວຸຈ຺ຈຕິ.

໓໑. ປຸນພ຺ພສຸມິຕ຺ໂຕ ນາໂຄ ຈ, ອເຫສຸໍ ອຄ຺ຄຸປຏ຺ຐກາ;

ສິຣິມາ ອຸຕ຺ຕຣາ ເຈວ, ອເຫສຸໍ ອຄ຺ຄຸປຏ຺ຐິກາ.

໓໒. ອສີຕິຫຕ຺ຖມຸພ຺ເພໂຘ, ວິປສ຺ສີ ໂລກນາຍໂກ;

ປຠາ ນິທ຺ຘາວຕິ ຕສ຺ສ, ສມນ຺ຕາ ສຕ຺ຕໂຍຊເນ.

໓໓. ອສີຕິວສ຺ສສຫສ຺ສານິ, ອາຍຸ ພຸທ຺ຘສ຺ສ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໓໔. ພຫຸເທວມນຸສ຺ສານໍ, ພນ຺ຘນາ ປຣິໂມຈຍິ;

ມຄ຺ຄາມຄ຺ຄຎ຺ຈ ອາຈິກ຺ຂິ, ອວເສສປຸຖຸຊ຺ຊເນ.

໓໕. ອາໂລກໍ ທສ຺ສຍິຕ຺ວານ, ເທເສຕ຺ວາ ອມຕໍ ປທໍ;

ຊລິຕ຺ວາ ອຄ຺ຄິກ຺ຂນ຺ໂຘວ, ນິພ຺ພຸໂຕ ໂສ ສສາວໂກ.

໓໖. ອິທ຺ຘິວຣໍ ປຸຎ຺ຎວຣໍ, ລກ຺ຂຓຎ຺ຈ ກຸສຸມິຕໍ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໓໗. ວິປສ຺ສີ ຊິນວໂຣ ພຸທ຺ໂຘ, ສຸມິຕ຺ຕາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຖູປວໂຣ, ສຕ຺ຕໂຍຊນມຸສ຺ສິໂຕຕິ.

ວິປສ຺ສິສ຺ສ ຠຄວໂຕ ວໍໂສ ເອກູນວີສຕິໂມ.