໒໐. ຜຸສ຺ສພຸທ຺ຘວໍໂສ

໑. ຕຕ຺ເຖວ ມຓ຺ຑກປ຺ປມ຺ຫິ, ອຫຸ ສຕ຺ຖາ ອນຸຕ຺ຕໂຣ;

ອນຸປໂມ ອສມສໂມ, ຜຸສ຺ໂສ ໂລກຄ຺ຄນາຍໂກ.

໒. ໂສປິ ສພ຺ພໍ ຕມໍ ຫນ຺ຕ຺ວາ, ວິຊເຏຕ຺ວາ ມຫາຊຏໍ;

ສເທວກໍ ຕປ຺ປຍນ຺ໂຕ, ອຠິວສ຺ສິ ອມຕມ຺ພຸນາ.

໓. ຘມ຺ມຈກ຺ກໍ ປວຕ຺ເຕນ຺ເຕ, ຜຸສ຺ເສ ນກ຺ຂຕ຺ຕມງ຺ຄເລ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໔. ນວຸຕິສຕສຫສ຺ສານໍ, ທຸຕິຍາຠິສມໂຍ ອຫຸ;

ອສີຕິສຕສຫສ຺ສານໍ, ຕຕິຍາຠິສມໂຍ ອຫຸ.

໕. ສນ຺ນິປາຕາ ຕໂຍ ອາສຸໍ, ຜຸສ຺ສສ຺ສາປິ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໖. ສຏ຺ຐິສຕສຫສ຺ສານໍ, ປຐໂມ ອາສິ ສມາຄໂມ;

ປຎ຺ຎາສສຕສຫສ຺ສານໍ, ທຸຕິໂຍ ອາສິ ສມາຄໂມ.

໗. ຈຕ຺ຕາຣີສສຕສຫສ຺ສານໍ, ຕຕິໂຍ ອາສິ ສມາຄໂມ;

ອນຸປາທາ ວິມຸຕ຺ຕານໍ, ໂວຈ຺ຉິນ຺ນປຏິສນ຺ຘິນໍ.

໘. ອຫໍ ເຕນ ສມເຍນ, ວິຊິຕາວີ ນາມ ຂຕ຺ຕິໂຍ;

ຉຑ຺ຑຍິຕ຺ວາ ມຫາຣຊ຺ຊໍ, ປພ຺ພຊິໍ ຕສ຺ສ ສນ຺ຕິເກ.

໙. ໂສປິ ມໍ ພຸທ຺ໂຘ ພ຺ຍາກາສິ, ຜຸສ຺ໂສ ໂລກຄ຺ຄນາຍໂກ;

‘‘ທ຺ເວນວຸເຕ ອິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໐. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໑. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໒. ສຸຕ຺ຕນ຺ຕໍ ວິນຍຎ຺ຈາປິ, ນວງ຺ຄໍ ສຕ຺ຖຸສາສນໍ;

ສພ຺ພໍ ປຣິຍາປຸຓິຕ຺ວາ, ໂສຠຍິໍ ຊິນສາສນໍ.

໑໓. ຕຕ຺ຖປ຺ປມຕ຺ໂຕ ວິຫຣນ຺ໂຕ, ພ຺ຣຫ຺ມໍ ຠາເວຕ຺ວ ຠາວນໍ;

ອຠິຎ຺ຎາສຸ ປາຣມິໍ ຄນ຺ຕ຺ວາ, ພ຺ຣຫ຺ມໂລກມຄຎ຺ຉຫໍ.

໑໔. ກາສິກໍ ນາມ ນຄຣໍ, ຊຍເສໂນ ນາມ ຂຕ຺ຕິໂຍ;

ສິຣິມາ ນາມ ຊນິກາ, ຜຸສ຺ສສ຺ສາປິ ມເຫສິໂນ.

໑໕. ນວວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ຄຣຸຬປກ຺ຂ ຫໍສ ສຸວຓ຺ຓຠາຣາ, ຕໂຍ ປາສາທມຸຕ຺ຕມາ.

໑໖. ຕິໍສອິຕ຺ຖິສຫສ຺ສານິ, ນາຣິໂຍ ສມລງ຺ກຕາ;

ກິສາໂຄຕມີ ນາມ ນາຣີ, ອນູປໂມ ນາມ ອຕ຺ຣໂຊ.

໑໗. ນິມິຕ຺ເຕ ຈຕຸໂຣ ທິສ຺ວາ, ຫຕ຺ຖິຍາເນນ ນິກ຺ຂມິ;

ຉມາສໍ ປຘານຈາຣໍ, ອຈຣີ ປຸຣິສຸຕ຺ຕໂມ.

໑໘. ພ຺ຣຫ຺ມຸນາ ຍາຈິໂຕ ສນ຺ໂຕ, ຜຸສ຺ໂສ ໂລກຄ຺ຄນາຍໂກ;

ວຕ຺ຕິ ຈກ຺ກໍ ມຫາວີໂຣ, ມິຄທາເຍ ນຣຸຕ຺ຕໂມ.

໑໙. ສຸຣກ຺ຂິໂຕ ຘມ຺ມເສໂນ, ອເຫສຸໍ ອຄ຺ຄສາວກາ;

ສຠິໂຍ ນາມຸປຏ຺ຐາໂກ, ຜຸສ຺ສສ຺ສາປິ ມເຫສິໂນ.

໒໐. ຈາລາ ຈ ອຸປຈາລາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ອາມຓ຺ໂຑຕິ ປວຸຈ຺ຈຕິ.

໒໑. ຘນຎ຺ຈໂຍ ວິສາໂຂ ຈ, ອເຫສຸໍ ອຄ຺ຄຸປຏ຺ຐກາ;

ປທຸມາ ເຈວ ນາຄາ ຈ, ອເຫສຸໍ ອຄ຺ຄຸປຏ຺ຐິກາ.

໒໒. ອຏ຺ຐປຓ຺ຓາສຣຕນໍ, ໂສປິ ອຈ຺ຈຸຄ຺ຄໂຕ ມຸນິ;

ໂສຠເຕ ສຕຣໍສີວ, ອຸຬຸຣາຊາວ ປູຣິໂຕ.

໒໓. ນວຸຕິວສ຺ສສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໒໔. ໂອວທິຕ຺ວາ ພຫູ ສຕ຺ເຕ, ສນ຺ຕາເຣຕ຺ວາ ພຫູ ຊເນ;

ໂສປິ ສຕ຺ຖາ ອຕຸລຍໂສ, ນິພ຺ພຸໂຕ ໂສ ສສາວໂກ.

໒໕. ຜຸສ຺ໂສ ຊິນວໂຣ ສຕ຺ຖາ, ເສນາຣາມມ຺ຫິ ນິພ຺ພຸໂຕ;

ຘາຕຸວິຕ຺ຖາຣິກໍ ອາສິ, ເຕສຸ ເຕສຸ ປເທສໂຕຕິ.

ຜຸສ຺ສສ຺ສ ຠຄວໂຕ ວໍໂສ ອຏ຺ຐາຣສໂມ.