໑໙. ຕິສ຺ສພຸທ຺ຘວໍໂສ

໑. ສິທ຺ຘຕ຺ຖສ຺ສ ອປເຣນ, ອສໂມ ອປ຺ປຏິປຸຄ຺ຄໂລ;

ອນນ຺ຕເຕໂຊ ອມິຕຍໂສ, ຕິສ຺ໂສ ໂລກຄ຺ຄນາຍໂກ.

໒. ຕມນ຺ຘກາຣໍ ວິຘມິຕ຺ວາ, ໂອຠາເສຕ຺ວາ ສເທວກໍ;

ອນຸກມ຺ປໂກ ມຫາວີໂຣ, ໂລເກ ອຸປ຺ປຊ຺ຊິ ຈກ຺ຂຸມາ.

໓. ຕສ຺ສາປິ ອຕຸລາ ອິທ຺ຘິ, ອຕຸລໍ ສີລໍ ສມາຘິ ຈ;

ສພ຺ພຕ຺ຖ ປາຣມິໍ ຄນ຺ຕ຺ວາ, ຘມ຺ມຈກ຺ກໍ ປວຕ຺ຕຍິ.

໔. ໂສ ພຸທ຺ໂຘ ທສສຫສ຺ສິມ຺ຫິ, ວິຎ຺ຎາເປສິ ຄິຣໍ ສຸຈິໍ;

ໂກຏິສຕານິ ອຠິສມິໍສຸ, ປຐເມ ຘມ຺ມເທສເນ.

໕. ທຸຕິໂຍ ນວຸຕິໂກຏີນໍ, ຕຕິໂຍ ສຏ຺ຐິໂກຏິໂຍ;

ພນ຺ຘນາໂຕ ປໂມເຈສິ, ສຕ຺ເຕ [ສມ຺ປຕ຺ເຕ (ກ.)] ນຣມຣູ ຕທາ.

໖. ສນ຺ນິປາຕາ ຕໂຍ ອາສຸໍ, ຕິສ຺ເສ ໂລກຄ຺ຄນາຍເກ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໗. ຂີຓາສວສຕສຫສ຺ສານໍ, ປຐໂມ ອາສິ ສມາຄໂມ;

ນວຸຕິສຕສຫສ຺ສານໍ, ທຸຕິໂຍ ອາສິ ສມາຄໂມ.

໘. ອສີຕິສຕສຫສ຺ສານໍ, ຕຕິໂຍ ອາສິ ສມາຄໂມ;

ຂີຓາສວານໍ ວິມລານໍ, ປຸປ຺ຜິຕານໍ ວິມຸຕ຺ຕິຍາ.

໙. ອຫໍ ເຕນ ສມເຍນ, ສຸຊາໂຕ ນາມ ຂຕ຺ຕິໂຍ;

ມຫາໂຠຄໍ ຉຑ຺ຑຍິຕ຺ວາ, ປພ຺ພຊິໍ ອິສິປພ຺ພຊໍ.

໑໐. ມຍິ ປພ຺ພຊິເຕ ສນ຺ເຕ, ອຸປ຺ປຊ຺ຊິ ໂລກນາຍໂກ;

ພຸທ຺ໂຘຕິ ສທ຺ທໍ ສຸຕ຺ວານ, ປີຕິ ເມ ອຸປປຊ຺ຊຖ.

໑໑. ທິພ຺ພໍ ມນ຺ທາຣວໍ ປຸປ຺ຜໍ, ປທຸມໍ ປາຣິຉຕ຺ຕກໍ;

ອຸໂຠ ຫຕ຺ເຖຫິ ປຄ຺ຄຍ຺ຫ, ຘຸນມາໂນ ອຸປາຄມິໍ.

໑໒. ຈຕຸວຓ຺ຓປຣິວຸຕໍ, ຕິສ຺ສໍ ໂລກຄ຺ຄນາຍກໍ;

ຕມຫໍ ປຸປ຺ຜໍ ຄເຫຕ຺ວາ, ມຕ຺ຖເກ ຘາຣຍິໍ ຊິນໍ.

໑໓. ໂສປິ ມໍ ພຸທ຺ໂຘ ພ຺ຍາກາສິ, ຊນມຊ຺ເຌ ນິສີທິຍ;

‘‘ທ຺ເວນວຸເຕ ອິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໔. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໕. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໖. ເຂມກໍ ນາມ ນຄຣໍ, ຊນສນ຺ໂຘ ນາມ ຂຕ຺ຕິໂຍ;

ປທຸມາ ນາມ ຊນິກາ, ຕິສ຺ສສ຺ສ ຈ ມເຫສິໂນ.

໑໗. ສຕ຺ຕວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ຄຸຫາເສລ ນາຣິສຍ ນິສຠາ [ກຸມຸໂທ ນາຬິໂຍ ປທຸໂມ (ກ.)], ຕໂຍ ປາສາທມຸຕ຺ຕມາ.

໑໘. ສມຕິໍສສຫສ຺ສານິ, ນາຣິໂຍ ສມລງ຺ກຕາ;

ສຸຠທ຺ທານາມິກາ ນາຣີ, ອານນ຺ໂທ ນາມ ອຕ຺ຣໂຊ.

໑໙. ນິມິຕ຺ເຕ ຈຕຸໂຣ ທິສ຺ວາ, ອສ຺ສຍາເນນ ນິກ຺ຂມິ;

ອນູນອຏ຺ຐມາສານິ, ປຘານໍ ປທຫີ ຊິໂນ.

໒໐. ພ຺ຣຫ຺ມຸນາ ຍາຈິໂຕ ສນ຺ໂຕ, ຕິສ຺ໂສ ໂລກຄ຺ຄນາຍໂກ;

ວຕ຺ຕິ ຈກ຺ກໍ ມຫາວີໂຣ, ຍສວຕິຍມຸຕ຺ຕເມ.

໒໑. ພ຺ຣຫ຺ມເທໂວ ອຸທໂຍ ຈ, ອເຫສຸໍ ອຄ຺ຄສາວກາ;

ສມງ຺ໂຄ ນາມຸປຏ຺ຐາໂກ, ຕິສ຺ສສ຺ສ ຈ ມເຫສິໂນ.

໒໒. ຜຸສ຺ສາ ເຈວ ສຸທຕ຺ຕາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ອສໂນຕິ ປວຸຈ຺ຈຕິ.

໒໓. ສມ຺ພໂລ ຈ ສິຣິມາ ເຈວ, ອເຫສຸໍ ອຄ຺ຄຸປຏ຺ຐກາ;

ກິສາໂຄຕມີ ອຸປເສນາ, ອເຫສຸໍ ອຄ຺ຄຸປຏ຺ຐິກາ.

໒໔. ໂສ ພຸທ຺ໂຘ ສຏ຺ຐິຣຕໂນ, ອຫຸ ອຸຈ຺ຈຕ຺ຕເນ ຊິໂນ;

ອນູປໂມ ອສທິໂສ, ຫິມວາ ວິຍ ທິສ຺ສຕິ.

໒໕. ຕສ຺ສາປິ ອຕຸລເຕຊສ຺ສ, ອາຍຸ ອາສິ ອນຸຕ຺ຕໂຣ;

ວສ຺ສສຕສຫສ຺ສານິ, ໂລເກ ອຏ຺ຐາສິ ຈກ຺ຂຸມາ.

໒໖. ອຸຕ຺ຕມໍ ປວຣໍ ເສຏ຺ຐໍ, ອນຸໂຠຕ຺ວາ ມຫາຍສໍ;

ຊລິຕ຺ວາ ອຄ຺ຄິກ຺ຂນ຺ໂຘວ, ນິພ຺ພຸໂຕ ໂສ ສສາວໂກ.

໒໗. ວລາຫໂກວ ອນິເລນ, ສູຣິເຍນ ວິຍ ອຸສ຺ສໂວ;

ອນ຺ຘກາໂຣວ ປທີເປນ, ນິພ຺ພຸໂຕ ໂສ ສສາວໂກ.

໒໘. ຕິສ຺ໂສ ຊິນວໂຣ ພຸທ຺ໂຘ, ນນ຺ທາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຊິນຖູໂປ, ຕີຓິໂຍຊນມຸຄ຺ຄໂຕຕິ.

ຕິສ຺ສສ຺ສ ຠຄວໂຕ ວໍໂສ ສຕ຺ຕຣສໂມ.