໑໘. ສິທ຺ຘຕ຺ຖພຸທ຺ຘວໍໂສ

໑. ຘມ຺ມທສ຺ສິສ຺ສ ອປເຣນ, ສິທ຺ຘຕ຺ໂຖ ນາມ ນາຍໂກ;

ນິຫນິຕ຺ວາ ຕມໍ ສພ຺ພໍ, ສູຣິໂຍ ອພ຺ຠຸຄ຺ຄໂຕ ຍຖາ.

໒. ໂສປິ ປຕ຺ວານ ສມ຺ໂພຘິໍ, ສນ຺ຕາເຣນ຺ໂຕ ສເທວກໍ;

ອຠິວສ຺ສິ ຘມ຺ມເມເຆນ, ນິພ຺ພາເປນ຺ໂຕ ສເທວກໍ.

໓. ຕສ຺ສາປິ ອຕຸລເຕຊສ຺ສ, ອເຫສຸໍ ອຠິສມຍາ ຕໂຍ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໔. ປຸນາປຣໍ ຠີມຣເຖ [ຫິມຣຏ຺ເຐ (ກ.)], ຍທາ ອາຫນິ ທຸນ຺ທຸຠິໍ;

ຕທາ ນວຸຕິໂກຏີນໍ, ທຸຕິຍາຠິສມໂຍ ອຫຸ.

໕. ຍທາ ພຸທ຺ໂຘ ຘມ຺ມໍ ເທເສສິ, ເວຠາເຣ ໂສ ປຸຣຸຕ຺ຕເມ;

ຕທາ ນວຸຕິໂກຏີນໍ, ຕຕິຍາຠິສມໂຍ ອຫຸ.

໖. ສນ຺ນິປາຕາ ຕໂຍ ອາສຸໍ, ຕສ຺ມິມ຺ປິ ທ຺ວິປທຸຕ຺ຕເມ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໗. ໂກຏິສຕານໍ ນວຸຕີນໍ [ນວຸຕິຍາ (ສ຺ຍາ. ກໍ.)], ອສີຕິຍາປິ ຈ ໂກຏິນໍ;

ເອເຕ ອາສຸໍ ຕໂຍ ຐານາ, ວິມລານໍ ສມາຄເມ.

໘. ອຫໍ ເຕນ ສມເຍນ, ມງ຺ຄໂລ ນາມ ຕາປໂສ;

ອຸຄ຺ຄເຕໂຊ ທຸປ຺ປສໂຫ, ອຠິຎ຺ຎາພລສມາຫິໂຕ.

໙. ຊມ຺ພຸໂຕ ຜລມາເນຕ຺ວາ [ຜລມາຫຕ຺ວາ (ສີ. ສ຺ຍາ.)] ສິທ຺ຘຕ຺ຖສ຺ສ ອທາສຫໍ;

ປຏິຄ຺ຄເຫຕ຺ວາ ສມ຺ພຸທ຺ໂຘ, ອິທໍ ວຈນມພ຺ຣວິ.

໑໐. ‘‘ປສ຺ສຖ ອິມໍ ຕາປສໍ, ຊຏິລໍ ອຸຄ຺ຄຕາປນໍ;

ຈຕຸນ຺ນວຸຕິໂຕ ກປ຺ເປ, ອຍໍ ພຸທ຺ໂຘ ຠວິສ຺ສຕິ.

໑໑. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໒. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໓. ເວຠາຣໍ ນາມ ນຄຣໍ, ອຸເທໂນ ນາມ ຂຕ຺ຕິໂຍ;

ສຸຜສ຺ສາ ນາມ ຊນິກາ, ສິທ຺ຘຕ຺ຖສ຺ສ ມເຫສິໂນ.

໑໔. ທສວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ໂກກາສຸປ຺ປລໂກກນທາ, ຕໂຍ ປາສາທມຸຕ຺ຕມາ.

໑໕. ຕິໂສຬສສຫສ຺ສານິ, ນາຣິໂຍ ສມລງ຺ກຕາ;

ໂສມນສ຺ສາ ນາມ ສາ ນາຣີ, ອນຸປໂມ ນາມ ອຕ຺ຣໂຊ.

໑໖. ນິມິຕ຺ເຕ ຈຕຸໂຣ ທິສ຺ວາ, ສິວິກາຍາຠິນິກ຺ຂມິ;

ອນູນທສມາສານິ, ປຘານໍ ປທຫີ ຊິໂນ.

໑໗. ພ຺ຣຫ຺ມຸນາ ຍາຈິໂຕ ສນ຺ໂຕ, ສິທ຺ຘຕ຺ໂຖ ໂລກນາຍໂກ;

ວຕ຺ຕິ ຈກ຺ກໍ ມຫາວີໂຣ, ມິຄທາເຍ ນຣຸຕ຺ຕໂມ.

໑໘. ສມ຺ພໂລ ຈ ສຸມິຕ຺ໂຕ ຈ, ອເຫສຸໍ ອຄ຺ຄສາວກາ;

ເຣວໂຕ ນາມຸປຏ຺ຐາໂກ, ສິທ຺ຘຕ຺ຖສ຺ສ ມເຫສິໂນ.

໑໙. ສີວລາ ຈ ສຸຣາມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ກຓິກາໂຣຕິ ວຸຈ຺ຈຕິ.

໒໐. ສຸປ຺ປິໂຍ ຈ ສມຸທ຺ໂທ ຈ, ອເຫສຸໍ ອຄ຺ຄຸປຏ຺ຐກາ;

ຣມ຺ມາ ເຈວ ສຸຣມ຺ມາ ຈ, ອເຫສຸໍ ອຄ຺ຄຸປຏ຺ຐິກາ.

໒໑. ໂສ ພຸທ຺ໂຘ ສຏ຺ຐິຣຕນໍ, ອໂຫສິ ນຠມຸຄ຺ຄໂຕ;

ກຎ຺ຈນຄ຺ຆິຍສງ຺ກາໂສ, ທສສຫສ຺ສີ ວິໂຣຈຕິ.

໒໒. ໂສປິ ພຸທ຺ໂຘ ອສມສໂມ, ອຕຸໂລ ອປ຺ປຏິປຸຄ຺ຄໂລ;

ວສ຺ສສຕສຫສ຺ສານິ, ໂລເກ ອຏ຺ຐາສິ ຈກ຺ຂຸມາ.

໒໓. ວິປຸລໍ ປຠໍ ທສ຺ສຍິຕ຺ວາ, ປຸປ຺ຜາເປຕ຺ວານ ສາວເກ;

ວິລາເສຕ຺ວາ ສມາປຕ຺ຍາ, ນິພ຺ພຸໂຕ ໂສ ສສາວໂກ.

໒໔. ສິທ຺ຘຕ຺ໂຖ ມຸນິວໂຣ ພຸທ຺ໂຘ, ອໂນມາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຖູປວໂຣ, ຈຕຸໂຍຊນມຸຄ຺ຄໂຕຕິ.

ສິທ຺ຘຕ຺ຖສ຺ສ ຠຄວໂຕ ວໍໂສ ໂສຬສໂມ.