໑໗. ຘມ຺ມທສ຺ສີພຸທ຺ຘວໍໂສ

໑. ຕຕ຺ເຖວ ມຓ຺ຑກປ຺ປມ຺ຫິ, ຘມ຺ມທສ຺ສີ ມຫາຍໂສ;

ຕມນ຺ຘກາຣໍ ວິຘມິຕ຺ວາ, ອຕິໂຣຈຕິ ສເທວເກ.

໒. ຕສ຺ສາປິ ອຕຸລເຕຊສ຺ສ, ຘມ຺ມຈກ຺ກປ຺ປວຕ຺ຕເນ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໓. ຍທາ ພຸທ຺ໂຘ ຘມ຺ມທສ຺ສີ, ວິເນສິ ສຎ຺ຊຍໍ ອິສິໍ;

ຕທາ ນວຸຕິໂກຏີນໍ, ທຸຕິຍາຠິສມໂຍ ອຫຸ.

໔. ຍທາ ສກ຺ໂກ ອຸປາຄຎ຺ຉິ, ສປຣິໂສ ວິນາຍກໍ;

ຕທາ ອສີຕິໂກຏີນໍ, ຕຕິຍາຠິສມໂຍ ອຫຸ.

໕. ຕສ຺ສາປິ ເທວເທວສ຺ສ, ສນ຺ນິປາຕາ ຕໂຍ ອຫຸໍ [ອາສຸໍ (ສີ. ສ຺ຍາ.)];

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໖. ຍທາ ພຸທ຺ໂຘ ຘມ຺ມທສ຺ສີ, ສຣເຓ ວສ຺ສໍ ອຸປາຄມິ;

ຕທາ ໂກຏິສຕສຫສ຺ສານໍ [ໂກຏິສຫສ຺ສານໍ (ສີ. ສ຺ຍາ. ກໍ.)], ປຐໂມ ອາສິ ສມາຄໂມ.

໗. ປຸນາປຣໍ ຍທາ ພຸທ຺ໂຘ, ເທວໂຕ ເອຕິ ມານຸສໍ;

ຕທາປິ ສຕໂກຏີນໍ, ທຸຕິໂຍ ອາສິ ສມາຄໂມ.

໘. ປຸນາປຣໍ ຍທາ ພຸທ຺ໂຘ, ປກາເສສິ ຘຸເຕ ຄຸເຓ;

ຕທາ ອສີຕິໂກຏີນໍ, ຕຕິໂຍ ອາສິ ສມາຄໂມ.

໙. ອຫໍ ເຕນ ສມເຍນ, ສກ຺ໂກ ອາສິໍ ປຸຣິນ຺ທໂທ;

ທິພ຺ເພນ ຄນ຺ຘມາເລນ, ຕຸຣິເຍນາຠິປູຊຍິໍ.

໑໐. ໂສປິ ມໍ ພຸທ຺ໂຘ ພ຺ຍາກາສິ, ເທວມຊ຺ເຌ ນິສີທິຍ;

‘‘ອຏ຺ຐາຣເສ ກປ຺ປສເຕ, ອຍໍ ພຸທ຺ໂຘ ຠວິສ຺ສຕິ.

໑໑. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໒. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໓. ສຣຓໍ ນາມ ນຄຣໍ, ສຣໂຓ ນາມ ຂຕ຺ຕິໂຍ;

ສຸນນ຺ທາ ນາມ ຊນິກາ, ຘມ຺ມທສ຺ສິສ຺ສ ສຕ຺ຖຸໂນ.

໑໔. ອຏ຺ຐວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ອຣໂຊ ວິຣໂຊ ສຸທສ຺ສໂນ, ຕໂຍ ປາສາທມຸຕ຺ຕມາ.

໑໕. ຕິຈຕ຺ຕາຣີສສຫສ຺ສານິ [ຈຕ຺ຕາລີສສຫສ຺ສານິ (ສ຺ຍາ. ກໍ.)], ນາຣິໂຍ ສມລງ຺ກຕາ;

ວິຈິໂກຬິ ນາມ ນາຣີ, ອຕ຺ຣໂຊ ປຸຎ຺ຎວຑ຺ຒໂນ.

໑໖. ນິມິຕ຺ເຕ ຈຕຸໂຣ ທິສ຺ວາ, ປາສາເທນາຠິນິກ຺ຂມິ;

ສຕ຺ຕາຫໍ ປຘານຈາຣໍ, ອຈຣີ ປຸຣິສຸຕ຺ຕໂມ.

໑໗. ພ຺ຣຫ຺ມຸນາ ຍາຈິໂຕ ສນ຺ໂຕ, ຘມ຺ມທສ຺ສີ ນຣາສໂຠ;

ວຕ຺ຕິ ຈກ຺ກໍ ມຫາວີໂຣ, ມິຄທາເຍ ນຣຸຕ຺ຕໂມ.

໑໘. ປທຸໂມ ຜຸສ຺ສເທໂວ ຈ, ອເຫສຸໍ ອຄ຺ຄສາວກາ;

ສຸເນຕ຺ໂຕ [ສຸທຕ຺ໂຕ (ສ຺ຍາ. ກໍ.)] ນາມຸປຏ຺ຐາໂກ, ຘມ຺ມທສ຺ສິສ຺ສ ສຕ຺ຖຸໂນ.

໑໙. ເຂມາ ຈ ສຈ຺ຈນາມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ພິມ຺ພິຊາໂລຕິ ວຸຈ຺ຈຕິ.

໒໐. ສຸຠທ຺ໂທ ກຏິສ຺ສໂຫ ເຈວ, ອເຫສຸໍ ອຄ຺ຄຸປຏ຺ຐກາ;

ສາຬິຍາ [ສາລິສາ (ສ຺ຍາ. ກໍ.)] ຈ ກຬິຍາ ຈ, ອເຫສຸໍ ອຄ຺ຄຸປຏ຺ຐິກາ.

໒໑. ໂສປິ ພຸທ຺ໂຘ ອສມສໂມ, ອສີຕິຫຕ຺ຖມຸຄ຺ຄໂຕ;

ອຕິໂຣຈຕິ ເຕເຊນ, ທສສຫສ຺ສິມ຺ຫິ ຘາຕຸຍາ.

໒໒. ສຸຜຸລ຺ໂລ ສາລຣາຊາວ, ວິຊ຺ຊູວ ຄຄເນ ຍຖາ;

ມຊ຺ຌນ຺ຫິເກວ ສູຣິໂຍ, ເອວໍ ໂສ ອຸປໂສຠຖ.

໒໓. ຕສ຺ສາປິ ອຕຸລເຕຊສ຺ສ, ສມກໍ ອາສິ ຊີວິຕໍ;

ວສ຺ສສຕສຫສ຺ສານິ, ໂລເກ ອຏ຺ຐາສິ ຈກ຺ຂຸມາ.

໒໔. ໂອຠາສໍ ທສ຺ສຍິຕ຺ວານ, ວິມລໍ ກຕ຺ວານ ສາສນໍ;

ຈວິ ຈນ຺ໂທວ ຄຄເນ, ນິພ຺ພຸໂຕ ໂສ ສສາວໂກ.

໒໕. ຘມ຺ມທສ຺ສີ ມຫາວີໂຣ, ສາລາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຖູປວໂຣ, ຕີຓິໂຍຊນມຸຄ຺ຄໂຕຕິ.

ຘມ຺ມທສ຺ສິສ຺ສ ຠຄວໂຕ ວໍໂສ ປນ຺ນຣສໂມ.