໑໖. ອຕ຺ຖທສ຺ສີພຸທ຺ຘວໍໂສ

໑. ຕຕ຺ເຖວ ມຓ຺ຑກປ຺ປມ຺ຫິ, ອຕ຺ຖທສ຺ສີ ມຫາຍໂສ;

ມຫາຕມໍ ນິຫນ຺ຕ຺ວານ, ປຕ຺ໂຕ ສມ຺ໂພຘິມຸຕ຺ຕມໍ.

໒. ພ຺ຣຫ຺ມຸນາ ຍາຈິໂຕ ສນ຺ໂຕ, ຘມ຺ມຈກ຺ກໍ ປວຕ຺ຕຍິ;

ອມເຕນ ຕປ຺ປຍີ ໂລກໍ, ທສສຫສ຺ສິສເທວກໍ.

໓. ຕສ຺ສາປິ ໂລກນາຖສ຺ສ, ອເຫສຸໍ ອຠິສມຍາ ຕໂຍ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໔. ຍທາ ພຸທ຺ໂຘ ອຕ຺ຖທສ຺ສີ, ຈຣເຕ ເທວຈາຣິກໍ;

ໂກຏິສຕສຫສ຺ສານໍ, ທຸຕິຍາຠິສມໂຍ ອຫຸ.

໕. ປຸນາປຣໍ ຍທາ ພຸທ຺ໂຘ, ເທເສສິ ປິຕຸສນ຺ຕິເກ;

ໂກຏິສຕສຫສ຺ສານໍ, ຕຕິຍາຠິສມໂຍ ອຫຸ.

໖. ສນ຺ນິປາຕາ ຕໂຍ ອາສຸໍ, ຕສ຺ສາປິ ຈ ມເຫສິໂນ;

ຂີຓາສວານໍ ວິມລານໍ, ສນ຺ຕຈິຕ຺ຕານ ຕາທິນໍ.

໗. ອຏ຺ຐນວຸຕິສຫສ຺ສານໍ, ປຐໂມ ອາສິ ສມາຄໂມ;

ອຏ຺ຐາສີຕິສຫສ຺ສານໍ, ທຸຕິໂຍ ອາສິ ສມາຄໂມ.

໘. ອຏ຺ຐສຕ຺ຕຕິສຕສຫສ຺ສານໍ, ຕຕິໂຍ ອາສິ ສມາຄໂມ;

ອນຸປາທາ ວິມຸຕ຺ຕານໍ, ວິມລານໍ ມເຫສິນໍ.

໙. ອຫໍ ເຕນ ສມເຍນ, ຊຏິໂລ ອຸຄ຺ຄຕາປໂນ;

ສຸສີໂມ ນາມ ນາເມນ, ມຫິຍາ ເສຏ຺ຐສມ຺ມໂຕ.

໑໐. ທິພ຺ພໍ ມນ຺ທາຣວໍ ປຸປ຺ຜໍ, ປທຸມໍ ປາຣິຉຕ຺ຕກໍ;

ເທວໂລກາຫຣິຕ຺ວານ, ສມ຺ພຸທ຺ຘມຠິປູຊຍິໍ.

໑໑. ໂສປິ ມໍ ພຸທ຺ໂຘ ພ຺ຍາກາສິ, ອຕ຺ຖທສ຺ສີ ມຫາມຸນິ;

‘‘ອຏ຺ຐາຣເສ ກປ຺ປສເຕ, ອຍໍ ພຸທ຺ໂຘ ຠວິສ຺ສຕິ.

໑໒. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໓. ຕສ຺ສາປິ ວຈນໍ ສຸຕ຺ວາ, ຫຏ຺ໂຐ [ຕຸຏ຺ໂຐ (ສ຺ຍາ. ກໍ.)] ສໍວິຄ຺ຄມານໂສ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໔. ໂສຠຓໍ ນາມ ນຄຣໍ, ສາຄໂຣ ນາມ ຂຕ຺ຕິໂຍ;

ສຸທສ຺ສນາ ນາມ ຊນິກາ, ອຕ຺ຖທສ຺ສິສ຺ສ ສຕ຺ຖຸໂນ.

໑໕. ທສວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ອມຣຄິຣິ ສຸຄິຣິ ວາຫນາ, ຕໂຍ ປາສາທມຸຕ຺ຕມາ.

໑໖. ເຕຕ຺ຕິໍສຎ຺ຈ ສຫສ຺ສານິ, ນາຣິໂຍ ສມລງ຺ກຕາ;

ວິສາຂາ ນາມ ນາຣີ ຈ, ເສໂລ ນາມາສິ ອຕ຺ຣໂຊ.

໑໗. ນິມິຕ຺ເຕ ຈຕຸໂຣ ທິສ຺ວາ, ອສ຺ສຍາເນນ ນິກ຺ຂມິ;

ອນູນອຏ຺ຐມາສານິ, ປຘານໍ ປທຫີ ຊິໂນ.

໑໘. ພ຺ຣຫ຺ມຸນາ ຍາຈິໂຕ ສນ຺ໂຕ, ອຕ຺ຖທສ຺ສີ ມຫາຍໂສ;

ວຕ຺ຕິ ຈກ຺ກໍ ມຫາວີໂຣ, ອໂນມຸຍ຺ຍາເນ ນຣາສໂຠ.

໑໙. ສນ຺ໂຕ ຈ ອຸປສນ຺ໂຕ ຈ, ອເຫສຸໍ ອຄ຺ຄສາວກາ;

ອຠໂຍ ນາມຸປຏ຺ຐາໂກ, ອຕ຺ຖທສ຺ສິສ຺ສ ສຕ຺ຖຸໂນ.

໒໐. ຘມ຺ມາ ເຈວ ສຸຘມ຺ມາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ຈມ຺ປໂກຕິ ປວຸຈ຺ຈຕິ.

໒໑. ນກຸໂລ ຈ ນິສໂຠ ຈ, ອເຫສຸໍ ອຄ຺ຄຸປຏ຺ຐກາ;

ມກິລາ ຈ ສຸນນ຺ທາ ຈ, ອເຫສຸໍ ອຄ຺ຄຸປຏ຺ຐິກາ.

໒໒. ໂສປິ ພຸທ຺ໂຘ ອສມສໂມ, ອສີຕິຫຕ຺ຖມຸຄ຺ຄໂຕ;

ໂສຠເຕ ສາລຣາຊາວ, ອຸຬຸຣາຊາວ ປູຣິໂຕ.

໒໓. ຕສ຺ສ ປາກຕິກາ ຣໍສີ, ອເນກສຕໂກຏິໂຍ;

ອຸທ຺ຘໍ ອໂຘ ທສ ທິສາ, ຜຣນ຺ຕິ ໂຍຊນໍ ສທາ.

໒໔. ໂສປິ ພຸທ຺ໂຘ ນຣາສໂຠ, ສພ຺ພສຕ຺ຕຸຕ຺ຕໂມ ມຸນິ;

ວສ຺ສສຕສຫສ຺ສານິ, ໂລເກ ອຏ຺ຐາສິ ຈກ຺ຂຸມາ.

໒໕. ອຕຸລໍ ທສ຺ເສຕ຺ວາ ໂອຠາສໍ, ວິໂຣເຈຕ຺ວາ ສເທວເກ [ອຕຸລໍ ທສ຺ສຍິຕ຺ວານ, ໂອຠາເສຕ຺ວາ ສເທວເກ (ສີ. ກ.)];

ໂສປິ ອນິຈ຺ຈຕໍ ປຕ຺ໂຕ, ຍຖຄ຺ຄຸປາທານສງ຺ຂຍາ.

໒໖. ອຕ຺ຖທສ຺ສີ ຊິນວໂຣ, ອໂນມາຣາມມ຺ຫິ ນິພ຺ພຸໂຕ;

ຘາຕຸວິຕ຺ຖາຣິກໍ ອາສິ, ເຕສຸ ເຕສຸ ປເທສໂຕຕິ.

ອຕ຺ຖທສ຺ສິສ຺ສ ຠຄວໂຕ ວໍໂສ ຈຸທ຺ທສໂມ.