໑໕. ປິຍທສ຺ສີພຸທ຺ຘວໍໂສ

໑. ສຸຊາຕສ຺ສ ອປເຣນ, ສຍມ຺ຠູ ໂລກນາຍໂກ;

ທຸຣາສໂທ ອສມສໂມ, ປິຍທສ຺ສີ ມຫາຍໂສ.

໒. ໂສປິ ພຸທ຺ໂຘ ອມິຕຍໂສ, ອາທິຈ຺ໂຈວ ວິໂຣຈຕິ;

ສພ຺ພໍ ຕມໍ ນິຫນ຺ຕ຺ວານ, ຘມ຺ມຈກ຺ກໍ ປວຕ຺ຕຍິ.

໓. ຕສ຺ສາປິ ອຕຸລເຕຊສ຺ສ, ອເຫສຸໍ ອຠິສມຍາ ຕໂຍ;

ໂກຏິສຕສຫສ຺ສານໍ, ປຐມາຠິສມໂຍ ອຫຸ.

໔. ສຸທສ຺ສໂນ ເທວຣາຊາ, ມິຈ຺ຉາທິຏ຺ຐິມໂຣຈຍິ;

ຕສ຺ສ ທິຏ຺ຐິໍ ວິໂນເທນ຺ໂຕ, ສຕ຺ຖາ ຘມ຺ມມເທສຍິ.

໕. ຊນສນ຺ນິປາໂຕ ອຕຸໂລ, ມຫາສນ຺ນິປຕີ ຕທາ;

ນວຸຕິໂກຏິສຫສ຺ສານໍ, ທຸຕິຍາຠິສມໂຍ ອຫຸ.

໖. ຍທາ ໂທຓມຸຂໍ ຫຕ຺ຖິໍ, ວິເນສິ ນຣສາຣຖິ;

ອສີຕິໂກຏິສຫສ຺ສານໍ, ຕຕິຍາຠິສມໂຍ ອຫຸ.

໗. ສນ຺ນິປາຕາ ຕໂຍ ອາສຸໍ, ຕສ຺ສາປິ ປິຍທສ຺ສິໂນ;

ໂກຏິສຕສຫສ຺ສານໍ, ປຐໂມ ອາສິ ສມາຄໂມ.

໘. ຕໂຕ ປຣໍ ນວຸຕິໂກຏີ, ສມິໍສຸ ເອກໂຕ ມຸນີ;

ຕຕິເຍ ສນ຺ນິປາຕມ຺ຫິ, ອສີຕິໂກຏິໂຍ ອຫູ.

໙. ອຫໍ ເຕນ ສມເຍນ, ກສ຺ສໂປ ນາມ ພ຺ຣາຫ຺ມໂຓ [ມານໂວ (ສ຺ຍາ. ກໍ.)];

ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ.

໑໐. ຕສ຺ສ ຘມ຺ມໍ ສຸຓິຕ຺ວານ, ປສາທໍ ຊນຍິໍ ອຫໍ;

ໂກຏິສຕສຫສ຺ເສຫິ, ສງ຺ຆາຣາມໍ ອມາປຍິໍ.

໑໑. ຕສ຺ສ ທຕ຺ວານ ອາຣາມໍ, ຫຏ຺ໂຐ ສໍວິຄ຺ຄມານໂສ;

ສຣເຓ ປຎ຺ຈ ສີເລ ຈ [ສຣຓໍ ປຎ຺ຈສີລຎ຺ຈ (ສີ.)], ທຬ຺ຫໍ ກຕ຺ວາ ສມາທິຍິໍ.

໑໒. ໂສປິ ມໍ ພຸທ຺ໂຘ ພ຺ຍາກາສິ, ສງ຺ຆມຊ຺ເຌ ນິສີທິຍ;

‘‘ອຏ຺ຐາຣເສ ກປ຺ປສເຕ, ອຍໍ ພຸທ຺ໂຘ ຠວິສ຺ສຕິ.

໑໓. ‘‘ປຘານໍ ປທຫິຕ຺ວານ…ເປ… ເຫສ຺ສາມ ສມ຺ມຸຂາ ອິມໍ’’.

໑໔. ຕສ຺ສາປິ ວຈນໍ ສຸຕ຺ວາ, ຠິຍ຺ໂຍ ຈິຕ຺ຕໍ ປສາທຍິໍ;

ອຸຕ຺ຕຣິໍ ວຕມຘິຏ຺ຐາສິໍ, ທສປາຣມິປູຣິຍາ.

໑໕. ສຸຘຎ຺ຎໍ ນາມ ນຄຣໍ, ສຸທຕ຺ໂຕ ນາມ ຂຕ຺ຕິໂຍ;

ຈນ຺ທາ ນາມາສິ ຊນິກາ, ປິຍທສ຺ສິສ຺ສ ສຕ຺ຖຸໂນ.

໑໖. ນວວສ຺ສສຫສ຺ສານິ, ອຄາຣໍ ອຊ຺ຌ ໂສ ວສິ;

ສຸນິມ຺ມລວິມລຄິຣິຄຸຫາ, ຕໂຍ ປາສາທມຸຕ຺ຕມາ.

໑໗. ເຕຕ຺ຕິໍສສຫສ຺ສານິ ຈ, ນາຣິໂຍ ສມລງ຺ກຕາ;

ວິມລາ ນາມ ນາຣີ ຈ, ກຎ຺ຈນາເວໂຬ ນາມ ອຕ຺ຣໂຊ.

໑໘. ນິມິຕ຺ເຕ ຈຕຸໂຣ ທິສ຺ວາ, ຣຖຍາເນນ ນິກ຺ຂມິ;

ຉມາສໍ ປຘານຈາຣໍ, ອຈຣີ ປຸຣິສຸຕ຺ຕໂມ.

໑໙. ພ຺ຣຫ຺ມຸນາ ຍາຈິໂຕ ສນ຺ໂຕ, ປິຍທສ຺ສີ ມຫາມຸນິ;

ວຕ຺ຕິ ຈກ຺ກໍ ມຫາວີໂຣ, ອຸສຠຸຍ຺ຍາເນ ມໂນຣເມ.

໒໐. ປາລິໂຕ ສພ຺ພທສ຺ສີ ຈ, ອເຫສຸໍ ອຄ຺ຄສາວກາ;

ໂສຠິໂຕ ນາມຸປຏ຺ຐາໂກ, ປິຍທສ຺ສິສ຺ສ ສຕ຺ຖຸໂນ.

໒໑. ສຸຊາຕາ ຘມ຺ມທິນ຺ນາ ຈ, ອເຫສຸໍ ອຄ຺ຄສາວິກາ;

ໂພຘິ ຕສ຺ສ ຠຄວໂຕ, ກກຸໂຘຕິ ປວຸຈ຺ຈຕິ.

໒໒. ສນ຺ຘໂກ ຘມ຺ມໂກ ເຈວ, ອເຫສຸໍ ອຄ຺ຄຸປຏ຺ຐກາ;

ວິສາຂາ ຘມ຺ມທິນ຺ນາ ຈ, ອເຫສຸໍ ອຄ຺ຄຸປຏ຺ຐິກາ.

໒໓. ໂສປິ ພຸທ຺ໂຘ ອມິຕຍໂສ, ທ຺ວຕ຺ຕິໍສວຣລກ຺ຂໂຓ;

ອສີຕິຫຕ຺ຖມຸພ຺ເພໂຘ, ສາລຣາຊາວ ທິສ຺ສຕິ.

໒໔. ອຄ຺ຄິຈນ຺ທສູຣິຍານໍ, ນຕ຺ຖິ ຕາທິສິກາ ປຠາ;

ຍຖາ ອຫຸ ປຠາ ຕສ຺ສ, ອສມສ຺ສ ມເຫສິໂນ.

໒໕. ຕສ຺ສາປິ ເທວເທວສ຺ສ, ອາຍຸ ຕາວຕກໍ ອຫຸ;

ນວຸຕິວສ຺ສສຫສ຺ສານິ, ໂລເກ ອຏ຺ຐາສິ ຈກ຺ຂຸມາ.

໒໖. ໂສປິ ພຸທ຺ໂຘ ອສມສໂມ, ຍຸຄານິປິ ຕານິ ອຕຸລິຍານິ;

ສພ຺ພໍ ຕມນ຺ຕຣຫິຕໍ, ນນຸ ຣິຕ຺ຕາ ສພ຺ພສງ຺ຂາຣາ.

໒໗. ປິຍທສ຺ສີ ມຸນິວໂຣ, ອສ຺ສຕ຺ຖາຣາມມ຺ຫິ ນິພ຺ພຸໂຕ;

ຕຕ຺ເຖວສ຺ສ ຊິນຖູໂປ, ຕີຓິໂຍຊນມຸຄ຺ຄໂຕຕິ.

ປິຍທສ຺ສິສ຺ສ ຠຄວໂຕ ວໍໂສ ເຕຣສໂມ.