໑໐. ຕິປທຸມິຍຕ຺ເຖຣອປທານໍ

໔໘. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ທນ຺ໂຕ ທນ຺ຕປຣິວຸໂຕ, ນຄຣາ ນິກ຺ຂມີ ຕທາ.

໔໙. ‘‘ນຄເຣ ຫໍສວຕິຍໍ, ອໂຫສິໍ ມາລິໂກ ຕທາ;

ຍໍ ຕຕ຺ຖ ອຸຕ຺ຕມໍ ໂຕຓິ, ປທ຺ມປຸປ຺ຜານິ [ອຸຕ຺ຕມໍ ປຸປ຺ຜໍ, ຕີຓິ ປຸປ຺ຜານິ (ສີ.)] ອຄ຺ຄຫິໍ.

໕໐. ‘‘ອທ຺ທສໍ ວິຣຊໍ ພຸທ຺ຘໍ, ປຏິມຄ຺ຄນ຺ຕຣາປເຓ;

ສຫ [ໂສຫໍ (ສີ.)] ທິສ຺ວານ ສມ຺ພຸທ຺ຘໍ, ເອວໍ ຈິນ຺ເຕສຫໍ ຕທາ.

໕໑. ‘‘ກິໍ ເມ ອິເມຫິ ປຸປ຺ເຜຫິ, ຣຎ຺ໂຎ ອຸປນິເຕຫິ ເມ;

ຄາມໍ ວາ ຄາມເຂຕ຺ຕໍ ວາ, ສຫສ຺ສໍ ວາ ລເຠຍ຺ຍຫໍ.

໕໒. ‘‘ອທນ຺ຕທມນໍ ວີຣໍ, ສພ຺ພສຕ຺ຕສຸຂາວຫໍ;

ໂລກນາຖໍ ປູຊຍິຕ຺ວາ, ລຈ຺ຉາມິ ອມຕໍ ຘນໍ.

໕໓. ‘‘ເອວາຫໍ ຈິນ຺ຕຍິຕ຺ວານ, ສກໍ ຈິຕ຺ຕໍ ປສາທຍິໍ;

ຕີຓິ ໂລຫິຕເກ ຄຍ຺ຫ, ອາກາເສ ອຸກ຺ຂິປິໍ ຕທາ.

໕໔. ‘‘ມຍາ ອຸກ຺ຂິຕ຺ຕມຕ຺ຕມ຺ຫິ, ອາກາເສ ປຕ຺ຖຣິໍສຸ ເຕ;

ຘາຣິໍສຸ ມຕ຺ຖເກ ຕຕ຺ຖ, ອຸທ຺ຘໍວຓ຺ຏາ ອໂຘມຸຂາ.

໕໕. ‘‘ເຍ ເກຈິ ມນຸຊາ ທິສ຺ວາ, ອຸກ຺ກຸຏ຺ຐິໍ ສມ຺ປວຕ຺ຕຍຸໍ;

ເທວຕາ ອນ຺ຕລິກ຺ຂມ຺ຫິ, ສາຘຸກາຣໍ ປວຕ຺ຕຍຸໍ.

໕໖. ‘‘ອຈ຺ເຉຣໍ ໂລເກ ອຸປ຺ປນ຺ນໍ, ພຸທ຺ຘເສຏ຺ຐສ຺ສ ວາຫສາ;

ສພ຺ເພ ຘມ຺ມໍ ສຸຓິສ຺ສາມ, ປຸປ຺ຜານໍ ວາຫສາ ມຍໍ.

໕໗. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ວີຖິຍຎ຺ຫິ ຐິໂຕ ສນ຺ໂຕ, ອິມາ ຄາຖາ ອຠາສຖ.

໕໘. ‘‘‘ໂຍ ໂສ ພຸທ຺ຘໍ ອປູເຊສິ, ຣຕ຺ຕປທ຺ເມຫິ [ຣຕ຺ຕປທຸເມຫິ (ສີ. ສ຺ຍາ.)] ມາຓໂວ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໕໙. ‘‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສຕິ;

ຕິໍສກປ຺ປານິ [ຕິໍສກ຺ຂຕ຺ຕຸຎ຺ຈ (ສ຺ຍາ.)] ເທວິນ຺ໂທ, ເທວຣຊ຺ຊໍ ກຣິສ຺ສຕິ.

໖໐. ‘‘‘ມຫາວິຕ຺ຖາຣິກໍ ນາມ, ພ຺ຍມ຺ຫໍ ເຫສ຺ສຕິ ຕາວເທ;

ຕິໂຍຊນສຕຸພ຺ພິທ຺ຘໍ, ທິຍຑ຺ຒສຕວິຕ຺ຖຕໍ.

໖໑. ‘‘‘ຈຕ຺ຕາຣິສຕສຫສ຺ສານິ, ນິຍ຺ຍູຫາ ຈ ສຸມາປິຕາ;

ກູຏາຄາຣວຣູເປຕາ, ມຫາສຍນມຓ຺ຑິຕາ.

໖໒. ‘‘‘ໂກຏິສຕສຫສ຺ສິໂຍ, ປຣິວາເຣສ຺ສນ຺ຕິ ອຈ຺ຉຣາ;

ກຸສລາ ນຈ຺ຈຄີຕສ຺ສ, ວາທິເຕປິ ປທກ຺ຂິຓາ.

໖໓. ‘‘‘ເອຕາທິເສ ພ຺ຍມ຺ຫວເຣ, ນາຣີຄຓສມາກຸເລ;

ວສ຺ສິສ຺ສຕິ ປຸປ຺ຜວສ຺ໂສ, ທິພ຺ໂພ [ປທ (ກ.)] ໂລຫິຕໂກ ສທາ.

໖໔. ‘‘‘ຠິຕ຺ຕິຂີເລ ນາຄທນ຺ເຕ, ທ຺ວາຣພາຫາຍ ໂຕຣເຓ;

ຈກ຺ກມຕ຺ຕາ ໂລຫິຕກາ, ໂອລມ຺ພິສ຺ສນ຺ຕິ ຕາວເທ.

໖໕. ‘‘‘ປຕ຺ເຕນ ປຕ຺ຕສຎ຺ຉນ຺ເນ, ອນ຺ໂຕພ຺ຍມ຺ຫວເຣ ອິມໍ;

ອຕ຺ຖຣິຕ຺ວາ ປາຣຸປິຕ຺ວາ, ຕຸວຏ຺ຏິສ຺ສນ຺ຕິ ຕາວເທ.

໖໖. ‘‘‘ຠວນໍ ປຣິວາເຣຕ຺ວາ, ສມນ຺ຕາ ສຕໂຍຊເນ;

ເຕປິ ປທ຺ມາ [ເຕ ວິສຸທ຺ຘາ (ສີ. ສ຺ຍາ.)] ໂລຫິຕກາ, ທິພ຺ພຄນ຺ຘໍ ປວາຍເຣ.

໖໗. ‘‘‘ປຎ຺ຈສຕ຺ຕຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໖໘. ‘‘‘ສມ຺ປຕ຺ຕິໂຍ ທຸເວ ຠຸຕ຺ວາ, ອນີຕິ ອນຸປທ຺ທໂວ;

ສມ຺ປຕ຺ເຕ ປຣິໂຍສາເນ, ນິພ຺ພານໍ ປາປຸຓິສ຺ສຕິ’ [ຜສ຺ສຍິສ຺ສຕິ (ສີ.), ປສ຺ສຍິສ຺ສຕິ (ກ.)].

໖໙. ‘‘ສຸທິຏ຺ໂຐ ວຕ ເມ ພຸທ຺ໂຘ, ວາຓິຊ຺ຊໍ ສຸປໂຍຊິຕໍ;

ປທ຺ມານິ ຕີຓິ ປູເຊຕ຺ວາ, ອນຸໂຠສິໍ ຕິສມ຺ປທາ [ອນຸຠູຍນ຺ຕິ ສມ຺ປທາ (ກ.)].

໗໐. ‘‘ອຊ຺ຊ ເມ ຘມ຺ມປ຺ປຕ຺ຕສ຺ສ, ວິປ຺ປມຸຕ຺ຕສ຺ສ ສພ຺ພໂສ;

ສຸປຸປ຺ຜິຕໍ ໂລຫິຕກໍ, ຘາຣຍິສ຺ສຕິ ມຕ຺ຖເກ.

໗໑. ‘‘ມມ ກມ຺ມໍ ກເຖນ຺ຕສ຺ສ, ປທຸມຸຕ຺ຕຣສຕ຺ຖຸໂນ;

ສຕປາຓສຫສ຺ສານໍ, ຘມ຺ມາຠິສມໂຍ ອຫຸ.

໗໒. ‘‘ສຕສຫສ຺ສິໂຕ ກປ຺ເປ, ຍໍ ພຸທ຺ຘມຠິປູຊຍິໍ;

ທຸຄ຺ຄຕິໍ ນາຠິຊານາມິ, ຕິປທຸມານິທໍ ຜລໍ.

໗໓. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ສພ຺ພາສວາ ປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໗໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຕິປທຸມິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຕິປທຸມິຍຕ຺ເຖຣສ຺ສາປທານໍ ທສມໍ.

ນາຄສມາລວຄ຺ໂຄ ອຏ຺ຐໂມ.