໙. ຕິມິຣວຄ຺ໂຄ

໑. ຕິມິຣປຸປ຺ຜິຍຕ຺ເຖຣອປທານໍ

໑. ‘‘ຈນ຺ທຠາຄານທີຕີເຣ, ອນຸໂສຕໍ ວຊາມຫໍ;

ນິສິນ຺ນໍ ສມຓໍ ທິສ຺ວາ, ວິປ຺ປສນ຺ນມນາວິລໍ.

໒. ‘‘ຕຕ຺ຖ ຈິຕ຺ຕໍ ປສາເທຕ຺ວາ [ປສາເທສິໍ (ສ຺ຍາ.)], ເອວໍ ຈິນ຺ເຕສຫໍ ຕທາ;

ຕາຣຍິສ຺ສຕິ ຕິຓ຺ໂຓຍໍ, ທນ຺ໂຕຍໍ ທມຍິສ຺ສຕິ.

໓. ‘‘ອສ຺ສາສິສ຺ສຕິ ອສ຺ສຕ຺ໂຖ, ສນ຺ໂຕ ຈ ສມຍິສ຺ສຕິ;

ໂມຈຍິສ຺ສຕິ ມຸຕ຺ໂຕ ຈ, ນິພ຺ພາເປສ຺ສຕິ ນິພ຺ພຸໂຕ.

໔. ‘‘ເອວາຫໍ ຈິນ຺ຕຍິຕ຺ວານ, ສິທ຺ຘຕ຺ຖສ຺ສ ມເຫສິໂນ;

ຄເຫຕ຺ວາ ຕິມິຣປຸປ຺ຜໍ, ມຕ຺ຖເກ ໂອກິຣິໍ ອຫໍ [ຕທາ (ສ຺ຍາ.)].

໕. ‘‘ອຎ຺ຊລິໍ ປຄ຺ຄເຫຕ຺ວານ, ກຕ຺ວາ ຈ ນໍ ປທກ຺ຂິຓໍ;

ວນ຺ທິຕ຺ວາ ສຕ຺ຖຸໂນ ປາເທ, ປກ຺ກາມິໍ ອປຣໍ ທິສໍ.

໖. ‘‘ອຈິຣໍ ຄຕມຕ຺ຕໍ ມໍ, ມິຄຣາຊາ ວິເຫຐຍິ;

ປປາຕມນຸຄຈ຺ຉນ຺ໂຕ, ຕຕ຺ເຖວ ປປຕິໍ ອຫໍ.

໗. ‘‘ຈຕຸນ຺ນວຸຕິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ປຸປ຺ຜປູຊາຍິທໍ [ພຸທ຺ຘປູຊາຍິທໍ (ສີ. ສ຺ຍາ.)] ຜລໍ.

໘. ‘‘ຉປ຺ປຎ຺ຎາສມ຺ຫິ ກປ຺ປມ຺ຫິ, ສຕ຺ເຕວາສຸໍ ມຫາຍສາ [ມຫາຣຫາ (ສ຺ຍາ. ກ.)];

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

໙. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຕິມິຣປຸປ຺ຜິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຕິມິຣປຸປ຺ຜິຍຕ຺ເຖຣສ຺ສາປທານໍ ປຐມໍ.

໒. ຄຕສຎ຺ຎກຕ຺ເຖຣອປທານໍ

໑໐. ‘‘ຊາຕິຍາ ສຕ຺ຕວສ຺ໂສຫໍ, ປພ຺ພຊິໍ ອນຄາຣິຍໍ;

ອວນ຺ທິໍ ສຕ຺ຖຸໂນ ປາເທ, ວິປ຺ປສນ຺ເນນ ເຈຕສາ.

໑໑. ‘‘ສຕ຺ຕນງ຺ຄລກີປຸປ຺ເຜ, ອາກາເສ ອຸກ຺ຂິປິໍ ອຫໍ;

ຕິສ຺ສໍ ພຸທ຺ຘໍ ສມຸທ຺ທິສ຺ສ, ອນນ຺ຕຄຸຓສາຄຣໍ.

໑໒. ‘‘ສຸຄຕານຸຄຕໍ ມຄ຺ຄໍ, ປູເຊຕ຺ວາ ຫຏ຺ຐມານໂສ;

ອຎ຺ຊລິຎ຺ຈ [ອຎ຺ຊລິສ຺ສ (ກ.)] ຕທາກາສິໍ, ປສນ຺ໂນ ເສຫິ ປາຓິຠິ.

໑໓. ‘‘ທ຺ເວນວຸເຕ ອິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໑໔. ‘‘ອິໂຕ ອຏ຺ຐມເກ ກປ຺ເປ, ຕໂຍ ອຄ຺ຄິສິຂາ ອຫຸ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

໑໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຄຕສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຄຕສຎ຺ຎກຕ຺ເຖຣສ຺ສາປທານໍ ທຸຕິຍໍ.

໓. ນິປນ຺ນຎ຺ຊລິກຕ຺ເຖຣອປທານໍ

໑໖. ‘‘ຣຸກ຺ຂມູເລ ນິສິນ຺ໂນຫໍ, ພ຺ຍາຘິໂຕ ປຣເມນ ຈ;

ປຣມກາຣຸຎ຺ຎປຕ຺ໂຕມ຺ຫິ, ອຣຎ຺ເຎ ການເນ ອຫໍ.

໑໗. ‘‘ອນຸກມ຺ປໍ ອຸປາທາຍ, ຕິສ຺ໂສ ສຕ຺ຖາ ອຸເປສິ ມໍ;

ໂສຫໍ ນິປນ຺ນໂກ ສນ຺ໂຕ, ສິເຣ ກຕ຺ວານ ອຎ຺ຊລິໍ.

໑໘. ‘‘ປສນ຺ນຈິຕ຺ໂຕ ສຸມໂນ, ສພ຺ພສຕ຺ຕານມຸຕ຺ຕມໍ;

ສມ຺ພຸທ຺ຘໍ ອຠິວາເທຕ຺ວາ, ຕຕ຺ຖ ກາລງ຺ກໂຕ ອຫໍ.

໑໙. ‘‘ທ຺ເວນວຸເຕ ອິໂຕ ກປ຺ເປ, ຍໍ ວນ຺ທິໍ ປຸຣິສຸຕ຺ຕມໍ;

ທຸຄ຺ຄຕິໍ ນາຠິຊານາມິ, ວນ຺ທນາຍ ອິທໍ ຜລໍ.

໒໐. ‘‘ອິໂຕ ປຎ຺ຈມເກ ກປ຺ເປ, ປຎ຺ເຈວາສຸໍ ມຫາສິຂາ;

ສຕ຺ຕຣຕນສມ຺ປນ຺ນາ, ຈກ຺ກວຕ຺ຕີ ມຫພ຺ພລາ.

໒໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນິປນ຺ນຎ຺ຊລິໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ນິປນ຺ນຎ຺ຊລິກຕ຺ເຖຣສ຺ສາປທານໍ ຕຕິຍໍ.

໔. ອໂຘປຸປ຺ຜິຍຕ຺ເຖຣອປທານໍ

໒໒. ‘‘ອຠິຠູ ນາມ ໂສ ຠິກ຺ຂຸ, ສິຂິໂນ ອຄ຺ຄສາວໂກ;

ມຫານຸຠາໂວ ເຕວິຊ຺ໂຊ, ຫິມວນ຺ຕໍ ອຸປາຄມິ.

໒໓. ‘‘ອຫມ຺ປິ ຫິມວນ຺ຕມ຺ຫິ, ຣມຓີຍສ຺ສເມ ອິສິ;

ວສາມິ ອປ຺ປມຎ຺ຎາສຸ, ອິທ຺ຘີສຸ ຈ ຕທາ ວສີ.

໒໔. ‘‘ປກ຺ຂິຊາໂຕ ວິຍາກາເສ, ປພ຺ພຕໍ ອຘິວຕ຺ຕຍິໍ [ອຠິປຕ຺ຖຍິໍ (ສ຺ຍາ.), ອຠິມຕ຺ຖຍິໍ (ກ.), ອຘິວຕ຺ຖຍິນ຺ຕິ ປພ຺ພຕສ຺ສ ອຸປຣິ ຄຈ຺ຉິນ຺ຕິອຕ຺ໂຖ];

ອໂຘປຸປ຺ຜໍ ຄເຫຕ຺ວານ, ອາຄຈ຺ຉິໍ [ອຄຈ຺ຉິໍ (ກ.)] ປພ຺ພຕໍ ອຫໍ.

໒໕. ‘‘ສຕ຺ຕ ປຸປ຺ຜານິ ຄຓ຺ຫິຕ຺ວາ, ມຕ຺ຖເກ ໂອກິຣິໍ ອຫໍ;

ອາໂລກິເຕ [ອາໂລກິໂຕ (ສ຺ຍາ.)] ຈ ວີເຣນ, ປກ຺ກາມິໍ ປາຈິນາມຸໂຂ.

໒໖. ‘‘ອາວາສໍ ອຠິສມ຺ໂຠສິໍ, ປຕ຺ວານ ອສ຺ສມໍ ອຫໍ;

ຂາຣິຠາຣໍ ຄເຫຕ຺ວານ, ປາຍາສິໍ [ປາວິສິໍ (ສີ.)] ປພ຺ພຕນ຺ຕຣໍ.

໒໗. ‘‘ອຊຄໂຣ ມໍ ປີເຬສິ, ໂຆຣຣູໂປ ມຫພ຺ພໂລ;

ປຸພ຺ພກມ຺ມໍ ສຣິຕ຺ວານ, ຕຕ຺ຖ ກາລງ຺ກໂຕ ອຫໍ.

໒໘. ‘‘ເອກຕ຺ຕິໍເສ ອິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ປຸປ຺ຜປູຊາຍິທໍ ຜລໍ.

໒໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອໂຘປຸປ຺ຜິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອໂຘປຸປ຺ຜິຍຕ຺ເຖຣສ຺ສາປທານໍ ຈຕຸຕ຺ຖໍ.

໕. ຣໍສິສຎ຺ຎກຕ຺ເຖຣອປທານໍ

໓໐. ‘‘ປພ຺ພເຕ ຫິມວນ຺ຕມ຺ຫິ, ວາສໍ ກປ຺ເປສຫໍ ປຸເຣ;

ອຊິນຸຕ຺ຕຣວາໂສຫໍ, ວສາມິ ປພ຺ພຕນ຺ຕເຣ.

໓໑. ‘‘ສຸວຓ຺ຓວຓ຺ຓໍ ສມ຺ພຸທ຺ຘໍ, ສຕຣໍສິໍວ ຠາຓຸມໍ;

ວນນ຺ຕຣຄຕໍ ທິສ຺ວາ, ສາລຣາຊໍວ ປຸປ຺ຜິຕໍ.

໓໒. ‘‘ຣໍສ຺ຍາ [ຣໍເສ (ສ຺ຍາ. ກ.)] ຈິຕ຺ຕໍ ປສາເທຕ຺ວາ, ວິປສ຺ສິສ຺ສ ມເຫສິໂນ;

ປຄ຺ຄຍ຺ຫ ອຎ຺ຊລິໍ ວນ຺ທິໍ, ສິຣສາ ອຸກ຺ກຸຏີ [ສິຣສາ ອຸກ຺ກຸຏິໂກ (ສ຺ຍາ.), ສິຣສຸກ຺ກຸຏິໂກ (ກ.)] ອຫໍ.

໓໓. ‘‘ເອກນວຸຕິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ຣໍສິສຎ຺ຎາຍິທໍ ຜລໍ.

໓໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຣໍສິສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຣໍສິສຎ຺ຎກຕ຺ເຖຣສ຺ສາປທານໍ ປຎ຺ຈມໍ.

໖. ທຸຕິຍຣໍສິສຎ຺ຎກຕ຺ເຖຣອປທານໍ

໓໕. ‘‘ປພ຺ພເຕ ຫິມວນ຺ຕມ຺ຫິ, ວາກຈີຣຘໂຣ ອຫໍ;

ຈງ຺ກມຎ຺ຈ ສມາຣູຬ຺ໂຫ, ນິສີທິໍ ປາຈິນາມຸໂຂ.

໓໖. ‘‘ປພ຺ພເຕ ສຸຄຕໍ ທິສ຺ວາ, ຜຸສ຺ສໍ ຌານຣຕໍ ຕທາ;

ອຎ຺ຊລິໍ ປຄ຺ຄເຫຕ຺ວານ, ຣໍສ຺ຍາ ຈິຕ຺ຕໍ ປສາທຍິໍ.

໓໗. ‘‘ທ຺ເວນວຸເຕ ອິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ຣໍສິສຎ຺ຎາຍິທໍ ຜລໍ.

໓໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຣໍສິສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ທຸຕິຍຣໍສິສຎ຺ຎກຕ຺ເຖຣສ຺ສາປທານໍ ຉຏ຺ຐໍ.

໗. ຜລທາຍກຕ຺ເຖຣອປທານໍ

໓໙. ‘‘ປພ຺ພເຕ ຫິມວນ຺ຕມ຺ຫິ, ຂຣາຊິນຘໂຣ ອຫໍ;

ຜຸສ຺ສໍ ຊິນວຣໍ ທິສ຺ວາ, ຜລຫຕ຺ໂຖ ຜລໍ ອທໍ.

໔໐. ‘‘ຍມຫໍ ຜລມທາສິໍ, ວິປ຺ປສນ຺ເນນ ເຈຕສາ;

ຠເວ ນິພ຺ພຕ຺ຕມານມ຺ຫິ, ຜລໍ ນິພ຺ພຕ຺ຕເຕ ມມ.

໔໑. ‘‘ທ຺ເວນວຸເຕ ອິໂຕ ກປ຺ເປ, ຍໍ ຜລໍ ອທທິໍ ອຫໍ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

໔໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຜລທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຜລທາຍກຕ຺ເຖຣສ຺ສາປທານໍ ສຕ຺ຕມໍ.

໘. ສທ຺ທສຎ຺ຎກຕ຺ເຖຣອປທານໍ

໔໓. ‘‘ປພ຺ພເຕ ຫິມວນ຺ຕມ຺ຫິ, ວສາມິ ປຓ຺ຓສນ຺ຖເຣ;

ຜຸສ຺ສສ຺ສ ຘມ຺ມໍ ຠຓໂຕ, ສທ຺ເທ ຈິຕ຺ຕໍ ປສາທຍິໍ.

໔໔. ‘‘ທ຺ເວນວຸເຕ ອິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ປຸຎ຺ຎກມ຺ມສ຺ສິທໍ ຜລໍ.

໔໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສທ຺ທສຎ຺ຎໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສທ຺ທສຎ຺ຎກຕ຺ເຖຣສ຺ສາປທານໍ ອຏ຺ຐມໍ.

໙. ໂພຘິສິຎ຺ຈກຕ຺ເຖຣອປທານໍ

໔໖. ‘‘ວິປສ຺ສິສ຺ສ ຠຄວໂຕ, ມຫາໂພຘິມໂຫ ອຫຸ;

ປພ຺ພຊ຺ຊຸປຄໂຕ ສນ຺ໂຕ, ອຸປຄຈ຺ຉິໍ ອຫໍ ຕທາ.

໔໗. ‘‘ກຸສຸໂມທກມາທາຍ, ໂພຘິຍາ ໂອກິຣິໍ ອຫໍ;

ໂມຈຍິສ຺ສຕິ ໂນ ມຸຕ຺ໂຕ, ນິພ຺ພາເປສ຺ສຕິ ນິພ຺ພຸໂຕ.

໔໘. ‘‘ເອກນວຸຕິໂຕ ກປ຺ເປ, ຍໍ ໂພຘິມຠິສິຎ຺ຈຍິໍ;

ທຸຄ຺ຄຕິໍ ນາຠິຊານາມິ, ໂພຘິສິຎ຺ຈາຍິທໍ ຜລໍ.

໔໙. ‘‘ເຕຕ຺ຕິໍເສ ວຕ຺ຕມານມ຺ຫິ, ກປ຺ເປ ອາສຸໍ ຊນາຘິປາ;

ອຸທກເສຈນາ ນາມ, ອຏ຺ເຐເຕ ຈກ຺ກວຕ຺ຕິໂນ.

໕໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ໂພຘິສິຎ຺ຈໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ໂພຘິສິຎ຺ຈກຕ຺ເຖຣສ຺ສາປທານໍ ນວມໍ.

໑໐. ປທຸມປຸປ຺ຜິຍຕ຺ເຖຣອປທານໍ

໕໑. ‘‘ໂປກ຺ຂຣວນໍ ປວິຏ຺ໂຐ, ຠຎ຺ຊນ຺ໂຕ ປທຸມານິຫໍ;

ຕຕ຺ຖທ຺ທສໍ ຜຸສ຺ສໍ ພຸທ຺ຘໍ [ອທ຺ທສໍ ຜຸສ຺ສສມ຺ພຸທ຺ຘໍ (ສີ. ສ຺ຍາ.)], ພາຕ຺ຕິໍສວຣລກ຺ຂຓໍ.

໕໒. ‘‘ປທຸມປຸປ຺ຜໍ ຄເຫຕ຺ວານ, ອາກາເສ ອຸກ຺ຂິປິໍ ອຫໍ;

ປາປກມ຺ມໍ ສຣິຕ຺ວານ, ປພ຺ພຊິໍ ອນຄາຣິຍໍ.

໕໓. ‘‘ປພ຺ພຊິຕ຺ວານ ກາເຍນ, ມນສາ ສໍວຸເຕນ ຈ;

ວຈີທຸຈ຺ຈຣິຕໍ ຫິຕ຺ວາ, ອາຊີວໍ ປຣິໂສຘຍິໍ.

໕໔. ‘‘ທ຺ເວນວຸເຕ ອິໂຕ ກປ຺ເປ, ຍໍ ປຸປ຺ຜມຠິໂຣປຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໕໕. ‘‘ປທຸມາຠາສນາມາ ຈ, ອຏ຺ຐາຣສ ມຫີປຕີ;

ອຏ຺ຐາຣເສສຸ ກປ຺ເປສຸ, ອຏ຺ຐຕາລີສມາສິສຸໍ.

໕໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປທຸມປຸປ຺ຜິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ;

ປທຸມປຸປ຺ຜິຍຕ຺ເຖຣສ຺ສາປທານໍ ທສມໍ.

ຕິມິຣວຄ຺ໂຄ ນວໂມ.