໗. ວຕ຺ຖທາຍກຕ຺ເຖຣອປທານໍ

໔໕. ‘‘ປກ຺ຂິຊາໂຕ ຕທາ ອາສິໍ, ສຸປຓ຺ໂຓ ຄຣຸຬາຘິໂປ;

ອທ຺ທສໍ ວິຣຊໍ ພຸທ຺ຘໍ, ຄຈ຺ຉນ຺ຕໍ ຄນ຺ຘມາທນໍ.

໔໖. ‘‘ຊຫິຕ຺ວາ ຄຣຸຬວຓ຺ຓໍ, ມາຓວກໍ ອຘາຣຍິໍ;

ເອກໍ ວຕ຺ຖໍ ມຍາ ທິນ຺ນໍ, ທ຺ວິປທິນ຺ທສ຺ສ ຕາທິໂນ.

໔໗. ‘‘ຕຎ຺ຈ ທຸສ຺ສໍ ປຏິຄ຺ຄຍ຺ຫ, ພຸທ຺ໂຘ ໂລກຄ຺ຄນາຍໂກ;

ອນ຺ຕລິກ຺ເຂ ຐິໂຕ ສຕ຺ຖາ, ອິມາ ຄາຖາ ອຠາສຖ.

໔໘. ‘‘‘ອິມິນາ ວຕ຺ຖທາເນນ, ຈິຕ຺ຕສ຺ສ ປຓິຘີຫິ ຈ;

ປຫາຍ ຄຣຸຬໍ ໂຍນິໍ, ເທວໂລເກ ຣມິສ຺ສຕິ’.

໔໙. ‘‘ອຕ຺ຖທສ຺ສີ ຕຸ ຠຄວາ, ໂລກເຊຏ຺ໂຐ ນຣາສໂຠ;

ວຕ຺ຖທານໍ ປສໍສິຕ຺ວາ, ປກ຺ກາມິ ອຸຕ຺ຕຣາມຸໂຂ.

໕໐. ‘‘ຠເວ ນິພ຺ພຕ຺ຕມານມ຺ຫິ, ໂຫນ຺ຕິ ເມ ວຕ຺ຖສມ຺ປທາ;

ອາກາເສ ຉທນໍ ໂຫຕິ, ວຕ຺ຖທານສ຺ສິທໍ ຜລໍ.

໕໑. ‘‘ອຣຸຓວາ [ອຣຸຓກາ (ສີ.), ອຣຸຓສາ (ສ຺ຍາ.)] ສຕ຺ຕ ຊນາ, ຈກ຺ກວຕ຺ຕີ ມຫພ຺ພລາ;

ຉຕ຺ຕິໍສຕິມ຺ຫິ ອາສິໍສຸ, ກປ຺ປມ຺ຫິ ມນຸຊາຘິປາ.

໕໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ວຕ຺ຖທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ວຕ຺ຖທາຍກຕ຺ເຖຣສ຺ສາປທານໍ ສຕ຺ຕມໍ.