໘. ອມ຺ພທາຍກຕ຺ເຖຣອປທານໍ

໕໓. ‘‘ອໂນມທສ຺ສີ ຠຄວາ, ນິສິນ຺ໂນ ປພ຺ພຕນ຺ຕເຣ;

ເມຕ຺ຕາຍ ອຜຣິ ໂລເກ, ອປ຺ປມາເຓ ນິຣູປຘິ.

໕໔. ‘‘ກປິ ອຫໍ ຕທາ ອາສິໍ, ຫິມວນ຺ເຕ ນຄຸຕ຺ຕເມ;

ທິສ຺ວາ ອໂນມທສ຺ສິໍ ຕໍ [ອໂນມໍ ອມິຕໍ (ສີ.), ອໂນມມຘິຕໍ (ສ຺ຍາ.)], ພຸທ຺ເຘ ຈິຕ຺ຕໍ ປສາທຍິໍ.

໕໕. ‘‘ອວິທູເຣ ຫິມວນ຺ຕສ຺ສ, ອມ຺ພາສຸໍ ຜລິໂນ ຕທາ;

ຕໂຕ ປກ຺ກໍ ຄເຫຕ຺ວານ, ອມ຺ພໍ ສມຘຸກໍ ອທໍ.

໕໖. ‘‘ຕໍ ເມ ພຸທ຺ໂຘ ວິຍາກາສິ, ອໂນມທສ຺ສີ ມຫາມຸນິ;

ອິມິນາ ມຘຸທາເນນ, ອມ຺ພທາເນນ ຈູຠຍໍ.

໕໗. ‘‘ສຕ຺ຕປຎ຺ຎາສກປ຺ປມ຺ຫິ, ເທວໂລເກ ຣມິສ຺ສຕິ;

ອວເສເສສຸ ກປ຺ເປສຸ, ໂວກິຓ຺ຓໍ ສໍສຣິສ຺ສຕິ.

໕໘. ‘‘ເຂເປຕ຺ວາ ປາປກໍ ກມ຺ມໍ, ປຣິປກ຺ກາຍ ພຸທ຺ຘິຍາ;

ວິນິປາຕມຄນ຺ຕ຺ວານ, ກິເລເສ ຌາປຍິສ຺ສຕິ.

໕໙. ‘‘ທເມນ ອຸຕ຺ຕເມນາຫໍ, ທມິໂຕມ຺ຫິ ມເຫສິນາ;

ປຕ຺ໂຕມ຺ຫິ ອຈລໍ ຐານໍ, ຫິຕ຺ວາ ຊຍປຣາຊຍໍ.

໖໐. ‘‘ສຕ຺ຕສຕ຺ຕຕິກປ຺ປສເຕ, ອມ຺ພຏ຺ຐຊສນາມກາ;

ຈຕຸທ຺ທສ ເຕ ຣາຊາໂນ, ຈກ຺ກວຕ຺ຕີ ມຫພ຺ພລາ.

໖໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອມ຺ພທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອມ຺ພທາຍກຕ຺ເຖຣສ຺ສາປທານໍ ອຏ຺ຐມໍ.