໖. ສຸຈິນ຺ຕິຕຕ຺ເຖຣອປທານໍ

໓໖. ‘‘ຄິຣິທຸຄ຺ຄຈໂຣ ອາສິໍ, ອຠິຊາໂຕວ ເກສຣີ;

ມິຄສງ຺ຆໍ ວຘິຕ຺ວານ, ຊີວາມິ ປພ຺ພຕນ຺ຕເຣ.

໓໗. ‘‘ອຕ຺ຖທສ຺ສີ ຕຸ ຠຄວາ, ສພ຺ພຎ຺ຎູ ວທຕໍ ວໂຣ;

ມມຸທ຺ຘຣິຕຸກາໂມ ໂສ, ອາຄຈ຺ຉິ ປພ຺ພຕຸຕ຺ຕມໍ.

໓໘. ‘‘ປສທຎ຺ຈ ມິຄໍ ຫນ຺ຕ຺ວາ, ຠກ຺ຂິຕຸໍ ສມຸປາຄມິໍ;

ຠຄວາ ຕມ຺ຫິ ສມເຍ, ຠິກ຺ຂມາໂນ [ສິກ຺ຂາຈາໂຣ (ສ຺ຍາ.)] ອຸປາຄມິ.

໓໙. ‘‘ວຣມໍສານິ ປຄ຺ຄຍ຺ຫ, ອທາສິໍ ຕສ຺ສ ສຕ຺ຖຸໂນ;

ອນຸໂມທິ ມຫາວີໂຣ, ນິພ຺ພາເປນ຺ໂຕ ມມໍ ຕທາ.

໔໐. ‘‘ເຕນ ຈິຕ຺ຕປ຺ປສາເທນ, ຄິຣິທຸຄ຺ຄໍ ປວິສິໍ ອຫໍ;

ປີຕິໍ ອຸປ຺ປາທຍິຕ຺ວານ, ຕຕ຺ຖ ກາລງ຺ກໂຕ ອຫໍ.

໔໑. ‘‘ເອເຕນ ມໍສທາເນນ, ຈິຕ຺ຕສ຺ສ ປຓິຘີຫິ ຈ;

ປນ຺ນຣເສ ກປ຺ປສເຕ, ເທວໂລເກ ຣມິໍ ອຫໍ.

໔໒. ‘‘ອວເສເສສຸ ກປ຺ເປສຸ, ກຸສລໍ ຈິນ຺ຕິຕໍ [ນິຈິຕໍ (ສີ.), ກຣິຕໍ (ສ຺ຍາ.)] ມຍາ;

ເຕເນວ ມໍສທາເນນ, ພຸທ຺ຘານຸສ຺ສຣເຓນ ຈ.

໔໓. ‘‘ອຏ຺ຐຕ຺ຕິໍສມ຺ຫິ ກປ຺ປມ຺ຫິ, ອຏ຺ຐ ທີຆາຍຸນາມກາ;

ສຏ຺ຐິມ຺ຫິໂຕ ກປ຺ປສເຕ, ທຸເວ ວຣຸຓນາມກາ [ສຣຓນາມກາ (ສ຺ຍາ.)].

໔໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຸຈິນ຺ຕິໂຕ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສຸຈິນ຺ຕິຕຕ຺ເຖຣສ຺ສາປທານໍ ຉຏ຺ຐໍ.