໕. ຠິສທາຍກຕ຺ເຖຣອປທານໍ

໒໙. ‘‘ເວສ຺ສຠູ ນາມ ນາເມນ, ອິສີນໍ ຕຕິໂຍ ອຫຸ;

ການນໍ ວນໂມຄຍ຺ຫ, ວິຫາສິ ປຸຣິສຸຕ຺ຕໂມ.

໓໐. ‘‘ຠິສມຸຬາລໍ ຄຓ຺ຫິຕ຺ວາ, ອຄມໍ ພຸທ຺ຘສນ຺ຕິກໍ;

ຕຎ຺ຈ ພຸທ຺ຘສ຺ສ ປາທາສິໍ, ປສນ຺ໂນ ເສຫິ ປາຓິຠິ.

໓໑. ‘‘ກເຣນ ຈ ປຣາມຏ຺ໂຐ, ເວສ຺ສຠູວຣພຸທ຺ຘິນາ;

ສຸຂາຫໍ ນາຠິຊານາມິ, ສມໍ ເຕນ ກຸໂຕຕ຺ຕຣິໍ.

໓໒. ‘‘ຈຣິໂມ ວຕ຺ຕເຕ ມຍ຺ຫໍ, ຠວາ ສພ຺ເພ ສມູຫຕາ;

ຫຕ຺ຖິນາເຄນ ສນ຺ເຕນ, ກຸສລໍ ໂຣປິຕໍ ມຍາ [ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ (ສ຺ຍາ.)].

໓໓. ‘‘ເອກຕ຺ຕິໍເສ ອິໂຕ ກປ຺ເປ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ຠິສທານສ຺ສິທໍ ຜລໍ.

໓໔. ‘‘ສໂມຘານາ ຈ ຣາຊາໂນ, ໂສຬສ ມນຸຊາຘິປາ;

ກປ຺ປມ຺ຫິ ຈຸທ຺ທເສ [ເຕຣເສ (ສີ. ສ຺ຍາ.)] ອາສຸໍ, ຈກ຺ກວຕ຺ຕີ ມຫພ຺ພລາ.

໓໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຠິສທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຠິສທາຍກຕ຺ເຖຣສ຺ສາປທານໍ ປຎ຺ຈມໍ.