໘. ຠທ຺ທຊິຕ຺ເຖຣອປທານໍ

໙໘. ‘‘ໂອຄຍ຺ຫ ຍໍ ໂປກ຺ຂຣຓິໍ, ນານາກຸຎ຺ຊຣເສວິຕໍ;

ອຸທ຺ຘຣາມິ ຠິສໍ ຕຕ຺ຖ, ຆາສເຫຕຸ ອຫໍ ຕທາ.

໙໙. ‘‘ຠຄວາ ຕມ຺ຫິ ສມເຍ, ປທຸມຸຕ຺ຕຣສວ຺ຫໂຍ;

ຣຕ຺ຕມ຺ພຣຘໂຣ ພຸທ຺ໂຘ, ຄຈ຺ຉເຕ ອນິລຎ຺ຊເສ.

໑໐໐. ‘‘ຘຸນນ຺ໂຕ ປໍສຸກູລານິ, ສທ຺ທໍ ອສ຺ໂສສຫໍ ຕທາ;

ອຸທ຺ຘໍ ນິຊ຺ຌາຍມາໂນຫໍ, ອທ຺ທສໍ ໂລກນາຍກໍ.

໑໐໑. ‘‘ຕຕ຺ເຖວ ຐິຕໂກ ສນ຺ໂຕ, ອາຍາຈິໍ ໂລກນາຍກໍ;

ມຘຸໍ ຠິເສຫິ ສຫິຕໍ, ຂີຣໍ ສປ຺ປິໍ ມຸຬາລິກໍ [ມຘຸໍ ຠິເສຫິ ປຈຕິ, ຂີຣສປ຺ປິ ມຸລາລິຠິ (ກ.) ຠິສທາຍກຕ຺ເຖຣາປທາເນປິ].

໑໐໒. ‘‘ປຏິຄ຺ຄຓ຺ຫາຕຸ ເມ ພຸທ຺ໂຘ, ອນຸກມ຺ປາຍ ຈກ຺ຂຸມາ;

ຕໂຕ ກາຣຸຓິໂກ ສຕ຺ຖາ, ໂອໂຣຫິຕ຺ວາ ມຫາຍໂສ.

໑໐໓. ‘‘ປຏິຄ຺ຄຓ຺ຫິ ມມ ຠິກ຺ຂໍ, ອນຸກມ຺ປາຍ ຈກ຺ຂຸມາ;

ປຏິຄ຺ຄເຫຕ຺ວາ ສມ຺ພຸທ຺ໂຘ, ອກາ ເມ ອນຸໂມທນໍ.

໑໐໔. ‘‘‘ສຸຂີ ໂຫຕຸ ມຫາປຸຎ຺ຎ, ຄຕິ ຕຸຍ຺ຫໍ ສມິຊ຺ຌຕຸ;

ອິມິນາ ຠິສທາເນນ, ລຠສ຺ສຸ ວິປຸລໍ ສຸຂໍ’.

໑໐໕. ‘‘ອິທໍ ວຕ຺ວານ ສມ຺ພຸທ຺ໂຘ, ຊລຊຸຕ຺ຕມນາມໂກ;

ຠິກ຺ຂມາທາຍ ສມ຺ພຸທ຺ໂຘ, ອາກາເສນາຄມາ ຊິໂນ.

໑໐໖. ‘‘ຕໂຕ ຠິສໍ ຄເຫຕ຺ວານ, ອຄຈ຺ຉິໍ ມມ ອສ຺ສມໍ;

ຠິສໍ ຣຸກ຺ເຂ ລຄ຺ເຄຕ຺ວານ, ມມ ທານໍ ອນຸສ຺ສຣິໍ.

໑໐໗. ‘‘ມຫາວາໂຕ ອຸຏ຺ຐຫິຕ຺ວາ, ສຎ຺ຈາເລສິ ວນໍ ຕທາ;

ອາກາໂສ ອຠິນາທິຕ຺ຖ, ອສນີ ຈ ຜລີ ຕທາ.

໑໐໘. ‘‘ຕໂຕ ເມ ອສນີປາໂຕ, ມຕ຺ຖເກ ນິປຕີ ຕທາ;

ໂສຫໍ ນິສິນ຺ນໂກ ສນ຺ໂຕ, ຕຕ຺ຖ ກາລງ຺ກໂຕ ອຫໍ.

໑໐໙. ‘‘ປຸຎ຺ຎກມ຺ເມນ ສຎ຺ຎຸຕ຺ໂຕ, ຕຸສິຕໍ ອຸປປຊ຺ຊຫໍ;

ກເຬວຣໍ ເມ ປຕິຕໍ, ເທວໂລເກ ຣມາມຫໍ.

໑໑໐. ‘‘ຉຬສີຕິສຫສ຺ສານິ, ນາຣິໂຍ ສມລງ຺ກຕາ;

ສາຍໍ ປາຕໍ ອຸປຏ຺ຐນ຺ຕິ, ຠິສທານສ຺ສິທໍ ຜລໍ.

໑໑໑. ‘‘ມນຸສ຺ສໂຍນິມາຄນ຺ຕ຺ວາ, ສຸຂິໂຕ ໂຫມຫໍ ຕທາ;

ໂຠຄາ ເມ ອູນຕາ ນຕ຺ຖິ, ຠິສທານສ຺ສິທໍ ຜລໍ.

໑໑໒. ‘‘ອນຸກມ຺ປິຕໂກ ເຕນ, ເທວເທເວນ ຕາທິນາ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໑໑໓. ‘‘ສຕສຫສ຺ສິໂຕ ກປ຺ເປ, ຍໍ ຠິສໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຠິສທານສ຺ສິທໍ ຜລໍ.

໑໑໔. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໑໕. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໑໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຠທ຺ທຊິຕ຺ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ຠທ຺ທຊິຕ຺ເຖຣສ຺ສາປທານໍ ອຏ຺ຐມໍ.