໕໖. ຍສວຄ຺ໂຄ

໑. ຍສຕ຺ເຖຣອປທານໍ

໑. ‘‘ມຫາສມຸທ຺ທໍ ໂອຄ຺ຄຍ຺ຫ, ຠວນໍ ເມ ສຸນິມ຺ມິຕໍ;

ສຸນິມ຺ມິຕາ ໂປກ຺ຂຣຓີ, ຈກ຺ກວາກູປກູຊິຕາ.

໒. ‘‘ມນ຺ທາຣເກຫິ ສຎ຺ຉນ຺ນາ, ປທຸມຸປ຺ປລເກຫິ ຈ;

ນທີ ຈ ສນ຺ທເຕ ຕຕ຺ຖ, ສຸປຕິຕ຺ຖາ ມໂນຣມາ.

໓. ‘‘ມຈ຺ຉກຈ຺ຉປສຎ຺ຉນ຺ນາ, ນານາທິຊສໂມຕ຺ຖຏາ [ນານາມິຄສໂມຕ຺ຖຏາ (ສ຺ຍາ.)];

ມຍູຣໂກຎ຺ຈາຠິຣຸທາ, ໂກກິລາທີຫິ ວຄ຺ຄຸຫິ.

໔. ‘‘ປາເຣວຕາ ຣວິຫໍສາ, ຈກ຺ກວາກາ ນທີຈຣາ;

ຕິຕ຺ຕິຣາ ສາຬິກາ ເຈຕ຺ຖ, ປາວກາ [ສມ຺ພກາ (ກ.)] ຊີວໍຊີວກາ.

໕. ‘‘ຫໍສາໂກຎ຺ຈາຠິນທິຕາ, ໂກສິຍາ ປິງ຺ຄລາ [ປິງ຺ຄລີ (ສີ.), ສິງ຺ຄລີ, ສິງ຺ຆລີ (ກ.)] ພຫູ;

ສຕ຺ຕຣຕນສມ຺ປນ຺ນາ, ມຓິມຸຕ຺ຕປວາຬິກາ.

໖. ‘‘ສພ຺ເພ ໂສຓ຺ຓມຍາ ຣຸກ຺ຂາ, ນານາຂນ຺ຘສເມຣິຕາ;

ອຸຊ຺ໂຊເຕນ຺ຕິ ທິວາຣຕ຺ຕິໍ, ຠວນໍ ສພ຺ພກາລິກໍ.

໗. ‘‘ສຏ຺ຐິຕຸຣິຍສຫສ຺ສານິ, ສາຍໍ ປາໂຕ ປວຊ຺ຊເຣ;

ໂສຬສິຕ຺ຖິສຫສ຺ສານິ, ປຣິວາເຣນ຺ຕິ ມໍ ສທາ.

໘. ‘‘ອຠິນິກ຺ຂມ຺ມ ຠວນາ, ສຸເມຘໍ ໂລກນາຍກໍ;

ປສນ຺ນຈິຕ຺ໂຕ ສຸມໂນ, ວນ຺ທຍິໍ ຕໍ [ສພ຺ພທສ຺ສິໍ (ກ.)] ມຫາຍສໍ.

໙. ‘‘ສມ຺ພຸທ຺ຘໍ ອຠິວາເທຕ຺ວາ, ສສງ຺ຆໍ ຕໍ ນິມນ຺ຕຍິໍ;

ອຘິວາເສສິ ໂສ ຘີໂຣ, ສຸເມໂຘ ໂລກນາຍໂກ.

໑໐. ‘‘ມມ ຘມ຺ມກຖໍ ກຕ຺ວາ, ອຸຍ຺ໂຍເຊສິ ມຫາມຸນິ;

ສມ຺ພຸທ຺ຘໍ ອຠິວາເທຕ຺ວາ, ຠວນໍ ເມ ອຸປາຄມິໍ.

໑໑. ‘‘ອາມນ຺ຕຍິໍ ປຣິຊນໍ, ສພ຺ເພ ສນ຺ນິປຕຸໍ ຕທາ;

‘ປຸພ຺ພຓ຺ຫສມຍໍ ພຸທ຺ໂຘ, ຠວນໍ ອາຄມິສ຺ສຕິ’.

໑໒. ‘‘‘ລາຠາ ອມ຺ຫໍ ສຸລທ຺ຘາ ໂນ, ເຍ ວສາມ ຕວນ຺ຕິເກ;

ມຍມ຺ປິ ພຸທ຺ຘເສຏ຺ຐສ຺ສ, ປູຊຍິສ຺ສາມ ສຕ຺ຖຸໂນ’.

໑໓. ‘‘ອນ຺ນໍ ປານໍ ປຏ຺ຐເປຕ຺ວາ, ກາລໍ ອາໂຣຈຍິໍ ອຫໍ;

ວສີສຕສຫສ຺ເສຫິ, ອຸເປສິ ໂລກນາຍໂກ.

໑໔. ‘‘ປຎ຺ຈງ຺ຄິເກຫິ ຕຸຣິເຍຫິ, ປຈ຺ຈຸຄ຺ຄມມກາສຫໍ;

ສພ຺ພໂສຓ຺ຓມເຍ ປີເຐ, ນິສີທິ ປຸຣິສຸຕ຺ຕໂມ.

໑໕. ‘‘ອຸປຣິຈ຺ຉທນໍ ອາສິ, ສພ຺ພໂສຓ຺ຓມຍໍ ຕທາ;

ພີຊນີໂຍ ປວາຍນ຺ຕິ, ຠິກ຺ຂຸສງ຺ຆໍ ອນຸຕ຺ຕຣໍ.

໑໖. ‘‘ປຫູເຕນນ຺ນປາເນນ, ຠິກ຺ຂຸສງ຺ຆໍ ອຕປ຺ປຍິໍ;

ປຈ຺ເຈກທຸສ຺ສຍຸຄເລ, ຠິກ຺ຂຸສງ຺ຆສ຺ສທາສຫໍ.

໑໗. ‘‘ຍໍ ວເທຕິ ສຸເມໂຘ ໂສ, ອາຫຸຕີນໍ ປຏິຄ຺ຄໂຫ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໑໘. ‘‘‘ໂຍ ມໍ ອນ຺ເນນ ປາເນນ, ສພ຺ເພ ອິເມ ຈ ຕປ຺ປຍິ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໑໙. ‘‘‘ອຏ຺ຐາຣເສ ກປ຺ປສເຕ, ເທວໂລເກ ຣມິສ຺ສຕິ;

ສຫສ຺ສກ຺ຂຕ຺ຕຸໍ ຣາຊາຍໍ, ຈກ຺ກວຕ຺ຕີ ຠວິສ຺ສຕິ.

໒໐. ‘‘‘ອຸປຄຈ຺ຉຕິ ຍໍ ໂຍນິໍ, ເທວຕ຺ຕໍ ອຖ ມານຸສໍ;

ສພ຺ພໂສຓ຺ຓມຍໍ ຕສ຺ສ, ຉທນໍ ຘາຣຍິສ຺ສຕິ.

໒໑. ‘‘‘ຕິໍສກປ຺ປສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໒໒. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

໒໓. ‘‘‘ຠິກ຺ຂຸສງ຺ເຆ ນິສີທິຕ຺ວາ, ສີຫນາທໍ ນທິສ຺ສຕິ’;

ຈິຕເກ ຉຕ຺ຕໍ ຘາເຣນ຺ຕິ, ເຫຏ຺ຐາ ຉຕ຺ຕມ຺ຫິ ຑຍ຺ຫຖ.

໒໔. ‘‘ສາມຎ຺ຎໍ ເມ ອນຸປ຺ປຕ຺ຕໍ, ກິເລສາ ຌາປິຕາ ມຍາ;

ມຓ຺ຑເປ ຣຸກ຺ຂມູເລ ວາ, ສນ຺ຕາໂສ ເມ ນ ວິຊ຺ຊຕິ.

໒໕. ‘‘ຕິໍສກປ຺ປສຫສ຺ສມ຺ຫິ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ສພ຺ພທານສ຺ສິທໍ ຜລໍ.

໒໖. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໒໗. ‘‘ສ຺ວາຄຕໍ ວຕ ເມ ອາສິ, ມມ ພຸທ຺ຘສ຺ສ ສນ຺ຕິເກ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໒໘. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຍໂສ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຍສຕ຺ເຖຣສ຺ສາປທານໍ ປຐມໍ.

໒. ນທີກສ຺ສປຕ຺ເຖຣອປທານໍ

໒໙. ‘‘ປທຸມຸຕ຺ຕຣສ຺ສ ຠຄວໂຕ, ໂລກເຊຏ຺ຐສ຺ສ ຕາທິໂນ;

ປິຓ຺ຑຈາຣໍ ຈຣນ຺ຕສ຺ສ, ວາຣໂຕ ອຸຕ຺ຕມໍ ຍສໍ;

ອຄ຺ຄຜລໍ ຄເຫຕ຺ວານ, ອທາສິໍ ສຕ຺ຖຸໂນ ອຫໍ.

໓໐. ‘‘ເຕນ ກມ຺ເມນ ເທວິນ຺ໂທ, ໂລກເຊຏ຺ໂຐ ນຣາສໂຠ;

ສມ຺ປຕ຺ໂຕມ຺ຫິ ອຈລໍ ຐານໍ, ຫິຕ຺ວາ ຊຍປຣາຊຍໍ.

໓໑. ‘‘ສຕສຫສ຺ສິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ອຄ຺ຄທານສ຺ສິທໍ ຜລໍ.

໓໒. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໓໓. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນທີກສ຺ສໂປ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ນທີກສ຺ສປຕ຺ເຖຣສ຺ສາປທານໍ ທຸຕິຍໍ.

໓. ຄຍາກສ຺ສປຕ຺ເຖຣອປທານໍ

໓໕. ‘‘ອຊິນຈມ຺ມວຕ຺ໂຖຫໍ [ອຊິນວຕ຺ຕໍ ນິວຕ຺ໂຕຫໍ (ສີ.)], ຂາຣິຠາຣຘໂຣ ຕທາ;

ຂາຣິກໍ ຫາຣຍິຕ຺ວານ, ໂກລໍ ອຫາສິ ອສ຺ສມໍ.

໓໖. ‘‘ຠຄວາ ຕມ຺ຫິ ສມເຍ, ເອໂກ ອທຸຕິໂຍ ຊິໂນ;

ມມສ຺ສມໍ ອຸປາຄຈ຺ຉິ, ໂຊເຕນ຺ໂຕ ສພ຺ພກາລິກໍ.

໓໗. ‘‘ສກໍ ຈິຕ຺ຕໍ ປສາເທຕ຺ວາ, ອຠິວາເທຕ຺ວານ ສຸພ຺ພຕໍ;

ອຸໂຠ ຫຕ຺ເຖຫິ ປຄ຺ຄຍ຺ຫ, ໂກລໍ ພຸທ຺ຘສ຺ສທາສຫໍ.

໓໘. ‘‘ເອກຕິໍເສ ອິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ໂກລທານສ຺ສິທໍ ຜລໍ.

໓໙. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໐. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຄຍາກສ຺ສໂປ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ຄຍາກສ຺ສປຕ຺ເຖຣສ຺ສາປທານໍ ຕຕິຍໍ.

໔. ກິມິລຕ຺ເຖຣອປທານໍ

໔໒. ‘‘ນິພ຺ພຸເຕ ກກຸສນ຺ຘມ຺ຫິ, ພ຺ຣາຫ຺ມຓມ຺ຫິ ວຸສີມຕິ;

ຄເຫຕ຺ວາ ສລລໍ ມາລໍ, ມຓ຺ຑປໍ ກາຣຍິໍ ອຫໍ.

໔໓. ‘‘ຕາວຕິໍສໍ ຄໂຕ ສນ຺ໂຕ, ລຠິມ຺ຫ [ລຠາມິ (ກ.)] ພ຺ຍມ຺ຫມຸຕ຺ຕມໍ;

ອຎ຺ເຎ ເທເວຕິໂຣຈາມິ, ປຸຎ຺ຎກມ຺ມສ຺ສິທໍ ຜລໍ.

໔໔. ‘‘ທິວາ ວາ ຍທິ ວາ ຣຕ຺ຕິໍ, ຈງ຺ກມນ຺ໂຕ ຐິໂຕ ຈຫໍ;

ຉນ຺ໂນ ສລລປຸປ຺ເຜຫິ, ປຸຎ຺ຎກມ຺ມສ຺ສິທໍ ຜລໍ.

໔໕. ‘‘ອິມສ຺ມິໍເຍວ ກປ຺ປມ຺ຫິ, ຍໍ ພຸທ຺ຘມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໔໖. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໗. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ກິມິໂລ [ກິມ຺ພິໂລ (ສີ.)] ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ກິມິລຕ຺ເຖຣສ຺ສາປທານໍ ຈຕຸຕ຺ຖໍ.

໕. ວຊ຺ຊີປຸຕ຺ຕຕ຺ເຖຣອປທານໍ

໔໙. ‘‘ສຫສ຺ສຣໍສີ ຠຄວາ, ສຍມ຺ຠູ ອປຣາຊິໂຕ;

ວິເວກາ ວຸຏ຺ຐຫິຕ຺ວານ, ໂຄຈຣາຍາຠິນິກ຺ຂມິ.

໕໐. ‘‘ຜລຫຕ຺ໂຖ ອຫໍ ທິສ຺ວາ, ອຸປຄຈ຺ຉິໍ ນຣາສຠໍ;

ປສນ຺ນຈິຕ຺ໂຕ ສຸມໂນ, ສວຓ຺ຏໍ ອທທິໍ ຜລໍ.

໕໑. ‘‘ຈຕຸນ຺ນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

໕໒. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໕໓. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໕໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ວຊ຺ຊີປຸຕ຺ໂຕ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ວຊ຺ຊີປຸຕ຺ຕຕ຺ເຖຣສ຺ສາປທານໍ ປຎ຺ຈມໍ.

໖. ອຸຕ຺ຕຣຕ຺ເຖຣອປທານໍ

໕໕. ‘‘ສຸເມໂຘ ນາມ ສມ຺ພຸທ຺ໂຘ, ພາຕ຺ຕິໍສວຣລກ຺ຂໂຓ;

ວິເວກກາໂມ ຠຄວາ, ຫິມວນ຺ຕມຸປາຄມິ.

໕໖. ‘‘ອຊ຺ໂຌຄາເຫຕ຺ວາ ຫິມວນ຺ຕໍ, ອຄ຺ໂຄ ກາຣຸຓິໂກ ມຸນິ;

ປລ຺ລງ຺ກໍ ອາຠຸຊິຕ຺ວານ, ນິສີທິ ປຸຣິສຸຕ຺ຕໂມ.

໕໗. ‘‘ວິຊ຺ຊຘໂຣ ຕທາ ອາສິໍ, ອນ຺ຕລິກ຺ຂຈໂຣ ອຫໍ;

ຕິສູລໍ ສຸຄຕໍ ຄຍ຺ຫ, ຄຈ຺ຉາມິ ອມ຺ພເຣ ຕທາ.

໕໘. ‘‘ປພ຺ພຕຄ຺ເຄ ຍຖາ ອຄ຺ຄິ, ປຸຓ຺ຓມາເຍວ ຈນ຺ທິມາ;

ວນໍ ໂອຠາສເຕ ພຸທ຺ໂຘ, ສາລຣາຊາວ ຜຸລ຺ລິໂຕ.

໕໙. ‘‘ວນຄ຺ຄາ ນິກ຺ຂມິຕ຺ວານ, ພຸທ຺ຘຣໍສີຠິຘາວເຣ [ພຸທ຺ຘຣໍສີ ວິຘາວເຣ (ສີ. ກ.)];

ນຬຄ຺ຄິວຓ຺ຓສງ຺ກາສາ [ນຬຄ຺ຄິວ ນສງ຺ກາສໍ (ສີ.)], ທິສ຺ວາ ຈິຕ຺ຕໍ ປສາທຍິໍ.

໖໐. ‘‘ວິຈິນໍ ອທ຺ທສໍ ປຸປ຺ຜໍ, ກຓິກາຣໍ ເທວຄນ຺ຘິກໍ;

ຕີຓິ ປຸປ຺ຜານິ ອາທາຍ, ພຸທ຺ຘເສຏ຺ຐມປູຊຍິໍ.

໖໑. ‘‘ພຸທ຺ຘສ຺ສ ອານຸຠາເວນ, ຕີຓິ ປຸປ຺ຜານິ ເມ ຕທາ;

ອຸທ຺ຘໍ ວຓ຺ຏາ ອໂຘປຕ຺ຕາ, ຉາຍໍ ກຸພ຺ພນ຺ຕິ ສຕ຺ຖຸໂນ.

໖໒. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ ຕາວຕິໍສມຄຈ຺ຉຫໍ.

໖໓. ‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ກຓິກາຣີຕິ [ກຓິກາໂຣຕິ (ສີ.)] ຎາຍຕິ;

ສຏ຺ຐິໂຍຊນມຸພ຺ເພຘໍ, ຕິໍສໂຍຊນວິຕ຺ຖຕໍ.

໖໔. ‘‘ສຫສ຺ສກຓ຺ຑໍ ສຕເຠຓ຺ຑຸ, ຘຊາລຸ ຫຣິຕາມຍໍ;

ສຕສຫສ຺ສນິຍ຺ຍູຫາ [ສຕສຫສ຺ສານິ ພ຺ຍູຫານິ (ສີ.)], ພ຺ຍມ຺ເຫ ປາຕຸຠວິໍສຸ [ປາຕຸຣຫໍສຸ (ສີ.), ປາຕຸຣຫິໍສຸ (ກ.)] ເມ.

໖໕. ‘‘ໂສຓ຺ຓມຍາ ມຓິມຍາ, ໂລຫິຕງ຺ກມຍາປິ ຈ;

ຜລິກາປິ ຈ ປລ຺ລງ຺ກາ, ເຍນິຈ຺ຉກາ ຍທິຈ຺ຉກາ.

໖໖. ‘‘ມຫາຣຫຎ຺ຈ ສຍນໍ, ຕູລິກາ ວິກຕີຍຸຕໍ;

ອຸທ຺ຘໂລມິຎ຺ຈ ເອກນ຺ຕໍ, ພິມ຺ໂພຫນສມາຍຸຕໍ.

໖໗. ‘‘ຠວນາ ນິກ຺ຂມິຕ຺ວານ, ຈຣນ຺ໂຕ ເທວຈາຣິກໍ;

ຍຖາ ອິຈ຺ຉາມິ [ຍຖາ ຄຈ຺ຉາມິ (ສີ.)] ຄມນໍ, ເທວສງ຺ຆປຸຣກ຺ຂໂຕ.

໖໘. ‘‘ປຸປ຺ຜສ຺ສ ເຫຏ຺ຐາ ຕິຏ຺ຐາມິ, ອຸປຣິຈ຺ຉທນໍ ມມ;

ສມນ຺ຕາ ໂຍຊນສຕໍ, ກຓິກາເຣຫິ ຉາທິຕໍ.

໖໙. ‘‘ສຏ຺ຐິຕຸຣິຍສຫສ຺ສານິ, ສາຍປາຕໍ ອຸປຏ຺ຐຫຸໍ;

ປຣິວາເຣນ຺ຕິ ມໍ ນິຈ຺ຈໍ, ຣຕ຺ຕິນ຺ທິວມຕນ຺ທິຕາ.

໗໐. ‘‘ຕຕ຺ຖ ນຈ຺ເຈຫິ ຄີເຕຫິ, ຕາເລຫິ ວາທິເຕຫິ ຈ;

ຣມາມິ ຂິຑ຺ຑາ ຣຕິຍາ, ໂມທາມິ ກາມກາມຫໍ.