໖. ອຸຕ຺ຕຣຕ຺ເຖຣອປທານໍ

໕໕. ‘‘ສຸເມໂຘ ນາມ ສມ຺ພຸທ຺ໂຘ, ພາຕ຺ຕິໍສວຣລກ຺ຂໂຓ;

ວິເວກກາໂມ ຠຄວາ, ຫິມວນ຺ຕມຸປາຄມິ.

໕໖. ‘‘ອຊ຺ໂຌຄາເຫຕ຺ວາ ຫິມວນ຺ຕໍ, ອຄ຺ໂຄ ກາຣຸຓິໂກ ມຸນິ;

ປລ຺ລງ຺ກໍ ອາຠຸຊິຕ຺ວານ, ນິສີທິ ປຸຣິສຸຕ຺ຕໂມ.

໕໗. ‘‘ວິຊ຺ຊຘໂຣ ຕທາ ອາສິໍ, ອນ຺ຕລິກ຺ຂຈໂຣ ອຫໍ;

ຕິສູລໍ ສຸຄຕໍ ຄຍ຺ຫ, ຄຈ຺ຉາມິ ອມ຺ພເຣ ຕທາ.

໕໘. ‘‘ປພ຺ພຕຄ຺ເຄ ຍຖາ ອຄ຺ຄິ, ປຸຓ຺ຓມາເຍວ ຈນ຺ທິມາ;

ວນໍ ໂອຠາສເຕ ພຸທ຺ໂຘ, ສາລຣາຊາວ ຜຸລ຺ລິໂຕ.

໕໙. ‘‘ວນຄ຺ຄາ ນິກ຺ຂມິຕ຺ວານ, ພຸທ຺ຘຣໍສີຠິຘາວເຣ [ພຸທ຺ຘຣໍສີ ວິຘາວເຣ (ສີ. ກ.)];

ນຬຄ຺ຄິວຓ຺ຓສງ຺ກາສາ [ນຬຄ຺ຄິວ ນສງ຺ກາສໍ (ສີ.)], ທິສ຺ວາ ຈິຕ຺ຕໍ ປສາທຍິໍ.

໖໐. ‘‘ວິຈິນໍ ອທ຺ທສໍ ປຸປ຺ຜໍ, ກຓິກາຣໍ ເທວຄນ຺ຘິກໍ;

ຕີຓິ ປຸປ຺ຜານິ ອາທາຍ, ພຸທ຺ຘເສຏ຺ຐມປູຊຍິໍ.

໖໑. ‘‘ພຸທ຺ຘສ຺ສ ອານຸຠາເວນ, ຕີຓິ ປຸປ຺ຜານິ ເມ ຕທາ;

ອຸທ຺ຘໍ ວຓ຺ຏາ ອໂຘປຕ຺ຕາ, ຉາຍໍ ກຸພ຺ພນ຺ຕິ ສຕ຺ຖຸໂນ.

໖໒. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ ຕາວຕິໍສມຄຈ຺ຉຫໍ.

໖໓. ‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ກຓິກາຣີຕິ [ກຓິກາໂຣຕິ (ສີ.)] ຎາຍຕິ;

ສຏ຺ຐິໂຍຊນມຸພ຺ເພຘໍ, ຕິໍສໂຍຊນວິຕ຺ຖຕໍ.

໖໔. ‘‘ສຫສ຺ສກຓ຺ຑໍ ສຕເຠຓ຺ຑຸ, ຘຊາລຸ ຫຣິຕາມຍໍ;

ສຕສຫສ຺ສນິຍ຺ຍູຫາ [ສຕສຫສ຺ສານິ ພ຺ຍູຫານິ (ສີ.)], ພ຺ຍມ຺ເຫ ປາຕຸຠວິໍສຸ [ປາຕຸຣຫໍສຸ (ສີ.), ປາຕຸຣຫິໍສຸ (ກ.)] ເມ.

໖໕. ‘‘ໂສຓ຺ຓມຍາ ມຓິມຍາ, ໂລຫິຕງ຺ກມຍາປິ ຈ;

ຜລິກາປິ ຈ ປລ຺ລງ຺ກາ, ເຍນິຈ຺ຉກາ ຍທິຈ຺ຉກາ.

໖໖. ‘‘ມຫາຣຫຎ຺ຈ ສຍນໍ, ຕູລິກາ ວິກຕີຍຸຕໍ;

ອຸທ຺ຘໂລມິຎ຺ຈ ເອກນ຺ຕໍ, ພິມ຺ໂພຫນສມາຍຸຕໍ.

໖໗. ‘‘ຠວນາ ນິກ຺ຂມິຕ຺ວານ, ຈຣນ຺ໂຕ ເທວຈາຣິກໍ;

ຍຖາ ອິຈ຺ຉາມິ [ຍຖາ ຄຈ຺ຉາມິ (ສີ.)] ຄມນໍ, ເທວສງ຺ຆປຸຣກ຺ຂໂຕ.

໖໘. ‘‘ປຸປ຺ຜສ຺ສ ເຫຏ຺ຐາ ຕິຏ຺ຐາມິ, ອຸປຣິຈ຺ຉທນໍ ມມ;

ສມນ຺ຕາ ໂຍຊນສຕໍ, ກຓິກາເຣຫິ ຉາທິຕໍ.

໖໙. ‘‘ສຏ຺ຐິຕຸຣິຍສຫສ຺ສານິ, ສາຍປາຕໍ ອຸປຏ຺ຐຫຸໍ;

ປຣິວາເຣນ຺ຕິ ມໍ ນິຈ຺ຈໍ, ຣຕ຺ຕິນ຺ທິວມຕນ຺ທິຕາ.

໗໐. ‘‘ຕຕ຺ຖ ນຈ຺ເຈຫິ ຄີເຕຫິ, ຕາເລຫິ ວາທິເຕຫິ ຈ;

ຣມາມິ ຂິຑ຺ຑາ ຣຕິຍາ, ໂມທາມິ ກາມກາມຫໍ.

໗໑. ‘‘ຕຕ຺ຖ ຠຸຕ຺ວາ ປິວິຕ຺ວາ ຈ, ໂມທາມິ ຕິທເສ ຕທາ;

ນາຣີຄເຓຫິ ສຫິໂຕ, ໂມທາມິ ພ຺ຍມ຺ຫມຸຕ຺ຕເມ.

໗໒. ‘‘ສຕານໍ ປຎ຺ຈກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ;

ສຕານໍ ຕີຓິກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໗໓. ‘‘ຠເວ ຠເວ ສໍສຣນ຺ໂຕ, ມຫາໂຠຄໍ ລຠາມຫໍ;

ໂຠເຄ ເມ ອູນຕາ ນຕ຺ຖິ, ພຸທ຺ຘປູຊາຍິທໍ ຜລໍ.

໗໔. ‘‘ທຸເວ ຠເວ ສໍສຣາມິ, ເທວຕ຺ເຕ ອຖ ມານຸເສ;

ອຎ຺ຎໍ ຄຕິໍ ນ ຊານາມິ, ພຸທ຺ຘປູຊາຍິທໍ ຜລໍ.

໗໕. ‘‘ທຸເວ ກຸເລ ປຊາຍາມິ [ຍຕ຺ຖ ປຈ຺ຉາ ປຊາຍາມິ (ສີ.)], ຂຕ຺ຕິເຍ ຈາປິ ພ຺ຣາຫ຺ມເຓ;

ນີເຈ ກຸເລ ນ ຊາຍາມິ, ພຸທ຺ຘປູຊາຍິທໍ ຜລໍ.

໗໖. ‘‘ຫຕ຺ຖິຍານໍ ອສ຺ສຍານໍ, ສິວິກໍ ສນ຺ທມານິກໍ;