໘. ໂລມສກງ຺ຄິຍຕ຺ເຖຣອປທານໍ

໒໒໕. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໒໒໖. ‘‘ຕທາຫໍ ຈນ຺ທໂນ ເຈວ, ປພ຺ພຊິຕ຺ວານ ສາສເນ;

ອາປາຓໂກຏິກໍ ຘມ຺ມໍ, ປູຣຍິຕ຺ວານ ສາສເນ.

໒໒໗. ‘‘ຕໂຕ ຈຸຕາ ສນ຺ຕຸສິຕໍ, ອຸປປນ຺ນາ ອຸໂຠ ມຍໍ;

ຕຕ຺ຖ ທິພ຺ເພຫິ ນຈ຺ເຈຫິ, ຄີເຕຫິ ວາທິເຕຫິ ຈ.

໒໒໘. ‘‘ຣູປາທິທສຫງ຺ເຄຫິ, ອຠິໂຠຕ຺ວານ ເສສເກ;

ຍາວຕາຍຸໍ ວສິຕ຺ວານ, ອນຸໂຠຕ຺ວາ ມຫາສຸຂໍ.

໒໒໙. ‘‘ຕໂຕ ຈວິຕ຺ວາ ຕິທສໍ, ຈນ຺ທໂນ ອຸປປຊ຺ຊຖ;

ອຫໍ ກປິລວຕ຺ຖຸສ຺ມິໍ, ອຊາຍິໍ ສາກິຍຕ຺ຣໂຊ.

໒໓໐. ‘‘ຍທາ ອຸທາຍິຕ຺ເຖເຣນ, ອຊ຺ຌິຏ຺ໂຐ ໂລກນາຍໂກ;

ອນຸກມ຺ປິຍ ສກ຺ຍານໍ, ອຸເປສິ ກປິລວ຺ຫຍໍ.

໒໓໑. ‘‘ຕທາຕິມານິໂນ ສກ຺ຍາ, ນ ພຸທ຺ຘສ຺ສ ຄຸຓຎ຺ຎຸໂນ;

ປຓມນ຺ຕິ ນ ສມ຺ພຸທ຺ຘໍ, ຊາຕິຖທ຺ຘາ ອນາທຣາ.

໒໓໒. ‘‘ເຕສໍ ສງ຺ກປ຺ປມຎ຺ຎາຍ, ອາກາເສ ຈງ຺ກມີ ຊິໂນ;

ປຊ຺ຊຸນ຺ໂນ ວິຍ ວສ຺ສິຕ຺ຖ, ປຊ຺ຊລິຕ຺ຖ ຍຖາ ສິຂີ.

໒໓໓. ‘‘ທສ຺ເສຕ຺ວາ ຣູປມຕຸລໍ, ປຸນ ອນ຺ຕຣຘາຍຖ;

ເອໂກປິ ຫຸຕ຺ວາ ພຫຸຘາ, ອໂຫສິ ປຸນເຣກໂກ.

໒໓໔. ‘‘ອນ຺ຘກາຣໍ ປກາສຎ຺ຈ, ທສ຺ສຍິຕ຺ວາ ອເນກຘາ;

ປາຏິເຫຣໍ ກຣິຕ຺ວານ, ວິນຍີ ຎາຕເກ ມຸນິ.

໒໓໕. ‘‘ຈາຕຸທ຺ທີໂປ ມຫາເມໂຆ, ຕາວເທວ ປວສ຺ສຖ;

ຕທາ ຫິ ຊາຕກໍ ພຸທ຺ໂຘ, ເວສ຺ສນ຺ຕຣມເທສຍິ.

໒໓໖. ‘‘ຕທາ ເຕ ຂຕ຺ຕິຍາ ສພ຺ເພ, ນິຫນ຺ຕ຺ວາ ຊາຕິຊໍ ມທໍ;

ອຸເປສຸໍ ສຣຓໍ ພຸທ຺ຘໍ, ອາຫ ສຸທ຺ໂຘທໂນ ຕທາ.

໒໓໗. ‘‘‘ອິທໍ ຕຕິຍໍ ຕວ ຠູຣິປຎ຺ຎ, ປາທານິ ວນ຺ທາມິ ສມນ຺ຕຈກ຺ຂຸ;

ຍທາຠິຊາໂຕ ປຖວີ ປກມ຺ປຍີ, ຍທາ ຈ ຕໍ ນຊ຺ຊຫິ ຊມ຺ພຸຉາຍາ’.

໒໓໘. ‘‘ຕທາ ພຸທ຺ຘານຸຠາວໍ ຕໍ, ທິສ຺ວາ ວິມ຺ຫິຕມານໂສ;

ປພ຺ພຊິຕ຺ວານ ຕຕ຺ເຖວ, ນິວສິໍ ມາຕຸປູຊໂກ.

໒໓໙. ‘‘ຈນ຺ທໂນ ເທວປຸຕ຺ໂຕ ມໍ, ອຸປຄນ຺ຕ຺ວານຸປຸຈ຺ຉຖ;

ຠທ຺ເທກຣຕ຺ຕສ຺ສ ຕທາ, ສງ຺ເຂປວິຕ຺ຖາຣໍ ນຍໍ.

໒໔໐. ‘‘ໂຈທິໂຕຫໍ ຕທາ ເຕນ, ອຸເປຈ຺ຈ ນຣນາຍກໍ;

ຠທ຺ເທກຣຕ຺ຕໍ ສຸຕ຺ວານ, ສໍວິຄ຺ໂຄ ວນມາມໂກ.

໒໔໑. ‘‘ຕທາ ມາຕຣມປຸຈ຺ຉິໍ, ວເນ ວຈ຺ຉາມິ ເອກໂກ;

ສຸຂຸມາໂລຕິ ເມ ມາຕາ, ວາຣຍີ ຕໍ [ເຕ (ສ຺ຍາ. ປີ. ກ.)] ຕທາ ວຈໍ.

໒໔໒. ‘‘ກາສໍ [ທພ຺ພໍ (ສີ. ສ຺ຍາ. ປີ.)] ກຸສໍ ໂປຏກິລໍ, ອຸສີຣໍ ມຸຎ຺ຊປພ຺ພຊໍ [ມຸຎ຺ຊພພ຺ພຊໍ (ສີ. ປີ.)];

ອຸຣສາ ປນຸທິສ຺ສາມິ, ວິເວກມນຸພ຺ຣູຫຍໍ.

໒໔໓. ‘‘ຕທາ ວນໍ ປວິຏ຺ໂຐຫໍ, ສຣິຕ຺ວາ ຊິນສາສນໍ;

ຠທ຺ເທກຣຕ຺ຕໂອວາທໍ, ອຣຫຕ຺ຕມປາປຸຓິໍ.

໒໔໔. ‘‘‘ອຕີຕໍ ນານ຺ວາຄເມຍ຺ຍ, ນປ຺ປຏິກງ຺ເຂ ອນາຄຕໍ;

ຍທຕີຕໍ ປຫີນໍ ຕໍ, ອປ຺ປຕ຺ຕຎ຺ຈ ອນາຄຕໍ.

໒໔໕. ‘‘‘ປຈ຺ຈຸປ຺ປນ຺ນຎ຺ຈ ໂຍ ຘມ຺ມໍ, ຕຕ຺ຖ ຕຕ຺ຖ ວິປສ຺ສຕິ;

ອສໍຫີຣໍ ອສໍກຸປ຺ປໍ, ຕໍ ວິທ຺ວາ ມນຸພ຺ຣູຫເຍ.

໒໔໖. ‘‘‘ອຊ຺ເຊວ ກິຈ຺ຈມາຕປ຺ປໍ, ໂກ ຊຎ຺ຎາ ມຣຓໍ ສຸເວ;

ນ ຫິ ໂນ ສງ຺ຄຣໍ [ສງ຺ກຣໍ (ກ.)] ເຕນ, ມຫາເສເນນ ມຈ຺ຈຸນາ.

໒໔໗. ‘‘‘ເອວໍວິຫາຣິໍ ອາຕາປິໍ, ອໂຫຣຕ຺ຕມຕນ຺ທິຕໍ;

ຕໍ ເວ ຠທ຺ເທກຣຕ຺ໂຕຕິ, ສນ຺ໂຕ ອາຈິກ຺ຂເຕ ມຸນິ’.

໒໔໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໒໔໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໒໕໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ໂລມສກງ຺ຄິໂຍ [ໂລມສງ຺ຂິໂຍ (ສ຺ຍາ. ກ.)] ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ໂລມສກງ຺ຄິຍຕ຺ເຖຣສ຺ສາປທານໍ ອຏ຺ຐມໍ.