໙. ວນວຈ຺ຉຕ຺ເຖຣອປທານໍ

໒໕໑. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໒໕໒. ‘‘ຕທາຫໍ ປພ຺ພຊິຕ຺ວານ, ຕສ຺ສ ພຸທ຺ຘສ຺ສ ສາສເນ;

ຍາວຊີວໍ ຈຣິຕ຺ວານ, ພ຺ຣຫ຺ມຈາຣໍ ຕໂຕ ຈຸໂຕ.

໒໕໓. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໒໕໔. ‘‘ຕໂຕ ຈຸໂຕ ອຣຎ຺ຎມ຺ຫິ, ກໂປໂຕ ອາສຫໍ ຕຫິໍ;

ວສເຕ ຄຸຓສມ຺ປນ຺ໂນ, ຠິກ຺ຂຸ ຌານຣໂຕ ສທາ.

໒໕໕. ‘‘ເມຕ຺ຕຈິຕ຺ໂຕ ກາຣຸຓິໂກ, ສທາ ປມຸທິຕານໂນ;

ອຸເປກ຺ຂໂກ ມຫາວີໂຣ, ອປ຺ປມຎ຺ຎາສຸ ໂກວິໂທ.

໒໕໖. ‘‘ວິນີວຣຓສງ຺ກປ຺ເປ, ສພ຺ພສຕ຺ຕຫິຕາສເຍ;

ວິສຏ຺ໂຐ ນຈິເຣນາສິໍ, ຕສ຺ມິໍ ສຸຄຕສາວເກ.

໒໕໗. ‘‘ອຸເປຈ຺ຈ ປາທມູລມ຺ຫິ, ນິສິນ຺ນສ຺ສ ຕທາສ຺ສເມ;

ກທາຈິ ສາມິສໍ ເທຕິ, ຘມ຺ມໍ ເທເສສິ ເຈກທາ.

໒໕໘. ‘‘ຕທາ ວິປຸລເປເມນ, ອຸປາສິຕ຺ວາ ຊິນຕ຺ຣຊໍ;

ຕໂຕ ຈຸໂຕ ຄໂຕ ສຄ຺ຄໍ, ປວາໂສ ສຆຣໍ ຍຖາ.

໒໕໙. ‘‘ສຄ຺ຄາ ຈຸໂຕ ມນຸສ຺ເສສຸ, ນິພ຺ພຕ຺ໂຕ ປຸຎ຺ຎກມ຺ມຸນາ;

ອຄາຣໍ ຉຑ຺ຑຍິຕ຺ວານ, ປພ຺ພຊິໍ ພຫຸໂສ ອຫໍ.

໒໖໐. ‘‘ສມໂຓ ຕາປໂສ ວິປ຺ໂປ, ປຣິພ຺ພໂຊ ຕເຖວຫໍ;

ຫຸຕ຺ວາ ວສິໍ ອຣຎ຺ຎມ຺ຫິ, ອເນກສຕໂສ ອຫໍ.

໒໖໑. ‘‘ປຈ຺ຉິເມ ຈ ຠເວ ທານິ, ຣມ຺ເມ ກປິລວຕ຺ຖເວ;

ວຈ຺ຉໂຄຕ຺ໂຕ ທິໂຊ ຕສ຺ສ, ຊາຍາຍ ອຫໂມກ຺ກມິໍ.

໒໖໒. ‘‘ມາຕຸ ເມ ໂທຫໂຬ ອາສິ, ຕິໂຣກຸຈ຺ຉິຄຕສ຺ສ ເມ;

ຊາຍມານສມີປມ຺ຫິ, ວນວາສາຍ ນິຈ຺ຉໂຍ.

໒໖໓. ‘‘ຕໂຕ ເມ ອຊນີ ມາຕາ, ຣມຓີເຍ ວນນ຺ຕເຣ;

ຄພ຺ຠໂຕ ນິກ຺ຂມນ຺ຕໍ ມໍ, ກາສາເຍນ ປຏິຄ຺ຄຫຸໍ.

໒໖໔. ‘‘ຕໂຕ ກຸມາໂຣ ສິທ຺ຘຕ຺ໂຖ, ຊາໂຕ ສກ຺ຍກຸລທ຺ຘໂຊ;

ຕສ຺ສ ມິຕ຺ໂຕ ປິໂຍ ອາສິໍ, ສໍວິສຏ຺ໂຐ ສຸມານິໂຍ.

໒໖໕. ‘‘ສຕ຺ຕສາເຣຠິນິກ຺ຂນ຺ເຕ, ໂອຫາຍ ວິປຸລໍ ຍສໍ;

ອຫມ຺ປິ ປພ຺ພຊິຕ຺ວານ, ຫິມວນ຺ຕມຸປາຄມິໍ.

໒໖໖. ‘‘ວນາລຍໍ ຠາວນີຍໍ, ກສ຺ສປໍ ຘຸຕວາທິກໍ;

ທິສ຺ວາ ສຸຕ຺ວາ ຊິນຸປ຺ປາທໍ, ອຸເປສິໍ ນຣສາຣຖິໍ.

໒໖໗. ‘‘ໂສ ເມ ຘມ຺ມມເທເສສິ, ສພ຺ພຕ຺ຖໍ ສມ຺ປກາສຍໍ;

ຕໂຕຫໍ ປພ຺ພຊິຕ຺ວານ, ວນເມວ ປຸນາຄມໍ [ປຸນາຄມິໍ (ສີ. ປີ.), ປຸໂນກ຺ກມໍ (ສ຺ຍາ.)].

໒໖໘. ‘‘ຕຕ຺ຖາປ຺ປມຕ຺ໂຕ ວິຫຣໍ, ຉຬຠິຎ຺ຎາ ອຜສ຺ສຍິໍ [ອປສ຺ສຍິໍ (ສ຺ຍາ. ກ.)];

ອໂຫ ສຸລທ຺ຘລາໂຠມ຺ຫິ, ສຸມິຕ຺ເຕນານຸກມ຺ປິໂຕ.

໒໖໙. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໒໗໐. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໒໗໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ວນວຈ຺ໂຉ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ວນວຈ຺ຉຕ຺ເຖຣສ຺ສາປທານໍ ນວມໍ.