໔. ວງ຺ຄີສຕ຺ເຖຣອປທານໍ

໙໖. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ເມສຸ ຈກ຺ຂຸມາ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໙໗. ‘‘ຍຖາປິ ສາຄເຣ ອູມິ, ຄຄເນ ວິຍ ຕາຣກາ;

ເອວໍ ປາວຈນໍ ຕສ຺ສ, ອຣຫນ຺ເຕຫິ ຈິຕ຺ຕິຕໍ.

໙໘. ‘‘ສເທວາສຸຣນາເຄຫິ, ມນຸເຊຫິ ປຸຣກ຺ຂໂຕ;

ສມຓພ຺ຣາຫ຺ມຓາກິຓ຺ເຓ, ຊນມຊ຺ເຌ ຊິນຸຕ຺ຕໂມ.

໙໙. ‘‘ປຠາຫິ ອນຸຣຎ຺ຊນ຺ໂຕ, ໂລເກ [ໂລກໍ (ສີ.)] ໂລກນ຺ຕຄູ ຊິໂນ;

ວຈເນນ ວິໂພເຘນ຺ໂຕ, ເວເນຍ຺ຍປທຸມານິ ໂສ.

໑໐໐. ‘‘ເວສາຣຊ຺ເຊຫິ ສມ຺ປນ຺ໂນ, ຈຕູຫິ ປຸຣິສຸຕ຺ຕໂມ;

ປຫີນຠຍສາຣຊ຺ໂຊ, ເຂມປ຺ປຕ຺ໂຕ ວິສາຣໂທ.

໑໐໑. ‘‘ອາສຠໍ ປວຣໍ ຐານໍ, ພຸທ຺ຘຠູມິຎ຺ຈ ເກວລໍ;

ປຏິຊານາຕິ ໂລກຄ຺ໂຄ, ນຕ຺ຖິ ສຎ຺ໂຈທໂກ ກ຺ວຈິ.

໑໐໒. ‘‘ສີຫນາທມສມ຺ຠີຕໍ, ນທໂຕ ຕສ຺ສ ຕາທິໂນ;

ເທໂວ ນໂຣ ວາ ພ຺ຣຫ຺ມາ ວາ, ປຏິວຕ຺ຕາ ນ ວິຊ຺ຊຕິ.

໑໐໓. ‘‘ເທເສນ຺ໂຕ ປວຣໍ ຘມ຺ມໍ, ສນ຺ຕາເຣນ຺ໂຕ ສເທວກໍ;

ຘມ຺ມຈກ຺ກໍ ປວຕ຺ເຕຕິ, ປຣິສາສຸ ວິສາຣໂທ.

໑໐໔. ‘‘ປຏິຠານວຕໍ ອຄ຺ຄໍ, ສາວກໍ ສາຘຸສມ຺ມຕໍ;

ຄຸຓໍ ພຫຸໍ ປກິຕ຺ເຕຕ຺ວາ, ເອຕທຄ຺ເຄ ຐເປສິ ຕໍ.

໑໐໕. ‘‘ຕທາຫໍ ຫໍສວຕິຍໍ, ພ຺ຣາຫ຺ມໂຓ ສາຘຸສມ຺ມໂຕ;

ສພ຺ພເວທວິທູ ຊາໂຕ, ວາຄີໂສ ວາທິສູທໂນ.

໑໐໖. ‘‘ອຸເປຈ຺ຈ ຕໍ ມຫາວີຣໍ, ສຸຕ຺ວາຫໍ ຘມ຺ມເທສນໍ;

ປີຕິວຣໍ ປຏິລຠິໍ, ສາວກສ຺ສ ຄຸເຓ ຣໂຕ.

໑໐໗. ‘‘ນິມນ຺ເຕຕ຺ວາວ ສຸຄຕໍ, ສສງ຺ຆໍ ໂລກນນ຺ທນໍ;

ສຕ຺ຕາຫໍ ໂຠຊຍິຕ຺ວາຫໍ, ທຸສ຺ເສຫຈ຺ຉາທຍິໍ ຕທາ.

໑໐໘. ‘‘ນິປຈ຺ຈ ສິຣສາ ປາເທ, ກໂຕກາໂສ ກຕຎ຺ຊລີ;

ເອກມນ຺ຕໍ ຐິໂຕ ຫຏ຺ໂຐ, ສນ຺ຖວິໍ ຊິນມຸຕ຺ຕມໍ.

໑໐໙. ‘‘‘ນໂມ ເຕ ວາທິມທ຺ທນ [ວາທິສທ຺ທຸລ (ສີ. ປີ.), ວາທິສູທນ (ສ຺ຍາ.)], ນໂມ ເຕ ອິສິສຕ຺ຕມ [ປຸຣິສຸຕ຺ຕມ (ສີ. ປີ.)];

ນໂມ ເຕ ສພ຺ພໂລກຄ຺ຄ, ນໂມ ເຕ ອຠຍງ຺ກຣ.

໑໑໐. ‘‘‘ນໂມ ເຕ ມາຣມຖນ [ມາຣມສນ (ອຏ຺ຐ.)], ນໂມ ເຕ ທິຏ຺ຐິສູທນ;

ນໂມ ເຕ ສນ຺ຕິສຸຂທ, ນໂມ ເຕ ສຣຓງ຺ກຣ.

໑໑໑. ‘‘‘ອນາຖານໍ ຠວໍ ນາໂຖ, ຠີຕານໍ ອຠຍປ຺ປໂທ;

ວິສ຺ສາມຠູມິ [ວິສ຺ສາສໍ ຠູມິ (ສ຺ຍາ.), ວິສ຺ສານຠູມິ (ປີ.)] ສນ຺ຕານໍ, ສຣຓໍ ສຣເຓສິນໍ’.

໑໑໒. ‘‘ເອວມາທີຫິ ສມ຺ພຸທ຺ຘໍ, ສນ຺ຖວິຕ຺ວາ ມຫາຄຸຓໍ;

ອໂວຈໍ ວາທິສູທສ຺ສ [ວາທິສູຣສ຺ສ (ສີ. ສ຺ຍາ. ປີ.)], ຄຕິໍ ປປ຺ໂປມິ ຠິກ຺ຂຸໂນ.

໑໑໓. ‘‘ຕທາ ອໂວຈ ຠຄວາ, ອນນ຺ຕປຏິຠານວາ;

‘ໂຍ ໂສ ພຸທ຺ຘໍ ອໂຠເຊສິ, ສຕ຺ຕາຫໍ ສຫສາວກໍ.

໑໑໔. ‘‘‘ຄຸຓຎ຺ຈ ເມ ປກິຕ຺ເຕສິ, ປສນ຺ໂນ ເສຫິ ປາຓິຠິ;

ເອໂສ ປຕ຺ຖຍເຕ ຐານໍ, ວາທິສູທສ຺ສ ຠິກ຺ຂຸໂນ.

໑໑໕. ‘‘‘ອນາຄຕມ຺ຫິ ອທ຺ຘາເນ, ລຈ຺ຉເສ ຕໍ ມໂນຣຖໍ;

ເທວມານຸສສມ຺ປຕ຺ຕິໍ, ອນຸໂຠຕ຺ວາ ອນປ຺ປກໍ.

໑໑໖. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໑໑໗. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ວງ຺ຄີໂສ ນາມ ນາເມນ, ເຫສ຺ສຕິ ສຕ຺ຖຸ ສາວໂກ’.

໑໑໘. ‘‘ຕໍ ສຸຕ຺ວາ ມຸທິໂຕ ຫຸຕ຺ວາ, ຍາວຊີວໍ ຕທາ ຊິນໍ;

ປຈ຺ຈເຍຫິ ອຸປຏ຺ຐາສິໍ, ເມຕ຺ຕຈິຕ຺ໂຕ ຕຖາຄຕໍ.

໑໑໙. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕຸສິຕໍ [ຕາວຕິໍສໍ (ສ຺ຍາ.)] ອຄມາສຫໍ.

໑໒໐. ‘‘ປຈ຺ຉິເມ ຈ ຠເວ ທານິ, ຊາໂຕ ວິປ຺ປກຸເລ [ປຣິພ຺ພາຊກຸເລ (ສີ. ສ຺ຍາ. ປີ.)] ອຫໍ;

ປຈ຺ຈາຊາໂຕ [ສມ຺ປຕ຺ໂຕ ຈ (ກ.)] ຍທາ ອາສິໍ, ຊາຕິຍາ ສຕ຺ຕວສ຺ສິໂກ.

໑໒໑. ‘‘ສພ຺ພເວທວິທູ ຊາໂຕ, ວາທສຕ຺ຖວິສາຣໂທ;

ວາທິສ຺ສໂຣ [ວຄ຺ຄຸສ຺ສໂຣ (ສ຺ຍາ. ປີ.)] ຈິຕ຺ຕກຖີ, ປຣວາທປ຺ປມທ຺ທໂນ.

໑໒໒. ‘‘ວງ຺ເຄ ຊາໂຕຕິ ວງ຺ຄີໂສ, ວຈເນ ອິສ຺ສໂຣຕິ ວາ;

ວງ຺ຄີໂສ ອິຕິ ເມ ນາມໍ, ອຠວີ ໂລກສມ຺ມຕໍ.

໑໒໓. ‘‘ຍທາຫໍ ວິຎ຺ຎຸຕໍ ປຕ຺ໂຕ, ຐິໂຕ ປຐມໂຍພ຺ພເນ;

ຕທາ ຣາຊຄເຫ ຣມ຺ເມ, ສາຣິປຸຕ຺ຕມຫທ຺ທສໍ [ມຖທ຺ທສໍ (ສີ. ປີ.), ຈ ອທ຺ທສໍ (ສ຺ຍາ.)].

ປຎ຺ຈວີສຕິມໍ ຠາຓວາຣໍ.

໑໒໔. ‘‘ປິຓ຺ຑາຍ ວິຈຣນ຺ຕໍ ຕໍ, ປຕ຺ຕປາຓິໍ ສຸສໍວຸຕໍ;

ອໂລລກ຺ຂິໍ ມິຕຠາຓິໍ, ຍຸຄມຕ຺ຕໍ ນິທກ຺ຂິຕໍ [ນິຣິກ຺ຂຕໍ (ສີ. ປີ.), ອຸທິກ຺ຂຕໍ (ສ຺ຍາ.)].

໑໒໕. ‘‘ຕໍ ທິສ຺ວາ ວິມ຺ຫິໂຕ ຫຸຕ຺ວາ, ອໂວຈໍ ມມນຸຈ຺ຉວໍ [ມນນຸຈ຺ຉວໍ (ສີ. ສ຺ຍາ.)];

ກຓິກາຣໍວ ນິຈິຕໍ [ກຓິກາຣປຣິຈິຕໍ (ປີ.), ຂຓິກໍ ຐານຣຈິຕໍ (ສີ.)], ຈິຕ຺ຕໍ ຄາຖາປທໍ ອຫໍ.

໑໒໖. ‘‘ອາຈິກ຺ຂິ ໂສ ເມ ສຕ຺ຖາຣໍ, ສມ຺ພຸທ຺ຘໍ ໂລກນາຍກໍ;

ຕທາ ໂສ ປຓ຺ຑິໂຕ ວີໂຣ, ອຸຕ຺ຕຣິໍ [ອຸຕ຺ຕຣໍ (ສີ. ປີ.)] ສມໂວຈ ເມ.

໑໒໗. ‘‘ວິຣາຄສໍຫິຕໍ ວາກ຺ຍໍ, ກຕ຺ວາ ທຸທ຺ທສມຸຕ຺ຕມໍ;

ວິຈິຕ຺ຕປຏິຠາເນຫິ, ໂຕສິໂຕ ເຕນ ຕາທິນາ.

໑໒໘. ‘‘ນິປຈ຺ຈ ສິຣສາ ປາເທ, ‘ປພ຺ພາເຊຫີ’ຕິ ມໍ ພ຺ຣວິ;

ຕໂຕ ມໍ ສ ມຫາປຎ຺ໂຎ, ພຸທ຺ຘເສຏ຺ຐມຸປານຍິ.

໑໒໙. ‘‘ນິປຈ຺ຈ ສິຣສາ ປາເທ, ນິສີທິໍ ສຕ຺ຖຸ ສນ຺ຕິເກ;

ມມາຫ ວທຕໍ ເສຏ຺ໂຐ, ກຈ຺ຈິ ວງ຺ຄີສ ຊານາສິ [ສຈ຺ຈໍ ວງ຺ຄີສ ກຈ຺ຈິ ເຕ (ສ຺ຍາ.)].

໑໓໐. ‘‘ກິຎ຺ຈິ ສິປ຺ປນ຺ຕິ ຕສ຺ສາຫໍ, ‘ຊານາມີ’ຕິ ຈ ອພ຺ຣວິໍ;

ມຕສີສໍ ວນຈ຺ຉຸທ຺ຘໍ, ອປິ ພາຣສວສ຺ສິກໍ;

ຕວ ວິຊ຺ຊາວິເສເສນ, ສເຈ ສກ຺ໂກສິ ວາຈຍ [ຠາສຍ (ສີ. ປີ.)].

໑໓໑. ‘‘ອາໂມຕິ ເມ ປຏິຎ຺ຎາເຕ, ຕີຓິ ສີສານິ ທສ຺ສຍິ;

ນິຣຍນຣເທເວສຸ, ອຸປປນ຺ເນ ອວາຈຍິໍ.

໑໓໒. ‘‘ຕທາ ຂີຓາສວສ຺ເສວ [ປຈ຺ເຈກພຸທ຺ຘສ຺ສ (ສີ. ປີ.)], ສີສໍ ທສ຺ເສສິ ນາຍໂກ;

ຕໂຕຫໍ ວິຫຕາຣພ຺ໂຠ, ປພ຺ພຊ຺ຊໍ ສມຍາຈິສໍ.

໑໓໓. ‘‘ປພ຺ພຊິຕ຺ວານ ສຸຄຕໍ, ສນ຺ຖວາມິ ຕຫິໍ ຕຫິໍ;

ຕໂຕ ມໍ ກພ຺ພວິຕ຺ໂຕສິ [ກວິຈິຕ຺ໂຕຕິ (ສ຺ຍາ. ປີ.)], ອຸຊ຺ຌາຍນ຺ຕິຫ ຠິກ຺ຂໂວ.

໑໓໔. ‘‘ຕໂຕ ວີມໍສນຕ຺ຖໍ ເມ, ອາຫ ພຸທ຺ໂຘ ວິນາຍໂກ;

ຕກ຺ກິກາ ປນິມາ ຄາຖາ, ຐານໂສ ປຏິຠນ຺ຕິ ຕໍ.

໑໓໕. ‘‘ນ ກພ຺ພວິຕ຺ໂຕຫໍ ວີຣ, ຐານໂສ ປຏິຠນ຺ຕິ ມໍ;

ເຕນ ຫິ ທານິ ວງ຺ຄີສ, ຐານໂສ ສນ຺ຖວາຫິ ມໍ.

໑໓໖. ‘‘ຕທາຫໍ ສນ຺ຖວິໍ ວີຣໍ, ຄາຖາຫິ ອິສິສຕ຺ຕມໍ;

ຐານໂສ ເມ ຕທາ ຕຸຏ຺ໂຐ, ຊິໂນ ອຄ຺ເຄ ຐເປສິ ມໍ.

໑໓໗. ‘‘ປຏິຠາເນນ ຈິຕ຺ເຕນ, ອຎ຺ເຎສມຕິມຎ຺ຎຫໍ;

ເປສເລ ເຕນ ສໍວິຄ຺ໂຄ, ອຣຫຕ຺ຕມປາປຸຓິໍ.

໑໓໘. ‘‘‘ປຏິຠານວຕໍ ອຄ຺ໂຄ, ອຎ຺ໂຎ ໂກຈິ ນ ວິຊ຺ຊຕິ;

ຍຖາຍໍ ຠິກ຺ຂຸ ວງ຺ຄີໂສ, ເອວໍ ຘາເຣຖ ຠິກ຺ຂໂວ’.

໑໓໙. ‘‘ສຕສຫສ຺ເສ ກຕໍ ກມ຺ມໍ, ຜລໍ ທສ຺ເສສິ ເມ ອິຘ;

ສຸມຸຕ຺ໂຕ ສຣເວໂຄວ ກິເລເສ ຌາປຍິໍ ມມ.

໑໔໐. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໔໑. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໔໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ວງ຺ຄີໂສ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ວງ຺ຄີສຕ຺ເຖຣສ຺ສາປທານໍ ຈຕຸຕ຺ຖໍ.