໕. ນນ຺ທກຕ຺ເຖຣອປທານໍ

໑໔໓. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ເມສຸ ຈກ຺ຂຸມາ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໑໔໔. ‘‘ຫິຕາຍ ສພ຺ພສຕ຺ຕານໍ, ສຸຂາຍ ວທຕໍ ວໂຣ;

ອຕ຺ຖາຍ ປຸຣິສາຊຎ຺ໂຎ, ປຏິປນ຺ໂນ ສເທວເກ.

໑໔໕. ‘‘ຍສຄ຺ຄປຕ຺ໂຕ ສິຣິມາ, ກິຕ຺ຕິວຓ຺ຓຠໂຕ [ກິຕ຺ຕິວຓ຺ຓ ຠໂຏ (ສ຺ຍາ. ກ.)] ຊິໂນ;

ປູຊິໂຕ ສພ຺ພໂລກສ຺ສ, ທິສາ ສພ຺ພາສຸ ວິສ຺ສຸໂຕ.

໑໔໖. ‘‘ອຸຕ຺ຕິຓ຺ຓວິຈິກິຈ຺ໂຉ ໂສ, ວີຕິວຕ຺ຕກຖໍກໂຖ;

ປຣິປຸຓ຺ຓມນສງ຺ກປ຺ໂປ, ປຕ຺ໂຕ ສມ຺ໂພຘິມຸຕ຺ຕມໍ.

໑໔໗. ‘‘ອນຸປ຺ປນ຺ນສ຺ສ ມຄ຺ຄສ຺ສ, ອຸປ຺ປາເທຕາ ນຣຸຕ຺ຕໂມ;

ອນກ຺ຂາຕຎ຺ຈ ອກ຺ຂາສິ, ອສຎ຺ຊາຕຎ຺ຈ ສຎ຺ຊນີ.

໑໔໘. ‘‘ມຄ຺ຄຎ຺ຎູ ມຄ຺ຄວິທູ [ໂສ ມຄ຺ຄວິທູ (ສີ. ປີ.)] ຈ, ມຄ຺ຄກ຺ຂາຍີ ນຣາສໂຠ;

ມຄ຺ຄສ຺ສ ກຸສໂລ ສຕ຺ຖາ, ສາຣຖີນໍ ວຣຸຕ຺ຕໂມ [ນຣຸຕ຺ຕໂມ (ສ຺ຍາ.)].

໑໔໙. ‘‘ຕທາ ມຫາກາຣຸຓິໂກ, ຘມ຺ມໍ ເທເສສິ ນາຍໂກ;

ນິມຸຄ຺ເຄ ກາມປງ຺ກມ຺ຫິ [ໂມຫປງ຺ກມ຺ຫິ (ສີ. ສ຺ຍາ.), ໂມຫມຄ຺ຄມ຺ຫິ (ປີ.)], ສມຸທ຺ຘຣຕິ ປາຓິເນ.

໑໕໐. ‘‘ຠິກ຺ຂຸນີນໍ ໂອວທເນ, ສາວກໍ ເສຏ຺ຐສມ຺ມຕໍ;

ວຓ຺ຓຍໍ ເອຕທຄ຺ຄມ຺ຫິ, ປຎ຺ຎເປສິ ມຫາມຸນິ.

໑໕໑. ‘‘ຕໍ ສຸຕ຺ວາຫໍ ປມຸທິໂຕ, ນິມນ຺ເຕຕ຺ວາ ຕຖາຄຕໍ;

ໂຠຊຍິຕ຺ວາ ສສງ຺ຆໍ ຕໍ, ປຕ຺ຖຍິໍ ຐານມຸຕ຺ຕມໍ.

໑໕໒. ‘‘ຕທາ ປມຸທິໂຕ ນາໂຖ, ມໍ ອໂວຈ ມຫາອິສິ;

‘ສຸຂີ ຠວສ຺ສຸ ທີຆາວຸ [ທີຆາຍຸ (ສີ. ສ຺ຍາ.)], ລຈ຺ຉເສ ຕໍ ມໂນຣຖໍ.

໑໕໓. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໑໕໔. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ນນ຺ທໂກ ນາມ ນາເມນ, ເຫສ຺ສຕິ ສຕ຺ຖຸ ສາວໂກ’.

໑໕໕. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສູປໂຄ ອຫໍ.

໑໕໖. ‘‘ປຈ຺ຉິເມ ຈ ຠເວ ທານິ, ຊາໂຕ ເສຏ຺ຐິກຸເລ ອຫໍ;

ສາວຕ຺ຖິຍໍ ປຸເຣ ວເຣ, ອິທ຺ເຘ ຜີເຕ ມຫທ຺ຘເນ.

໑໕໗. ‘‘ປຸຣປ຺ປເວເສ ສຸຄຕໍ, ທິສ຺ວາ ວິມ຺ຫິຕມານໂສ;

ເຊຕາຣາມປຏິຄ຺ຄາເຫ, ປພ຺ພຊິໍ ອນຄາຣິຍໍ.

໑໕໘. ‘‘ນຈິເຣເນວ ກາເລນ, ອຣຫຕ຺ຕມປາປຸຓິໍ;

ຕໂຕຫໍ ຕິຓ຺ຓສໍສາໂຣ, ສາສິໂຕ ສພ຺ພທສ຺ສິນາ.

໑໕໙. ‘‘ຠິກ຺ຂຸນີນໍ ຘມ຺ມກຖໍ, ປຏິປຸຈ຺ຉາກຣິໍ ອຫໍ;

ສາສິຕາ ຕາ ມຍາ ສພ຺ພາ, ອຠວິໍສຸ ອນາສວາ.

໑໖໐. ‘‘ສຕານິ ປຎ຺ຈນູນານິ, ຕທາ ຕຸຏ຺ໂຐ ມຫາຫິໂຕ;

ຠິກ຺ຂຸນີນໍ ໂອວທຕໍ, ອຄ຺ຄຏ຺ຐາເນ ຐເປສິ ມໍ.

໑໖໑. ‘‘ສຕສຫສ຺ເສ ກຕໍ ກມ຺ມໍ, ຜລໍ ທສ຺ເສສິ ເມ ອິຘ;

ສຸມຸຕ຺ໂຕ ສຣເວໂຄວ, ກິເລເສ ຌາປຍິໍ ມມ.

໑໖໒. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໖໓. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໖໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນນ຺ທໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ນນ຺ທກຕ຺ເຖຣສ຺ສາປທານໍ ປຎ຺ຈມໍ.