໓. ສີວລິຕ຺ເຖຣອປທານໍ

໕໔. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ເມສຸ ຈກ຺ຂຸມາ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໕໕. ‘‘ສີລໍ ຕສ຺ສ ອສງ຺ເຂຍ຺ຍໍ, ສມາຘິ ວຊິຣູປໂມ;

ອສງ຺ເຂຍ຺ຍໍ ຎາຓວຣໍ, ວິມຸຕ຺ຕິ ຈ ອໂນປມາ.

໕໖. ‘‘ມນຸຊາມຣນາຄານໍ, ພ຺ຣຫ຺ມານຎ຺ຈ ສມາຄເມ;

ສມຓພ຺ຣາຫ຺ມຓາກິຓ຺ເຓ, ຘມ຺ມໍ ເທເສສິ ນາຍໂກ.

໕໗. ‘‘ສສາວກໍ ມຫາລາຠິໍ, ປຸຎ຺ຎວນ຺ຕໍ ຊຸຕິນ຺ຘຣໍ;

ຐເປສິ ເອຕທຄ຺ຄມ຺ຫິ, ປຣິສາສຸ ວິສາຣໂທ.

໕໘. ‘‘ຕທາຫໍ ຂຕ຺ຕິໂຍ ອາສິໍ, ນຄເຣ ຫໍສສວ຺ຫເຍ;

ສຸຕ຺ວາ ຊິນສ຺ສ ຕໍ ວາກ຺ຍໍ, ສາວກສ຺ສ ຄຸຓໍ ພຫຸໍ.

໕໙. ‘‘ນິມນ຺ຕຍິຕ຺ວາ ສຕ຺ຕາຫໍ, ໂຠຊຍິຕ຺ວາ ສສາວກໍ;

ມຫາທານໍ ທທິຕ຺ວານ, ຕໍ ຐານມຠິປຕ຺ຖຍິໍ.

໖໐. ‘‘ຕທາ ມໍ ວິນຕໍ ປາເທ, ທິສ຺ວານ ປຸຣິສາສໂຠ;

ສເຣນ ມຫຕາ ວີໂຣ [ສຸສ຺ສເຣນ ມຫາວີໂຣ (ສີ. ປີ.)], ອິທໍ ວຈນມພ຺ຣວິ.

໖໑. ‘‘‘ຕໂຕ ຊິນສ຺ສ ວຈນໍ, ໂສຕຸກາມາ ມຫາຊນາ;

ເທວທານວຄນ຺ຘພ຺ພາ, ພ຺ຣຫ຺ມາໂນ ຈ ມຫິທ຺ຘິກາ’.

໖໒. ‘‘ສມຓພ຺ຣາຫ຺ມຓາ ເຈວ, ນມສ຺ສິໍສຸ ກຕຎ຺ຊລີ;

‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ.

໖໓. ‘‘‘ຂຕ຺ຕິເຍນ ມຫາທານໍ, ທິນ຺ນໍ ສຕ຺ຕາຫິກມ຺ປິ ໂວ [ສຕ຺ຕຫິກໍ ມິ ໂວ (ສີ.), ສຕ຺ຕຫິກາຘິກໍ (ສ຺ຍາ.), ສຕ຺ຕຫິກໍ ວິໂຠ (ປີ.)];

ໂສຕຸກາມາ ຜລໍ ຕສ຺ສ, ພ຺ຍາກໂຣຫິ ມຫາມຸເນ’.

໖໔. ‘‘ຕໂຕ ອໂວຈ ຠຄວາ, ‘ສຸຓາຖ ມມ ຠາສິຕໍ;

ອປ຺ປເມຍ຺ຍມ຺ຫິ ພຸທ຺ຘມ຺ຫິ, ສສງ຺ຆມ຺ຫິ ປຕິຏ຺ຐິຕາ [ສໍຆມ຺ຫິ ສຸປ຺ປຕິຏ຺ຐິຕາ (ສີ. ປີ.)].

໖໕. ‘‘‘ທກ຺ຂິຓາ ຕາຍ [ທກ຺ຂິຓາທາຍ (ສ຺ຍາ. ປີ.)] ໂກ ວຕ຺ຕາ, ອປ຺ປເມຍ຺ຍຜລາ ຫິ ສາ;

ອປິ ເຈ ສ ມຫາໂຠໂຄ, ຐານໍ ປຕ຺ເຖຕິ ອຸຕ຺ຕມໍ.

໖໖. ‘‘‘ລາຠີ ວິປຸລລາຠານໍ, ຍຖາ ຠິກ຺ຂຸ ສຸທສ຺ສໂນ;

ຕຖາຫມ຺ປິ ຠເວຍ຺ຍນ຺ຕິ, ລຈ຺ຉເສ ຕໍ ອນາຄເຕ.

໖໗. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໖໘. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສີວລິ ນາມ ນາເມນ, ເຫສ຺ສຕິ ສຕ຺ຖຸ ສາວໂກ’.

໖໙. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສູປໂຄ ອຫໍ.

໗໐. ‘‘ເອກນວຸຕິໂຕ ກປ຺ເປ, ວິປສ຺ສີ ໂລກນາຍໂກ;

ອຸປ຺ປຊ຺ຊິ ຈາຣຸທສ຺ສໂນ, ສພ຺ພຘມ຺ມວິປສ຺ສໂກ.

໗໑. ‘‘ຕທາຫໍ ພນ຺ຘຸມຕິຍໍ, ກຸລສ຺ສຎ຺ຎຕຣສ຺ສ ຈ;

ທຍິໂຕ ປສ຺ສິໂຕ ເຈວ, ອາສິໍ ກມ຺ມນ຺ຕວາວໂຏ [ກມ຺ມນ຺ຕພ຺ຍາວໂຏ (ສີ. ສ຺ຍາ. ກ.)].

໗໒. ‘‘ຕທາ ອຎ຺ຎຕໂຣ ປູໂຄ, ວິປສ຺ສິສ຺ສ ມເຫສິໂນ;

ປຣິເວສໍ ອກາຣຍິ, ມຫນ຺ຕມຕິວິສ຺ສຸຕໍ.

໗໓. ‘‘ນິຏ຺ຐິເຕ ຈ ມຫາທາເນ, ທທຸໍ ຂຊ຺ຊກສຎ຺ຫິຕໍ;

ນວໍ ທຘິໍ ມຘຸຎ຺ເຈວ, ວິຈິນໍ ເນວ ອທ຺ທສຸໍ.

໗໔. ‘‘ຕທາຫໍ ຕໍ ຄເຫຕ຺ວານ, ນວໍ ທຘິໍ ມຘຸມ຺ປິ ຈ;

ກມ຺ມສ຺ສາມິຆຣໍ ຄຈ຺ຉິໍ, ຕເມສນ຺ຕາ ມມທ຺ທສຸໍ.

໗໕. ‘‘ສຫສ຺ສມປິ ທຕ຺ວານ, ນາລຠິໍສຸ ຈ ຕໍ ທ຺ວຍໍ;

ຕໂຕຫໍ ເອວໍ ຈິນ຺ເຕສິໍ, ‘ເນຕໍ ເຫສ຺ສຕິ ໂອຣກໍ.

໗໖. ‘‘‘ຍຖາ ອິເມ ຊນາ ສພ຺ເພ, ສກ຺ກໂຣນ຺ຕິ ຕຖາຄຕໍ;

ອຫມ຺ປິ ກາຣໍ ກສ຺ສາມິ, ສສງ຺ເຆ ໂລກນາຍເກ’.

໗໗. ‘‘ຕທາຫເມວໍ ຈິນ຺ເຕຕ຺ວາ, ທຘິໍ ມຘຸຎ຺ຈ ເອກໂຕ;

ມທ຺ທິຕ຺ວາ ໂລກນາຖສ຺ສ, ສສງ຺ຆສ຺ສ ອທາສຫໍ.

໗໘. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໗໙. ‘‘ປຸນາຫໍ ພາຣາຓສິຍໍ, ຣາຊາ ຫຸຕ຺ວາ ມຫາຍໂສ;

ສຕ຺ຕຸກສ຺ສ ຕທາ ທຸຏ຺ໂຐ, ທ຺ວາຣໂຣຘມກາຣຍິໍ.

໘໐. ‘‘ຕທາ ຕປສ຺ສິໂນ ຣຸທ຺ຘາ, ເອກາຫໍ ຣກ຺ຂິຕາ ອຫຸໍ;

ຕໂຕ ຕສ຺ສ ວິປາເກນ, ປາປຕິໍ [ປາປິຏ຺ຐໍ (ສ຺ຍາ.) ປາປຕ຺ຕໍ (ກ.)] ນິຣຍໍ ຠຸສໍ.

໘໑. ‘‘ປຈ຺ຉິເມ ຈ ຠເວ ທານິ, ຊາໂຕຫໍ ໂກລິເຍ ປຸເຣ;

ສຸປ຺ປວາສາ ຈ ເມ ມາຕາ, ມຫາລິ ລິຈ຺ຉວີ ປິຕາ.

໘໒. ‘‘ຂຕ຺ຕິເຍ ປຸຎ຺ຎກມ຺ເມນ, ທ຺ວາຣໂຣຘສ຺ສ ວາຫສາ;

ສຕ຺ຕ ວສ຺ສານິ ນິວສິໍ, ມາຕຸກຸຈ຺ຉິມ຺ຫິ ທຸກ຺ຂິໂຕ.

໘໓. ‘‘ສຕ຺ຕາຫໍ ທ຺ວາຣມູຬ຺ໂຫຫໍ, ມຫາທຸກ຺ຂສມປ຺ປິໂຕ;

ມາຕາ ເມ ຉນ຺ທທາເນນ, ເອວໍ ອາສິ ສຸທຸກ຺ຂິຕາ.

໘໔. ‘‘ສຸວຕ຺ຖິໂຕຫໍ ນິກ຺ຂນ຺ໂຕ, ພຸທ຺ເຘນ ອນຸກມ຺ປິໂຕ;

ນິກ຺ຂນ຺ຕທິວເສເຍວ, ປພ຺ພຊິໍ ອນຄາຣິຍໍ.

໘໕. ‘‘ອຸປຊ຺ຌາ ສາຣິປຸຕ຺ໂຕ ເມ, ໂມຄ຺ຄລ຺ລາໂນ ມຫິທ຺ຘິໂກ;

ເກເສ ໂອໂຣປຍນ຺ໂຕ ເມ, ອນຸສາສິ ມຫາມຕິ.

໘໖. ‘‘ເກເສສຸ ຉິຊ຺ຊມາເນສຸ, ອຣຫຕ຺ຕມປາປຸຓິໍ;

ເທວາ ນາຄາ ມນຸສ຺ສາ ຈ, ປຈ຺ຈເຍ ອຸປເນນ຺ຕິ ເມ.

໘໗. ‘‘ປທຸມຸຕ຺ຕຣນາຖຎ຺ຈ, ວິປສ຺ສິຎ຺ຈ ວິນາຍກໍ;

ຍໍ ປູຊຍິໍ ປມຸທິໂຕ, ປຈ຺ຈເຍຫິ ວິເສສໂຕ.

໘໘. ‘‘ຕໂຕ ເຕສໍ ວິເສເສນ, ກມ຺ມານໍ ວິປຸລຸຕ຺ຕມໍ;

ລາຠໍ ລຠາມິ ສພ຺ພຕ຺ຖ, ວເນ ຄາເມ ຊເລ ຖເລ.

໘໙. ‘‘ເຣວຕໍ ທສ຺ສນຕ຺ຖາຍ, ຍທາ ຍາຕິ ວິນາຍໂກ;

ຕິໍສຠິກ຺ຂຸສຫສ຺ເສຫິ, ສຫ ໂລກຄ຺ຄນາຍໂກ.

໙໐. ‘‘ຕທາ ເທໂວປຓີເຕຫິ, ມມຕ຺ຖາຍ ມຫາມຕິ;

ປຈ຺ຈເຍຫິ ມຫາວີໂຣ, ສສງ຺ໂຆ ໂລກນາຍໂກ.

໙໑. ‘‘ອຸປຏ຺ຐິໂຕ ມຍາ ພຸທ຺ໂຘ, ຄນ຺ຕ຺ວາ ເຣວຕມທ຺ທສ;

ຕໂຕ ເຊຕວນໍ ຄນ຺ຕ຺ວາ, ເອຕທຄ຺ເຄ ຐເປສິ ມໍ.

໙໒. ‘‘‘ລາຠີນໍ ສີວລິ ອຄ຺ໂຄ, ມມ ສິສ຺ເສສຸ ຠິກ຺ຂໂວ’;

ສພ຺ພໂລກຫິໂຕ ສຕ຺ຖາ, ກິຕ຺ຕຍີ ປຣິສາສຸ ມໍ.

໙໓. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໙໔. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໙໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສີວລິເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ສີວລິຕ຺ເຖຣສ຺ສາປທານໍ ຕຕິຍໍ.