໙. ຣາຘຕ຺ເຖຣອປທານໍ

໒໙໖. ‘‘ປທຸມຸຕ຺ຕໂຣ ນາມ ຊິໂນ, ສພ຺ພໂລກວິທູ ມຸນິ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ຈກ຺ຂຸມາ.

໒໙໗. ‘‘ໂອວາທໂກ ວິຎ຺ຎາປໂກ, ຕາຣໂກ ສພ຺ພປາຓິນໍ;

ເທສນາກຸສໂລ ພຸທ຺ໂຘ, ຕາເຣສິ ຊນຕໍ ພຫຸໍ.

໒໙໘. ‘‘ອນຸກມ຺ປໂກ ກາຣຸຓິໂກ, ຫິເຕສີ ສພ຺ພປາຓິນໍ;

ສມ຺ປຕ຺ເຕ ຕິຕ຺ຖິເຍ ສພ຺ເພ, ປຎ຺ຈສີເລ ປຕິຏ຺ຐປິ.

໒໙໙. ‘‘ເອວໍ ນິຣາກຸລໍ ອາສິ, ສຸຎ຺ຎຕໍ ຕິຕ຺ຖິເຍຫິ ຈ;

ວິຈິຕ຺ຕໍ ອຣຫນ຺ເຕຫິ, ວສີຠູເຕຫິ ຕາທິຠິ.

໓໐໐. ‘‘ຣຕນານຏ຺ຐປຎ຺ຎາສໍ, ອຸຄ຺ຄໂຕ ໂສ ມຫາມຸນິ;

ກຎ຺ຈນຄ຺ຆິຍສງ຺ກາໂສ, ພາຕ຺ຕິໍສວຣລກ຺ຂໂຓ.

໓໐໑. ‘‘ວສ຺ສສຕສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໓໐໒. ‘‘ຕທາຫໍ ຫໍສວຕິຍໍ, ພ຺ຣາຫ຺ມໂຓ ມນ຺ຕປາຣຄູ;

ອຸເປຈ຺ຈ ຕໍ ນຣວຣໍ, ອສ຺ໂສສິໍ ຘມ຺ມເທສນໍ.

໓໐໓. ‘‘ປຎ຺ຎເປນ຺ຕໍ ມຫາວີຣໍ, ປຣິສາສຸ ວິສາຣທໍ;

ປຏິຠາເນຍ຺ຍກໍ ຠິກ຺ຂຸໍ, ເອຕທຄ຺ເຄ ວິນາຍກໍ.

໓໐໔. ‘‘ຕທາຫໍ ກາຣໍ ກຕ຺ວານ, ສສງ຺ເຆ ໂລກນາຍເກ;

ນິປຈ຺ຈ ສິຣສາ ປາເທ, ຕໍ ຐານໍ ອຠິປຕ຺ຖຍິໍ.

໓໐໕. ‘‘ຕໂຕ ມໍ ຠຄວາ ອາຫ, ສິງ຺ຄີນິກ຺ຂສມປ຺ປໂຠ;

ສເຣນ ຣຊນີເຍນ, ກິເລສມລຫາຣິນາ.

໓໐໖. ‘‘‘ສຸຂີ ຠວສ຺ສຸ ທີຆາຍຸ, ສິຊ຺ຌຕຸ ປຓິຘີ ຕວ;

ສສງ຺ເຆ ເມ ກຕໍ ກາຣໍ, ອຕີວ ວິປຸລໍ ຕຍາ.

໓໐໗. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໓໐໘. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ຣາໂຘຕິ ນາມເຘຍ຺ເຍນ, ເຫສ຺ສຕິ ສຕ຺ຖຸ ສາວໂກ.

໓໐໙. ‘‘‘ສ ເຕ ເຫຕຸຄຸເຓ ຕຸຏ຺ໂຐ, ສກ຺ຍປຸຕ຺ໂຕ ນຣາສໂຠ [ອິທໍ ປາທທ຺ວຍໍ ສ຺ຍາມມູເລ ນຕ຺ຖີ];

ປຏິຠາເນຍ຺ຍການຄ຺ຄໍ, ປຎ຺ຎເປສ຺ສຕິ ນາຍໂກ’.

໓໑໐. ‘‘ຕໍ ສຸຕ຺ວາ ມຸທິໂຕ ຫຸຕ຺ວາ, ຍາວຊີວໍ ຕທາ ຊິນໍ;

ເມຕ຺ຕຈິຕ຺ໂຕ ປຣິຈຣິໍ, ສໂຕ ປຎ຺ຎາສມາຫິໂຕ.

໓໑໑. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໓໑໒. ‘‘ສຕານໍ ຕີຓິກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ;

ສຕານໍ ປຎ຺ຈກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ.

໓໑໓. ‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ສພ຺ພຕ຺ຖ ສຸຂິໂຕ ອາສິໍ, ຕສ຺ສ ກມ຺ມສ຺ສ ວາຫສາ.

໓໑໔. ‘‘ປຈ຺ຉິເມ ຠເວ ສມ຺ປຕ຺ເຕ, ຄິຣິພ຺ພຊປຸຣຸຕ຺ຕເມ;

ຊາໂຕ ວິປ຺ປກຸເລ ນິທ຺ເຘ, ວິກລຈ຺ຉາທນາສເນ.

໓໑໕. ‘‘ກຏຈ຺ຉຸຠິກ຺ຂໍ ປາທາສິໍ, ສາຣິປຸຕ຺ຕສ຺ສ ຕາທິໂນ;

ຍທາ ຊິຓ຺ໂຓ ຈ ວຸທ຺ໂຘ ຈ, ຕທາຣາມມຸປາຄມິໍ.

໓໑໖. ‘‘ປພ຺ພຊຕິ ນ ມໍ ໂກຈິ [ປພ຺ພາເຊນ຺ຕິ ນ ມໍ ເກຈິ (ສີ. ສ຺ຍາ ປີ.)], ຊິຓ຺ຓທຸພ຺ພລຖາມກໍ;

ເຕນ ທີໂນ ວິວຓ຺ຓງ຺ໂຄ [ວິວຓ຺ຓໂກ (ກ.)], ໂສໂກ ຈາສິໍ ຕທາ ອຫໍ.

໓໑໗. ‘‘ທິສ຺ວາ ມຫາກາຣຸຓິໂກ, ມມມາຫ [ມມາຫ ໂສ (ສີ.), ມມາຫ ຈ (ປີ.)] ມຫາມຸນິ;

‘ກິມຕ຺ຖໍ ປຸຕ຺ຕໂສກຏ຺ໂຏ, ພ຺ຣູຫິ ເຕ ຈິຕ຺ຕຊໍ ຣຸຊໍ’.

໓໑໘. ‘‘‘ປພ຺ພຊ຺ຊໍ ນ ລເຠ ວີຣ, ສ຺ວາກ຺ຂາເຕ ຕວ ສາສເນ;

ເຕນ ໂສເກນ ທີໂນສ຺ມິ, ສຣຓໍ ໂຫຫິ ນາຍກ’.

໓໑໙. ‘‘ຕທາ ຠິກ຺ຂູ ສມາເນຕ຺ວາ, ອປຸຈ຺ຉິ ມຸນິສຕ຺ຕໂມ;

‘ອິມສ຺ສ ອຘິກາຣໍ ເຍ, ສຣນ຺ຕິ ພ຺ຍາຫຣນ຺ຕຸ ເຕ’.

໓໒໐. ‘‘ສາຣິປຸຕ຺ໂຕ ຕທາໂວຈ, ‘ກາຣມສ຺ສ ສຣາມຫໍ;

ກຏຈ຺ຉຸຠິກ຺ຂໍ ທາເປສິ, ປິຓ຺ຑາຍ ຈຣໂຕ ມມ’.

໓໒໑. ‘‘‘ສາຘຸ ສາຘຸ ກຕຎ຺ຎູສິ, ສາຣິປຸຕ຺ຕ ອິມໍ ຕຸວໍ;

ປພ຺ພາເຊຫິ ທິຊໍ ວຸຑ຺ຒໍ, ເຫສ຺ສຕາຊານິໂຍ ອຍໍ’.

໓໒໒. ‘‘ຕໂຕ ອລຕ຺ຖໍ ປພ຺ພຊ຺ຊໍ, ກມ຺ມວາໂຈປສມ຺ປທໍ;

ນ ຈິເຣເນວ ກາເລນ, ປາປຸຓິໍ ອາສວກ຺ຂຍໍ.

໓໒໓. ‘‘ສກ຺ກຈ຺ຈໍ ມຸນິໂນ ວາກ຺ຍໍ, ສຸຓາມິ ມຸທິໂຕ ຍໂຕ;

ປຏິຠາເນຍ຺ຍການຄ຺ຄໍ, ຕໂຕ ມໍ ຐປຍີ ຊິໂນ.

໓໒໔. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໓໒໕. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໒໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຣາໂຘ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ຣາຘຕ຺ເຖຣສ຺ສາປທານໍ ນວມໍ.