໑໐. ໂມຆຣາຊຕ຺ເຖຣອປທານໍ

໓໒໗. ‘‘ປທຸມຸຕ຺ຕໂຣ ນາມ ຊິໂນ, ສພ຺ພໂລກວິທູ ມຸນິ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ຈກ຺ຂຸມາ.

໓໒໘. ‘‘ໂອວາທໂກ ວິຎ຺ຎາປໂກ, ຕາຣໂກ ສພ຺ພປາຓິນໍ;

ເທສນາກຸສໂລ ພຸທ຺ໂຘ, ຕາເຣສິ ຊນຕໍ ພຫຸໍ.

໓໒໙. ‘‘ອນຸກມ຺ປໂກ ກາຣຸຓິໂກ, ຫິເຕສີ ສພ຺ພປາຓິນໍ;

ສມ຺ປຕ຺ເຕ ຕິຕ຺ຖິເຍ ສພ຺ເພ, ປຎ຺ຈສີເລ ປຕິຏ຺ຐປິ.

໓໓໐. ‘‘ເອວໍ ນິຣາກຸລໍ ອາສິ, ສຸຎ຺ຎຕໍ ຕິຕ຺ຖິເຍຫິ ຈ;

ວິຈິຕ຺ຕໍ ອຣຫນ຺ເຕຫິ, ວສີຠູເຕຫິ ຕາທິຠິ.

໓໓໑. ‘‘ຣຕນານຏ຺ຐປຎ຺ຎາສໍ, ອຸຄ຺ຄໂຕ ໂສ ມຫາມຸນິ;

ກຎ຺ຈນຄ຺ຆິຍສງ຺ກາໂສ, ພາຕ຺ຕິໍສວຣລກ຺ຂໂຓ.

໓໓໒. ‘‘ວສ຺ສສຕສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໓໓໓. ‘‘ຕທາຫໍ ຫໍສວຕິຍໍ, ກຸເລ ອຎ຺ຎຕເຣ ອຫຸໍ;

ປຣກມ຺ມາຍເນ ຍຸຕ຺ໂຕ, ນຕ຺ຖິ ເມ ກິຎ຺ຈິ ສໍຘນໍ.

໓໓໔. ‘‘ປຏິກ຺ກມນສາລາຍໍ, ວສນ຺ໂຕ ກຕຠູມິຍໍ;

ອຄ຺ຄິໍ ອຸຊ຺ຊາລຍິໍ ຕຕ຺ຖ, ທຬ຺ຫໍ ກຓ຺ຫາສິ ສາ [ກຓ຺ຫາ ສິຍາ (ສີ. ປີ.), ຑຍ຺ຫກຓ຺ຫາ ສິລາ (ສ຺ຍາ.)] ຫີ.

໓໓໕. ‘‘ຕທາ ປຣິສຕິໍ ນາໂຖ, ຈຕຸສຈ຺ຈປກາສໂກ;

ສາວກໍ ສມ຺ປກິຕ຺ເຕສິ, ລູຂຈີວຣຘາຣກໍ.

໓໓໖. ‘‘ຕສ຺ສ ຕມ຺ຫິ ຄຸເຓ ຕຸຏ຺ໂຐ, ປຓິປຈ຺ຈ [ປຕິປຊ຺ຊ (ສ຺ຍາ.)] ຕຖາຄຕໍ;

ລູຂຈີວຣຘາຣຄ຺ຄໍ, ປຕ຺ຖຍິໍ ຐານມຸຕ຺ຕມໍ.

໓໓໗. ‘‘ຕທາ ອໂວຈ ຠຄວາ, ສາວເກ ປທຸມຸຕ຺ຕໂຣ;

‘ປສ຺ສເຖຕໍ ປຸຣິສກໍ, ກຸເຈລໍ ຕນຸເທຫກໍ.

໓໓໘. ‘‘‘ປີຕິປ຺ປສນ຺ນວທນໍ, ສທ຺ຘາຘນສມນ຺ວິຕໍ [ສທ຺ຘາສ຺ເນຫສມນ຺ວຕໍ (ກ.)];

ອຸທຄ຺ຄຕນຸຊໍ ຫຏ຺ຐໍ, ອຈລໍ ສາລປິຓ຺ຑິຕໍ.

໓໓໙. ‘‘‘ເອໂສ ປຕ຺ເຖຕິ ຕໍ ຐານໍ, ສຈ຺ຈເສນສ຺ສ ຠິກ຺ຂຸໂນ;

ລູຂຈີວຣຘາຣິສ຺ສ, ຕສ຺ສ ວຓ຺ຓສິຕາສໂຍ [ວຓ຺ຓຄຕາສໂຍ (ສີ. ສ຺ຍາ. ປີ.)].

໓໔໐. ‘‘ຕໍ ສຸຕ຺ວາ ມຸທິໂຕ ຫຸຕ຺ວາ, ນິປຈ຺ຈ ສິຣສາ ຊິນໍ;

ຍາວຊີວໍ ສຸຠໍ ກມ຺ມໍ, ກຣິຕ຺ວາ ຊິນສາສເນ.

໓໔໑. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສູປໂຄ ອຫໍ.

໓໔໒. ‘‘ປຏິກ຺ກມນສາລາຍໍ, ຠູມິທາຫກກມ຺ມຸນາ;

ສມສຫສ຺ສໍ ນິຣເຍ, ອທຍ຺ຫິໍ ເວທນາຏ຺ຏິໂຕ.

໓໔໓. ‘‘ເຕນ ກມ຺ມາວເສເສນ, ປຎ຺ຈ ຊາຕິສຕານິຫໍ;

ມນຸສ຺ໂສ ກຸລໂຊ ຫຸຕ຺ວາ, ຊາຕິຍາ ລກ຺ຂຓງ຺ກິໂຕ.

໓໔໔. ‘‘ປຎ຺ຈ ຊາຕິສຕາເນວ, ກຸຏ຺ຐໂຣຄສມປ຺ປິໂຕ;

ມຫາທຸກ຺ຂໍ ອນຸຠວິໍ, ຕສ຺ສ ກມ຺ມສ຺ສ ວາຫສາ.

໓໔໕. ‘‘ອິມສ຺ມິໍ ຠທ຺ທເກ ກປ຺ເປ, ອຸປຣິຏ຺ຐໍ ຍສສ຺ສິນໍ;

ປິຓ຺ຑປາເຕນ ຕປ຺ເປສິໍ, ປສນ຺ນມານໂສ ອຫໍ.

໓໔໖. ‘‘ເຕນ ກມ຺ມວິເສເສນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໓໔໗. ‘‘ປຈ຺ຉິເມ ຠເວ ສມ຺ປຕ຺ເຕ, ອຊາຍິໍ ຂຕ຺ຕິເຍ ກຸເລ;

ປິຕຸໂນ ອຈ຺ຈເຍນາຫໍ, ມຫາຣຊ຺ຊສມປ຺ປິໂຕ.

໓໔໘. ‘‘ກຸຏ຺ຐໂຣຄາຘິຠູໂຕຫໍ, ນ ຣຕິໍ ນ ສຸຂໍ ລເຠ;

ໂມຆໍ ຣຊ຺ຊໍ ສຸຂໍ ຍສ຺ມາ, ໂມຆຣາຊາ ຕໂຕ ອຫໍ.

໓໔໙. ‘‘ກາຍສ຺ສ ໂທສໍ ທິສ຺ວານ, ປພ຺ພຊິໍ ອນຄາຣິຍໍ;

ພາວຣິສ຺ສ ທິຊຄ຺ຄສ຺ສ, ສິສ຺ສຕ຺ຕໍ ອຊ຺ຌຸປາຄມິໍ.

໓໕໐. ‘‘ມຫຕາ ປຣິວາເຣນ, ອຸເປຈ຺ຈ ນຣນາຍກໍ;

ອປຸຈ຺ຉິໍ ນິປຸຓໍ ປຎ຺ຫໍ, ຕໍ ວີຣໍ ວາທິສູທນໍ.

໓໕໑. ‘‘‘ອຍໍ ໂລໂກ ປໂຣ ໂລໂກ, ພ຺ຣຫ຺ມໂລໂກ ສເທວໂກ;

ທິຏ຺ຐິໍ ໂນ [ທິຏ຺ຐາ ໂນ (ສີ.), ທິຏ຺ຐໍ ໂນ (ປີ.), ທິຏ຺ຐິໍ ເຕ (ສ຺ຍາ.)] ນາຠິຊານາມິ, ໂຄຕມສ຺ສ ຍສສ຺ສິໂນ.

໓໕໒. ‘‘‘ເອວາຠິກ຺ກນ຺ຕທສ຺ສາວິໍ, ອຕ຺ຖິ ປຎ຺ເຫນ ອາຄມໍ;

ກຖໍ ໂລກໍ ອເວກ຺ຂນ຺ຕໍ, ມຈ຺ຈຸຣາຊາ ນ ປສ຺ສຕິ’.

໓໕໓. ‘‘‘ສຸຎ຺ຎໂຕ ໂລກໍ ອເວກ຺ຂສ຺ສຸ, ໂມຆຣາຊ ສທາ ສໂຕ;

ອຕ຺ຕານຸທິຏ຺ຐິໍ ອຸຫຈ຺ຈ, ເອວໍ ມຈ຺ຈຸຕໂຣ ສິຍາ.

໓໕໔. ‘‘‘ເອວໍ ໂລກໍ ອເວກ຺ຂນ຺ຕໍ, ມຈ຺ຈຸຣາຊາ ນ ປສ຺ສຕິ’;

ອິຕິ ມໍ ອຠຓິ ພຸທ຺ໂຘ, ສພ຺ພໂຣຄຕິກິຈ຺ຉໂກ.

໓໕໕. ‘‘ສຫ ຄາຖາວສາເນນ, ເກສມສ຺ສຸວິວຊ຺ຊິໂຕ;

ກາສາວວຕ຺ຖວສໂນ, ອາສິໍ ຠິກ຺ຂຸ ຕຖາຣຫາ.

໓໕໖. ‘‘ສງ຺ຆິເກສຸ ວິຫາເຣສຸ, ນ ວສິໍ ໂຣຄປີຬິໂຕ;

ມາ ວິຫາໂຣ ປທຸສ຺ສີຕິ, ວາຕໂຣເຄຫິ ປີຬິໂຕ [ວາຈາຍາຠິສຸປີຬິໂຕ (ສ຺ຍາ. ປີ.), ວາຕໂຣຄີ ສຸປີຬິໂຕ (ກ.)].

໓໕໗. ‘‘ສງ຺ກາຣກູຏາ ອາຫິຕ຺ວາ, ສຸສານາ ຣຖິກາຫິ ຈ;

ຕໂຕ ສງ຺ຆາຏິໍ ກຣິຕ຺ວາ, ຘາຣຍິໍ ລູຂຈີວຣໍ.

໓໕໘. ‘‘ມຫາຠິສກ຺ໂກ ຕສ຺ມິໍ ເມ, ຄຸເຓ ຕຸຏ຺ໂຐ ວິນາຍໂກ;

ລູຂຈີວຣຘາຣີນໍ, ເອຕທຄ຺ເຄ ຐເປສິ ມໍ.

໓໕໙. ‘‘ປຸຎ຺ຎປາປປຣິກ຺ຂີໂຓ, ສພ຺ພໂຣຄວິວຊ຺ຊິໂຕ;

ສິຂີວ ອນຸປາທາໂນ, ນິພ຺ພາຍິສ຺ສມນາສໂວ.

໓໖໐. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໓໖໑. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໖໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ໂມຆຣາຊາ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ໂມຆຣາຊຕ຺ເຖຣສ຺ສາປທານໍ ທສມໍ.

ກຈ຺ຈາຍນວຄ຺ໂຄ ຈຕຸປຎ຺ຎາສໂມ.