໕. ກຸມາຣກສ຺ສປຕ຺ເຖຣອປທານໍ

໑໕໐. ‘‘ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ;

ສພ຺ພໂລກຫິໂຕ ວີໂຣ, ປທຸມຸຕ຺ຕຣນາມໂກ.

໑໕໑. ‘‘ຕທາຫໍ ພ຺ຣາຫ຺ມໂຓ ຫຸຕ຺ວາ, ວິສ຺ສຸໂຕ ເວທປາຣຄູ;

ທິວາວິຫາຣໍ ວິຈຣໍ, ອທ຺ທສໍ ໂລກນາຍກໍ.

໑໕໒. ‘‘ຈຕຸສຈ຺ຈໍ ປກາເສນ຺ຕໍ, ໂພຘຍນ຺ຕໍ ສເທວກໍ;

ວິຈິຕ຺ຕກຖິການຄ຺ຄໍ, ວຓ຺ຓຍນ຺ຕໍ ມຫາຊເນ.

໑໕໓. ‘‘ຕທາ ມຸທິຕຈິຕ຺ໂຕຫໍ, ນິມນ຺ເຕຕ຺ວາ ຕຖາຄຕໍ;

ນານາຣຕ຺ເຕຫິ ວຕ຺ເຖຫິ, ອລງ຺ກຣິຕ຺ວານ ມຓ຺ຑປໍ.

໑໕໔. ‘‘ນານາຣຕນປຊ຺ໂຊຕໍ, ສສງ຺ຆໍ ໂຠຊຍິໍ ຕຫິໍ;

ໂຠຊຍິຕ຺ວານ ສຕ຺ຕາຫໍ, ນານຄ຺ຄຣສໂຠຊນໍ.

໑໕໕. ‘‘ນານາຈິຕ຺ເຕຫິ [ນານາວຓ຺ເຓຫິ (ສີ.)] ປຸປ຺ເຜຫິ, ປູຊຍິຕ຺ວາ ສສາວກໍ [ມຫາວີຣໍ (ກ.)];

ນິປຈ຺ຈ ປາທມູລມ຺ຫິ, ຕໍ ຐານໍ ປຕ຺ຖຍິໍ ອຫໍ.

໑໕໖. ‘‘ຕທາ ມຸນິວໂຣ ອາຫ, ກຣຸເຓກຣສາສໂຍ [ກຣຸໂຓ ກຣຸຓາລໂຍ (ສ຺ຍາ.)];

‘ປສ຺ສເຖຕໍ ທິຊວຣໍ, ປທຸມານນໂລຈນໍ.

໑໕໗. ‘‘‘ປີຕິປາໂມຊ຺ຊພຫຸລໍ, ສມຸຄ຺ຄຕຕນູຣຸຫໍ;

ຫາສມ຺ຫິຕວິສາລກ຺ຂໍ, ມມ ສາສນລາລສໍ.

໑໕໘. ‘‘‘ປຕິຕໍ ປາທມູເລ ເມ, ເອກາວຕ຺ຖສຸມານສໍ [ເອກວຕ຺ຖໍ ສຸມານສໍ (ສ຺ຍາ. ກ.)];

ເອສ ປຕ຺ເຖຕິ ຕໍ ຐານໍ, ວິຈິຕ຺ຕກຖິກຕ຺ຕນໍ [ວິຈິຕ຺ຕກຖິກຕ຺ຕທໍ (ສີ. ປີ.)].

໑໕໙. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໑໖໐. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ກຸມາຣກສ຺ສໂປ ນາມ, ເຫສ຺ສຕິ ສຕ຺ຖຸ ສາວໂກ.

໑໖໑. ‘‘‘ວິຈິຕ຺ຕປຸປ຺ຜທຸສ຺ສານໍ, ຣຕນານຎ຺ຈ ວາຫສາ;

ວິຈິຕ຺ຕກຖິການໍ ໂສ, ອຄ຺ຄຕໍ ປາປຸຓິສ຺ສຕິ’.

໑໖໒. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໖໓. ‘‘ປຣິພ຺ຠມໍ ຠວາຠເວ [ຠວາກາເສ (ສີ. ປີ.)], ຣງ຺ຄມຊ຺ເຌ ຍຖາ ນໂຏ;

ສາຂມິຄຕ຺ຣໂຊ ຫຸຕ຺ວາ, ມິຄິຍາ ກຸຈ຺ຉິໂມກ຺ກມິໍ.

໑໖໔. ‘‘ຕທາ ມຍິ ກຸຈ຺ຉິຄເຕ, ວຊ຺ຌວາໂຣ ອຸປຏ຺ຐິໂຕ;

ສາເຂນ ຈຕ຺ຕາ ເມ ມາຕາ, ນິຄ຺ໂຣຘໍ ສຣຓໍ ຄຕາ.

໑໖໕. ‘‘ເຕນ ສາ ມິຄຣາເຊນ, ມຣຓາ ປຣິໂມຈິຕາ;

ປຣິຈ຺ຈຊິຕ຺ວາ ສປາຓໍ [ສໍປາຓໍ (ສີ. ປີ.)], ມເມວໍ ໂອວທີ ຕທາ.

໑໖໖. ‘‘‘ນິຄ຺ໂຣຘເມວ ເສເວຍ຺ຍ, ນ ສາຂມຸປສໍວເສ;

ນິຄ຺ໂຣຘສ຺ມິໍ ມຕໍ ເສຍ຺ໂຍ, ຍຎ຺ເຈ ສາຂມ຺ຫິ ຊີວິຕໍ’.

໑໖໗. ‘‘ເຕນານຸສິຏ຺ຐາ ມິຄຍູຖເປນ, ອຫຎ຺ຈ ມາຕາ ຈ ຕເຖຕເຣ ຈ [ຈິຕເຣ ຈ (ສ຺ຍາ.), ຕສ຺ໂສວາເທນ (ປີ.), ຈິຕເຣ ຈ ຕສ຺ໂສວາທໍ (ກ.)];

ອາຄມ຺ມ ຣມ຺ມໍ ຕຸສິຕາຘິວາສໍ, ຄຕາ ປວາສໍ ສຆຣໍ ຍເຖວ.

໑໖໘. ‘‘ປຸໂນ ກສ຺ສປວີຣສ຺ສ, ອຕ຺ຖເມນ຺ຕມ຺ຫິ ສາສເນ;

ອາຣຸຍ຺ຫ ເສລສິຂຣໍ, ຍຸຎ຺ຊິຕ຺ວາ ຊິນສາສນໍ.

໑໖໙. ‘‘ອິທານາຫໍ ຣາຊຄເຫ, ຊາໂຕ ເສຏ຺ຐິກຸເລ ອຫຸໍ;

ອາປນ຺ນສຕ຺ຕາ ເມ ມາຕາ, ປພ຺ພຊິ ອນຄາຣິຍໍ.

໑໗໐. ‘‘ສຄພ຺ຠໍ ຕໍ ວິທິຕ຺ວານ, ເທວທຕ຺ຕມຸປານຍຸໍ;

ໂສ ອໂວຈ ‘ວິນາເສຖ, ປາປິກໍ ຠິກ຺ຂຸນິໍ ອິມໍ’.

໑໗໑. ‘‘ອິທານິປິ ມຸນິນ຺ເທນ, ຊິເນນ ອນຸກມ຺ປິຕາ;

ສຸຂິນີ ອຊນີ ມຍ຺ຫໍ, ມາຕາ ຠິກ຺ຂຸນຸປສ຺ສເຍ.

໑໗໒. ‘‘ຕໍ ວິທິຕ຺ວາ ມຫີປາໂລ, ໂກສໂລ ມໍ ອໂປສຍິ;

ກຸມາຣປຣິຫາເຣນ, ນາເມນາຫຎ຺ຈ ກສ຺ສໂປ.

໑໗໓. ‘‘ມຫາກສ຺ສປມາຄມ຺ມ, ອຫໍ ກຸມາຣກສ຺ສໂປ;

ວມ຺ມິກສທິສໍ ກາຍໍ, ສຸຕ຺ວາ ພຸທ຺ເຘນ ເທສິຕໍ.

໑໗໔. ‘‘ຕໂຕ ຈິຕ຺ຕໍ ວິມຸຈ຺ຈິ ເມ, ອນຸປາທາຍ ສພ຺ພໂສ;

ປາຍາສິໍ ທມຍິຕ຺ວາຫໍ, ເອຕທຄ຺ຄມປາປຸຓິໍ.

໑໗໕. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໗໖. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໗໗. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ກຸມາຣກສ຺ສໂປ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ກຸມາຣກສ຺ສປຕ຺ເຖຣສ຺ສາປທານໍ ປຎ຺ຈມໍ.

ຈຕຸວີສຕິມໍ ຠາຓວາຣໍ.