໖. ພາຫິຍຕ຺ເຖຣອປທານໍ

໑໗໘. ‘‘ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ;

ມຫປ຺ປໂຠ ຕິໂລກຄ຺ໂຄ, ນາເມນ ປທຸມຸຕ຺ຕໂຣ.

໑໗໙. ‘‘ຂິປ຺ປາຠິຎ຺ຎສ຺ສ ຠິກ຺ຂຸສ຺ສ, ຄຸຓໍ ກິຕ຺ຕຍໂຕ ມຸເນ;

ສຸຕ຺ວາ ອຸທຄ຺ຄຈິຕ຺ໂຕຫໍ, ກາຣໍ ກຕ຺ວາ ມເຫສິໂນ.

໑໘໐. ‘‘ທຕ຺ວາ ສຕ຺ຕາຫິກໍ ທານໍ, ສສິສ຺ສສ຺ສ ມຸເນ ອຫໍ;

ອຠິວາທິຍ ສມ຺ພຸທ຺ຘໍ, ຕໍ ຐານໍ ປຕ຺ຖຍິໍ ຕທາ.

໑໘໑. ‘‘ຕໂຕ ມໍ ພ຺ຍາກຣິ ພຸທ຺ໂຘ, ‘ເອຕໍ ປສ຺ສຖ ພ຺ຣາຫ຺ມຓໍ;

ປຕິຕໍ ປາທມູເລ ເມ, ຈຣິຍໍ ປຈ຺ຈເວກ຺ຂຓໍ [ປສນ຺ນນຍນານນໍ (ສີ.), ປີນສມ຺ປນ຺ນເວກ຺ຂຓໍ (ສ຺ຍາ.), ປີຓໍສໍ ປຈ຺ຈເວກ຺ຂຓໍ (ປີ.)].

໑໘໒. ‘‘‘ເຫມຍຎ຺ໂຎປຈິຕງ຺ຄໍ, ອວທາຕຕນຸຕ຺ຕຈໍ;

ປລມ຺ພພິມ຺ພຕມ຺ໂພຏ຺ຐໍ, ເສຕຕິຓ຺ຫສມໍ ທິຊໍ.

໑໘໓. ‘‘‘ຄຸຓຖາມພຫຸຕຣໍ, ສມຸຄ຺ຄຕຕນູຣຸຫໍ;

ຄຸໂຓຆາຍຕນີຠູຕໍ, ປີຕິສມ຺ຜຸລ຺ລິຕານນໍ.

໑໘໔. ‘‘‘ເອໂສ ປຕ຺ຖຍເຕ ຐານໍ, ຂິປ຺ປາຠິຎ຺ຎສ຺ສ ຠິກ຺ຂຸໂນ;

ອນາຄເຕ ມຫາວີໂຣ, ໂຄຕໂມ ນາມ ເຫສ຺ສຕິ.

໑໘໕. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ພາຫິໂຍ ນາມ ນາເມນ, ເຫສ຺ສຕິ ສຕ຺ຖຸ ສາວໂກ’.

໑໘໖. ‘‘ຕທາ ຫິ ຕຸຏ຺ໂຐ ວຸຏ຺ຐາຍ, ຍາວຊີວໍ ມຫາມຸເນ;

ກາຣໍ ກຕ຺ວາ ຈຸໂຕ ສຄ຺ຄໍ, ອຄໍ ສຠວນໍ ຍຖາ.

໑໘໗. ‘‘ເທວຠູໂຕ ມນຸສ຺ໂສ ວາ, ສຸຂິໂຕ ຕສ຺ສ ກມ຺ມຸໂນ;

ວາຫສາ ສໍສຣິຕ຺ວານ, ສມ຺ປຕ຺ຕິມນຸໂຠມຫໍ.

໑໘໘. ‘‘ປຸນ ກສ຺ສປວີຣສ຺ສ, ອຕ຺ຖເມນ຺ຕມ຺ຫິ [ອຕ຺ຖງ຺ຄຕມ຺ຫິ (ສ຺ຍາ.)] ສາສເນ;

ອາຣຸຍ຺ຫ ເສລສິຂຣໍ, ຍຸຎ຺ຊິຕ຺ວາ ຊິນສາສນໍ.

໑໘໙. ‘‘ວິສຸທ຺ຘສີໂລ ສປ຺ປຎ຺ໂຎ, ຊິນສາສນກາຣໂກ;

ຕໂຕ ຈຸຕາ ປຎ຺ຈ ຊນາ, ເທວໂລກໍ ອຄມ຺ຫເສ.

໑໙໐. ‘‘ຕໂຕຫໍ ພາຫິໂຍ ຊາໂຕ, ຠາຣຸກຈ຺ເຉ ປຸຣຸຕ຺ຕເມ;

ຕໂຕ ນາວາຍ ປກ຺ຂນ຺ໂທ [ປກ຺ຂນ຺ໂຕ (ສີ.), ປກ຺ກນ຺ໂຕ (ປີ.)], ສາຄຣໍ ອປ຺ປສິທ຺ຘິຍໍ [ອຕ຺ຖສິທ຺ຘິຍໍ (ກ.)].

໑໙໑. ‘‘ຕໂຕ ນາວາ ອຠິຊ຺ຊິຕ຺ຖ, ຄນ຺ຕ຺ວານ ກຕິປາຫກໍ;

ຕທາ ຠີສນເກ ໂຆເຣ, ປຕິໂຕ ມກຣາກເຣ.

໑໙໒. ‘‘ຕທາຫໍ ວາຍມິຕ຺ວານ, ສນ຺ຕຣິຕ຺ວາ ມໂຫທຘິໍ;

ສຸປ຺ປາທປຏ຺ຏນວຣໍ [ສຸປ຺ປາຣປຏ຺ຏນວຣໍ (ສີ. ປີ.)], ສມ຺ປຕ຺ໂຕ ມນ຺ທເວຘິໂຕ [ມນ຺ທເມຘິໂກ (ສີ.), ມນ຺ທເວທິໂຕ (ສ຺ຍາ.), ມທ຺ທເວຣຕໍ (ກ.)].

໑໙໓. ‘‘ທາຣຸຈີຣໍ ນິວາເສຕ຺ວາ, ຄາມໍ ປິຓ຺ຑາຍ ປາວິສິໍ;

ຕທາຫ ໂສ ຊໂນ ຕຸຏ຺ໂຐ, ອຣຫາຍມິຘາຄໂຕ.

໑໙໔. ‘‘ອິມໍ ອນ຺ເນນ ປາເນນ, ວຕ຺ເຖນ ສຍເນນ ຈ;

ເຠສຊ຺ເຊນ ຈ ສກ຺ກຕ຺ວາ, ເຫສ຺ສາມ ສຸຂິຕາ ມຍໍ.

໑໙໕. ‘‘ປຈ຺ຈຍານໍ ຕທາ ລາຠີ, ເຕຫິ ສກ຺ກຕປູຊິໂຕ;

ອຣຫາຫນ຺ຕິ ສງ຺ກປ຺ປໍ, ອຸປ຺ປາເທສິໍ ອໂຍນິໂສ.

໑໙໖. ‘‘ຕໂຕ ເມ ຈິຕ຺ຕມຎ຺ຎາຍ, ໂຈທຍີ ປຸພ຺ພເທວຕາ;

‘ນ ຕ຺ວໍ ອຸປາຍມຄ຺ຄຎ຺ຎູ, ກຸໂຕ ຕ຺ວໍ ອຣຫາ ຠເວ’.

໑໙໗. ‘‘ໂຈທິໂຕ ຕາຍ ສໍວິຄ຺ໂຄ, ຕທາຫໍ ປຣິປຸຈ຺ຉິ ຕໍ;

‘ເກ ວາ ເອເຕ ກຸຫິໍ ໂລເກ, ອຣຫນ຺ໂຕ ນຣຸຕ຺ຕມາ.

໑໙໘. ‘‘‘ສາວຕ຺ຖິຍໍ ໂກສລມນ຺ທິເຣ ຊິໂນ, ປຫູຕປຎ຺ໂຎ ວຣຠູຣິເມຘໂສ;

ໂສ ສກ຺ຍປຸຕ຺ໂຕ ອຣຫາ ອນາສໂວ, ເທເສຕິ ຘມ຺ມໍ ອຣຫຕ຺ຕປຕ຺ຕິຍາ.

໑໙໙. ‘‘‘ຕທສ຺ສ ສຸຕ຺ວາ ວຈນໍ ສຸປີຓິໂຕ [ປີຓິຕ຺ວາ (ກ.)], ນິຘິໍວ ລທ຺ຘາ ກປໂຓຕິ ວິມ຺ຫິໂຕ;

ອຸທຄ຺ຄຈິຕ຺ໂຕ ອຣຫຕ຺ຕມຸຕ຺ຕມໍ, ສຸທສ຺ສນໍ ທຏ຺ຐຸມນນ຺ຕໂຄຈຣໍ.

໒໐໐. ‘‘‘ຕທາ ຕໂຕ ນິກ຺ຂມິຕ຺ວານ ສຕ຺ຖຸໂນ [ນິກ຺ຂມິຕຸນ ສຕ຺ຖຸວຣໍ (ສີ.)], ສທາ ຊິນໍ ປສ຺ສາມິ ວິມລານນໍ [ປຣາຊິນໍ ປສ຺ສາມິ ກມລານນໍ (ກ.)];

ອຸເປຈ຺ຈ ຣມ຺ມໍ ວິຊິຕວ຺ຫຍໍ ວນໍ, ທິເຊ ອປຸຈ຺ຉິໍ ກຸຫິໍ ໂລກນນ຺ທໂນ.

໒໐໑. ‘‘‘ຕໂຕ ອໂວຈຸໍ ນຣເທວວນ຺ທິໂຕ, ປຸຣໍ ປວິຏ຺ໂຐ ອສເນສນາຍ ໂສ;

ສໂສວ [ປຈ຺ເຈຫິ (ສີ. ສ຺ຍາ.)] ຂິປ຺ປໍ ມຸນິທສ຺ສນຸສ຺ສຸໂກ, ອຸເປຈ຺ຈ ວນ຺ທາຫິ ຕມຄ຺ຄປຸຄ຺ຄລໍ’.

໒໐໒. ‘‘ຕໂຕຫໍ ຕຸວຏໍ ຄນ຺ຕ຺ວາ, ສາວຕ຺ຖິໍ ປຸຣມຸຕ຺ຕມໍ;

ວິຈຣນ຺ຕໍ ຕມທ຺ທກ຺ຂິໍ, ປິຓ຺ຑຕ຺ຖໍ ອປິຫາຄິຘໍ.

໒໐໓. ‘‘ປຕ຺ຕປາຓິໍ ອໂລລກ຺ຂໍ, ປາຈຍນ຺ຕໍ ປີຕາກຣໍ [ຠາຊຍນ຺ຕໍ ວິຍາມຕໍ (ສີ.), ໂຊຕຍນ຺ຕໍ ອິຘາມຕໍ (ສ຺ຍາ.), ຠາຊຍນ຺ຕໍ ອິທໍມຕໍ (ປີ.)];

ສິຣີນິລຍສງ຺ກາສໍ, ຣວິທິຕ຺ຕິຫຣານນໍ.

໒໐໔. ‘‘ຕໍ ສເມຈ຺ຈ ນິປຈ຺ຈາຫໍ, ອິທໍ ວຈນມພ຺ຣວິໍ;

‘ກຸປເຖ ວິປ຺ປນຏ຺ຐສ຺ສ, ສຣຓໍ ໂຫຫິ ໂຄຕມ.

໒໐໕. ‘‘‘ປາຓສນ຺ຕາຣຓຕ຺ຖາຍ, ປິຓ຺ຑາຍ ວິຈຣາມຫໍ;

ນ ເຕ ຘມ຺ມກຖາກາໂລ, ອິຈ຺ຈາຫ ມຸນິສຕ຺ຕໂມ’.

໒໐໖. ‘‘ຕທາ ປຸນປ຺ປຸນໍ ພຸທ຺ຘໍ, ອາຍາຈິໍ ຘມ຺ມລາລໂສ;

ໂຍ ເມ ຘມ຺ມມເທເສສິ, ຄມ຺ຠີຣໍ ສຸຎ຺ຎຕໍ ປທໍ.

໒໐໗. ‘‘ຕສ຺ສ ຘມ຺ມໍ ສຸຓິຕ຺ວານ, ປາປຸຓິໍ ອາສວກ຺ຂຍໍ;

ປຣິກ຺ຂີຓາຍຸໂກ ສນ຺ໂຕ, ອໂຫ ສຕ຺ຖານຸກມ຺ປໂກ.

໒໐໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໒໐໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໒໑໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ.

໒໑໑. ‘‘ເອວໍ ເຖໂຣ ວິຍາກາສິ, ພາຫິໂຍ ທາຣຸຈີຣິໂຍ;

ສງ຺ກາຣກູເຏ ປຕິໂຕ, ຠູຕາວິຏ຺ຐາຍ ຄາວິຍາ.

໒໑໒. ‘‘ອຕ຺ຕໂນ ປຸພ຺ພຈຣິຍໍ, ກິຕ຺ຕຍິຕ຺ວາ ມຫາມຕິ;

ປຣິນິພ຺ພາຍິ ໂສ ເຖໂຣ [ວີໂຣ (ສີ.), ຘີໂຣ (ສ຺ຍາ.)], ສາວຕ຺ຖິຍໍ ປຸຣຸຕ຺ຕເມ.

໒໑໓. ‘‘ນຄຣາ ນິກ຺ຂມນ຺ໂຕ ຕໍ, ທິສ຺ວານ ອິສິສຕ຺ຕໂມ;

ທາຣຸຈີຣຘຣໍ ຘີຣໍ, ພາຫິຍໍ ພາຫິຕາຄມໍ.

໒໑໔. ‘‘ຠູມິຍໍ ປຕິຕໍ ທນ຺ຕໍ, ອິນ຺ທເກຕູວ ປາຕິຕໍ;

ຄຕາຍຸໍ ສຸກ຺ຂກິເລສໍ [ຄຕາຍຸ ສໍຄຕກ຺ເລສໍ (ສີ. ປີ.), ຕທາຍຸ ສງ຺ກຕາເລສໍ (ກ.)], ຊິນສາສນກາຣກໍ.

໒໑໕. ‘‘ຕໂຕ ອາມນ຺ຕຍີ ສຕ຺ຖາ, ສາວເກ ສາສເນ ຣເຕ;

‘ຄຓ຺ຫຖ ເນຕ຺ວາ [ຫຸຕ຺ວາ (ສ຺ຍາ. ປີ. ກ.)] ຌາເປຖ, ຕນຸໍ ສພ຺ຣຫ຺ມຈາຣິໂນ.

໒໑໖. ‘‘‘ຖູປໍ ກໂຣຖ ປູເຊຖ, ນິພ຺ພຸໂຕ ໂສ ມຫາມຕິ;

ຂິປ຺ປາຠິຎ຺ຎານເມສຄ຺ໂຄ, ສາວໂກ ເມ ວໂຈກໂຣ.

໒໑໗. ‘‘‘ສຫສ຺ສມປິ ເຈ ຄາຖາ, ອນຕ຺ຖປທສຎ຺ຫິຕາ;

ເອກໍ ຄາຖາປທໍ ເສຍ຺ໂຍ, ຍໍ ສຸຕ຺ວາ ອຸປສມ຺ມຕິ.

໒໑໘. ‘‘‘ຍຕ຺ຖ ອາໂປ ຈ ປຖວີ, ເຕໂຊ ວາໂຍ ນ ຄາຘຕິ;

ນ ຕຕ຺ຖ ສຸກ຺ກາ ໂຊຕນ຺ຕິ, ອາທິຈ຺ໂຈ ນ ປກາສຕິ.

໒໑໙. ‘‘‘ນ ຕຕ຺ຖ ຈນ຺ທິມາ ຠາຕິ, ຕໂມ ຕຕ຺ຖ ນ ວິຊ຺ຊຕິ;

ຍທາ ຈ ອຕ຺ຕນາ ເວທິ, ມຸນິໂມເນນ ພ຺ຣາຫ຺ມໂຓ.

໒໒໐. ‘‘‘ອຖ ຣູປາ ອຣູປາ ຈ, ສຸຂທຸກ຺ຂາ ວິມຸຈ຺ຈຕິ’;

ອິຈ຺ເຈວໍ ອຠຓີ ນາໂຖ, ຕິໂລກສຣໂຓ ມຸນິ’’.

ອິຕ຺ຖໍ ສຸທໍ ອາຍສ຺ມາ ພາຫິໂຍ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ພາຫິຍຕ຺ເຖຣສ຺ສາປທານໍ ຉຏ຺ຐໍ.