໔. ທພ຺ພມລ຺ລປຸຕ຺ຕຕ຺ເຖຣອປທານໍ

໑໐໘. ‘‘ປທຸມຸຕ຺ຕໂຣ ນາມ ຊິໂນ, ສພ຺ພໂລກວິທູ ມຸນິ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ຈກ຺ຂຸມາ.

໑໐໙. ‘‘ໂອວາທໂກ ວິຎ຺ຎາປໂກ, ຕາຣໂກ ສພ຺ພປາຓິນໍ;

ເທສນາກຸສໂລ ພຸທ຺ໂຘ, ຕາເຣສິ ຊນຕໍ ພຫຸໍ.

໑໑໐. ‘‘ອນຸກມ຺ປໂກ ກາຣຸຓິໂກ, ຫິເຕສີ ສພ຺ພປາຓິນໍ;

ສມ຺ປຕ຺ເຕ ຕິຕ຺ຖິເຍ ສພ຺ເພ, ປຎ຺ຈສີເລ ປຕິຏ຺ຐປິ [ປຕິຏ຺ຐຫິ (ສ຺ຍາ. ກ.)].

໑໑໑. ‘‘ເອວໍ ນິຣາກຸລໍ ອາສິ, ສຸຎ຺ຎຕໍ [ສຸຎ຺ຎກໍ (ສີ.) ເອວມຸປຣິປິ] ຕິຕ຺ຖິເຍຫິ ຈ;

ວິຈິຕ຺ຕໍ ອຣຫນ຺ເຕຫິ, ວສີຠູເຕຫິ ຕາທິຠິ.

໑໑໒. ‘‘ຣຕນານຏ຺ຐປຎ຺ຎາສໍ, ອຸຄ຺ຄໂຕ ໂສ ມຫາມຸນິ;

ກຎ຺ຈນຄ຺ຆິຍສງ຺ກາໂສ, ພາຕ຺ຕິໍສວຣລກ຺ຂໂຓ.

໑໑໓. ‘‘ວສ຺ສສຕສຫສ຺ສານິ, ອາຍຸ ວິຊ຺ຊຕິ ຕາວເທ;

ຕາວຕາ ຕິຏ຺ຐມາໂນ ໂສ, ຕາເຣສິ ຊນຕໍ ພຫຸໍ.

໑໑໔. ‘‘ຕທາຫໍ ຫໍສວຕິຍໍ, ເສຏ຺ຐິປຸຕ຺ໂຕ ມຫາຍໂສ;

ອຸເປຕ຺ວາ ໂລກປຊ຺ໂຊຕໍ, ອສ຺ໂສສິໍ ຘມ຺ມເທສນໍ.

໑໑໕. ‘‘ເສນາສນານິ ຠິກ຺ຂູນໍ, ປຎ຺ຎາເປນ຺ຕໍ ສສາວກໍ;

ກິຕ຺ຕຍນ຺ຕສ຺ສ ວຈນໍ, ສຸຓິຕ຺ວາ ມຸທິໂຕ ອຫໍ.

໑໑໖. ‘‘ອຘິກາຣໍ ສສງ຺ຆສ຺ສ, ກຕ຺ວາ ຕສ຺ສ ມເຫສິໂນ;

ນິປຈ຺ຈ ສິຣສາ ປາເທ, ຕໍ ຐານມຠິປຕ຺ຖຍິໍ.

໑໑໗. ‘‘ຕທາຫ ສ ມຫາວີໂຣ, ມມ ກມ຺ມໍ ປກິຕ຺ຕຍໍ;

‘ໂຍ ສສງ຺ຆມໂຠເຊສິ, ສຕ຺ຕາຫໍ ໂລກນາຍກໍ.

໑໑໘. ‘‘‘ໂສຍໍ ກມລປຕ຺ຕກ຺ໂຂ, ສີຫໍໂສ ກນກຕ຺ຕໂຈ;

ມມ ປາທມູເລ ນິປຕິ [ປຕິໂຕ (ປີ.)], ປຕ຺ຖຍໍ ຐານມຸຕ຺ຕມໍ.

໑໑໙. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໑໒໐. ‘‘‘ສາວໂກ ຕສ຺ສ ພຸທ຺ຘສ຺ສ, ທພ຺ໂພ ນາເມນ ວິສ຺ສຸໂຕ;

ເສນາສນປຎ຺ຎາປໂກ, ອຄ຺ໂຄ ເຫສ຺ສຕິຍໍ ຕທາ’.

໑໒໑. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໒໒. ‘‘ສຕານໍ ຕີຓິກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ;

ສຕານໍ ປຎ຺ຈກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ.

໑໒໓. ‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ສພ຺ພຕ຺ຖ ສຸຂິໂຕ ອາສິໍ, ຕສ຺ສ ກມ຺ມສ຺ສ ວາຫສາ.

໑໒໔. ‘‘ເອກນວຸຕິໂຕ ກປ຺ເປ, ວິປສ຺ສີ ນາມ ນາຍໂກ;

ອຸປ຺ປຊ຺ຊິ ຈາຣຸທສ຺ສໂນ [ຈາຣຸນຍໂນ (ສີ. ສ຺ຍາ. ປີ.)], ສພ຺ພຘມ຺ມວິປສ຺ສໂກ.

໑໒໕. ‘‘ທຸຏ຺ຐຈິຕ຺ໂຕ ອຸປວທິໍ, ສາວກໍ ຕສ຺ສ ຕາທິໂນ;

ສພ຺ພາສວປຣິກ຺ຂີຓໍ, ສຸທ຺ໂຘຕິ ຈ ວິຊານິຍ.

໑໒໖. ‘‘ຕສ຺ເສວ ນຣວີຣສ຺ສ, ສາວການໍ ມເຫສິນໍ;

ສລາກຎ຺ຈ ຄເຫຕ຺ວານ [ສລາກໍ ປຄ຺ຄເຫຕ຺ວານ (ສີ. ປີ.)], ຂີໂຣທນມທາສຫໍ.

໑໒໗. ‘‘ອິມມ຺ຫິ ຠທ຺ທເກ ກປ຺ເປ, ພ຺ຣຫ຺ມພນ຺ຘຸ ມຫາຍໂສ;

ກສ຺ສໂປ ນາມ ໂຄຕ຺ເຕນ, ອຸປ຺ປຊ຺ຊິ ວທຕໍ ວໂຣ.

໑໒໘. ‘‘ສາສນໍ ໂຊຕຍິຕ຺ວານ, ອຠິຠຸຍ຺ຍ ກຸຕິຕ຺ຖິເຍ;

ວິເນຍ຺ເຍ ວິນຍິຕ຺ວາວ, ນິພ຺ພຸໂຕ ໂສ ສສາວໂກ.

໑໒໙. ‘‘ສສິສ຺ເສ ນິພ຺ພຸເຕ ນາເຖ, ອຕ຺ຖເມນ຺ຕມ຺ຫິ ສາສເນ;

ເທວາ ກນ຺ທິໍສຸ ສໍວິຄ຺ຄາ, ມຸຕ຺ຕເກສາ ຣຸທມ຺ມຸຂາ.

໑໓໐. ‘‘ນິພ຺ພາຍິສ຺ສຕິ ຘມ຺ມກ຺ໂຂ, ນ ປສ຺ສິສ຺ສາມ ສຸພ຺ພເຕ;

ນ ສຸຓິສ຺ສາມ ສທ຺ຘມ຺ມໍ, ອໂຫ ໂນ ອປ຺ປປຸຎ຺ຎຕາ.

໑໓໑. ‘‘ຕທາຍໍ ປຖວີ ສພ຺ພາ, ອຈລາ ສາ ຈລາຈລາ [ຈລາຈລີ (ສີ.), ປຸລາປຸລີ (ສ຺ຍາ.)];

ສາຄໂຣ ຈ ສໂສໂກວ, ວິນທີ ກຣຸຓໍ ຄິຣໍ.

໑໓໒. ‘‘ຈຕຸທ຺ທິສາ ທຸນ຺ທຸຠິໂຍ, ນາທຍິໍສຸ ອມານຸສາ;

ສມນ຺ຕໂຕ ອສນິໂຍ, ຜລິໍສຸ ຈ ຠຍາວຫາ.

໑໓໓. ‘‘ອຸກ຺ກາ ປຕິໍສຸ ນຠສາ, ຘູມເກຕຸ ຈ ທິສ຺ສຕິ;

ສຘູມາ ຊາລວຏ຺ຏາ ຈ [ສພ຺ພຖລຊສຕ຺ຕາ ຈ (ສີ.)], ຣວິໍສຸ ກຣຸຓໍ ມິຄາ.

໑໓໔. ‘‘ອຸປ຺ປາເທ ທາຣຸເຓ ທິສ຺ວາ, ສາສນຕ຺ຖງ຺ຄສູຈເກ;

ສໍວິຄ຺ຄາ ຠິກ຺ຂໂວ ສຕ຺ຕ, ຈິນ຺ຕຍິມ຺ຫ ມຍໍ ຕທາ.

໑໓໕. ‘‘ສາສເນນ ວິນາມ຺ຫາກໍ, ຊີວິເຕນ ອລໍ ມຍໍ;

ປວິສິຕ຺ວາ ມຫາຣຎ຺ຎໍ, ຍຸຎ຺ຊາມ ຊິນສາສນໍ.

໑໓໖. ‘‘ອທ຺ທສມ຺ຫ ຕທາຣຎ຺ເຎ, ອຸພ຺ພິທ຺ຘໍ ເສລມຸຕ຺ຕມໍ;

ນິສ຺ເສຓິຍາ ຕມາຣຸຍ຺ຫ, ນິສ຺ເສຓິໍ ປາຕຍິມ຺ຫເສ.

໑໓໗. ‘‘ຕທາ ໂອວທິ ໂນ ເຖໂຣ, ພຸທ຺ຘຸປ຺ປາໂທ ສຸທຸລ຺ລໂຠ;

ສທ຺ຘາຕິທຸລ຺ລຠາ ລທ຺ຘາ, ໂຖກໍ ເສສຎ຺ຈ ສາສນໍ.

໑໓໘. ‘‘ນິປຕນ຺ຕິ ຂຓາຕີຕາ, ອນນ຺ເຕ ທຸກ຺ຂສາຄເຣ;

ຕສ຺ມາ ປໂຍໂຄ ກຕ຺ຕພ຺ໂພ, ຍາວ ຐາຕິ ມຸເນ ມຕໍ [ຍາວ ຕິຏ຺ຐຕິ ສາສນໍ (ສ຺ຍາ.)].

໑໓໙. ‘‘ອຣຫາ ອາສິ ໂສ ເຖໂຣ, ອນາຄາມີ ຕທານຸໂຄ;

ສຸສີລາ ອິຕເຣ ຍຸຕ຺ຕາ, ເທວໂລກໍ ອຄມ຺ຫເສ.

໑໔໐. ‘‘ນິພ຺ພຸໂຕ ຕິຓ຺ຓສໍສາໂຣ, ສຸທ຺ຘາວາເສ ຈ ເອກໂກ;

ອຫຎ຺ຈ ປກ຺ກຸສາຕິ ຈ, ສຠິໂຍ ພາຫິໂຍ ຕຖາ.

໑໔໑. ‘‘ກຸມາຣກສ຺ສໂປ ເຈວ, ຕຕ຺ຖ ຕຕ຺ຖູປຄາ ມຍໍ;

ສໍສາຣພນ຺ຘນາ ມຸຕ຺ຕາ, ໂຄຕເມນານຸກມ຺ປິຕາ.

໑໔໒. ‘‘ມລ຺ເລສຸ ກຸສິນາຣາຍໍ, ຊາໂຕ ຄພ຺ເຠວ ເມ ສໂຕ;

ມາຕາ ມຕາ ຈິຕາຣຸຬ຺ຫາ, ຕໂຕ ນິປ຺ປຕິໂຕ ອຫໍ.

໑໔໓. ‘‘ປຕິໂຕ ທພ຺ພປຸຎ຺ຊມ຺ຫິ, ຕໂຕ ທພ຺ໂພຕິ ວິສ຺ສຸໂຕ;

ພ຺ຣຫ຺ມຈາຣີພເລນາຫໍ, ວິມຸຕ຺ໂຕ ສຕ຺ຕວສ຺ສິໂກ.

໑໔໔. ‘‘ຂີໂຣທນພເລນາຫໍ, ປຎ຺ຈຫງ຺ເຄຫຸປາຄໂຕ;

ຂີຓາສໂວປວາເທນ, ປາເປຫິ ພຫຸໂຈທິໂຕ.

໑໔໕. ‘‘ອຸໂຠ ປຸຎ຺ຎຎ຺ຈ ປາປຎ຺ຈ, ວີຕິວຕ຺ໂຕມ຺ຫິ ທານິຫໍ;

ປຕ຺ວານ ປຣມໍ ສນ຺ຕິໍ, ວິຫຣາມິ ອນາສໂວ.

໑໔໖. ‘‘ເສນາສນໍ ປຎ຺ຎາປຍິໍ, ຫາສຍິຕ຺ວານ ສຸພ຺ພເຕ;

ຊິໂນ ຕສ຺ມິໍ ຄຸເຓ ຕຸຏ຺ໂຐ, ເອຕທຄ຺ເຄ ຐເປສິ ມໍ.

໑໔໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໔໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໔໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ທພ຺ພມລ຺ລປຸຕ຺ໂຕ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ທພ຺ພມລ຺ລປຸຕ຺ຕຕ຺ເຖຣສ຺ສາປທານໍ ຈຕຸຕ຺ຖໍ.