໓. ຠິສທາຍກຕ຺ເຖຣອປທານໍ

໒໗. ‘‘ໂອຄຍ຺ຫ ຍໍ [ໂອຄຍ຺ຫາຫໍ (ສີ. ສ຺ຍາ. ປີ.)] ໂປກ຺ຂຣຓິໍ, ນານາກຸຎ຺ຊຣເສວິຕໍ;

ອຸທ຺ຘຣາມິ ຠິສໍ ຕຕ຺ຖ, ຆາສເຫຕຸ [ອສນເຫຕຸ (ສ຺ຍາ.)] ອຫໍ ຕທາ.

໒໘. ‘‘ຠຄວາ ຕມ຺ຫິ ສມເຍ, ປທຸມຸຕ຺ຕຣສວ຺ຫໂຍ;

ຣຕ຺ຕມ຺ພຣຘໂຣ [ຣຕ຺ຕກມ຺ພລຘໂຣ (ສ຺ຍາ.)] ພຸທ຺ໂຘ, ຄຈ຺ຉຕິ ອນິລຎ຺ຊເສ.

໒໙. ‘‘ຘຸນນ຺ໂຕ ປໍສຸກູລານິ, ສທ຺ທມສ຺ໂສສຫໍ ຕທາ;

ອຸທ຺ຘໍ ນິຊ຺ຌາຍມາໂນຫໍ, ອທ຺ທສໍ ໂລກນາຍກໍ.

໓໐. ‘‘ຕຕ຺ເຖວ ຐິຕໂກ ສນ຺ໂຕ, ອາຍາຈິໍ ໂລກນາຍກໍ;

ມຘຸໍ ຠິເສຫິ ສວຕິ, ຂີຣໍ ສປ຺ປິໍ ມຸຬາລິຠິ.

໓໑. ‘‘ປຏິຄ຺ຄຓ຺ຫາຕຸ ເມ ພຸທ຺ໂຘ, ອນຸກມ຺ປາຍ ຈກ຺ຂຸມາ;

ຕໂຕ ກາຣຸຓິໂກ ສຕ຺ຖາ, ໂອຣຸຫິຕ຺ວາ ມຫາຍໂສ.

໓໒. ‘‘ປຏິຄ຺ຄຓ຺ຫິ ມມໍ ຠິກ຺ຂໍ, ອນຸກມ຺ປາຍ ຈກ຺ຂຸມາ;

ປຏິຄ຺ຄເຫຕ຺ວາ ສມ຺ພຸທ຺ໂຘ, ອກາ ເມ ອນຸໂມທນໍ.

໓໓. ‘‘‘ສຸຂີ ໂຫຕຸ [ໂຫຫິ (ສີ. ສ຺ຍາ. ປີ. ກ.)] ມຫາປຸຎ຺ຎ, ຄຕິ ຕຸຍ຺ຫໍ ສມິຊ຺ຌຕຸ;

ອິມິນາ ຠິສທາເນນ, ລຠສ຺ສຸ ວິປຸລໍ ສຸຂໍ’.

໓໔. ‘‘ອິທໍ ວຕ຺ວານ ສມ຺ພຸທ຺ໂຘ, ຊລຊຸຕ຺ຕມນາມໂກ;

ຠິກ຺ຂມາທາຍ ສມ຺ພຸທ຺ໂຘ, ອມ຺ພເຣນາຄມາ ຊິໂນ.

໓໕. ‘‘ຕໂຕ ຠິສໍ ຄເຫຕ຺ວານ, ອາຄຈ຺ຉິໍ ມມ ອສ຺ສມໍ;

ຠິສໍ ຣຸກ຺ເຂ ລເຄຕ຺ວານ [ລຄ຺ຄິຕ຺ວານ (ສ຺ຍາ. ກ.)], ມມ ທານມນຸສ຺ສຣິໍ.

໓໖. ‘‘ມຫາວາໂຕ ວຸຏ຺ຐຫິຕ຺ວາ, ສຎ຺ຈາເລສິ ວນໍ ຕທາ;

ອາກາໂສ ອຠິນາທິຕ຺ຖ, ອສນິຍາ ຜລນ຺ຕິຍາ.

໓໗. ‘‘ຕໂຕ ເມ ອສນິປາໂຕ, ມຕ຺ຖເກ ນິປຕີ ຕທາ;

ໂສຫໍ ນິສິນ຺ນໂກ ສນ຺ໂຕ, ຕຕ຺ຖ ກາລງ຺ກໂຕ ອຫຸໍ.

໓໘. ‘‘ປຸຎ຺ຎກມ຺ເມນ ສໍຍຸຕ຺ໂຕ, ຕຸສິຕໍ ອຸປປຊ຺ຊຫໍ;

ກເຬວຣໍ ເມ ປຕິຕໍ, ເທວໂລເກ ຣມິໍ ອຫໍ.

໓໙. ‘‘ຉຬສີຕິສຫສ຺ສານິ, ນາຣິໂຍ ສມລງ຺ກຕາ;

ສາຍປາຕໍ [ສາຍໍ ປາຕໍ (ສ຺ຍາ. ກ.)] ອຸປຏ຺ຐນ຺ຕິ, ຠິສທານສ຺ສິທໍ ຜລໍ.

໔໐. ‘‘ມນຸສ຺ສໂຍນິມາຄນ຺ຕ຺ວາ, ສຸຂິໂຕ ໂຫມຫໍ ສທາ;

ໂຠເຄ ເມ ອູນຕາ ນຕ຺ຖິ, ຠິສທານສ຺ສິທໍ ຜລໍ.

໔໑. ‘‘ອນຸກມ຺ປິຕໂກ ເຕນ, ເທວເທເວນ ຕາທິນາ;

ສພ຺ພາສວາ ປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໔໒. ‘‘ສຕສຫສ຺ສິໂຕ ກປ຺ເປ, ຍໍ ຠິສໍ [ຠິກ຺ຂໍ (ສພ຺ພຕ຺ຖ)] ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຠິສທານສ຺ສິທໍ ຜລໍ.

໔໓. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໔. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຠິສທາຍໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ຠິສທາຍກຕ຺ເຖຣສ຺ສາປທານໍ ຕຕິຍໍ.