໔. ຎາຓຖວິກຕ຺ເຖຣອປທານໍ

໔໖. ‘‘ທກ຺ຂິເຓ ຫິມວນ຺ຕສ຺ສ, ສຸກໂຕ ອສ຺ສໂມ ມມ;

ອຸຕ຺ຕມຕ຺ຖໍ ຄເວສນ຺ໂຕ, ວສາມິ ວິປິເນ ຕທາ.

໔໗. ‘‘ລາຠາລາເຠນ ສນ຺ຕຸຏ຺ໂຐ, ມູເລນ ຈ ຜເລນ ຈ;

ອນ຺ເວສນ຺ໂຕ ອາຈຣິຍໍ, ວສາມິ ເອກໂກ ອຫໍ.

໔໘. ‘‘ສຸເມໂຘ ນາມ ສມ຺ພຸທ຺ໂຘ, ໂລເກ ອຸປ຺ປຊ຺ຊິ ຕາວເທ;

ຈຕຸສຈ຺ຈໍ ປກາເສຕິ, ອຸທ຺ຘຣນ຺ໂຕ ມຫາຊນໍ.

໔໙. ‘‘ນາຫໍ ສຸໂຓມິ ສມ຺ພຸທ຺ຘໍ, ນປິ ເມ ໂກຈິ ສໍສຕິ [ຠາສຕິ (ສີ.), ສາສຕິ (ສ຺ຍາ. ປີ.)];

ອຏ຺ຐວສ຺ເສ ອຕິກ຺ກນ຺ເຕ, ອສ຺ໂສສິໍ ໂລກນາຍກໍ.

໕໐. ‘‘ອຄ຺ຄິທາຣຸໍ ນີຫຣິຕ຺ວາ, ສມ຺ມຊ຺ຊິຕ຺ວານ ອສ຺ສມໍ;

ຂາຣິຠາຣໍ ຄເຫຕ຺ວານ, ນິກ຺ຂມິໍ ວິປິນາ ອຫໍ.

໕໑. ‘‘ເອກຣຕ຺ຕິໍ ວສນ຺ໂຕຫໍ, ຄາເມສຸ ນິຄເມສຸ ຈ;

ອນຸປຸພ຺ເພນ ຈນ຺ທວຕິໍ, ຕທາຫໍ ອຸປສງ຺ກມິໍ.

໕໒. ‘‘ຠຄວາ ຕມ຺ຫິ ສມເຍ, ສຸເມໂຘ ໂລກນາຍໂກ;

ອຸທ຺ຘຣນ຺ໂຕ ພຫູ ສຕ຺ເຕ, ເທເສຕິ ອມຕໍ ປທໍ.

໕໓. ‘‘ຊນກາຍມຕິກ຺ກມ຺ມ, ວນ຺ທິຕ຺ວາ ຊິນສາຄຣໍ;

ເອກໍສໍ ອຊິນໍ ກຕ຺ວາ, ສນ຺ຖວິໍ ໂລກນາຍກໍ.

໕໔. ‘‘‘ຕຸວໍ ສຕ຺ຖາ ຈ ເກຕຸ ຈ, ຘໂຊ ຍູໂປ ຈ ປາຓິນໍ;

ປຣາຍໂນ [ປຣາຍໂຓ (ສີ. ປີ.)] ປຕິຏ຺ຐາ ຈ, ທີໂປ ຈ ທ຺ວິປທຸຕ຺ຕໂມ.

ເອກວີສຕິມໍ ຠາຓວາຣໍ.

໕໕. ‘‘‘ເນປຸຎ຺ໂຎ ທສ຺ສເນ ວີໂຣ, ຕາເຣສິ ຊນຕໍ ຕຸວໍ;

ນຕ຺ຖຎ຺ໂຎ ຕາຣໂກ ໂລເກ, ຕວຸຕ຺ຕຣິຕໂຣ ມຸເນ.

໕໖. ‘‘‘ສກ຺ກາ ເຖເວ [ຫເວ (ສີ. ປີ.) ຠເວ (ສ຺ຍາ. ກ.)] ກຸສຄ຺ເຄນ, ປເມຕຸໍ ສາຄຣຸຕ຺ຕເມ [ສາຄຣຸຕ຺ຕໂມ (ສີ. ສ຺ຍາ. ປີ.)];

ນຕ຺ເວວ ຕວ ສພ຺ພຎ຺ຎຸ, ຎາຓໍ ສກ຺ກາ ປເມຕເວ.

໕໗. ‘‘‘ຕຸລທຓ຺ເຑ [ຕຸລມຓ຺ຑເລ (ສີ. ປີ.)] ຐເປຕ຺ວານ, ມຫິໍ [ມຫີ (ສ຺ຍາ. ປີ.)] ສກ຺ກາ ຘເຣຕເວ;

ນຕ຺ເວວ ຕວ ປຎ຺ຎາຍ, ປມາຓມຕ຺ຖິ ຈກ຺ຂຸມ.

໕໘. ‘‘‘ອາກາໂສ ມິນິຕຸໍ ສກ຺ກາ, ຣຊ຺ຊຸຍາ ອງ຺ຄຸເລນ ວາ;

ນຕ຺ເວວ ຕວ ສພ຺ພຎ຺ຎຸ, ສີລໍ ສກ຺ກາ ປເມຕເວ.

໕໙. ‘‘‘ມຫາສມຸທ຺ເທ ອຸທກໍ, ອາກາໂສ ຈ ວສຸນ຺ຘຣາ;

ປຣິເມຍ຺ຍານິ ເອຕານິ, ອປ຺ປເມຍ຺ໂຍສິ ຈກ຺ຂຸມ’.

໖໐. ‘‘ຉຫິ ຄາຖາຫິ ສພ຺ພຎ຺ຎຸໍ, ກິຕ຺ຕຍິຕ຺ວາ ມຫາຍສໍ;

ອຎ຺ຊລິໍ ປຄ຺ຄເຫຕ຺ວານ, ຕຸຓ຺ຫີ ອຏ຺ຐາສຫໍ ຕທາ.

໖໑. ‘‘ຍໍ ວທນ຺ຕິ ສຸເມໂຘຕິ, ຠູຣິປຎ຺ຎໍ ສຸເມຘສໍ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໖໒. ‘‘‘ໂຍ ເມ ຎາຓໍ ປກິຕ຺ເຕສິ, ວິປ຺ປສນ຺ເນນ ເຈຕສາ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໖໓. ‘‘‘ສຕ຺ຕສຕ຺ຕຕິ ກປ຺ປານິ, ເທວໂລເກ ຣມິສ຺ສຕິ;

ສຫສ຺ສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສຕິ.

໖໔. ‘‘‘ອເນກສຕກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໖໕. ‘‘‘ເທວຠູໂຕ ມນຸສ຺ໂສ ວາ, ປຸຎ຺ຎກມ຺ມສມາຫິໂຕ;

ອນູນມນສງ຺ກປ຺ໂປ, ຕິກ຺ຂປຎ຺ໂຎ ຠວິສ຺ສຕິ’.

໖໖. ‘‘ຕິໍສກປ຺ປສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໖໗. ‘‘ອຄາຣາ ອຠິນິກ຺ຂມ຺ມ, ປພ຺ພຊິສ຺ສຕິ ກິຎ຺ຈໂນ;

ຊາຕິຍາ ສຕ຺ຕວສ຺ເສນ, ອຣຫຕ຺ຕໍ ຜຸສິສ຺ສຕິ.

໖໘. ‘‘ຍໂຕ ສຣາມິ ອຕ຺ຕານໍ, ຍໂຕ ປຕ຺ໂຕສ຺ມິ ສາສນໍ;

ເອຕ຺ຖນ຺ຕເຣ ນ ຊານາມິ, ເຈຕນໍ ອມໂນຣມໍ.

໖໙. ‘‘ສໍສຣິຕ຺ວາ ຠເວ ສພ຺ເພ, ສມ຺ປຕ຺ຕານຸຠວິໍ ອຫໍ;

ໂຠເຄ ເມ ອູນຕາ ນຕ຺ຖິ, ຜລໍ ຎາຓສ຺ສ ໂຖມເນ.

໗໐. ‘‘ຕິຍຄ຺ຄີ ນິພ຺ພຸຕາ ມຍ຺ຫໍ, ຠວາ ສພ຺ເພ ສມູຫຕາ;

ສພ຺ພາສວາ ປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໗໑. ‘‘ຕິໍສກປ຺ປສຫສ຺ສມ຺ຫິ, ຍໍ ຎາຓມຖວິໍ ອຫໍ [ມຠິໂຖມຍິໍ (ສີ. ປີ.), ມຠິໂຖມຫໍ (ສ຺ຍາ.)];

ທຸຄ຺ຄຕິໍ ນາຠິຊານາມິ, ຜລໍ ຎາຓສ຺ສ ໂຖມເນ.

໗໒. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໗໓. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໗໔. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຎາຓຖວິໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ຎາຓຖວິກຕ຺ເຖຣສ຺ສາປທານໍ ຈຕຸຕ຺ຖໍ.