໙. ສຍໍປຏິຠານິຍຕ຺ເຖຣອປທານໍ

໔໕. ‘‘ກກຸຘໍ ວິລສນ຺ຕໍວ, ເທວເທວໍ ນຣາສຠໍ;

ຣຖິຍໍ ປຏິປຊ຺ຊນ຺ຕໍ, ໂກ ທິສ຺ວາ ນ ປສີທຕິ.

໔໖. ‘‘ຕມນ຺ຘກາຣໍ ນາເສຕ຺ວາ, ສນ຺ຕາເຣຕ຺ວາ ພຫຸໍ ຊນໍ;

ຎາຓາໂລເກນ ໂຊຕນ຺ຕໍ, ໂກ ທິສ຺ວາ ນ ປສີທຕິ.

໔໗. ‘‘ວສີສຕສຫສ຺ເສຫິ, ນີຍນ຺ຕໍ ໂລກນາຍກໍ;

ອຸທ຺ຘຣນ຺ຕໍ ພຫູ ສຕ຺ເຕ, ໂກ ທິສ຺ວາ ນ ປສີທຕິ.

໔໘. ‘‘ອາຫນນ຺ຕໍ [ອາຫນິຕ຺ວາ (ສ຺ຍາ. ກ.)] ຘມ຺ມເຠຣິໍ, ມທ຺ທນ຺ຕໍ ຕິຕ຺ຖິເຍ ຄເຓ;

ສີຫນາທໍ ວິນທນ຺ຕໍ, ໂກ ທິສ຺ວາ ນ ປສີທຕິ.

໔໙. ‘‘ຍາວຕາ ພ຺ຣຫ຺ມໂລກໂຕ, ອາຄນ຺ຕ຺ວານ ສພ຺ຣຫ຺ມກາ;

ປຸຈ຺ຉນ຺ຕິ ນິປຸເຓ ປຎ຺ເຫ, ໂກ ທິສ຺ວາ ນ ປສີທຕິ.

໕໐. ‘‘ຍສ຺ສຎ຺ຊລິໍ ກຣິຕ຺ວານ, ອາຍາຈນ຺ຕິ ສເທວກາ;

ເຕນ ປຸຎ຺ຎໍ ອນຸໂຠນ຺ຕິ, ໂກ ທິສ຺ວາ ນ ປສີທຕິ.

໕໑. ‘‘ສພ຺ເພ ຊນາ ສມາຄນ຺ຕ຺ວາ, ສມ຺ປວາເຣນ຺ຕິ ຈກ຺ຂຸມໍ;

ນ ວິກມ຺ປຕິ ອຊ຺ຌິຏ຺ໂຐ, ໂກ ທິສ຺ວາ ນ ປສີທຕິ.

໕໒. ‘‘ນຄຣໍ ປວິສໂຕ ຍສ຺ສ, ຣວນ຺ຕິ ເຠຣິໂຍ ພຫູ;

ວິນທນ຺ຕິ ຄຊາ ມຕ຺ຕາ, ໂກ ທິສ຺ວາ ນ ປສີທຕິ.

໕໓. ‘‘ວີຖິຍາ [ຣຖິຍາ (ສີ.)] ຄຈ຺ຉໂຕ ຍສ຺ສ, ສພ຺ພາຠາ ໂຊຕເຕ ສທາ;

ອພ຺ຠຸນ຺ນຕາ ສມາ ໂຫນ຺ຕິ, ໂກ ທິສ຺ວາ ນ ປສີທຕິ.

໕໔. ‘‘ພ຺ຍາຫຣນ຺ຕສ຺ສ ພຸທ຺ຘສ຺ສ, ຈກ຺ກວາຬມ຺ປິ ສຸຍ຺ຍຕິ;

ສພ຺ເພ ສຕ຺ເຕ ວິຎ຺ຎາເປຕິ, ໂກ ທິສ຺ວາ ນ ປສີທຕິ.

໕໕. ‘‘ສຕສຫສ຺ສິໂຕ ກປ຺ເປ, ຍໍ ພຸທ຺ຘມຠິກິຕ຺ຕຍິໍ;

ທຸຄ຺ຄຕິໍ ນາຠິຊານາມິ, ກິຕ຺ຕນາຍ ອິທໍ ຜລໍ.

໕໖. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໕໗. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໕໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຍໍປຏິຠານິໂຍ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ສຍໍປຏິຠານິຍຕ຺ເຖຣສ຺ສາປທານໍ ນວມໍ.