໑໐. ນິມິຕ຺ຕພ຺ຍາກຣຓິຍຕ຺ເຖຣອປທານໍ

໕໙. ‘‘ອຊ຺ໂຌຄາເຫຕ຺ວາ ຫິມວໍ, ມນ຺ເຕ ວາເຈ ມຫໍ ຕທາ;

ຈຕຸປຎ຺ຎາສສຫສ຺ສານິ, ສິສ຺ສາ ມຍ຺ຫໍ ອຸປຏ຺ຐຫຸໍ.

໖໐. ‘‘ອຘິຕາ ເວທຄູ ສພ຺ເພ, ຉຬງ຺ເຄ ປາຣມິໍ ຄຕາ;

ສກວິຊ຺ຊາຫຸປຕ຺ຖທ຺ຘາ, ຫິມວນ຺ເຕ ວສນ຺ຕິ ເຕ.

໖໑. ‘‘ຈວິຕ຺ວາ ຕຸສິຕາ ກາຍາ, ເທວປຸຕ຺ໂຕ ມຫາຍໂສ;

ອຸປ຺ປຊ຺ຊິ ມາຕຸກຸຈ຺ຉິສ຺ມິໍ, ສມ຺ປຊາໂນ ປຕິສ຺ສໂຕ.

໖໒. ‘‘ສມ຺ພຸທ຺ເຘ ອຸປປຊ຺ຊນ຺ເຕ, ທສສຫສ຺ສິ ກມ຺ປຖ;

ອນ຺ຘາ ຈກ຺ຂຸໍ ອລຠິໍສຸ, ອຸປ຺ປຊ຺ຊນ຺ຕມ຺ຫິ ນາຍເກ.

໖໓. ‘‘ສພ຺ພາກາຣໍ ປກມ຺ປິຕ຺ຖ, ເກວລາ ວສຸຘາ ອຍໍ;

ນິຄ຺ໂຆສສທ຺ທໍ ສຸຕ຺ວານ, ອຸພ຺ພິຊ຺ຊິໍສຸ [ວິມ຺ຫຍິໍສຸ (ສ຺ຍາ. ກ.)] ມຫາຊນາ.

໖໔. ‘‘ສພ຺ເພ ຊນາ ສມາຄມ຺ມ, ອາຄຈ຺ຉຸໍ ມມ ສນ຺ຕິກໍ;

ວສຸຘາຍໍ ປກມ຺ປິຕ຺ຖ, ກິໍ ວິປາໂກ ຠວິສ຺ສຕິ.

໖໕. ‘‘ອວຈາສິໍ [ວິທສ຺ສາມິ (ສ຺ຍາ.)] ຕທາ ເຕສໍ, ມາ ເຠຖ [ມາ ໂຣທ (ກ.), ມາຠາຍິຕ຺ຖ (ສ຺ຍາ.)] ນຕ຺ຖິ ໂວ ຠຍໍ;

ວິສຏ຺ຐາ ໂຫຖ ສພ຺ເພປິ, ອຸປ຺ປາໂທຍໍ ສຸວຕ຺ຖິໂກ [ສຸຂຕ຺ຖິໂກ (ສ຺ຍາ.)].

໖໖. ‘‘ອຏ຺ຐເຫຕູຫິ ສມ຺ຜຸສ຺ສ [ອຏ຺ຐເຫຕູຫິ ສມ຺ຜສ຺ສ (ສ຺ຍາ. ປີ.), ອຕ຺ຖເຫຕຸ ນິສໍສຍໍ (ກ.)], ວສຸຘາຍໍ ປກມ຺ປຕິ;

ຕຖາ ນິມິຕ຺ຕາ ທິສ຺ສນ຺ຕິ, ໂອຠາໂສ ວິປຸໂລ ມຫາ.

໖໗. ‘‘ອສໍສຍໍ ພຸທ຺ຘເສຏ຺ໂຐ, ອຸປ຺ປຊ຺ຊິສ຺ສຕິ ຈກ຺ຂຸມາ;

ສຎ຺ຎາເປຕ຺ວານ ຊນຕໍ, ປຎ຺ຈສີເລ ກເຖສຫໍ.

໖໘. ‘‘ສຸຕ຺ວານ ປຎ຺ຈ ສີລານິ, ພຸທ຺ຘຸປ຺ປາທຎ຺ຈ ທຸລ຺ລຠໍ;

ອຸພ຺ເພຄຊາຕາ ສຸມນາ, ຕຸຏ຺ຐຫຏ຺ຐາ ອຫໍສຸ ເຕ.

໖໙. ‘‘ທ຺ເວນວຸເຕ ອິໂຕ ກປ຺ເປ, ຍໍ ນິມິຕ຺ຕໍ ວິຍາກຣິໍ;

ທຸຄ຺ຄຕິໍ ນາຠິຊານາມິ, ພ຺ຍາກຣຓສ຺ສິທໍ ຜລໍ.

໗໐. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໗໑. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໗໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນິມິຕ຺ຕພ຺ຍາກຣຓິໂຍ ເຖໂຣ ອິມາ

ຄາຖາໂຍ ອຠາສິຕ຺ຖາຕິ.

ນິມິຕ຺ຕພ຺ຍາກຣຓິຍຕ຺ເຖຣສ຺ສາປທານໍ ທສມໍ.

ສາລກຸສຸມິຍວຄ຺ໂຄ ສຕ຺ຕຈຕ຺ຕາລີສໂມ.