໗. ສີຫາສນິກຕ຺ເຖຣອປທານໍ

໔໒. ‘‘ປທຸມຸຕ຺ຕຣສ຺ສ ຠຄວໂຕ, ສພ຺ພຠູຕຫິເຕສິໂນ;

ປສນ຺ນຈິຕ຺ໂຕ ສຸມໂນ, ສີຫາສນມທາສຫໍ.

໔໓. ‘‘ເທວໂລເກ ມນຸສ຺ເສ ວາ, ຍຕ຺ຖ ຍຕ຺ຖ ວສາມຫໍ;

ລຠາມິ ວິປຸລໍ ພ຺ຍມ຺ຫໍ, ສີຫາສນສ຺ສິທໍ ຜລໍ.

໔໔. ‘‘ໂສຓ຺ຓມຍາ ຣູປິມຍາ, ໂລຫິຕງ຺ຄມຍາ [ໂລຫິຕງ຺ກມຍາ (ສີ. ສ຺ຍາ. ປີ.)] ພຫູ;

ມຓິມຍາ ຈ ປລ຺ລງ຺ກາ, ນິພ຺ພຕ຺ຕນ຺ຕິ ມມໍ ສທາ.

໔໕. ‘‘ໂພຘິຍາ ອາສນໍ ກຕ຺ວາ, ຊລຊຸຕ຺ຕມນາມິໂນ;

ອຸຈ຺ເຈ ກຸເລ ປຊາຍາມິ, ອໂຫ ຘມ຺ມສຸຘມ຺ມຕາ.

໔໖. ‘‘ສຕສຫສ຺ສິໂຕ ກປ຺ເປ, ສີຫາສນມກາສຫໍ;

ທຸຄ຺ຄຕິໍ ນາຠິຊານາມິ, ສີຫາສນສ຺ສິທໍ ຜລໍ.

໔໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສີຫາສນິໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ສີຫາສນິກຕ຺ເຖຣສ຺ສາປທານໍ ສຕ຺ຕມໍ.