໘. ປາທປີຐິຍຕ຺ເຖຣອປທານໍ

໕໐. ‘‘ສຸເມໂຘ ນາມ ສມ຺ພຸທ຺ໂຘ, ອຄ຺ໂຄ ກາຣຸຓິໂກ ມຸນິ;

ຕາຣຍິຕ຺ວາ ພຫູ ສຕ຺ເຕ, ນິພ຺ພຸໂຕ ໂສ ມຫາຍໂສ.

໕໑. ‘‘ສີຫາສນສ຺ສ ສາມນ຺ຕາ, ສຸເມຘສ຺ສ ມເຫສິໂນ;

ປສນ຺ນຈິຕ຺ໂຕ ສຸມໂນ, ປາທປີຐມກາຣຍິໍ.

໕໒. ‘‘ກຕ຺ວານ ກຸສລໍ ກມ຺ມໍ, ສຸຂປາກໍ ສຸຂຸທ຺ຣຍໍ;

ປຸຎ຺ຎກມ຺ເມນ ສໍຍຸຕ຺ໂຕ, ຕາວຕິໍສມຄຈ຺ຉຫໍ.

໕໓. ‘‘ຕຕ຺ຖ ເມ ວສມານສ຺ສ, ປຸຎ຺ຎກມ຺ມສມງ຺ຄິໂນ;

ປທານິ ອຸທ຺ຘຣນ຺ຕສ຺ສ, ໂສຓ຺ຓປີຐາ ຠວນ຺ຕິ ເມ.

໕໔. ‘‘ລາຠາ ເຕສໍ ສຸລທ຺ຘໍ ໂວ, ເຍ ລຠນ຺ຕິ ອຸປສ຺ສຸຕິໍ;

ນິພ຺ພຸເຕ ກາຣໍ ກຕ຺ວານ, ລຠນ຺ຕິ ວິປຸລໍ ສຸຂໍ.

໕໕. ‘‘ມຍາປິ ສຸກຕໍ ກມ຺ມໍ, ວາຓິຊ຺ຊໍ ສຸປ຺ປໂຍຊິຕໍ;

ປາທປີຐໍ ກຣິຕ຺ວານ, ໂສຓ຺ຓປີຐໍ ລຠາມຫໍ.

໕໖. ‘‘ຍໍ ຍໍ ທິສໍ ປກ຺ກມາມິ, ເກນຈິ ກິຈ຺ຈເຍນຫໍ [ປຈ຺ຈເຍນຫໍ (ສີ. ປີ.)];

ໂສຓ຺ຓປີເຐ ອກ຺ກມາມິ [ໂສຓ຺ຓປີເຐນ ກມາມິ (ກ.)], ປຸຎ຺ຎກມ຺ມສ຺ສິທໍ ຜລໍ.

໕໗. ‘‘ຕິໍສກປ຺ປສຫສ຺ສມ຺ຫິ, ຍໍ ກມ຺ມມກຣິໍ ຕທາ;

ທຸຄ຺ຄຕິໍ ນາຠິຊານາມິ, ປາທປີຐສ຺ສິທໍ ຜລໍ.

໕໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໕໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໖໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປາທປີຐິໂຍ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ປາທປີຐິຍຕ຺ເຖຣສ຺ສາປທານໍ ອຏ຺ຐມໍ.