໗. ເອກຘມ຺ມສ຺ສວນິຍຕ຺ເຖຣອປທານໍ

໘໘. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ຈຕຸສຈ຺ຈໍ ປກາເສນ຺ໂຕ, ສນ຺ຕາເຣສິ ພຫຸໍ ຊນໍ.

໘໙. ‘‘ອຫໍ ເຕນ ສມເຍນ, ຊຏິໂລ ອຸຄ຺ຄຕາປໂນ;

ຘຸນນ຺ໂຕ ວາກຈີຣານິ, ຄຈ຺ຉາມິ ອມ຺ພເຣ ຕທາ.

໙໐. ‘‘ພຸທ຺ຘເສຏ຺ຐສ຺ສ ອຸປຣິ, ຄນ຺ຕຸໍ ນ ວິສຫາມຫໍ;

ປກ຺ຂີວ ເສລມາສຊ຺ຊ, ຄມນໍ ນ ລຠາມຫໍ.

໙໑. ‘‘ອຸທເກ ໂວກ຺ກມິຕ຺ວານ, ເອວໍ ຄຈ຺ຉາມິ ອມ຺ພເຣ;

ນ ເມ ອິທໍ ຠູຕປຸພ຺ພໍ, ອິຣິຍາປຖວິໂກປນໍ.

໙໒. ‘‘ຫນ຺ທ ເມຕໍ ຄເວສິສ຺ສໍ, ອປ຺ເປວຕ຺ຖໍ ລເຠຍ຺ຍຫໍ;

ໂອໂຣຫນ຺ໂຕ ອນ຺ຕລິກ຺ຂາ, ສທ຺ທມສ຺ໂສສິ ສຕ຺ຖຸໂນ.

໙໓. ‘‘ສເຣນ ຣຊນີເຍນ, ສວນີເຍນ ວຄ຺ຄຸນາ;

ອນິຈ຺ຈຕໍ ກເຖນ຺ຕສ຺ສ, ຕຎ຺ເຎວ ອຸຄ຺ຄຫິໍ ຕທາ;

ອນິຈ຺ຈສຎ຺ຎມຸຄ຺ຄຍ຺ຫ, ອຄມາສິໍ ມມສ຺ສມໍ.

໙໔. ‘‘ຍາວຕາຍຸໍ ວສິຕ຺ວານ, ຕຕ຺ຖ ກາລງ຺ກໂຕ ອຫໍ;

ຈຣິເມ ວຕ຺ຕມານມ຺ຫິ, ສທ຺ຘມ຺ມສ຺ສວນໍ ສຣິໍ.

໙໕. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໙໖. ‘‘ຕິໍສກປ຺ປສຫສ຺ສານິ, ເທວໂລເກ ຣມິໍ ອຫໍ;

ເອກປຎ຺ຎາສກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ.

໙໗. ‘‘ເອກວີສຕິກ຺ຂຕ຺ຕຸຎ຺ຈ [ເອກຕິໍສຕິ… (ສ຺ຍາ.)], ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໙໘. ‘‘ອນຸໂຠມິ ສກໍ ປຸຎ຺ຎໍ, ສຸຂິໂຕຫໍ ຠວາຠເວ;

ອນຸສ຺ສຣາມິ ຕໍ ສຎ຺ຎໍ, ສໍສຣນ຺ໂຕ ຠວາຠເວ;

ນ ໂກຏິໍ ປຏິວິຊ຺ຌາມິ, ນິພ຺ພານໍ ອຈ຺ຈຸຕໍ ປທໍ.

໙໙. ‘‘ປິຕຸເຄເຫ ນິສີທິຕ຺ວາ, ສມໂຓ ຠາວິຕິນ຺ທ຺ຣິໂຍ;

ກຖໍສ [ກຖຍໍ (ສີ. ປີ. ກ.)] ປຣິທີເປນ຺ໂຕ, ອນິຈ຺ຈຕມຸທາຫຣິ.

໑໐໐. ‘‘‘ອນິຈ຺ຈາ ວຕ ສງ຺ຂາຣາ, ອຸປ຺ປາທວຍຘມ຺ມິໂນ;

ອຸປ຺ປຊ຺ຊິຕ຺ວາ ນິຣຸຊ຺ຌນ຺ຕິ, ເຕສໍ ວູປສໂມ ສຸໂຂ’.

໑໐໑. ‘‘ສຫ ຄາຖໍ ສຸຓິຕ຺ວານ, ປຸພ຺ພສຎ຺ຎມນຸສ຺ສຣິໍ;

ເອກາສເນ ນິສີທິຕ຺ວາ, ອຣຫຕ຺ຕມປາປຸຓິໍ.

໑໐໒. ‘‘ຊາຕິຍາ ສຕ຺ຕວສ຺ເສນ, ອຣຫຕ຺ຕມປາປຸຓິໍ;

ອຸປສມ຺ປາທຍີ ພຸທ຺ໂຘ, ຘມ຺ມສ຺ສວນສ຺ສິທໍ ຜລໍ.

໑໐໓. ‘‘ສຕສຫສ຺ສິໂຕ ກປ຺ເປ, ຍໍ ຘມ຺ມມສຸຓິໍ ຕທາ;

ທຸຄ຺ຄຕິໍ ນາຠິຊານາມິ, ຘມ຺ມສ຺ສວນສ຺ສິທໍ ຜລໍ.

໑໐໔. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໐໕. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໐໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກຘມ຺ມສ຺ສວນິໂຍ ເຖໂຣ ອິມາ

ຄາຖາໂຍ ອຠາສິຕ຺ຖາຕິ.

ເອກຘມ຺ມສ຺ສວນິຍຕ຺ເຖຣສ຺ສາປທານໍ ສຕ຺ຕມໍ.