໘. ສຸຈິນ຺ຕິຕຕ຺ເຖຣອປທານໍ

໑໐໗. ‘‘ນຄເຣ ຫໍສວຕິຍາ, ອໂຫສິໍ ກສ຺ສໂກ ຕທາ;

ກສິກມ຺ເມນ ຊີວາມິ, ເຕນ ໂປເສມິ ທາຣເກ.

໑໐໘. ‘‘ສຸສມ຺ປນ຺ນໍ ຕທາ ເຂຕ຺ຕໍ, ຘຎ຺ຎໍ ເມ ຜລິນໍ [ຜລິຕໍ (ສີ. ປີ.)] ອຫຸ;

ປາກກາເລ ຈ ສມ຺ປຕ຺ເຕ, ເອວໍ ຈິນ຺ເຕສຫໍ ຕທາ.

໑໐໙. ‘‘ນຈ຺ຉນ຺ນໍ ນປ຺ປຕິຣູປໍ, ຊານນ຺ຕສ຺ສ ຄຸຓາຄຸຓໍ;

ໂຍຫໍ ສງ຺ເຆ ອທຕ຺ວານ, ອຄ຺ຄໍ ຠຸຎ຺ເຊຍ຺ຍ ເຈ ຕທາ [ມຕ຺ຕນາ (ສ຺ຍາ.)].

໑໑໐. ‘‘ອຍໍ ພຸທ຺ໂຘ ອສມສໂມ, ທ຺ວຕ຺ຕິໍສວຣລກ຺ຂໂຓ;

ຕໂຕ ປຠາວິໂຕ ສງ຺ໂຆ, ປຸຎ຺ຎກ຺ເຂຕ຺ໂຕ ອນຸຕ຺ຕໂຣ.

໑໑໑. ‘‘ຕຕ຺ຖ ທສ຺ສາມຫໍ ທານໍ, ນວສສ຺ສໍ ປຸເຣ ປຸເຣ;

ເອວາຫໍ ຈິນ຺ຕຍິຕ຺ວານ, ຫຏ຺ໂຐ ປີຓິຕມານໂສ [ປີຕິກ… (ສ຺ຍາ.)].

໑໑໒. ‘‘ເຂຕ຺ຕໂຕ ຘຎ຺ຎມາຫຕ຺ວາ, ສມ຺ພຸທ຺ຘໍ ອຸປສງ຺ກມິໍ;

ອຸປສງ຺ກມ຺ມ ສມ຺ພຸທ຺ຘໍ, ໂລກເຊຏ຺ຐໍ ນຣາສຠໍ;

ວນ຺ທິຕ຺ວາ ສຕ຺ຖຸໂນ ປາເທ, ອິທໍ ວຈນມພ຺ຣວິໍ.

໑໑໓. ‘‘‘ນວສສ຺ສຎ຺ຈ ສມ຺ປນ຺ນໍ, ອາຍາໂຄສິ [ອິຘ ໂຫສິ (ສ຺ຍາ.)] ຈ ຕ຺ວໍ ມຸເນ;

ອນຸກມ຺ປມຸປາທາຍ, ອຘິວາເສຫິ ຈກ຺ຂຸມ’.

໑໑໔. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມ ສງ຺ກປ຺ປມຎ຺ຎາຍ, ອິທໍ ວຈນມພ຺ຣວິ.

໑໑໕. ‘‘‘ຈຕ຺ຕາໂຣ ຈ ປຏິປນ຺ນາ, ຈຕ຺ຕາໂຣ ຈ ຜເລ ຐິຕາ;

ເອສ ສງ຺ໂຆ ອຸຊຸຠູໂຕ, ປຎ຺ຎາສີລສມາຫິໂຕ;

ຍຊນ຺ຕານໍ ມນຸສ຺ສານໍ, ປຸຎ຺ຎເປກ຺ຂານ ປາຓິນໍ.

໑໑໖. ‘‘‘ກໂຣໂຕປຘິກໍ ປຸຎ຺ຎໍ, ສງ຺ເຆ ທິນ຺ນໍ ມຫປ຺ຜລໍ;

ຕສ຺ມິໍ ສງ຺ເຆວ [ສໍເຆ ຈ (ສ຺ຍາ. ປີ.)] ທາຕພ຺ພໍ, ຕວ ສສ຺ສໍ ຕເຖຕຣໍ.

໑໑໗. ‘‘‘ສງ຺ຆໂຕ ອຸທ຺ທິສິຕ຺ວານ, ຠິກ຺ຂູ ເນຕ຺ວານ ສໍຆຣໍ;

ປຏິຍຕ຺ຕໍ ຆເຣ ສນ຺ຕໍ, ຠິກ຺ຂຸສງ຺ຆສ຺ສ ເທຫິ ຕ຺ວໍ’.

໑໑໘. ‘‘ສງ຺ຆໂຕ ອຸທ຺ທິສິຕ຺ວານ, ຠິກ຺ຂູ ເນຕ຺ວານ ສໍຆຣໍ;

ຍໍ ຆເຣ ປຏິຍຕ຺ຕໍ ເມ, ຠິກ຺ຂຸສງ຺ຆສ຺ສທາສຫໍ.

໑໑໙. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໒໐. ‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ໂສວຓ຺ຓໍ ສປ຺ປຠສ຺ສຣໍ;

ສຏ຺ຐິໂຍຊນມຸພ຺ເພຘໍ, ຕິໍສໂຍຊນວິຕ຺ຖຕໍ.

ເອກູນວີສຕິມໍ ຠາຓວາຣໍ.

໑໒໑. ‘‘ອາກິຓ຺ຓໍ ຠວນໍ ມຍ຺ຫໍ, ນາຣີຄຓສມາກຸລໍ;

ຕຕ຺ຖ ຠຸຕ຺ວາ ປິວິຕ຺ວາ ຈ, ວສາມິ ຕິທເສ ອຫໍ.

໑໒໒. ‘‘ສຕານໍ ຕີຓິກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ;

ສຕານໍ ປຎ຺ຈກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໑໒໓. ‘‘ຠວາຠເວ ສໍສຣນ຺ໂຕ, ລຠາມິ ອມິຕໍ ຘນໍ;

ໂຠເຄ ເມ ອູນຕາ ນຕ຺ຖິ, ນວສສ຺ສສ຺ສິທໍ ຜລໍ.

໑໒໔. ‘‘ຫຕ຺ຖິຍານໍ ອສ຺ສຍານໍ, ສິວິກໍ ສນ຺ທມານິກໍ;

ລຠາມິ ສພ຺ພເມເວຕໍ [ສພ຺ພເມຕມ຺ປິ (ກ.)], ນວສສ຺ສສ຺ສິທໍ ຜລໍ.

໑໒໕. ‘‘ນວວຕ຺ຖໍ ນວຜລໍ, ນວຄ຺ຄຣສໂຠຊນໍ;

ລຠາມິ ສພ຺ພເມເວຕໍ, ນວສສ຺ສສ຺ສິທໍ ຜລໍ.

໑໒໖. ‘‘ໂກເສຍ຺ຍກມ຺ພລິຍານິ, ໂຂມກປ຺ປາສິການິ ຈ;

ລຠາມິ ສພ຺ພເມເວຕໍ, ນວສສ຺ສສ຺ສິທໍ ຜລໍ.

໑໒໗. ‘‘ທາສີຄຓໍ ທາສຄຓໍ, ນາຣິໂຍ ຈ ອລງ຺ກຕາ;

ລຠາມິ ສພ຺ພເມເວຕໍ, ນວສສ຺ສສ຺ສິທໍ ຜລໍ.

໑໒໘. ‘‘ນ ມໍ ສີຕໍ ວາ ອຸຓ຺ຫໍ ວາ, ປຣິຬາໂຫ ນ ວິຊ຺ຊຕິ;

ອໂຖ ເຈຕສິກໍ ທຸກ຺ຂໍ, ຫທເຍ ເມ ນ ວິຊ຺ຊຕິ.

໑໒໙. ‘‘ອິທໍ ຂາທ ອິທໍ ຠຸຎ຺ຊ, ອິມມ຺ຫິ ສຍເນ ສຍ;

ລຠາມິ ສພ຺ພເມເວຕໍ, ນວສສ຺ສສ຺ສິທໍ ຜລໍ.

໑໓໐. ‘‘ອຍໍ ປຈ຺ຉິມໂກ ທານິ, ຈຣິໂມ ວຕ຺ຕເຕ ຠໂວ;

ອຊ຺ຊາປິ ເທຍ຺ຍຘມ຺ໂມ ເມ, ຜລໍ ໂຕເສສິ ສພ຺ພທາ.

໑໓໑. ‘‘ນວສສ຺ສໍ ທທິຕ຺ວານ, ສງ຺ເຆ ຄຓວຣຸຕ຺ຕເມ;

ອຏ຺ຐານິສໍເສ ອນຸໂຠມິ, ກມ຺ມານຸຈ຺ຉວິເກ ມມ.

໑໓໒. ‘‘ວຓ຺ຓວາ ຍສວາ ໂຫມິ, ມຫາໂຠໂຄ ອນີຕິໂກ;

ມຫາປກ຺ໂຂ [ມຫາຠກ຺ໂຂ (ສ຺ຍາ. ກ.)] ສທາ ໂຫມິ, ອເຠຊ຺ຊປຣິໂສ ສທາ.

໑໓໓. ‘‘ສພ຺ເພ ມໍ ອປຈາຍນ຺ຕິ, ເຍ ເກຈິ ປຖວິສ຺ສິຕາ;

ເທຍ຺ຍຘມ຺ມາ ຈ ເຍ ເກຈິ, ປຸເຣ ປຸເຣ ລຠາມຫໍ.

໑໓໔. ‘‘ຠິກ຺ຂຸສງ຺ຆສ຺ສ ວາ ມຊ຺ເຌ, ພຸທ຺ຘເສຏ຺ຐສ຺ສ ສມ຺ມຸຂາ;

ສພ຺ເພປິ ສມຕິກ຺ກມ຺ມ, ເທນ຺ຕິ ມເມວ ທາຍກາ.

໑໓໕. ‘‘ປຐມໍ ນວສສ຺ສຎ຺ຫິ, ທຕ຺ວາ ສງ຺ເຆ ຄຓຸຕ຺ຕເມ;

ອິມານິສໍເສ ອນຸໂຠມິ, ນວສສ຺ສສ຺ສິທໍ ຜລໍ.

໑໓໖. ‘‘ສຕສຫສ຺ສິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ນວສສ຺ສສ຺ສິທໍ ຜລໍ.

໑໓໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ;

໑໓໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໓໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຸຈິນ຺ຕິໂຕ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ສຸຈິນ຺ຕິຕຕ຺ເຖຣສ຺ສາປທານໍ ອຏ຺ຐມໍ.