໖. ເອກທີປິຍຕ຺ເຖຣອປທານໍ

໑໒໔. ‘‘ປຣິນິພ຺ພຸເຕ ສຸຄເຕ, ສິທ຺ຘຕ຺ເຖ ໂລກນາຍເກ;

ສເທວມານຸສາ ສພ຺ເພ, ປູເຊນ຺ຕິ ທ຺ວິປທຸຕ຺ຕມໍ.

໑໒໕. ‘‘ອາໂຣປິເຕ ຈ ຈິຕເກ, ສິທ຺ຘຕ຺ເຖ ໂລກນາຍເກ;

ຍຖາສເກນ ຖາເມນ, ຈິຕໍ ປູເຊນ຺ຕິ ສຕ຺ຖຸໂນ.

໑໒໖. ‘‘ອວິທູເຣ ຈິຕກສ຺ສ, ທີປໍ ອຸຊ຺ຊາລຍິໍ ອຫໍ;

ຍາວ ອຸເທຕິ ສູຣິໂຍ, ທີປໍ ເມ ຕາວ ອຸຊ຺ຊລິ.

໑໒໗. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໒໘. ‘‘ຕຕ຺ຖ ເມ ສຸກຕໍ ພ຺ຍມ຺ຫໍ, ເອກທີປີຕິ ຎາຍຕິ;

ທີປສຕສຫສ຺ສານິ, ພ຺ຍມ຺ເຫ ປຊ຺ຊລເຣ ມມ.

໑໒໙. ‘‘ອຸທຍນ຺ໂຕວ ສູຣິໂຍ, ເທໂຫ ເມ ໂຊຕເຕ ສທາ;

ສປ຺ປຠາຫິ ສຣີຣສ຺ສ, ອາໂລໂກ ໂຫຕິ ເມ ສທາ.

໑໓໐. ‘‘ຕິໂຣກຸຏ຺ຏໍ [ຕິໂຣກຸຑ຺ຑໍ (ສີ. ສ຺ຍາ. ກ.)] ຕິໂຣເສລໍ, ສມຕິຄ຺ຄຍ຺ຫ [ສພ຺ພຕ຺ຖປິ ເອວເມວ ທິສ຺ສຕິ] ປພ຺ພຕໍ;

ສມນ຺ຕາ ໂຍຊນສຕໍ, ປສ຺ສາມິ ຈກ຺ຂຸນາ ອຫໍ.

໑໓໑. ‘‘ສຕ຺ຕສຕ຺ຕຕິກ຺ຂຕ຺ຕຸຎ຺ຈ, ເທວໂລເກ ຣມິໍ ອຫໍ;

ເອກຕິໍສຕິກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ.

໑໓໒. ‘‘ອຏ຺ຐວີສຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໑໓໓. ‘‘ເທວໂລກາ ຈວິຕ຺ວານ, ນິພ຺ພຕ຺ຕິໍ ມາຕຸກຸຈ຺ຉິຍໍ;

ມາຕຸກຸຈ຺ຉິຄຕສ຺ສາປິ, ອກ຺ຂິ ເມ ນ ນິມີລຕິ.

໑໓໔. ‘‘ຊາຕິຍາ ຈຕຸວສ຺ໂສຫໍ, ປພ຺ພຊິໍ ອນຄາຣິຍໍ;

ອຑ຺ຒມາເສ ອສມ຺ປຕ຺ເຕ, ອຣຫຕ຺ຕມປາປຸຓິໍ.

໑໓໕. ‘‘ທິພ຺ພຈກ຺ຂຸໍ ວິໂສເຘສິໍ, ຠວາ ສພ຺ເພ ສມູຫຕາ;

ສພ຺ເພ ກິເລສາ ສຎ຺ຉິນ຺ນາ, ເອກທີປສ຺ສິທໍ ຜລໍ.

໑໓໖. ‘‘ຕິໂຣກຸຏ຺ຏໍ ຕິໂຣເສລໍ, ປພ຺ພຕຎ຺ຈາປິ ເກວລໍ;

ສມຕິກ຺ກມ຺ມ [ສພ຺ພຕ຺ຖປີ ເອວເມວ ທິສ຺ສຕິ] ປສ຺ສາມິ, ເອກທີປສ຺ສິທໍ ຜລໍ.

໑໓໗. ‘‘ວິສມາ ເມ ສມາ ໂຫນ຺ຕິ, ອນ຺ຘກາໂຣ ນ ວິຊ຺ຊຕິ;

ນາຫໍ ປສ຺ສາມິ ຕິມິຣໍ, ເອກທີປສ຺ສິທໍ ຜລໍ.

໑໓໘. ‘‘ຈຕຸນ຺ນວຸຕິໂຕ ກປ຺ເປ, ຍໍ ທີປມທທິໍ ຕທາ;

ທຸຄ຺ຄຕິໍ ນາຠິຊານາມິ, ເອກທີປສ຺ສິທໍ ຜລໍ.

໑໓໙. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໔໐. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໔໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເອກທີປິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ເອກທີປິຍຕ຺ເຖຣສ຺ສາປທານໍ ຉຏ຺ຐໍ.