໙. ຊຕຸກຓ຺ຓິຕ຺ເຖຣອປທານໍ

໒໗໖. ‘‘ນຄເຣ ຫໍສວຕິຍາ, ເສຏ຺ຐິປຸຕ຺ໂຕ ອໂຫສຫໍ;

ສມປ຺ປິໂຕ ກາມຄຸເຓ, ປຣິຈາເຣມຫໍ ຕທາ.

໒໗໗. ‘‘ຕໂຕ [ຕໂຍ (ສີ.)] ປາສາທມາຣຸຍ຺ຫ, ມຫາໂຠເຄ ວລຎ຺ຊໂກ [ອຸພ຺ພິທ຺ຘາ ເຄຫລຸຎ຺ຊກາ (ກ.), ອຸພ຺ພິທ຺ຘາເຄຫລຎ຺ຉກາ (ສີ.)];

ຕຕ຺ຖ ນຈ຺ເຈຫິ ຄີເຕຫິ, ປຣິຈາເຣມຫໍ ຕທາ.

໒໗໘. ‘‘ຕູຣິຍາ ອາຫຕາ ມຍ຺ຫໍ, ສມ຺ມຕາຬສມາຫິຕາ;

ນຈ຺ຈນ຺ຕາ [ຣຎ຺ຊນ຺ຕີ (ສ຺ຍາ.), ຣຊ຺ຊນ຺ຕາ (ກ.)] ອິຕ຺ຖິໂຍ ສພ຺ພາ, ຫຣນ຺ຕິເຍວ ເມ ມໂນ.

໒໗໙. ‘‘ເຈລາປິກາ [ເຈລາວກາ (ສ຺ຍາ.), ເວລາມິກາ (ປີ.)] ລາມຓິກາ [ວາມນິກາ (ສ຺ຍາ. ປີ.)], ກຸຎ຺ຊວາສີ ຕິມຊ຺ຌິກາ [ກຸຎ຺ຊວາ ສີຫິມຊ຺ຌິຕາ (ສ຺ຍາ.), ກຸຊ຺ຊາ ວາ ສີຫິມຊ຺ຌິກາ (ປີ.)];

ລງ຺ຆິກາ ໂສກຊ຺ຌາຍີ ຈ, ປຣິວາເຣນ຺ຕິ ມໍ ສທາ.

໒໘໐. ‘‘ເວຕາຬິໂນ ກຸມ຺ຠຖູນີ, ນຏາ ຈ ນຈ຺ຈກາ ພຫູ;

ນຏກາ ນາຏກາ ເຈວ, ປຣິວາເຣນ຺ຕິ ມໍ ສທາ.

໒໘໑. ‘‘ກປ຺ປກາ ນ຺ຫາປກາ ສູທາ, ມາລາກາຣາ ສຸປາສກາ [ສຸມາປກາ (ສີ. ສ຺ຍາ.)];

ຊລ຺ລາ ມລ຺ລາ ຈ ເຕ ສພ຺ເພ, ປຣິວາເຣນ຺ຕິ ມໍ ສທາ.

໒໘໒. ‘‘ເອເຕສຸ ກີຬມາເນສຸ, ສິກ຺ຂິເຕ ກຕຸປາສເນ;

ຣຕ຺ຕິນ຺ທິວໍ ນ ຊານາມິ, ອິນ຺ໂທວ ຕິທສງ຺ຄເຓ.

໒໘໓. ‘‘ອທ຺ຘິກາ ປຖິກາ ສພ຺ເພ, ຍາຈກາ ວຣກາ ພຫູ;

ອຸປຄຈ຺ຉນ຺ຕິ ເຕ ນິຈ຺ຈໍ, ຠິກ຺ຂຍນ຺ຕາ ມມໍ ຆຣໍ.

໒໘໔. ‘‘ສມຓາ ພ຺ຣາຫ຺ມຓາ ເຈວ, ປຸຎ຺ຎກ຺ເຂຕ຺ຕາ ອນຸຕ຺ຕຣາ;

ວຑ຺ຒຍນ຺ຕາ ມມໍ ປຸຎ຺ຎໍ, ອາຄຈ຺ຉນ຺ຕິ ມມໍ ຆຣໍ.

໒໘໕. ‘‘ປຏຄາ [ປຏກາ (ສີ. ສ຺ຍາ.), ປທກາ (ປີ.)] ລຏຸກາ [ລຏກາ (ສີ.)] ສພ຺ເພ, ນິຄຓ຺ຐາ ປຸປ຺ຜສາຏກາ;

ເຕທຓ຺ຑິກາ ເອກສິຂາ, ອາຄຈ຺ຉນ຺ຕິ ມມໍ ຆຣໍ.

໒໘໖. ‘‘ອາຊີວກາ ວິລຸຕ຺ຕາວີ, ໂຄຘມ຺ມາ ເທວຘມ຺ມິກາ;

ຣໂຊຊລ຺ລຘຣາ ເອເຕ, ອາຄຈ຺ຉນ຺ຕິ ມມໍ ຆຣໍ.

໒໘໗. ‘‘ປຣິຕ຺ຕກາ ສນ຺ຕິປຕ຺ຕາ [ປຣິວຕ຺ຕກາ ສິທ຺ຘິປຕ຺ຕາ (ສີ. ສ຺ຍາ. ປີ.)], ໂກຘປຸຄ຺ຄນິກາ [ໂກຓ຺ຑປຸຄ຺ຄຓິກາ (ສີ.), ໂກຓ຺ຑປຸຄ຺ຄລິກາ (ປີ.)] ພຫູ;

ຕປສ຺ສີ ວນຈາຣີ ຈ, ອາຄຈ຺ຉນ຺ຕິ ມມໍ ຆຣໍ.

໒໘໘. ‘‘ໂອຑ຺ຑກາ ທມິຬາ ເຈວ, ສາກຸຬາ ມລວາຬກາ [ມລຍາລກາ (ສີ. ສ຺ຍາ. ປີ.)];

ສວຣາ ໂຍນກາ ເຈວ, ອາຄຈ຺ຉນ຺ຕິ ມມໍ ຆຣໍ.

໒໘໙. ‘‘ອນ຺ຘກາ ມຸຓ຺ຑກາ ສພ຺ເພ, ໂກຏລາ ຫນຸວິນ຺ທກາ [ໂກລກາ ສານຸວິນ຺ທກາ (ສີ. ປີ.)];

ອາຣາວຈີນຣຏ຺ຐາ ຈ, ອາຄຈ຺ຉນ຺ຕິ ມມໍ ຆຣໍ.

໒໙໐. ‘‘ອລສນ຺ທກາ [ອລສນ຺ຕາ (ກ.)] ປລ຺ລວກາ, ຘມ຺ມຣາ ນິຄ຺ຄມານຸສາ [ພພ຺ພຣາ ຠຄ຺ຄກາຣຸສາ (ສີ.)];

ເຄຫິກາ [ໂຣຫິຕາ (ສີ.), ພາຫິກາ (ປີ.)] ເຈຕປຸຕ຺ຕາ ຈ, ອາຄຈ຺ຉນ຺ຕິ ມມໍ ຆຣໍ.

໒໙໑. ‘‘ມາຘຸຣກາ ໂກສລກາ, ກລິງ຺ຄາ [ກາສິກາ (ສີ.)] ຫຕ຺ຖິໂປຣິກາ;

ອິສິຓ຺ຑາ ມກ຺ກລາ ເຈວ, ອາຄຈ຺ຉນ຺ຕິ ມມໍ ຆຣໍ.

໒໙໒. ‘‘ເຈລາວກາ ອາຣພ຺ຠາ [ອຣມ຺ມາ (ສີ. ປີ.)] ຈ, ໂອຆຸຬ຺ຫາ [ໂອກ຺ກລາ (ສີ.)] ເມຆລາ ພຫູ;

ຂຸທ຺ທກາ ສຸທ຺ທກາ ເຈວ, ອາຄຈ຺ຉນ຺ຕິ ມມໍ ຆຣໍ.

໒໙໓. ‘‘ໂຣຫຓາ ສິນ຺ຘວາ ເຈວ, ຈິຕກາ ເອກກຓ຺ຓິກາ;

ສຸຣຏ຺ຐາ ອປຣນ຺ຕາ ຈ, ອາຄຈ຺ຉນ຺ຕິ ມມໍ ຆຣໍ.

໒໙໔. ‘‘ສຸປ຺ປາຣກາ ກຸມາຣາ [ກິກຸມາຣາ (ສີ. ປີ.)] ຈ, ມລ຺ລໂສວຓ຺ຓຠູມິກາ [ມລຍາ ໂສຓ຺ຓຠູມິກາ (ສີ. ສ຺ຍາ. ປີ.)];

ວຊ຺ຊີຕງ຺ຄາ [ວຊ຺ຊີ ຕາຣາ (ສີ.), ວຊ຺ຊີຫາຣາ (ສ຺ຍາ. ປີ.)] ຈ ເຕ ສພ຺ເພ, ອາຄຈ຺ຉນ຺ຕິ ມມໍ ຆຣໍ.

໒໙໕. ‘‘ນຬກາຣາ ເປສກາຣາ, ຈມ຺ມກາຣາ ຈ ຕຈ຺ຉກາ;

ກມ຺ມາຣາ ກຸມ຺ຠກາຣາ ຈ, ອາຄຈ຺ຉນ຺ຕິ ມມໍ ຆຣໍ.

໒໙໖. ‘‘ມຓິກາຣາ ໂລຫກາຣາ, ໂສຓ຺ຓກາຣາ ຈ ທຸສ຺ສິກາ;

ຕິປຸກາຣາ ຈ ເຕ ສພ຺ເພ, ອາຄຈ຺ຉນ຺ຕິ ມມໍ ຆຣໍ.

໒໙໗. ‘‘ອຸສຸກາຣາ ຠມກາຣາ, ເປສກາຣາ ຈ ຄນ຺ຘິກາ;

ຣຊກາ ຕຸນ຺ນວາຍາ ຈ, ອາຄຈ຺ຉນ຺ຕິ ມມໍ ຆຣໍ.

໒໙໘. ‘‘ເຕລິກາ ກຏ຺ຐຫາຣາ ຈ, ອຸທຫາຣາ ຈ ເປສ຺ສິກາ;

ສູປິກາ ສູປຣກ຺ຂາ ຈ, ອາຄຈ຺ຉນ຺ຕິ ມມໍ ຆຣໍ.

໒໙໙. ‘‘ໂທວາຣິກາ ອນີກຏ຺ຐາ, ພນ຺ຘິກາ [ວນ຺ທິກາ (ສີ.), ຄນ຺ຖິກາ (ສ຺ຍາ.), ສນ຺ທິກາ (ປີ.)] ປຸປ຺ຜຉຑ຺ຑກາ;

ຫຕ຺ຖາຣຸຫາ ຫຕ຺ຖິປາລາ, ອາຄຈ຺ຉນ຺ຕິ ມມໍ ຆຣໍ.

໓໐໐. ‘‘ອານນ຺ທສ຺ສ ມຫາຣຎ຺ໂຎ [ອານນ຺ທສ຺ສ ນາມ ຣຎ຺ໂຎ (ສ຺ຍາ.), ອຣິນ຺ທມນາມ ຣຎ຺ໂຎ (ປີ.)], ມມຕ຺ຖສ຺ສ [ປມຕ຺ຕສ຺ສ (ສີ. ປີ.), ສມຄ຺ຄສ຺ສ (ສ຺ຍາ.)] ອທາສຫໍ;

ສຕ຺ຕວຓ຺ເຓນ ຣຕເນນ, ອູນຕ຺ຖໍ [ອູນຕ຺ຕໍ (ສີ. ສ຺ຍາ. ປີ.)] ປູຣຍາມຫໍ.

໓໐໑. ‘‘ເຍ ມຍາ ກິຕ຺ຕິຕາ ສພ຺ເພ, ນານາວຓ຺ຓາ ພຫູ ຊນາ;

ເຕສາຫໍ ຈິຕ຺ຕມຎ຺ຎາຍ, ຕປ຺ປຍິໍ ຣຕເນນຫໍ.

໓໐໒. ‘‘ວຄ຺ຄູສຸ ຠາສມານາສຸ, ວຊ຺ຊມານາສຸ ເຠຣິສຸ;

ສງ຺ເຂສຸ ຘມຍນ຺ເຕສຸ, ສກເຄເຫ ຣມາມຫໍ.

໓໐໓. ‘‘ຠຄວາ ຕມ຺ຫິ ສມເຍ, ປທຸມຸຕ຺ຕຣນາຍໂກ;

ວສີສຕສຫສ຺ເສຫິ, ປຣິກ຺ຂີຓາສເວຫິ ໂສ.

໓໐໔. ‘‘ຠິກ຺ຂູຫິ ສຫິໂຕ ວີຖິໍ, ປຏິປຊ຺ຊິຕ຺ຖ ຈກ຺ຂຸມາ;

ໂອຠາເສນ຺ໂຕ ທິສາ ສພ຺ພາ, ທີປຣຸກ຺ໂຂວ ໂຊຕຕິ.

໓໐໕. ‘‘ວຊ຺ຊນ຺ຕິ ເຠຣິໂຍ ສພ຺ພາ, ຄຈ຺ຉນ຺ເຕ ໂລກນາຍເກ;

ປຠາ ນິທ຺ຘາວເຕ ຕສ຺ສ, ສຕຣໍສີວ ອຸຄ຺ຄໂຕ.

໓໐໖. ‘‘ກວາຏນ຺ຕຣິກາຍາປິ, ປວິຏ຺ເຐນ ຈ ຣສ຺ມິນາ;

ອນ຺ໂຕຆເຣສຸ ວິປຸໂລ, ອາໂລໂກ ອາສິ ຕາວເທ.

໓໐໗. ‘‘ປຠໍ ທິສ຺ວານ ພຸທ຺ຘສ຺ສ, ປາຣິສຊ຺ເຊ ອໂວຈຫໍ;

ນິສ຺ສໍສຍໍ ພຸທ຺ຘເສຏ຺ໂຐ, ອິມໍ ວີຖິມຸປາຄໂຕ.

໓໐໘. ‘‘ຂິປ຺ປໍ ໂອຣຸຍ຺ຫ ປາສາທາ, ອຄມິໍ ອນ຺ຕຣາປຓໍ;

ສມ຺ພຸທ຺ຘໍ ອຠິວາເທຕ຺ວາ, ອິທໍ ວຈນມພ຺ຣວິໍ.

໓໐໙. ‘‘‘ອນຸກມ຺ປຕຸ ເມ ພຸທ຺ໂຘ, ຊລຊຸຕ຺ຕມນາຍໂກ;

ວສີສຕສຫສ຺ເສຫິ, ອຘິວາເສສິ ໂສ ມຸນິ’.

໓໑໐. ‘‘ນິມນ຺ເຕຕ຺ວານ ສມ຺ພຸທ຺ຘໍ, ອຠິເນສິໍ ສກໍ ຆຣໍ;

ຕຕ຺ຖ ອນ຺ເນນ ປາເນນ, ສນ຺ຕປ຺ເປສິໍ ມຫາມຸນິໍ.

໓໑໑. ‘‘ຠຸຕ຺ຕາວິໍ ກາລມຎ຺ຎາຍ, ພຸທ຺ຘເສຏ຺ຐສ຺ສ ຕາທິໂນ;

ສຕງ຺ຄິເກນ ຕູຣິເຍນ, ພຸທ຺ຘເສຏ຺ຐໍ ອຸປຏ຺ຐຫິໍ.

໓໑໒. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ອນ຺ໂຕຆເຣ ນິສີທິຕ຺ວາ, ອິມາ ຄາຖາ ອຠາສຖ.

໓໑໓. ‘‘‘ໂຍ ມໍ ຕູຣິເຍຫຸປຏ຺ຐາສິ, ອນ຺ນປານຎ຺ຈທາສິ ເມ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໓໑໔. ‘‘‘ປຫູຕຠກ຺ໂຂ ຫຸຕ຺ວານ, ສຫິຣຎ຺ໂຎ ສໂຠຊໂນ;

ຈຕຸທີເປ ເອກຣຊ຺ຊໍ, ກາຣຍິສ຺ສຕິຍໍ ນໂຣ.

໓໑໕. ‘‘‘ປຎ຺ຈສີເລ ສມາທາຍ, ທສກມ຺ມປເຖ ຕໂຕ;

ສມາທາຍ ປວຕ຺ເຕນ຺ໂຕ, ປຣິສໍ ສິກ຺ຂາປຍິສ຺ສຕິ.

໓໑໖. ‘‘‘ຕູຣິຍສຕສຫສ຺ສານິ, ເຠຣິໂຍ ສມລງ຺ກຕາ;

ວຊ຺ຊຍິສ຺ສນ຺ຕິມໍ ນິຈ຺ຈໍ, ອຸປຏ຺ຐານສ຺ສິທໍ ຜລໍ.

໓໑໗. ‘‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສຕິ;

ຈຕຸສຏ຺ຐິກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສຕິ.

໓໑໘. ‘‘‘ຈຕຸສຏ຺ຐິກ຺ຂຕ຺ຕຸໍ ຣາຊາ, ຈກ຺ກວຕ຺ຕີ ຠວິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໓໑໙. ‘‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໓໒໐. ‘‘‘ອຸປປຊ຺ຊຕິ ຍໍ ໂຍນິໍ, ເທວຕ຺ຕໍ ອຖ ມານຸສໍ;

ອນູນໂຠໂຄ ຫຸຕ຺ວານ, ມນຸສ຺ສຕ຺ຕໍ ຄມິສ຺ສຕິ.

໓໒໑. ‘‘‘ອຊ຺ຌາຍໂກ ຠວິຕ຺ວານ, ຕິຓ຺ຓໍ ເວທານ ປາຣຄູ;

ອຸຕ຺ຕມຕ຺ຖໍ ຄເວສນ຺ໂຕ, ຈຣິສ຺ສຕິ ມຫິໍ ອິມໍ.

໓໒໒. ‘‘‘ໂສ ປຈ຺ຉາ ປພ຺ພຊິຕ຺ວານ, ສຸກ຺ກມູເລນ ໂຈທິໂຕ;

ໂຄຕມສ຺ສ ຠຄວໂຕ, ສາສເນຠິຣມິສ຺ສຕິ.

໓໒໓. ‘‘‘ອາຣາຘຍິຕ຺ວານ ສມ຺ພຸທ຺ຘໍ, ໂຄຕມໍ ສກ຺ຍປຸງ຺ຄວໍ;

ກິເລເສ ຌາປຍິຕ຺ວານ, ອຣຫາຍໍ ຠວິສ຺ສຕິ’.

໓໒໔. ‘‘ວິປິເນ ພ຺ຍຄ຺ຆຣາຊາວ, ມິຄຣາຊາວ ເກສຣີ;

ອຠີໂຕ ວິຫຣາມຊ຺ຊ, ສກ຺ຍປຸຕ຺ຕສ຺ສ ສາສເນ.

໓໒໕. ‘‘ເທວໂລເກ ມນຸສ຺ເສ ວາ, ທລິທ຺ເທ ທຸຄ຺ຄຕິມ຺ຫິ ວາ;

ນິພ຺ພຕ຺ຕິໍ ເມ ນ ປສ຺ສາມິ, ອຸປຏ຺ຐານສ຺ສິທໍ ຜລໍ.

໓໒໖. ‘‘ວິເວກມນຸຍຸຕ຺ໂຕມ຺ຫິ, ອຸປສນ຺ໂຕ ນິຣູປຘິ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໓໒໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໓໒໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໒໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຊຕຸກຓ຺ຓິຕ຺ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຊຕຸກຓ຺ຓິຕ຺ເຖຣສ຺ສາປທານໍ ນວມໍ.