໑໐. ອຸເທນຕ຺ເຖຣອປທານໍ

໓໓໐. ‘‘ຫິມວນ຺ຕສ຺ສາວິທູເຣ, ປທຸໂມ ນາມ ປພ຺ພໂຕ;

ອສ຺ສໂມ ສຸກໂຕ ມຍ຺ຫໍ, ປຓ຺ຓສາລາ ສຸມາປິຕາ.

໓໓໑. ‘‘ນທິໂຍ ສນ຺ທເຣ ຕຕ຺ຖ, ສຸປຕິຕ຺ຖາ ມໂນຣມາ;

ອຈ຺ໂຉທກາ ສີຕຊລາ, ສນ຺ທເຣ ນທິໂຍ ສທາ.

໓໓໒. ‘‘ປາຐີນາ ປາວຸສາ ມຈ຺ຉາ, ພລຊາ ມຸຎ຺ຊໂຣຫິຕາ;

ໂສເຠນ຺ຕາ ນທິໂຍ ເອເຕ, ວສນ຺ຕິ ນທິຍາ ສທາ.

໓໓໓. ‘‘ອມ຺ພຊມ຺ພູຫິ ສຎ຺ຉນ຺ນາ, ກເຣຣິຕິລກາ ຕຖາ;

ອຸທ຺ທາລກາ ປາຏລິໂຍ, ໂສເຠນ຺ຕິ ມມ ອສ຺ສມໍ.

໓໓໔. ‘‘ອງ຺ໂກລກາ ພິມ຺ພິຊາລາ, ມາຍາກາຣີ ຈ ປຸປ຺ຜິຕາ;

ຄນ຺ເຘນ ອຸປວາຍນ຺ຕາ, ໂສເຠນ຺ຕິ ມມ ອສ຺ສມໍ.

໓໓໕. ‘‘ອຕິມຸຕ຺ຕາ ສຕ຺ຕລິກາ, ນາຄາ ສາລາ ຈ ປຸປ຺ຜິຕາ;

ທິພ຺ພຄນ຺ຘໍ ສມ຺ປວນ຺ຕາ, ໂສເຠນ຺ຕິ ມມ ອສ຺ສມໍ.

໓໓໖. ‘‘ໂກສມ຺ພາ ສຬລາ ນີປາ, ອຏ຺ຐງ຺ຄາປິ ຈ ປຸປ຺ຜິຕາ [ອຏ຺ຐງ຺ຄາ ຈ ສຸປຸປ຺ຜິຕາ (ສີ.), ກຏ຺ຐງ຺ຄາ ຈ ສຸປຸປ຺ຜິຕາ (ປີ.)];

ທິພ຺ພຄນ຺ຘໍ ສມ຺ປວນ຺ຕາ, ໂສເຠນ຺ຕິ ມມ ອສ຺ສມໍ.

໓໓໗. ‘‘ຫຣີຕກາ ອາມລກາ, ອມ຺ພຊມ຺ພຸວິຠີຕກາ;

ໂກລາ ຠລ຺ລາຕກາ ພິລ຺ລາ, ຜລານິ ພຫຸ ອສ຺ສເມ.

໓໓໘. ‘‘ກລມ຺ພາ ກນ຺ທລີ ຕຕ຺ຖ, ປຸປ຺ຜນ຺ຕິ ມມ ອສ຺ສເມ;

ທິພ຺ພຄນ຺ຘໍ [ທິພ຺ພຄນ຺ຘາ (ສີ. ສ຺ຍາ. ປີ.) ເອວໍ ປຣຕ຺ຖປິ] ສມ຺ປວນ຺ຕາ, ໂສເຠນ຺ຕິ ມມ ອສ຺ສມໍ.

໓໓໙. ‘‘ອໂສກປິຓ຺ຑິວາຣີ ຈ [ອໂສກປິຓ຺ຑີ ຈ ວຣີ (ສີ. ສ຺ຍາ.), ອໂສກປິຓ຺ຑີ ຈ ວາຣີ (ປີ.)], ນິມ຺ພຣຸກ຺ຂາ ຈ ປຸປ຺ຜິຕາ;

ທິພ຺ພຄນ຺ຘໍ ສມ຺ປວນ຺ຕາ, ໂສເຠນ຺ຕິ ມມ ອສ຺ສມໍ.

໓໔໐. ‘‘ປຸນ຺ນາຄາ ຄິຣິປຸນ຺ນາຄາ, ຕິມິຣາ ຕຕ຺ຖ ປຸປ຺ຜິຕາ;

ທິພ຺ພຄນ຺ຘໍ ສມ຺ປວນ຺ຕາ, ໂສເຠນ຺ຕິ ມມ ອສ຺ສມໍ.

໓໔໑. ‘‘ນິຄ຺ຄຸຓ຺ຑີ ສິຣິນິຄ຺ຄຸຓ຺ຑີ, ຈມ຺ປຣຸກ຺ເຂຕ຺ຖ ປຸປ຺ຜິຕາ;

ທິພ຺ພຄນ຺ຘໍ ສມ຺ປວນ຺ຕາ, ໂສເຠນ຺ຕິ ມມ ອສ຺ສມໍ.

໓໔໒. ‘‘ອວິທູເຣ ໂປກ຺ຂຣຓີ, ຈກ຺ກວາກູປກູຊິຕາ;

ມນ຺ທາລເກຫິ ສຎ຺ຉນ຺ນາ, ປທຸມຸປ຺ປລເກຫິ ຈ.

໓໔໓. ‘‘ອຈ຺ໂຉທກາ ສີຕຊລາ, ສຸປຕິຕ຺ຖາ ມໂນຣມາ;

ອຈ຺ຉາ ຜລິກສມານາ, ໂສເຠນ຺ຕິ ມມ ອສ຺ສມໍ.

໓໔໔. ‘‘ປທຸມາ ປຸປ຺ຜເຣ ຕຕ຺ຖ, ປຸຓ຺ຑຣີກາ ຈ ອຸປ຺ປລາ;

ມນ຺ທາລເກຫິ ສຎ຺ຉນ຺ນາ, ໂສເຠນ຺ຕິ ມມ ອສ຺ສມໍ.

໓໔໕. ‘‘ປາຐີນາ ປາວຸສາ ມຈ຺ຉາ, ພລຊາ ມຸຎ຺ຊໂຣຫິຕາ;

ວິຈຣນ຺ຕາວ ເຕ ຕຕ຺ຖ, ໂສເຠນ຺ຕິ ມມ ອສ຺ສມໍ.

໓໔໖. ‘‘ກຸມ຺ຠີລາ ສຸສຸມາຣາ ຈ, ກຈ຺ຉປາ ຈ ຄຫາ ພຫູ;

ໂອຄຫາ ອຊຄຣາ ຈ, ໂສເຠນ຺ຕິ ມມ ອສ຺ສມໍ.

໓໔໗. ‘‘ປາເຣວຕາ ຣວິຫໍສາ, ຈກ຺ກວາກາ ນທີຈຣາ;

ທິນ຺ທິຠາ ສາຬິກາ ເຈຕ຺ຖ, ໂສເຠນ຺ຕິ ມມ ອສ຺ສມໍ.

໓໔໘. ‘‘ນຍິຕາ ອມ຺ພຄນ຺ຘີ ຈ, ເກຕກາ ຕຕ຺ຖ ປຸປ຺ຜິຕາ;

ທິພ຺ພຄນ຺ຘໍ ສມ຺ປວນ຺ຕາ, ໂສເຠນ຺ຕິ ມມ ອສ຺ສມໍ.

໓໔໙. ‘‘ສີຫາ ພ຺ຍຄ຺ຆາ ຈ ທີປີ ຈ, ອຈ຺ຉໂກກຕຣຈ຺ຉກາ;

ອນຸສຎ຺ຈຣນ຺ຕາ ປວເນ, ໂສເຠນ຺ຕິ ມມ ອສ຺ສມໍ.

໓໕໐. ‘‘ຊຏາຠາເຣນ ຠຣິຕາ, ອຊິນຸຕ຺ຕຣວາສນາ;

ອນຸສຎ຺ຈຣນ຺ຕາ ປວເນ, ໂສເຠນ຺ຕິ ມມ ອສ຺ສມໍ.

໓໕໑. ‘‘ອຊິນານິຘຣາ ເອເຕ, ນິປກາ ສນ຺ຕວຸຕ຺ຕິໂນ;

ອປ຺ປາຫາຣາວ ເຕ ສພ຺ເພ, ໂສເຠນ຺ຕິ ມມ ອສ຺ສມໍ.

໓໕໒. ‘‘ຂາຣິຠາຣໍ ຄເຫຕ຺ວານ, ອຊ຺ໂຌຄຍ຺ຫ ວນໍ ຕທາ;

ມູລຜລານິ ຠຸຎ຺ຊນ຺ຕາ, ວສນ຺ຕິ ອສ຺ສເມ ຕທາ.

໓໕໓. ‘‘ນ ເຕ ທາຣຸໍ ອາຫຣນ຺ຕິ, ອຸທກໍ ປາທໂຘວນໍ;

ສພ຺ເພສໍ ອານຸຠາເວນ, ສຍເມວາຫຣີຍຕິ.

໓໕໔. ‘‘ຈຸລ຺ລາສີຕິສຫສ຺ສານິ, ອິສເຍຕ຺ຖ ສມາຄຕາ;

ສພ຺ເພວ ຌາຍິໂນ ເອເຕ, ອຸຕ຺ຕມຕ຺ຖຄເວສກາ.

໓໕໕. ‘‘ຕປສ຺ສິໂນ ພ຺ຣຫ຺ມຈາຣີ, ໂຈເທນ຺ຕາ ອປ຺ປນາວ ເຕ;

ອມ຺ພຣາວຈຣາ ສພ຺ເພ, ວສນ຺ຕິ ອສ຺ສເມ ຕທາ.

໓໕໖. ‘‘ປຎ຺ຈາຫໍ ສນ຺ນິປຕນ຺ຕິ, ເອກຄ຺ຄາ ສນ຺ຕວຸຕ຺ຕິໂນ;

ອຎ຺ໂຎຎ຺ຎໍ ອຠິວາເທຕ຺ວາ, ປກ຺ກມນ຺ຕິ ທິສາມຸຂາ.

໓໕໗. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ຕມນ຺ຘກາຣໍ ວິຘມໍ, ອຸປ຺ປຊ຺ຊິ ຕາວເທ ຊິໂນ.

໓໕໘. ‘‘ມມ ອສ຺ສມສາມນ຺ຕາ, ຍກ຺ໂຂ ອາສິ ມຫິທ຺ຘິໂກ;

ໂສ ເມ ສໍສິຕ຺ຖ ສມ຺ພຸທ຺ຘໍ, ຊລຊຸຕ຺ຕມນາຍກໍ.

໓໕໙. ‘‘ເອສ ພຸທ຺ໂຘ ສມຸປ຺ປນ຺ໂນ, ປທຸມຸຕ຺ຕໂຣ ມຫາມຸນິ;

ຂິປ຺ປໍ ຄນ຺ຕ຺ວານ ສມ຺ພຸທ຺ຘໍ, ປຍິຣູປາສ ມາຣິສ.

໓໖໐. ‘‘ຍກ຺ຂສ຺ສ ວຈນໍ ສຸຕ຺ວາ, ວິປ຺ປສນ຺ເນນ ເຈຕສາ;

ອສ຺ສມໍ ສໍສາເມຕ຺ວານ, ນິກ຺ຂມິໍ ວິປິນາ ຕທາ.

໓໖໑. ‘‘ເຈເຬວ ຑຍ຺ຫມານມ຺ຫິ, ນິກ຺ຂມິຕ຺ວານ ອສ຺ສມາ;

ເອກຣຕ຺ຕິໍ ນິວາເສຕ຺ວາ [ນິວສິຕ຺ວາ (ສີ.), ນິວາເສນ (?)], ອຸປຄຈ຺ຉິໍ ວິນາຍກໍ.

໓໖໒. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ຈຕຸສຈ຺ຈໍ ປກາເສນ຺ໂຕ, ເທເສສິ ອມຕໍ ປທໍ.

໓໖໓. ‘‘ສຸຜຸລ຺ລໍ ປທຸມໍ ຄຍ຺ຫ, ອຸປຄນ຺ຕ຺ວາ ມເຫສິໂນ;

ປສນ຺ນຈິຕ຺ໂຕ ສຸມໂນ, ພຸທ຺ຘສ຺ສ ອຠິໂຣປຍິໍ.

໓໖໔. ‘‘ປູຊຍິຕ຺ວານ ສມ຺ພຸທ຺ຘໍ, ຊລຊຸຕ຺ຕມນາຍກໍ;

ເອກໍສໍ ອຊິນໍ ກຕ຺ວາ, ສນ຺ຖວິໍ ໂລກນາຍກໍ.

໓໖໕. ‘‘ເຍນ ຎາເຓນ ສມ຺ພຸທ຺ໂຘ, ວສຕີຫ ອນາສໂວ;

ຕໍ ຎາຓໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໓໖໖. ‘‘‘ສໍສາຣໂສຕໍ ຉິນ຺ທິຕ຺ວາ, ຕາເຣສິ ສພ຺ພປາຓິນໍ;

ຕວ ຘມ຺ມໍ ສຸຓິຕ຺ວານ, ຕຓ຺ຫາໂສຕໍ ຕຣນ຺ຕິ ເຕ.

໓໖໗. ‘‘‘ຕຸວໍ ສຕ຺ຖາ ຈ ເກຕຸ ຈ, ຘໂຊ ຍູໂປ ຈ ປາຓິນໍ;

ປຣາຍໂຓ ປຕິຏ຺ຐາ ຈ, ທີໂປ ຈ ທ຺ວິປທຸຕ຺ຕມ [ທິປທຸຕ຺ຕມ (ສີ. ສ຺ຍາ. ປີ.)].

໓໖໘. ‘‘‘ຍາວຕາ ຄຓິໂນ ໂລເກ, ສຕ຺ຖວາຫາ ປວຸຈ຺ຈເຣ;

ຕຸວໍ ອຄ຺ໂຄສິ ສພ຺ພຎ຺ຎຸ, ຕວ ອນ຺ໂຕຄຘາວ ເຕ.

໓໖໙. ‘‘‘ຕວ ຎາເຓນ ສພ຺ພຎ຺ຎຸ, ຕາເຣສິ ຊນຕໍ ພຫຸໍ;

ຕວ ທສ຺ສນມາຄມ຺ມ, ທຸກ຺ຂສ຺ສນ຺ຕໍ ກຣິສ຺ສເຣ.

໓໗໐. ‘‘‘ເຍ ເກຈິເມ ຄນ຺ຘຊາຕາ, ໂລເກ ວາຍນ຺ຕິ ຈກ຺ຂຸມ;

ຕວ ຄນ຺ຘສໂມ ນຕ຺ຖິ, ປຸຎ຺ຎກ຺ເຂຕ຺ເຕ ມຫາມຸເນ’.

໓໗໑. ‘‘‘ຕິຣຈ຺ຉານໂຍນິໍ ນິຣຍໍ, ປຣິໂມເຈສິ [ປຣິໂມເຈຫິ (ສ຺ຍາ. ກ.)] ຈກ຺ຂຸມ;

ອສງ຺ຂຕໍ ປທໍ ສນ຺ຕໍ, ເທເສສິ [ເທເສຫິ (ສ຺ຍາ. ກ.)] ຕ຺ວໍ ມຫາມຸເນ’.

໓໗໒. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໓໗໓. ‘‘‘ໂຍ ເມ ຎາຓໍ ອປູເຊສິ, ປສນ຺ໂນ ເສຫິ ປາຓິຠິ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໓໗໔. ‘‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສຕິ;

ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ’.

໓໗໕. ‘‘ສຸລທ຺ຘລາຠໍ ລທ຺ໂຘມ຺ຫິ, ໂຕສຍິຕ຺ວານ ສຸພ຺ພຕໍ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໓໗໖. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໓໗໗. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໗໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຸເທໂນ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອຸເທນຕ຺ເຖຣສ຺ສາປທານໍ ທສມໍ.

ເມຕ຺ເຕຍ຺ຍວຄ຺ໂຄ ເອກຈຕ຺ຕາລີສໂມ.