໖. ນນ຺ທກຕ຺ເຖຣອປທານໍ

໑໖໑. ‘‘ມິຄລຸທ຺ໂທ ປຸເຣ ອາສິໍ, ອຣຎ຺ເຎ ການເນ ອຫໍ;

ປສທໍ ມິຄເມສນ຺ໂຕ, ສຍມ຺ຠຸໍ ອທ຺ທສໍ ອຫໍ [ຊິນໍ (ສີ.)].

໑໖໒. ‘‘ອນຸຣຸທ຺ໂຘ ນາມ ສມ຺ພຸທ຺ໂຘ, ສຍມ຺ຠູ ອປຣາຊິໂຕ;

ວິເວກກາໂມ ໂສ ຘີໂຣ, ວນມຊ຺ໂຌຄຫີ ຕທາ.

໑໖໓. ‘‘ຈຕຸທຓ຺ເຑ ຄເຫຕ຺ວານ, ຈຕຸຏ຺ຐາເນ ຐເປສຫໍ;

ມຓ຺ຑປໍ ສຸກຕໍ ກຕ຺ວາ, ປທ຺ມປຸປ຺ເຜຫິ ຉາທຍິໍ.

໑໖໔. ‘‘ມຓ຺ຑປໍ ຉາທຍິຕ຺ວານ, ສຍມ຺ຠຸໍ ອຠິວາທຍິໍ;

ຘນຸໍ ຕຕ຺ເຖວ ນິກ຺ຂິປ຺ປ, ປພ຺ພຊິໍ ອນຄາຣິຍໍ.

໑໖໕. ‘‘ນຈິຣໍ ປພ຺ພຊິຕສ຺ສ [ປພ຺ພຊິຕສ຺ສ ອຈິຣໍ (ສີ.)], ພ຺ຍາຘິ ເມ ອຸທປຊ຺ຊຖ;

ປຸພ຺ພກມ຺ມໍ ສຣິຕ຺ວານ, ຕຕ຺ຖ ກາລງ຺ກໂຕ ອຫໍ.

໑໖໖. ‘‘ປຸພ຺ພກມ຺ເມນ ສໍຍຸຕ຺ໂຕ, ຕຸສິຕໍ ອຄມາສຫໍ;

ຕຕ຺ຖ ໂສຓ຺ຓມຍໍ ພ຺ຍມ຺ຫໍ, ນິພ຺ພຕ຺ຕຕິ ຍທິຈ຺ຉກໍ.

໑໖໗. ‘‘ສຫສ຺ສຍຸຕ຺ຕໍ ຫຍວາຫິໍ, ທິພ຺ພຍານມຘິຏ຺ຐິໂຕ;

ອາຣຸຫິຕ຺ວານ ຕໍ ຍານໍ, ຄຈ຺ຉາມຫໍ ຍທິຈ຺ຉກໍ.

໑໖໘. ‘‘ຕໂຕ ເມ ນິຍ຺ຍມານສ຺ສ, ເທວຠູຕສ຺ສ ເມ ສໂຕ;

ສມນ຺ຕາ ໂຍຊນສຕໍ, ມຓ຺ຑໂປ ເມ ຘຣີຍຕິ.

໑໖໙. ‘‘ສຍເນຫໍ ຕຸວຏ຺ຏາມິ, ອຈ຺ຉນ຺ເນ [ອຈ຺ຈນ຺ຕໍ (ສີ.), ອຈ຺ຈນ຺ຕ (ປີ.)] ປຸປ຺ຜສນ຺ຖເຕ;

ອນ຺ຕລິກ຺ຂາ ຈ ປທຸມາ, ວສ຺ສນ຺ເຕ ນິຈ຺ຈກາລິກໍ.

໑໗໐. ‘‘ມຣີຈິເກ ຜນ຺ທມາເນ, ຕປ຺ປມາເນ ຈ ອາຕເປ;

ນ ມໍ ຕາເປຕິ ອາຕາໂປ, ມຓ຺ຑປສ຺ສ ອິທໍ ຜລໍ.

໑໗໑. ‘‘ທຸຄ຺ຄຕິໍ ສມຕິກ຺ກນ຺ໂຕ, ອປາຍາ ປິຫິຕາ ມມ;

ມຓ຺ຑເປ ຣຸກ຺ຂມູເລ ວາ, ສນ຺ຕາໂປ ເມ ນ ວິຊ຺ຊຕິ.

໑໗໒. ‘‘ມຫີສຎ຺ຎໍ ອຘິຏ຺ຐາຍ, ໂລຓໂຕຍໍ ຕຣາມຫໍ;

ຕສ຺ສ ເມ ສຸກຕໍ ກມ຺ມໍ, ພຸທ຺ຘປູຊາຍິທໍ ຜລໍ.

໑໗໓. ‘‘ອປຖມ຺ປິ [ອພ຺ຠມ຺ຫິ (ສ຺ຍາ. ກ.)] ປຖໍ ກຕ຺ວາ, ຄຈ຺ຉາມິ ອນິລຎ຺ຊເສ;

ອໂຫ ເມ ສຸກຕໍ ກມ຺ມໍ, ພຸທ຺ຘປູຊາຍິທໍ ຜລໍ.

໑໗໔. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ອາສວາ ເມ ປຣິກ຺ຂີຓາ, ພຸທ຺ຘປູຊາຍິທໍ ຜລໍ.

໑໗໕. ‘‘ຊຫິຕາ ປຸຣິມາ ຊາຕິ, ພຸທ຺ຘສ຺ສ ໂອຣໂສ ອຫໍ;

ທາຍາໂທມ຺ຫິ ຈ ສທ຺ຘມ຺ເມ, ພຸທ຺ຘປູຊາຍິທໍ ຜລໍ.

໑໗໖. ‘‘ອາຣາຘິໂຕມ຺ຫິ ສຸຄຕໍ, ໂຄຕມໍ ສກ຺ຍປຸງ຺ຄວໍ;

ຘມ຺ມຘໂຊ ຘມ຺ມທາຍາໂທ [ຘມ຺ມາທາໂສ (ກ.)], ພຸທ຺ຘປູຊາຍິທໍ ຜລໍ.

໑໗໗. ‘‘ອຸປຏ຺ຐິຕ຺ວານ ສມ຺ພຸທ຺ຘໍ, ໂຄຕມໍ ສກ຺ຍປຸງ຺ຄວໍ;

ປາຣງ຺ຄມນິຍໍ ມຄ຺ຄໍ, ອປຸຈ຺ຉິໍ ໂລກນາຍກໍ.

໑໗໘. ‘‘ອຊ຺ຌິຏ຺ໂຐ ກຖຍີ ພຸທ຺ໂຘ, ຄມ຺ຠີຣໍ ນິປຸຓໍ ປທໍ;

ຕສ຺ສາຫໍ ຘມ຺ມໍ ສຸຕ຺ວານ, ປຕ຺ໂຕມ຺ຫິ ອາສວກ຺ຂຍໍ.

໑໗໙. ‘‘ອໂຫ ເມ ສຸກຕໍ ກມ຺ມໍ, ປຣິມຸຕ຺ໂຕມ຺ຫິ ຊາຕິຍາ;

ສພ຺ພາສວປຣິກ຺ຂີໂຓ, ນຕ຺ຖິ ທານິ ປຸນພ຺ຠໂວ.

໑໘໐. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໘໑. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໘໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ນນ຺ທໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ນນ຺ທກຕ຺ເຖຣສ຺ສາປທານໍ ຉຏ຺ຐໍ.