໗. ເຫມກຕ຺ເຖຣອປທານໍ

໑໘໓. ‘‘ປພ຺ຠາຣກູຏໍ ນິສ຺ສາຍ, ອໂນໂມ ນາມ ຕາປໂສ;

ອສ຺ສມໍ ສຸກຕໍ ກຕ຺ວາ, ປຓ຺ຓສາເລ ວສີ ຕທາ.

໑໘໔. ‘‘ສິທ຺ຘໍ ຕສ຺ສ ຕໂປ ກມ຺ມໍ, ສິທ຺ຘິປຕ຺ໂຕ ສເກ ພເລ;

ສກສາມຎ຺ຎວິກ຺ກນ຺ໂຕ, ອາຕາປີ ນິປໂກ ມຸນິ.

໑໘໕. ‘‘ວິສາຣໂທ ສສມເຍ, ປຣວາເທ ຈ ໂກວິໂທ;

ປຏ຺ໂຐ ຠູມນ຺ຕລິກ຺ຂມ຺ຫິ, ອຸປ຺ປາຕມ຺ຫິ ຈ ໂກວິໂທ.

໑໘໖. ‘‘ວີຕໂສໂກ ນິຣາຣມ຺ໂຠ, ອປ຺ປາຫາໂຣ ອໂລລຸໂປ;

ລາຠາລາເຠນ ສນ຺ຕຸຏ຺ໂຐ, ຌາຍີ ຌານຣໂຕ ມຸນິ.

໑໘໗. ‘‘ປິຍທສ຺ສີ ນາມ ສມ຺ພຸທ຺ໂຘ, ອຄ຺ໂຄ ກາຣຸຓິໂກ ມຸນິ;

ສຕ຺ເຕ ຕາເຣຕຸກາໂມ ໂສ, ກຣຸຓາຍ ຜຣີ ຕທາ.

໑໘໘. ‘‘ໂພຘເນຍ຺ຍໍ ຊນໍ ທິສ຺ວາ, ປິຍທສ຺ສີ ມຫາມຸນິ;

ຈກ຺ກວາຬສຫສ຺ສມ຺ປິ, ຄນ຺ຕ຺ວາ ໂອວທເຕ ມຸນິ.

໑໘໙. ‘‘ມມຸທ຺ຘຣິຕຸກາໂມ ໂສ, ມມສ຺ສມມຸປາຄມິ;

ນ ທິຏ຺ໂຐ ເມ ຊິໂນ ປຸພ຺ເພ, ນ ສຸໂຕປິ ຈ ກສ຺ສຈິ.

໑໙໐. ‘‘ອຸປ຺ປາຕາ ສຸປິນາ ມຍ຺ຫໍ, ລກ຺ຂຓາ ສຸປ຺ປກາສິຕາ;

ປຏ຺ໂຐ ຠູມນ຺ຕລິກ຺ຂມ຺ຫິ, ນກ຺ຂຕ຺ຕປທໂກວິໂທ.

໑໙໑. ‘‘ໂສຫໍ ພຸທ຺ຘສ຺ສ ສຸຕ຺ວານ, ຕຕ຺ຖ ຈິຕ຺ຕໍ ປສາທຍິໍ;

ຕິຏ຺ຐນ຺ໂຕ [ຠຸຎ຺ຊນ຺ໂຕ (ສີ. ປີ. ກ.)] ວາ ນິສິນ຺ໂນ ວາ, ສຣາມິ ນິຈ຺ຈກາລິກໍ.

໑໙໒. ‘‘ມຍິ ເອວໍ ສຣນ຺ຕມ຺ຫິ, ຠຄວາປິ ອນຸສ຺ສຣິ;

ພຸທ຺ຘໍ ອນຸສ຺ສຣນ຺ຕສ຺ສ, ປີຕິ ເມ ໂຫຕິ ຕາວເທ.

໑໙໓. ‘‘ກາລຎ຺ຈ ປຸນຣາຄມ຺ມ, ອຸເປສິ ມໍ ມຫາມຸນິ;

ສມ຺ປຕ຺ເຕປິ ນ ຊານາມິ, ອຍໍ ພຸທ຺ໂຘ ມຫາມຸນິ.

໑໙໔. ‘‘ອນຸກມ຺ປໂກ ກາຣຸຓິໂກ, ປິຍທສ຺ສີ ມຫາມຸນິ;

ສຎ຺ຊານາເປສິ ອຕ຺ຕານໍ, ‘ອຫໍ ພຸທ຺ໂຘ ສເທວເກ’.

໑໙໕. ‘‘ສຎ຺ຊານິຕ຺ວານ ສມ຺ພຸທ຺ຘໍ, ປິຍທສ຺ສິໍ ມຫາມຸນິໍ;

ສກໍ ຈິຕ຺ຕໍ ປສາເທຕ຺ວາ, ອິທໍ ວຈນມພ຺ຣວິໍ.

໑໙໖. ‘‘‘ອຎ຺ເຎ [ສພ຺ເພ (ສ຺ຍາ.)] ປີເຐ ຈ ປລ຺ລງ຺ເກ, ອາສນ຺ທີສຸ ນິສີທເຣ;

ຕຸວມ຺ປິ ສພ຺ພທສ຺ສາວີ, ນິສີທ ຣຕນາສເນ’.

໑໙໗. ‘‘ສພ຺ພຣຕນມຍໍ ປີຐໍ, ນິມ຺ມິນິຕ຺ວານ ຕາວເທ;

ປິຍທສ຺ສິສ຺ສ ມຸນິໂນ, ອທາສິໍ ອິທ຺ຘິນິມ຺ມິຕໍ.

໑໙໘. ‘‘ຣຕເນ ຈ ນິສິນ຺ນສ຺ສ, ປີຐເກ ອິທ຺ຘິນິມ຺ມິເຕ;

ກຸມ຺ຠມຕ຺ຕໍ ຊມ຺ພຸຜລໍ, ອທາສິໍ ຕາວເທ ອຫໍ.

໑໙໙. ‘‘ມມ ຫາສໍ ຊເນຕ຺ວານ, ປຣິຠຸຎ຺ຊິ ມຫາມຸນິ;

ຕທາ ຈິຕ຺ຕໍ ປສາເທຕ຺ວາ, ສຕ຺ຖາຣໍ ອຠິວາທຍິໍ.

໒໐໐. ‘‘ປິຍທສ຺ສີ ຕຸ ຠຄວາ, ໂລກເຊຏ຺ໂຐ ນຣາສໂຠ;

ຣຕນາສນມາສີໂນ, ອິມາ ຄາຖາ ອຠາສຖ.

໒໐໑. ‘‘‘ໂຍ ເມ ຣຕນມຍໍ ປີຐໍ, ອມຕຎ຺ຈ ຜລໍ ອທາ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໒໐໒. ‘‘‘ສຕ຺ຕສຕ຺ຕຕິ ກປ຺ປານິ, ເທວໂລເກ ຣມິສ຺ສຕິ;

ປຎ຺ຈສຕ຺ຕຕິກ຺ຂຕ຺ຕຸຎ຺ຈ, ຈກ຺ກວຕ຺ຕີ ຠວິສ຺ສຕິ.

໒໐໓. ‘‘‘ທ຺ວຕ຺ຕິໍສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໒໐໔. ‘‘‘ໂສຓ຺ຓມຍໍ ຣູປິມຍໍ, ປລ຺ລງ຺ກໍ ສຸກຕໍ ພຫຸໍ;

ໂລຫິຕງ຺ຄມຍຎ຺ເຈວ, ລຈ຺ຉຕິ ຣຕນາມຍໍ.

໒໐໕. ‘‘‘ຈງ຺ກມນ຺ຕມ຺ປິ ມນຸຊໍ, ປຸຎ຺ຎກມ຺ມສມງ຺ຄິນໍ;

ປລ຺ລງ຺ການິ ອເນການິ, ປຣິວາເຣສ຺ສເຣ ຕທາ.

໒໐໖. ‘‘‘ກູຏາຄາຣາ ຈ ປາສາທາ, ສຍນຎ຺ຈ ມຫາຣຫໍ;

ອິມສ຺ສ ຈິຕ຺ຕມຎ຺ຎາຍ, ນິພ຺ພຕ຺ຕິສ຺ສນ຺ຕິ ຕາວເທ.

໒໐໗. ‘‘‘ສຏ຺ຐິ ນາຄສຫສ຺ສານິ, ສພ຺ພາລງ຺ກາຣຠູສິຕາ;

ສຸວຓ຺ຓກຈ຺ຉາ ມາຕງ຺ຄາ, ເຫມກປ຺ປນວາສສາ [ເຫມກປ຺ປນິວາສນາ (ສີ. ສ຺ຍາ.), ເຫມກປ຺ປນິວາສສາ (ກ.)].

໒໐໘. ‘‘‘ອາຣູຬ຺ຫາ ຄາມຓີເຍຫິ, ໂຕມຣງ຺ກຸສປາຓິຠິ;

ອິມໍ ປຣິຈຣິສ຺ສນ຺ຕິ, ຣຕ຺ນປີຐສ຺ສິທໍ ຜລໍ.

໒໐໙. ‘‘‘ສຏ຺ຐິ ອສ຺ສສຫສ຺ສານິ, ສພ຺ພາລງ຺ກາຣຠູສິຕາ;

ອາຊານີຍາວ ຊາຕິຍາ, ສິນ຺ຘວາ ສີຆວາຫິໂນ.

໒໑໐. ‘‘‘ອາຣູຬ຺ຫາ ຄາມຓີເຍຫິ, ອິລ຺ລິຍາຈາປຘາຣິຠິ;

ເຕປິມໍ ປຣິຈຣິສ຺ສນ຺ຕິ, ຣຕ຺ນປີຐສ຺ສິທໍ ຜລໍ.

໒໑໑. ‘‘‘ສຏ຺ຐິ ຣຖສຫສ຺ສານິ, ສພ຺ພາລງ຺ກາຣຠູສິຕາ;

ທີປາ ອໂຖປິ ເວຍຄ຺ຆາ, ສນ຺ນທ຺ຘາ ອຸສ຺ສິຕທ຺ຘຊາ.

໒໑໒. ‘‘‘ອາຣູຬ຺ຫາ ຄາມຓີເຍຫິ, ຈາປຫຕ຺ເຖຫິ ວມ຺ມິຠິ;

ປຣິວາເຣສ຺ສນ຺ຕິມໍ ນິຈ຺ຈໍ, ຣຕ຺ນປີຐສ຺ສິທໍ ຜລໍ.

໒໑໓. ‘‘‘ສຏ຺ຐິ ເຘນຸສຫສ຺ສານິ, ໂທຫຎ຺ຎາ ປຸງ຺ຄວູສເຠ;

ວຈ຺ຉເກ ຊນຍິສ຺ສນ຺ຕິ, ຣຕ຺ນປີຐສ຺ສິທໍ ຜລໍ.

໒໑໔. ‘‘‘ໂສຬສິຕ຺ຖິສຫສ຺ສານິ, ສພ຺ພາລງ຺ກາຣຠູສິຕາ;

ວິຈິຕ຺ຕວຕ຺ຖາຠຣຓາ, ອາມຸກ຺ກມຓິກຸຓ຺ຑລາ.

໒໑໕. ‘‘‘ອຬາຣປມ຺ຫາ ຫສຸລາ, ສຸສຎ຺ຎາ ຕນຸມຊ຺ຌິມາ;

ປຣິວາເຣສ຺ສນ຺ຕິມໍ ນິຈ຺ຈໍ, ຣຕ຺ນປີຐສ຺ສິທໍ ຜລໍ.

໒໑໖. ‘‘‘ອຏ຺ຐາຣເສ ກປ຺ປສເຕ, ໂຄຕໂມ ນາມ ຈກ຺ຂຸມາ;

ຕມນ຺ຘກາຣໍ ວິຘມິຕ຺ວາ, ພຸທ຺ໂຘ ໂລເກ ຠວິສ຺ສຕິ.

໒໑໗. ‘‘‘ຕສ຺ສ ທສ຺ສນມາຄມ຺ມ, ປພ຺ພຊິສ຺ສຕິກິຎ຺ຈໂນ;

ໂຕສຍິຕ຺ວານ ສຕ຺ຖາຣໍ, ສາສເນຠິຣມິສ຺ສຕິ.

໒໑໘. ‘‘‘ຕສ຺ສ ຘມ຺ມໍ ສຸຓິຕ຺ວານ, ກິເລເສ ຆາຕຍິສ຺ສຕິ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ’.

໒໑໙. ‘‘ວີຣິຍໍ ເມ ຘຸຣໂຘຣຍ຺ຫໍ, ໂຍຄກ຺ເຂມາຘິວາຫນໍ;

ອຸຕ຺ຕມຕ຺ຖໍ ປຕ຺ຖຍນ຺ໂຕ, ສາສເນ ວິຫຣາມຫໍ.

໒໒໐. ‘‘ອິທໍ ປຈ຺ຉິມກໍ ມຍ຺ຫໍ, ຈຣິໂມ ວຕ຺ຕເຕ ຠໂວ;

ສພ຺ພາສວາ ປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໒໒໑. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໒໒໒. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໒໒໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ເຫມໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ;

ເຫມກຕ຺ເຖຣສ຺ສາປທານໍ ສຕ຺ຕມໍ.

ສຕ຺ຕຣສມໍ ຠາຓວາຣໍ.