໕. ອຸປສີວຕ຺ເຖຣອປທານໍ

໑໐໐. ‘‘ຫິມວນ຺ຕສ຺ສາວິທູເຣ, ອໂນໂມ ນາມ ປພ຺ພໂຕ;

ອສ຺ສໂມ ສຸກໂຕ ມຍ຺ຫໍ, ປຓ຺ຓສາລາ ສຸມາປິຕາ.

໑໐໑. ‘‘ນທີ ຈ ສນ຺ທຕີ ຕຕ຺ຖ, ສຸປຕິຕ຺ຖາ ມໂນຣມາ;

ອນູປຕິຕ຺ເຖ ຊາຍນ຺ຕິ, ປທຸມຸປ຺ປລກາ ພຫູ.

໑໐໒. ‘‘ປາຐີນາ ປາວຸສາ ມຈ຺ຉາ, ພລຊາ ມຸຎ຺ຊໂຣຫິຕາ;

ມຈ຺ຉກຈ຺ຉປສຎ຺ຉນ຺ນາ [ມຈ຺ຉກຈ຺ຉປສມ຺ປນ຺ນາ (?)], ນທິກາ ສນ຺ທເຕ ຕທາ.

໑໐໓. ‘‘ຕິມິຣາ ປຸປ຺ຜິຕາ ຕຕ຺ຖ, ອໂສກາ ຂຸທ຺ທມາລກາ;

ປຸນ຺ນາຄາ ຄິຣິປຸນ຺ນາຄາ, ສມ຺ປວນ຺ຕິ ມມສ຺ສມໍ.

໑໐໔. ‘‘ກຸຏຊາ ປຸປ຺ຜິຕາ ຕຕ຺ຖ, ຕິຓສູລວນານິ ຈ;

ສາລາ ຈ ສຬລາ ຕຕ຺ຖ, ຈມ຺ປກາ ປຸປ຺ຜິຕາ ພຫູ.

໑໐໕. ‘‘ອຊ຺ຊຸນາ ອຕິມຸຕ຺ຕາ ຈ, ມຫານາມາ ຈ ປຸປ຺ຜິຕາ;

ອສນາ ມຘຸຄນ຺ຘີ ຈ, ປຸປ຺ຜິຕາ ເຕ ມມສ຺ສເມ.

໑໐໖. ‘‘ອຸທ຺ທາລກາ ປາຏລິກາ, ຍູຖິກາ ຈ ປິຍງ຺ຄຸກາ;

ພິມ຺ພິຊາລກສຎ຺ຉນ຺ນາ, ສມນ຺ຕາ ອຑ຺ຒໂຍຊນໍ.

໑໐໗. ‘‘ມາຕຄ຺ຄາຣາ [ມາຕງ຺ຄວາ (ສີ.), ມາຕກຣາ (ສ຺ຍາ.), ມາຕງ຺ຄາ ວາ (ປີ.)] ສຕ຺ຕລິໂຍ, ປາຏລີ ສິນ຺ທຸວາຣກາ;

ອງ຺ໂກລກາ ພຫູ ຕຕ຺ຖ, ຕາລກຸຏ຺ຐິ [ຕາລກູຏາ (ສີ. ສ຺ຍາ.), ຕາລກຸຏ຺ຐາ (ປີ.)] ຈ ປຸປ຺ຜິຕາ;

ເສເລຍ຺ຍກາ ພຫູ ຕຕ຺ຖ, ປຸປ຺ຜິຕາ ມມ ອສ຺ສເມ.

໑໐໘. ‘‘ເອເຕສຸ ປຸປ຺ຜຊາເຕສຸ [ປຸປ຺ຜມາເນສຸ (ສີ. ປີ.)], ໂສຠນ຺ຕິ ປາທປາ ພຫູ;

ສມນ຺ຕາ ເຕນ ຄນ຺ເຘນ, ວາຍເຕ ມມ ອສ຺ສໂມ.

໑໐໙. ‘‘ຫຣີຕກາ ອາມລກາ, ອມ຺ພຊມ຺ພຸວິຠີຕກາ [ວິຠິຏກາ (ສີ.)];

ໂກລາ ຠລ຺ລາຕກາ ພິລ຺ລາ, ຜາຣຸສກຜລານິ ຈ.

໑໑໐. ‘‘ຕິນ຺ທຸກາ ຈ ປິຍາລາ ຈ, ມຘຸກາ ກາສຸມາຣໂຍ;

ລພຸຊາ ປນສາ ຕຕ຺ຖ, ກທລີ ພທຣີຜລາ [ມນ຺ທຣິຜລາ (ກ.), ຈນ຺ທຣີຜລາ (ສ຺ຍາ. ປີ.)].

໑໑໑. ‘‘ອມ຺ພາຏກາ ພຫູ ຕຕ຺ຖ, ວລ຺ລິກາຣຜລານິ ຈ;

ພີຊປູຣສປາຣິໂຍ [ຈິຣສໍຣສປາກາ ຈ (ສ຺ຍາ.), ວິຏປາ ຈ ສປາກາ ຈ (ປີ), ວິທປຣປທາທໂຍ (ກ.)], ຜລິຕາ ມມ ອສ຺ສເມ.

໑໑໒. ‘‘ອາຬກາ ອິສິມຸຄ຺ຄາ ຈ, ຕໂຕ ໂມທຜລາ ພຫູ;

ອວຏາ ປກ຺ກຠຣິຕາ [ສກ຺ກຣາຣິຕາ (ກ.)], ປິລກ຺ຂຸທຸມ຺ພຣານິ ຈ.

໑໑໓. ‘‘ປິປ຺ຜິລີ ມຣີຈາ ຕຕ຺ຖ, ນິຄ຺ໂຣຘາ ຈ ກປິຕ຺ຖນາ;

ອຸທຸມ຺ພຣກາ ພຫໂວ, ກຓ຺ຑຸປຓ຺ຓາ ຈ ຫຣິໂຍ [ກຓ຺ຑປກ຺ກາ ຈ ປາຣິໂຍ (ສີ. ສ຺ຍາ. ປີ.)].

໑໑໔. ‘‘ເອເຕ ຈຎ຺ເຎ ຈ ພຫໂວ, ຜລິຕາ ອສ຺ສເມ ມມ;

ປຸປ຺ຜຣຸກ຺ຂາປິ ພຫໂວ, ປຸປ຺ຜິຕາ ມມ ອສ຺ສເມ.

໑໑໕. ‘‘ອາລຸວາ ຈ ກຬມ຺ພາ ຈ, ພິຬາລີ ຕກ຺ກລານິ ຈ;

ອາລກາ ຕາລກາ ເຈວ, ວິຊ຺ຊນ຺ຕິ ອສ຺ສເມ ມມ.

໑໑໖. ‘‘ອສ຺ສມສ຺ສາວິທູເຣ ເມ, ມຫາຊາຕສ຺ສໂຣ ອຫຸ;

ອຈ຺ໂຉທໂກ ສີຕຊໂລ, ສຸປຕິຕ຺ໂຖ ມໂນຣໂມ.

໑໑໗. ‘‘ປທຸມຸປ຺ປລາ ພຫູ ຕຕ຺ຖ, ປຸຓ຺ຑຣີກສມາຍຸຕາ;

ມນ຺ທາລເກຫິ ສຎ຺ຉນ຺ນາ, ນານາຄນ຺ຘສເມຣິຕາ.

໑໑໘. ‘‘ຄພ຺ຠໍ ຄຓ຺ຫນ຺ຕິ ປທຸມາ, ອຎ຺ເຎ ປຸປ຺ຜນ຺ຕິ ເກສຣີ;

ໂອປຸປ຺ຜປຕ຺ຕາ ຕິຏ຺ຐນ຺ຕິ, ປທຸມາກຓ຺ຓິກາ ພຫູ.

໑໑໙. ‘‘ມຘຸ ຠິສມ຺ຫາ ສວຕິ, ຂີຣໍ ສປ຺ປິ ມຸລາຬິຠິ;

ສມນ຺ຕາ ເຕນ ຄນ຺ເຘນ, ນານາຄນ຺ຘສເມຣິຕາ.

໑໒໐. ‘‘ກຸມຸທາ ອມ຺ພຄນ຺ຘິ ຈ, ນຍິຕາ ທິສ຺ສເຣ ພຫູ;

ຊາຕສ຺ສຣສ຺ສານຸກູລໍ, ເກຕກາ ປຸປ຺ຜິຕາ ພຫູ.

໑໒໑. ‘‘ສຸຜຸລ຺ລາ ພນ຺ຘຸຊີວາ ຈ, ເສຕວາຣີ ສຸຄນ຺ຘິກາ;

ກຸມ຺ຠິລາ ສຸສຸມາຣາ ຈ, ຄຫກາ ຕຕ຺ຖ ຊາຍເຣ.

໑໒໒. ‘‘ອຸຄ຺ຄາຫກາ ອຊຄຣາ, ຕຕ຺ຖ ຊາຕສ຺ສເຣ ພຫູ;

ປາຐີນາ ປາວຸສາ ມຈ຺ຉາ, ພລຊາ ມຸຎ຺ຊໂຣຫິຕາ.

໑໒໓. ‘‘ມຈ຺ຉກຈ຺ຉປສຎ຺ຉນ຺ນາ, ອໂຖ ປປຏກາຫິ [ປມ຺ປຏເກຫິ (ສີ.), ສປຏເກຫິ (ສ຺ຍາ.), ປປ຺ປຏເກຫິ (ປີ)] ຈ;

ປາເຣວຕາ ຣວິຫໍສາ, ກຸກຸຕ຺ຖາ [ກຸກ຺ກຸຕ຺ຖາ (ສ຺ຍາ. ກ.), ກຸຕ຺ຖກາ (ປີ.)] ຈ ນທີຈຣາ.

໑໒໔. ‘‘ທິນ຺ທິຠາ [ຏິຏ຺ຏິຠາ (ປີ.)] ຈກ຺ກວາກາ ຈ, ປມ຺ປກາ ຊີວຊີວກາ;

ກລນ຺ທກາ ອຸກ຺ກຸສາ ຈ, ເສນກາ ອຸທ຺ຘຣາ ພຫູ.

໑໒໕. ‘‘ໂກຏ຺ຐກາ ສຸກໂປຕາ ຈ, ຕຸລິຍາ ຈມຣາ ພຫູ;

ກາເຣນິໂຍ [ກາເສນິຍາ (ສ຺ຍາ.)] ຈ ຕິລກາ [ກິລກາ (ກ.)], ອຸປຊີວນ຺ຕິ ຕໍ ສຣໍ.

໑໒໖. ‘‘ສີຫາ ພ຺ຍຄ຺ຆາ ຈ ທີປີ ຈ, ອຈ຺ຉໂກກຕຣຈ຺ຉກາ;

ວານຣາ ກິນ຺ນຣາ ເຈວ, ທິສ຺ສນ຺ຕິ ມມ ອສ຺ສເມ.

໑໒໗. ‘‘ຕານິ ຄນ຺ຘານິ ຆາຍນ຺ໂຕ, ຠກ຺ຂຍນ຺ໂຕ ຜລານຫໍ;

ຄນ຺ໂຘທກໍ ປິວນ຺ໂຕ ຈ, ວສາມິ ມມ ອສ຺ສເມ.

໑໒໘. ‘‘ເອຓີມິຄາ ວຣາຫາ ຈ, ປສທາ ຂຸທ຺ທຣູປກາ;

ອຄ຺ຄິກາ ໂຊຕິກາ ເຈວ, ວສນ຺ຕິ ມມ ອສ຺ສເມ.

໑໒໙. ‘‘ຫໍສາ ໂກຎ຺ຈາ ມຍູຣາ ຈ, ສາລິກາປິ ຈ ໂກກິລາ;

ມຊ຺ຊາຣິກາ [ມຎ຺ຊຣິກາ (ສີ. ສ຺ຍາ. ປີ.)] ພຫູ ຕຕ຺ຖ, ໂກສິກາ ໂປຏ຺ຐສີສກາ.

໑໓໐. ‘‘ປິສາຈາ ທານວາ ເຈວ, ກຸມ຺ຠຓ຺ຑາ ຣກ຺ຂສາ ພຫູ;

ຄຣຸຬາ ປນ຺ນຄາ ເຈວ, ວສນ຺ຕິ ມມ ອສ຺ສເມ.

໑໓໑. ‘‘ມຫານຸຠາວາ ອິສໂຍ, ສນ຺ຕຈິຕ຺ຕາ ສມາຫິຕາ;

ກມຓ຺ຑລຸຘຣາ ສພ຺ເພ, ອຊິນຸຕ຺ຕຣວາສນາ;

ຊຏາຠາຣຠຣິຕາວ [ເຕ ຊຏາຠາຣຠຣິຕາ (ສີ. ປີ.), ຊຏາຠາຣຠຣິຕາ ຈ (ສ຺ຍາ.)], ວສນ຺ຕິ ມມ ອສ຺ສເມ.

໑໓໒. ‘‘ຍຸຄມຕ຺ຕຎ຺ຈ ເປກ຺ຂນ຺ຕາ, ນິປກາ ສນ຺ຕວຸຕ຺ຕິໂນ;

ລາຠາລາເຠນ ສນ຺ຕຸຏ຺ຐາ, ວສນ຺ຕິ ມມ ອສ຺ສເມ.

໑໓໓. ‘‘ວາກຈີຣໍ ຘຸນນ຺ຕາ ເຕ, ໂຜເຏນ຺ຕາຊິນຈມ຺ມກໍ;

ສພເລຫິ ອຸປຕ຺ຖທ຺ຘາ, ຄຈ຺ຉນ຺ຕິ ອມ຺ພເຣ ຕທາ.

໑໓໔. ‘‘ນ ເຕ ທກໍ ອາຫຣນ຺ຕິ, ກຏ຺ຐໍ ວາ ອຄ຺ຄິທາຣຸກໍ;

ສຍຎ຺ຈ ອຸປສມ຺ປນ຺ນາ, ປາຏິຫີຣສ຺ສິທໍ ຜລໍ.

໑໓໕. ‘‘ໂລຫໂທຓິໍ ຄເຫຕ຺ວານ, ວນມຊ຺ເຌ ວສນ຺ຕິ ເຕ;

ກຸຎ຺ຊຣາວ ມຫານາຄາ, ອສມ຺ຠີຕາວ ເກສຣີ.

໑໓໖. ‘‘ອຎ຺ເຎ ຄຈ຺ຉນ຺ຕິ ໂຄຍານໍ, ອຎ຺ເຎ ປຸພ຺ພວິເທຫກໍ [ປຸພ຺ພວິເທຫນໍ (ສ຺ຍາ. ປີ. ກ.)];

ອຎ຺ເຎ ຈ ອຸຕ຺ຕຣກຸຣຸໍ, ສກໍ ພລມວສ຺ສິຕາ [ພລມປສ຺ສິຕາ (ສ຺ຍາ. ປີ. ກ.)].

໑໓໗. ‘‘ຕໂຕ ປິຓ຺ຑໍ ອາຫຣິຕ຺ວາ, ປຣິຠຸຎ຺ຊນ຺ຕິ ເອກໂຕ;

ສພ຺ເພສໍ ປກ຺ກມນ຺ຕານໍ, ອຸຄ຺ຄເຕຊານ ຕາທິນໍ.

໑໓໘. ‘‘ອຊິນຈມ຺ມສທ຺ເທນ, ວນໍ ສທ຺ທາຍເຕ ຕທາ;

ເອທິສາ ເຕ ມຫາວີຣ, ສິສ຺ສາ ອຸຄ຺ຄຕປາ ມມ.

໑໓໙. ‘‘ປຣິວຸໂຕ ອຫໍ ເຕຫິ, ວສາມິ ມມ ອສ຺ສເມ;

ໂຕສິຕາ ສກກມ຺ເມນ, ວິນີຕາປິ ສມາຄຕາ.

໑໔໐. ‘‘ອາຣາຘຍິໍສຸ ມໍ ເອເຕ, ສກກມ຺ມາຠິລາສິໂນ;

ສີລວນ຺ໂຕ ຈ ນິປກາ, ອປ຺ປມຎ຺ຎາສຸ ໂກວິທາ.

໑໔໑. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ສມຍໍ ສໍວິທິຕ຺ວານ, ອຸປຄຈ຺ຉິ ວິນາຍໂກ.

໑໔໒. ‘‘ອຸປຄນ຺ຕ຺ວານ ສມ຺ພຸທ຺ໂຘ, ອາຕາປີ ນິປໂກ ມຸນິ;

ປຕ຺ຕໍ ປຄ຺ຄຍ຺ຫ ສມ຺ພຸທ຺ໂຘ, ຠິກ຺ຂາຍ ມມຸປາຄມິ.

໑໔໓. ‘‘ອຸປາຄຕໍ ມຫາວີຣໍ, ຊລຊຸຕ຺ຕມນາຍກໍ;

ຕິຓສນ຺ຖຣໍ [ຕິຓຕ຺ຖຣໍ (ສ຺ຍາ.), ຕິຓຕ຺ຖຕໍ (ກ.)] ປຎ຺ຎາເປຕ຺ວາ, ສາລປຸປ຺ເຜຫິ ໂອກິຣິໍ.

໑໔໔. ‘‘ນິສາເທຕ຺ວານ [ນິສີເທຕ຺ວານ (ສີ.), ນິສີທິຕ຺ວານ (ສ຺ຍາ. ປີ.)] ສມ຺ພຸທ຺ຘໍ, ຫຏ຺ໂຐ ສໍວິຄ຺ຄມານໂສ;

ຂິປ຺ປໍ ປພ຺ພຕມາຣຸຍ຺ຫ, ອຄຬຸໍ [ອຄຣຸໍ (ສີ.)] ອຄ຺ຄຫິໍ ອຫໍ.

໑໔໕. ‘‘ກຸມ຺ຠມຕ຺ຕໍ ຄເຫຕ຺ວານ, ປນສໍ ເທວຄນ຺ຘິກໍ;

ຂນ຺ເຘ ອາໂຣປຍິຕ຺ວານ, ອຸປຄຈ຺ຉິໍ ວິນາຍກໍ.

໑໔໖. ‘‘ຜລໍ ພຸທ຺ຘສ຺ສ ທຕ຺ວານ, ອຄຬຸໍ ອນຸລິມ຺ປຫໍ;

ປສນ຺ນຈິຕ຺ໂຕ ສຸມໂນ, ພຸທ຺ຘເສຏ຺ຐໍ ອວນ຺ທິຫໍ.

໑໔໗. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ອິສິມຊ຺ເຌ ນິສີທິຕ຺ວາ, ອິມາ ຄາຖາ ອຠາສຖ.

໑໔໘. ‘‘‘ໂຍ ເມ ຜລຎ຺ຈ ອຄຬຸໍ, ອາສນຎ຺ຈ ອທາສິ ເມ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໑໔໙. ‘‘‘ຄາເມ ວາ ຍທິ ວາຣຎ຺ເຎ, ປພ຺ຠາເຣສຸ ຄຸຫາສຸ ວາ;

ອິມສ຺ສ ຈິຕ຺ຕມຎ຺ຎາຍ, ນິພ຺ພຕ຺ຕິສ຺ສຕິ ໂຠຊນໍ.

໑໕໐. ‘‘‘ເທວໂລເກ ມນຸສ຺ເສ ວາ, ອຸປປນ຺ໂນ ອຍໍ ນໂຣ;

ໂຠຊເນຫິ ຈ ວຕ຺ເຖຫິ, ປຣິສໍ ຕປ຺ປຍິສ຺ສຕິ.

໑໕໑. ‘‘‘ອຸປປຊ຺ຊຕິ ຍໍ ໂຍນິໍ, ເທວຕ຺ຕໍ ອຖ ມານຸສໍ;

ອກ຺ໂຂຠໂຠໂຄ ຫຸຕ຺ວານ, ສໍສຣິສ຺ສຕິຍໍ ນໂຣ.

໑໕໒. ‘‘‘ຕິໍສກປ຺ປສຫສ຺ສານິ, ເທວໂລເກ ຣມິສ຺ສຕິ;

ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ.

໑໕໓. ‘‘‘ເອກສຕ຺ຕຕິກ຺ຂຕ຺ຕຸຎ຺ຈ, ເທວຣຊ຺ຊໍ ກຣິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໑໕໔. ‘‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໑໕໕. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ [(ອຸປສີໂວ ນາມ ນາເມນ, ເຫສ຺ສຕິ ສຕ຺ຖຸ ສາວໂກ) (ສ຺ຍາ.)];

ສພ຺ພາສເວ ປຣິຎ຺ຎາຍ, ວິຫຣິສ຺ສຕິນາສໂວ’.

໑໕໖. ‘‘ສຸລທ຺ຘລາໂຠ ລທ຺ໂຘ ເມ, ໂຍຫໍ ອທ຺ທກ຺ຂິໍ ນາຍກໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໑໕໗. ‘‘ຄາເມ ວາ ຍທິ ວາຣຎ຺ເຎ, ປພ຺ຠາເຣສຸ ຄຸຫາສຸ ວາ;

ມມ ສງ຺ກປ຺ປມຎ຺ຎາຍ, ໂຠຊນໍ ໂຫຕິ ເມ ສທາ.

໑໕໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໕໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໖໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຸປສີໂວ [ອຸປສິໂວ (ກ.)] ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອຸປສີວຕ຺ເຖຣສ຺ສາປທານໍ ປຎ຺ຈມໍ.