໔. ໂຘຕກຕ຺ເຖຣອປທານໍ

໗໒. ‘‘ຄງ຺ຄາ ຠາຄີຣຖີ ນາມ, ຫິມວນ຺ຕາ ປຠາວິຕາ [ຫິມວນ຺ຕປ຺ປຠາວິຕາ (ສີ.)];

ຫໍສວຕິຍາ ທ຺ວາເຣນ, ອນຸສນ຺ທຕິ ຕາວເທ.

໗໓. ‘‘ໂສຠິໂຕ ນາມ ອາຣາໂມ, ຄງ຺ຄາກູເລ ສຸມາປິໂຕ;

ຕຕ຺ຖ ປທຸມຸຕ຺ຕໂຣ ພຸທ຺ໂຘ, ວສເຕ ໂລກນາຍໂກ.

໗໔. ‘‘ຕິທເສຫິ ຍຖາ ອິນ຺ໂທ, ມນຸເຊຫິ ປຸຣກ຺ຂໂຕ;

ນິສີທິ ຕຕ຺ຖ ຠຄວາ, ອສມ຺ຠີໂຕວ ເກສຣີ.

໗໕. ‘‘ນຄເຣ ຫໍສວຕິຍາ, ວສາມິ [ອໂຫສິໍ (ສ຺ຍາ.)] ພ຺ຣາຫ຺ມໂຓ ອຫໍ;

ຉຬງ຺ໂຄ ນາມ ນາເມນ, ເອວໍນາໂມ ມຫາມຸນິ.

໗໖. ‘‘ອຏ຺ຐາຣສ ສິສ຺ສສຕາ, ປຣິວາເຣນ຺ຕິ ມໍ ຕທາ;

ເຕຫິ ສິສ຺ເສຫິ ສມິໂຕ, ຄງ຺ຄາຕີຣໍ ອຸປາຄມິໍ.

໗໗. ‘‘ຕຕ຺ຖທ຺ທສາສິໍ ສມເຓ, ນິກ຺ກຸເຫ ໂຘຕປາປເກ;

ຠາຄີຣຖິໍ ຕຣນ຺ເຕຫໍ [ຕຣນ຺ໂຕຫໍ (ສ຺ຍາ. ປີ.)], ເອວໍ ຈິນ຺ເຕສິ ຕາວເທ.

໗໘. ‘‘ສາຍໍ ປາຕໍ [ສາຍປາຕໍ (ປີ.)] ຕຣນ຺ຕາເມ, ພຸທ຺ຘປຸຕ຺ຕາ ມຫາຍສາ;

ວິເຫສຍນ຺ຕິ ອຕ຺ຕານໍ, ເຕສໍ ອຕ຺ຕາ ວິຫຎ຺ຎຕິ.

໗໙. ‘‘ສເທວກສ຺ສ ໂລກສ຺ສ, ພຸທ຺ໂຘ ອຄ຺ໂຄ ປວຸຈ຺ຈຕິ;

ນຕ຺ຖິ ເມ ທກ຺ຂິເຓ ກາຣໍ, ຄຕິມຄ຺ຄວິໂສຘນໍ.

໘໐. ‘‘ຍໍນູນ ພຸທ຺ຘເສຏ຺ຐສ຺ສ, ເສຕຸໍ ຄງ຺ຄາຍ ກາຣເຍ;

ກາຣາເປຕ຺ວາ ອິມໍ ກມ຺ມໍ [ເສຕຸໍ (ສ຺ຍາ.)], ສນ຺ຕຣາມິ ອິມໍ ຠວໍ.

໘໑. ‘‘ສຕສຫສ຺ສໍ ທຕ຺ວານ, ເສຕຸໍ ກາຣາປຍິໍ ອຫໍ;

ສທ຺ທຫນ຺ໂຕ ກຕໍ ກາຣໍ, ວິປຸລໍ ເມ ຠວິສ຺ສຕິ.

໘໒. ‘‘ກາຣາເປຕ຺ວານ ຕໍ ເສຕຸໍ, ອຸເປສິໍ ໂລກນາຍກໍ;

ສິຣສິ ອຎ຺ຊລິໍ ກຕ຺ວາ, ອິມໍ ວຈນມພ຺ຣວິໍ.

໘໓. ‘‘‘ສຕສຫສ຺ສສ຺ສ ວຍໍ [ວຍໍ ສຕສຫສ຺ສໍວ (ກ.)], ທຕ຺ວາ [ກຕ຺ວາ (ສີ. ປີ.)] ກາຣາປິໂຕ ມຍາ;

ຕວຕ຺ຖາຍ ມຫາເສຕຸ, ປຏິຄ຺ຄຓ຺ຫ ມຫາມຸເນ.

໘໔. ‘‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໘໕. ‘‘‘ໂຍ ເມ ເສຕຸໍ ອກາເຣສິ, ປສນ຺ໂນ ເສຫິ ປາຓິຠິ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

(ເສຕຸທານອານິສໍໂສ)

໘໖. ‘‘‘ທຣິໂຕ ປພ຺ພຕໂຕ ວາ, ຣຸກ຺ຂໂຕ ປຕິໂຕປິຍໍ;

ຈຸໂຕປິ ລຈ຺ຉຕີ ຐານໍ, ເສຕຸທານສ຺ສິທໍ ຜລໍ.

໘໗. ‘‘‘ວິຣູຬ຺ຫມູລສນ຺ຕານໍ, ນິຄ຺ໂຣຘມິວ ມາລຸໂຕ;

ອມິຕ຺ຕາ ນປ຺ປສຫນ຺ຕິ, ເສຕຸທານສ຺ສິທໍ ຜລໍ.

໘໘. ‘‘‘ນາສ຺ສ ໂຈຣາ ປສຫນ຺ຕິ, ນາຕິມຎ຺ຎນ຺ຕິ ຂຕ຺ຕິຍາ;

ສພ຺ເພ ຕຣິສ຺ສຕາມິຕ຺ເຕ, ເສຕຸທານສ຺ສິທໍ ຜລໍ.

໘໙. ‘‘‘ອພ຺ໂຠກາສຄຕໍ ສນ຺ຕໍ, ກຐິນາຕປຕາປິຕໍ;

ປຸຎ຺ຎກມ຺ເມນ ສໍຍຸຕ຺ຕໍ, ນ ຠວິສ຺ສຕິ ເວທນາ [ຕາວເທ (ກ.)].

໙໐. ‘‘‘ເທວໂລເກ ມນຸສ຺ເສ ວາ, ຫຕ຺ຖິຍານໍ ສຸນິມ຺ມິຕໍ;

ຕສ຺ສ ສງ຺ກປ຺ປມຎ຺ຎາຍ, ນິພ຺ພຕ຺ຕິສ຺ສຕິ ຕາວເທ.

໙໑. ‘‘‘ສຫສ຺ສສ຺ສາ ວາຕຊວາ, ສິນ຺ຘວາ ສີຆວາຫນາ;

ສາຍໍ ປາຕໍ ອຸເປສ຺ສນ຺ຕິ, ເສຕຸທານສ຺ສິທໍ ຜລໍ.

໙໒. ‘‘‘ອາຄນ຺ຕ຺ວານ ມນຸສ຺ສຕ຺ຕໍ, ສຸຂິໂຕຍໍ ຠວິສ຺ສຕິ;

ເວຫາສໍ [ອິຫາປິ (ສີ. ສ຺ຍາ. ປີ.)] ມນຸຊສ຺ເສວ, ຫຕ຺ຖິຍານໍ ຠວິສ຺ສຕິ.

໙໓. ‘‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໙໔. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ’.

໙໕. ‘‘ອໂຫ ເມ ສຸກຕໍ ກມ຺ມໍ, ຊລຊຸຕ຺ຕມນາມເກ;

ຕຕ຺ຖ ກາຣໍ ກຣິຕ຺ວານ, ປຕ຺ໂຕຫໍ ອາສວກ຺ຂຍໍ.

໙໖. ‘‘ປຘານໍ ປຫິຕຕ຺ໂຕມ຺ຫິ, ອຸປສນ຺ໂຕ ນິຣູປຘິ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໙໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໙໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໙໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ໂຘຕໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ໂຘຕກຕ຺ເຖຣສ຺ສາປທານໍ ຈຕຸຕ຺ຖໍ.